قصة اللوحة الحلقة التاسعه
#اللوحة
#الراوى
الحلقة التاسعة...
فتحت عينى لقيت اللي واقف ادامى هو زعيم الجن...
حسيت ان جسمي بيترفع من على السرير وبيتحرك فى الاتجاه اللي هو واقف فيه عشان ابقى واقف أدامه بالضبط، لسه حاسس إن جسمى متكتف، والصهد اللي طالعه منه بيحرقني ومش قادر حتى اصرخ.....
وقرب مني اكثر وقالى...
" ألم أقل لك انها ملكى؟"
" لقد بدأت الحرب"
وكررها تانى تانى بصوت أعلى ...
"لقد بدأت الحرب"
فضلت أعافر عشان أعرف أتحرك ، لحد ما حسيت ان جسمي فك ، ورحت ماسكه من رقبته ، بس مكنش هو !!!!
ده اتحول لشخص غريب أول مره أشوفه ، كنت ماسك رقبته جامد و كان هيموت في ايدي لقيت اسماء أختي بتبعد إيدى عنه وبتقولي إهدا ياكريم إهدا
ببص لقيت امي وابويا ماسكنى عشان أهدا
هو ايه اللي بيحصل؟
ومين الشخص ده؟
وبتعملوا ايه في اوضتي؟
لقيت الشخص ده بيرد بيقولي إهدا خالص ياكريم ،
انت بقالك كم يوم تصرفاتك مش طبيعية، واهلك وخطيبتك ملاحظين ده ،
وانا موجود هنا عشان أساعدك أنا دكتور ودول أهلك وإحنا كلنا هنا علشانك ، قلتله حتى لو دكتور انت ايه اللي جابك دلوقتى وانا نايم؟
قالي احنا مكناش عايزين نضايقك عشان متوهمش نفسك انها حاجه كبيرة يعني،وتاني حاجة عشان كنت عايز أعرف نومك مستقر ولا بتشوف حاجة وانت نايم وغالبا كان تخميني صح ....
انت كنت شايف ايه وانت نايم يا كريم؟
سكت وبصيتله شوية وبصيت لأهلي وخفت اتكلم أدامهم رغم انى كنت محتاج حد أتكلم معاه ، وقلتله ماشفتش حاجة
ولوسمحت اتفضل وانتم كلكم اطلعوا وسيبوني شوية
امي بتقولي
"كريم احنا لازم...."
لقيت الدكتور قالها
"احنا لازم نسيبه براحته"
وفعلا طلعوا كلهم وسابوني وهما طالعين قلت للدكتور استنى دقيقة... الدكتور قالهم اتفضلوا انتوا وقفل الباب ورجعلى ..
وقالى قول كل حاجة انت عايز تقولها، كنت شايف مين وبتقوله ايه؟
قلتله كنت شايف زعيم العالم السفلي وكان بيقولي لقد بدات الحرب ....
سكت شوية وقالى حرب ايه؟
وليه؟
كنت حاسس إني عايز احكيله كل حاجة وفعلا قلتله ان عائنة محبوسة في العالم السفلي وانى لازم انقذها....
لقيت ملامحه اتغيرت وسكت شوية وقالي وانت عرفت ازاي ان عائنة محبوسه هناك؟؟
قلتله من اللوحة
قاللي انه لوحه؟
قلته كان في لوحة على الحيطة هنا بس اختفت لما ظهر زعيم الجن....
قام الدكتور وقالي انت لو تعرف تيجيلي بكره المستشفي نكمل كلامنا براحتنا احسن ، وادانى كارت فيه عنوان المستشفى،
حسيت انه مش مصدق أي حاجة من اللى أنا قلتها
وقلتله" ماشي ان شاء الله"
خذ بعضه ومشي بس كنت شايف في عنيه انه شايفني مجنون حتى لو حاول يدارى...
فضلت قاعد على السرير شوية ، ولقيت حد بيخبط على باب الأوضة ومن غير ما أعرف مين قلتلهم سيبوني لوحدي شوية وفعلا فضلت لوحدي...
حاسس اني تعبان نفسيا وجسديا ٤ ساعات عدوا عليا وانا باصص في الحيطة و بفكر في كل حاجة بتحصلي وكان أهون عليا اني اطلع مجنون ولا ان شهد أو عمر يكون بيخونى أو ان عائنة تكون موجودة ومحبوسة فعلا...
لو اكتشفت إن أنا مجنون هيكون احسنلي١٠٠ مرة....
وانا قاعد بفكر سمعت الفجر بيأذن قمت عشان أصلي وكان بقالي فتره كبيره ماصلتش...
بعد ما خلصت صلاة فضلت قاعد على السرير و حاسس اني ارتحت شوية و رحت في النوم ، وصحيت على الساعه ١١ الصبح دخلت الحمام و انا طالع كنت ملاحظ في عين اسماء انها بتراقبنى....
دخلت على أوضتى عشان تلبس و قبل ما أخرج ، لقيت صوت بينادي عليا " كريم "
بلف لقيتها عائنة واقفة ادامي
حضنتها ، وقلتلها انتى رحتى فين أنا مش كنت بكلمك مكنتيش بتردي عليا ليه؟
قالتلي أنا كنت خايفة عليك بس خلاص من دلوقتى مفيش أي حد هيضرك ، كل حاجه انتهت....
قلتلها ازاي يعني؟؟
قالتلي هقولك بعدين بس خلاص زعيم الجن مش هيقربلك تاني، أنا دلوقتى مش خايفة عليك منه ، انا خايفه عليك منهم هما
قلتلها مين دول؟
سكتت شوية وبصت في الارض، قلتلها اتكلمي مين دول؟؟
قالتلي الدكتور اللي جالك امبارح ده بسبب ان شهد وعمر كانوا هنا في البيت من يومين وبيقولوا لاختك ان انت مجنون، وان تصرفاتك مش طبيعية...
قلتلها وهما يعملوا كده ليه؟
سكتت تانى وقالتلي لانك عقبة بالنسبلهم وكان أحسن حل انك تطلع مجنون
قلتلها عقبة ازاي يعني؟
قالتلي أنا عارفة كل حاجة من زمان وعارفة انك شاكك فيهم بس مكنش ينفع اقولك عشان ماكنش أنا السبب في انك تتجرح....
قلتلها انت تعرفي ايه ومخبية عليا؟
قالتلي انا معرفش حاجة ، أنزل الكلية دلوقتى وروح المكان اللي متعود تقعد فيه انت وشهد وانت هتعرف كل حاجة...
خلصت كلامها واختفت وانا فضلت أنادي عليها بصوت عالي
لقيت اختي اسماء فتحت باب الأوضة من غير ما تخبط وقالتلي كريم انت بتكلم مين؟؟
قلتلها ملكيش دعوة انتى وسبتها وطلعت أجري فالكلية ، رحت المكان بتاعنا أنا وشهد ولقيتها قاعدة مع عمر وبيكلموا رغم انه كان قايلي ان مابيشوفهاش خالص...
حسيت ساعتها اني كنت صح وان في حاجة بين عمر وشهد....
رحت زعقت لعمر وشتمته و مسكت فيه وهو عمال يقولي
" الناس بيتفرج علينا" "اهدا"
وشتمت شهد ورميتلها الدبلة في وشها ....
مكنتش عارف ازاى قدرت اتحكم في نفسي واسيبهم وامشي!
فضلت ماشي في الشارع وانا مكسور من جوايا ، يعني كل السنين اللي فاتت دي كنت عايش وانا مضحوك عليا؟!
وازي اسماء تصدق انى مجنون؟!
روحت على البيت بسرعة كنت عايز أشوف عائنة ،لانها دلوقتى اقرب حد ليا ، يمكن الوحيدة اللي بثق فيها....
وصلت البيت ودخلت على الاوضة على طول وأول ما قفلت الباب لقيت عائنة واقفة ادامي وبتعيط
سالتها مالك؟؟
بتعيطي ليه؟؟
قالتلي بعيط عشانك ومكنتش عايزاك تخسر صاحبك وتخسر خطيبتك
قلتلها ما تقوليش صاحبي انا ماليش صحاب وخطيبتي دي واحده...............وكويس اني عرفت الحقيقه دلوقتى،
انا بس كل اللي مستغربه ازاي اقرب الناس ليك ممكن يعملوا معك كده؟!
قالتلي عادي يا كريم كل واحد بيبقى عنده مبررات، قلتلها مبررات ايه اللي تخلي صاحبي وخطيبتي يعملوا معايا كده؟!
قالتلي طب ما اسماء اختك بتحبك بس برده عندها مبررات ......
قلتلها "اسماء" "مالها اسماء"؟؟
قالتلى انا خايفة يا كريم ، قلتلها خايفه من ايه؟
واسماء بتعمل ايه؟ فهميني،
قالتلي فاكر لما قلتلك ان محدش هيضرك تاني ،
قلتلها اه
قالتلى ده عشان خلاص أنا قررت أعمل اللى زعيم الجن عايزه، عشان أكون حرة وأعيش معاك...
مش عارف فرحت ولا زعلت ، كان شعور غريب، وقلتلها يعني انت بقالك ٥٠ سنة محبوسة و مستحملة وجاية دلوقتى توافقي
لقيتها قربت مني وقالتلي ٥٠ سنة محبوسة ومكنتش أعرفك بس دلوقتى انا مااقدرش أعيش يوم واحد من غيرك،
بس انا خايفة
قلتلها خايفه من ايه؟
قالتلي خايفة بعد كل ده ارجع ومااكنش جنبك خايفة ارجع وألاقيك مرمى في مستشفى لانهم شايفينك مجنون...
قلتلها ده مش هيحصل طبعا
قالتلي "هيحصل" "والنهارده كمان"
قلتلها ايه اللي بتقوليه ده؟؟
سكتت شوية و كان باين عليها أنها مترددة تقولي،
قربت مني وقالتلي عارف الدكتور اللي كان هنا ده يبقى مين؟
قلتلها مين؟
قالتلي عبد الرحمن اللي أسماء بتكلمه وضحكت عليك وقالتك انه أخو صاحبتها وهى في الحقيقة عايزة ترتبط بيه ، وتقريبا هو كمان عايز يرتبط بيها ، وانت هتكون السبب فى انهم يقربوا من بعض بحجة انه هيبقى دكتورك....
سكت شوية بفكر في كلامها وقلتها انتى أكيد غلطانة وباصص فى عنيها ونفسي تقولي انها فعلا غلطانة
لقيتها قالتلي انت لما حكيت مع
عبد الرحمن امبارح قالك ايه؟؟
قلتلها قالي تعالى المستشفى بكرا...
قالتلي ما سألتش نفسك ليه عايزك تيجي المستشفى؟؟
عشان هتروح ومش هتطلع من هناك تانى ياكريم...
"حبيبي انا مش عايزه اضحى بكل حاجة على الفاضي"
""انا عايز اعيش معاك""
واختفت عائنة في نفس الوقت اللي دخلت فيه أسماء اوضتى من غير ما تخبط ، وبتزعق وبتقولي انت ايه اللي عملته مع شهد وعمر ده؟؟
ازاي تعمل كده؟؟
وقفت ادامها وقلتها "معلش أصلى مجنون"
قالتلي اللي يعمل كده يبقى فعلا مجنون،
قلتها مجنون عشان عرفت اللي بين عمر وشهد ولا مجنون عشان عرفت مين هو عبد الرحمن
لقيتها اتوترت وقالتلي عبد الرحمن مين؟
قلتلها الدكتور اللي كان هنا امبارح عشان سواد عيونك
ايه اللي بينك وبينه؟؟
قالتلي لا ده انت مش مجنون بس ، ده انت مجنون ولازم تتعالج كمان...
ماحستش بنفسي إلا وانا ضاربها بالقلم ، كانت أول مرة أضربها ، وأول مرو أضرب حد بالقوة دى ، ضربتها قلم جامد...
وقعت على الأرض و دماغها اتخبطت في الحيطة ، لقيت أمى خرجت من الاوضة بسرعه على صوت أسماء وهي بتصرخ وحضنتها وفضلت أسماء ترتعش وجسمها اتخشب كانت صعبان عليا جدا
انا ما كنش قصدي أضربها كده
انا ما كنش قصدي اضربها اصلا......
فضلت امى تعيط وتقولي
منك لله منك لله
مكنتش قادر استحمل الموقف وكنت خايف على اسماء في نفس الوقت...
نزلت في الشارع مش عارف أروح لمين ولا أعمل ايه ، خلاص مبقاش ليا حد ، طلعت اجري على المستشفى اللي شغال فيها عبد الرحمن طلبت انى اقابله ، وقلتله وانا بنهج انا ضربت اسماء ومش عارف ايه اللي حصلها؟؟
قالي طب اهدأ طيب انا هاخذ دكتور ونروح نشوفها، وانت خليك هنا فى مكتبى متتحركش
وفعلا مشى الدكتور وانا فضلت قاعد فى الكتب ، كنت قلقان ومستني اعرف حصلها ايه ؟
بس مقدرتش افضل قاعد وقررت انى أنزل أشوفها ، بس وأنا طالع لقيت واحد واقف على الباب وقالي مينفعش تطلع ، قلتله يعني ايه ؟
انا محبوس؟!
قالي دى تعليمات ، خليك هنا لحد ما الدكتور يرجع ، زقيته عشان أمشي بس مكنش لوحده ، كان معاه واحد تاني ومسكونى ودخلوني جوا
وقالي يا استاذ لو سمحت دي تعليمات واحنا بنفذها لما يجى الدكتور ابقى اتكلم معاه، وخرجوا وقفلوا الباب....
فصلت قاعد مستني وانا بغلي من جوايا،عايز اطمن على اسماء...
لقيت الباب اتفتح افتكرته الدكتور لسه بجرى على الباب لقيت عائنة هي اللي دخلت وقفلت الباب وراها ساعتها مكنتش عارف احساسي من ناحيتها بس؟؟
كنت حاسس انها السبب في اللي بيحصل لاختى
لقيتها بتقولى ليه كده يا كريم؟
أنا مكنتش عايزة اقولك عشان كده
ليه تضرب اختك؟
ليه يحصلها كل ده بسببك؟
قلتلها اسماء مالها؟
حصلها ايه؟
بصتلى بنظرة زعل و حسرة وقالتلى أسماء تعبانة يا كريم، انت ليه عملت كده ؟
قالت كلامها واختفت ، ولقيت الدكتور بيفتح الباب....
رحت عليه وقلتله "انت ازاي تقولهم يحبسوني"؟
قالي "عشان انت خطر يا كريم"
اختك اسماء اتنقلت المستشفى والموضوع مش سهل...
قربت منه وقلتله اسماء مالها؟
جرالها ايه؟
قالى لسه هنعرف لما توصل الاشعة
قلتله أنا عايز أشوفها دلوقتى ،
قالي ما ينفعش لازم تفضل هنا تحت الملاحظة أسبوعين، وقبل ماتقول أى حاجة فكر في الناس اللي بتحبهم واللى بقيت خطر عليهم دلوقتى
فكر في اهلك....
فضلت ساكت و حسيت ان كلامه صح
وقلتله ان أنا موافق ابقى هنا
وفعلا دخلت المستشفى
( احساس صعب وانا قاعد وسط ناس ماأعرفهاش بس عارف انهم مرضى نفسيين)
( والاحساس المؤلم اني عارف اني مش مريض بس لازم أكون هنا عشان الناس اللي بحبهم هيكونوا مطمنين أكتر وانا مش معاهم)
اتعرفت على واحد هنا كنت بحكي معاه كل حاجة وكان مصدقني...
والغريب انه كان اسمه عمر على اسم صاحبى..
والحاجه الوحيد اللي كانت بتهون علية هو عائنة...
كنت دايما بقضى يومي في الجنينة والهواء وما برجعش العنبر الا على النوم وكانت كل يوم بتيجي تقعد معايا في الجنينة ونتكلم ،
ولما كان حد بيجي يكلمني من الدكاترة أو التمريض وعائنة موجودة مكنتش بتختفي ، كانت بتفضل قاعده وتتكلم معايا، ولما كنت أرد عليها كان الدكتور بيبصلي بصه انى لسه مجنون و بكلم نفسي فضلت على الحال ده أسبوعين ، بس الدكتور قالي انى لسه مش طبيعي ولازم افضل كمان اسبوعين في المستشفى.
بس الاسبوعين جابوا شهور طويلة ....
وانا في المستشفى حالتي النفسية اتدمرت لان عائنة مبقتش تيجى زى الأول واختفت من كذا شهر ومفيش حد من أهلي زارني من ساعة ما دخلت المستشفى...
حياتي بقت مؤلمة لدرجة اني فكرت أكتر من مرة انى انتحر
وفي يوم وانا سرحان بفكر في عائنة و بفكر ليه سابتني واختفت؟؟
واخبارها ايه دلوقتى؟؟
كانت وحشاني جدا ونفسي اشوفها باي طريقة،
افتكرت الحكاية بتاعتها لما أبوها وامها ماتوا وهي اتخطفت وقلت اكيد الحادثة دي نزل عنها خبر زمان فى الجرنال ، ودلوقتى كل جريدة ليها موقع على جوجل وممكن يكون ليها أرشيف وألاقى الخبر وممكن يكون مع الخبر صور ومش هتعب كتير لأن اسمها مميز ،
رحت اجري على ممرضة كان ليا كلام معاها اسمها جيهان ، وقلتلها لو سمحتى عايز اشوف حاجه على التليفون بتاعك انتى عندك نت؟
قالتلى أه اتفضل
كنت مبسوط جدا ان ممكن اشوف صورة لعائنة وفعلا اخذت التليفون وكتبت في search عائنة
وأول ما شفت اللي ظهراي رميت التليفون من ايدي.....
يتبع.......
وانت كمان بعد ماتدخل على جوجل وتعرف ايه اللى شافه كريم ...
ارجع و اقرا الحلقة الاخيرة
التعليقات على الموضوع