شقة العفاريت

رجعنا مصر بعد سنين طويله عشناها بره كنت مبسوطو قوي اني رجعت بلدي ثاني ، والدي قرر ان هو يشتري شقه نستقر فيها بعد سنين طويلة فضلنا فيها بعيد عن بلدنا ، بعد شويه تدوير مش قليلين والدي لقي شقة لقطة ، مكانها كان مناسب وسعرها ومساحتها بعد ما شاف شقق كثير جدا جدا مساحتها يا اما صغيرة او مكانها ما كانش مناسب يعني ما كانش حلو وكمان الأسعار غالية جدا ، البلد وخصوصا العقارات بقت غالية بشكل مبالغ فيه ، المهم اخيرا أتوفقنا في شقة مناسبة منطقتها كويسة جدا في منطقه في وسط البلد مساحتها حلوة خالص وسعرها كمان مناسب ما كانتش رخيصة قوي بس ما كانتش غاليه نار زي كل الاسعار اللي شفناها قبل كده كانت جميله جدا وكمان كانت بتبص على ميدان ، الجيران بتوعها كانوا كويسين جدا والعمارة ما كنتش قديمة قوي وبرضو ما كانتش جديدة يعني ليها حوالي ٢٥ سنه مبنية وده عمر مناسب يعني مش هتقع وخصوصا ان مبانيها متأسسة صح وكويس وده باين من شكل العمارة وكمان لان والدي مهندس ففاهم ده كويس والشقة كانت عاجبانا قوي كلنا أنا و أمي و أخويا وأختي وكمان والدي اكيد يعني لأن سعرها كان أقل من باقي الشقق اللي بنفس المواصفات دي كمان الشقة كانت بالعفش، العفش كان قديم بس كان شكله فخم قوي وكان كويس جدا مش قديم لدرجة انه متهالك لا يعني كان قديم في الموضة وكان عدد الأوض كويس جدا في الشقة مساحة كل اوضة حلوة يعني أنا وأختي قعدنا في أوضة وأخويا في أوضة والدي والدتي في أوضة وصالة واسعة جدا يعني هي كانت ثلاث اوض حلوين مناسبين لعددنا اشترينا شوية حاجات حديثة زي مثلا بوتاجاز وثلاجة او أجهزة كهربائية حديثة وسجاد واستخدمنا العفش اللي كان موجود لأنه جميل اوي، الشقة اللي جنبنا على اليمين شقة دكتور ومراته مهندسة عندهم ولد وبنت البنت متجوزة والولد مخلص كلية بس ساكن معاهم في الشقة أما اللي جبنا من الناحية الثانية محامي راجل كبير في السن عايش وحده كان راجل محترم شخصية وقورة جدا.

 خلصنا فرش الشقة و مقعدناش فيها خالص سافرنا علشان الصيف سافرنا مصيف واتفسحنا في كام حتة في مصر، كانت مصر وحشاني أوي اتبسطنا جدا لما رجعنا الشقة لاحظت أنا ولبنى أختي أن السجاد مكانه مش هو نفس المكان اللي احنا فرشناه فيه بس قولنا يمكن ماما غيرتة.

 لما رجعنا كنا مرهقين قوي كل واحد فينا دخل اوضته ونام لما صحينا الصبح لقينا والدتي بتقول انتوا غيرته مكان البوتاجاز ليه ؟

كلنا قعدنا نبص لبعض ونقول أنا ولبنى أن أحنا ما غيرناش مكان البوتاجاز

كلنا طبعاً اتأكدنا أن دي عمايل يزيد أخونا لأنه بيعمل مقالب وخصوصاً أنه صحي ونزل بدري على غير العادة . ماما رجعت البوتاجاز مكانه وعملت لنا الغداء و لما جاءت تحط الغداء لقت الطباق مكانها كمان متغير طبعا اتنرفزت لانها حاسة إني حد مننا عمل كده بس أحنا وهي كنا متأكدين أنه"يزيد" اخويا لان هو بيعمل مقالب .

لما رجع من بره والدتي أتخانقت معاه هو فضل يأكد أنه ماعملش حاجة بس طبعاً هو كل مرة بيعمل كده، ثاني يوم امي لما صحيت الصبح لقيت ان مكان البوتاجاز برضو اتغير ثاني بس مش في نفس المكان ولقيت كمان مكان الغسالة والثلاجة و حاجات تانية مكانها غير المكان اللي هي حاطها فيها ولقت الأطباق اللي هي غسلاهم محطوطين في الحوض وسخين والدتي اتضايقت جدا كمية الطباق كثير جدا على ان فرد واحد يستخدمها فهي كانت متأكدة أن أحنا التلاتة أكلنا وسبنا الطباق وسخة ورميناها في الحوض 

وطبعاً والدي جه أخد دوره في تهزيئنا أنا ولبنى أما "يزيد" برضو كان بره ، سكتنا ودخلنا أوضتنا لاننا عارفين أن" يزيد " هو اللي بيعمل الحاجات الغريبة دي هو اللي بياكل في نص الليل وبيسيب الأطباق وسخة بس عدد الأطباق أستحالة يكون لفرد واحد .موضوع نقل أماكن الثلاجة والغسالةو باقي الحاجات بقى كل يوم بيزيد عن اليوم اللي قبله يعني في يوم صحينا كده لقيت الدولاب اللي في أوضتنا موجود بره محطوط في الصالة ، في يوم كمان والدتي لما صحيت الصبح لقت نفسها هي ووالدي نائمين في الصالة السرير بتاعهم موجود في الصالة ، هو احنا ما كناش عارفين هو اخويا ازاي بيقدر يعمل كده ازاي يقدر ينقل سرير وعليه ناس نايمة وكمان من غير ما يحسوا ،ازاي يقدر يحرك دولاب بالحاجات اللي .

لحد ما الحاجات دي بقت بتحصل وهو كان مسافر في رحلة ، وده زاد خوفنا لاننا اتأكدنا انه مش هو اللي بيعمل كده.

حسينا فيه حركة في أوضتة وهو مافيش في البيت دخلنا الاوضة بتاعته لقينا ان السرير محطوط مكان الدولاب والدولاب محطوط مكان السرير و كل الهدوم اللي في الدولاب مرمية ، فكرنا ان هو أكيد عايز يثبت لنا ان مش هو اللي بيعمل كده بس صوت الحركة اللي كان في أوضته جه من فين وهو مسافر .

الوضع ده فضل يتكرر ، صحينا لاقينا ان الكراسي بتاعه السفرة موجودة في الحمام وفي يوم تاني البوتاجاز محطوط في اوضة النوم ، مرة لقينا الثلاجة في الصالة ، وفي مرة ودي كانت الاكتر رعب لقينا الغسالة شغالة وفيها غسيل وهي هدومنا بس ما كنتش وسخه ما كناش حاطينها في الغسيل وأمي ما كانتش مشغلاها .

 الموضوع ابتدي يزيد أكتر بقينا بنسمع ناس بتتحرك في المطبخ او في اي حته في الشقة و بنسمع صوت مواعين بتتغسل و بنسمع حد في الحمام بيستحمى او صوت حد بيطبخ ، بنسمع صوت الميه في البانيو او حد بيفتح الثلاجة وبيطلع منها حاجة ، كل الحاجات دي كنا بنسمع اصواتها و ما كناش بنشوفها لكن الصبح كنا بنلاقي اماكن الحاجات متغيرة .

 لحد ليلة كنت نايمة أنا وأختي وصحينا على صوت الدولاب وهو بيتحرك من مكانه كان بيتحرك لحد ما وصل لحد جنبنا فضلنا باصين للدولاب وهو بيتحرك ناحيتنا واحنا مش قادرين نعمل حاجه ولا نتكلم ولا نصرخ كأن صوتنا ضاع فضلنا نترعش ونمسك في بعض أنا وأختي وأحنا مش عارفين نعمل ايه الدولاب فضل يتحرك ناحيتنا كأنوا بيهجم علينا لحد ما وصل عندنا و رمى الهدوم كلها اللي في الدولاب علينا كأنه متنرفز مننا وبعد كده ابتدي يرجع ثاني لمكانه ،كل ده وأحنا بنرعش وماكسين في بعض ومكانا على السرير شدينا الغطا وغطينا وشنا زي الأطفال وسنانا بتخبط في بعض وقلبنا قرب يقف من الخوف ، الدم نشف في عروقنا، بعد كده مشي ثاني ناحيتنا وهو بيفتح ويقفل الدولف بتاعة وفضل يقرب ويبعد كل ده واحنا مغطين وشنا بس سامعين الحركة وتخبيط الدولف و اسنانا بتخبط في بعضها وقلبنا كان قرب من كثر الخوف يقف فجأة لقينا الغطا اللي مخبين بيه وشنا بيتشد وأحنا بنحاول نمسك فيه بكل قوتنا ومش قادرين لحد ما اتسحب بقوة أكبر مننا وطار في الهوا وفضل شوية طاير وبعدين اترمى على الأرض في الوقت ده غالباً فقدت وعيي ولبنى بتهزني من غير ولا كلمة كأن صوتها متحاش عشان تفوقني غالباً عشان اشارك معاها الرعب او عشان ما تفوتنيش لحظة رعب مهمة زي دي ، فوقت وأنا بحاول أفهم اللي حصل ده كان حلم ولا حقيقة كنت بأتمنى يكون كابوس بس للأسف حقيقة المرتبة بتاعة السرير اللي نائمين عليها ابتدت تتشد من تحتنا وكنا هنقع بصينا في المراية كنا شايفين شخص ملامحه مش واضحة اوي لكن ملامح الغضب في وشه واحنا مش فاهمين هو مين ولا ليه غضبان وبيعمل كده ،احنا كنا بنعيط ومش عارفين نعمل اي حاجة ولا نتحرك من السرير و وفضل الدولاب يتحرك و دولفه تخبط في بعضها تتقفل وتتفتح بقوة واحنا مش عارفين نتصرف ولا نتحرك انا واختي ماسكين في بعض وقاعدين على السرير لحد ما قدرنا نجمع شوية شجاعة وننزل من على السرير ، لكن الدولاب قرب علينا جامد عشان يزنقنا في الحيطة كأنه هيموتنا .

بدأنا نصرخ انا واختي والدي والدتي سمعوا صريخنا دخلوا الاوضه ولما قربوا من باب الاوضة كل حاجة رجعت مكانها في لحظه ، ولما حكينا ليهم اللي حصل ما كانوش مصدقين لكن بعدين صدقوا لان حصلتلهم حاجات غريبة عندهم يعني مثلا ملايات السرير اللي نايمين عليها مرميه على الارض و اتشدت من تحتهم واترمت على الارض ، مرة صحيوا لقوا هدومهم ملبوسه بالمقلوب ده غير ان ترتيب الدولاب بيتغير كل يوم ده طبعاً بالأضافة لتحريك الأثاث كل يوم تقريباً. والدي نده بواب العماره اللي هو برضو كان السمسار اللي جمع الشقة وقال أن هي لقطة لانها شقة ورثة ،حاول يفهم منه إيه اللي بيحصل في الشقة، البواب فضل يقول لبابا ان هو ما يعرفش حاجة عن الكلام ده وان الكلام اللي بيقوله ده غريب و مش منطقي و الشقه كانت مسكونة من فتره وما كانش حد بيشتكي منها قبل كده ودي شقة حلوة جدا و كويسة والدي هدده أنه هايبلغ عنه البوليس ، البواب خاف و وابتدا يحكي له اللي حصل في الشقة دي، كان عايش فيها من حوالي 15 سنة واحد ومعاه اولاده الاثنين ومراته وفي يوم من الايام مراته واولاده الاثنين كانوا مسافرين وهو كان في الشقة لوحده دخلوا حراميه وقتلوا الراجل ده في الشقة ومن ساعتها و في حاجات غريبة جداً بتحصل في الشقه وكل اللي بيسكن فيها بيحصل له كده والشقة بقت معروفة عند الناس بانها شقة العفاريت ما كانش حد بيسكن فيها ابدا ، اصحاب الشقة كانوا حاطين مبلغ كبير قوي لي لو انا عرفت اجيب لها زبون باي سعر وفعلا لما حضرتك جيت انا لقيت حضرتك بتدور على شقة ومش عارف المنطقة ومش عارف قصة الشقة انتهزت الفرصة دي وبعتها لك واخذت مبلغ كبير جدا من هم والدي قرر ان هو زي ما البواب ده باعله الشقة لازم يشوف حل ويرجعها بعد محاولات كثير جداً اصحاب الشقة وافقوا أنهم يرجعوها بس طبعاً ما وافقوش يرجعوا غير نصف المبلغ بس ، دي كانت خساره كبيره جداً لنا بس المهم أن احنا عايزين نخلص من شقة العفاريت دي ما كناش قادرين نقعد فيها ثاني .

واشترينا شقة جديدة ونقلنا فيها ، بعد اسبوع الكراسي وحاجات تانية خفيفة ابتدت تتحرك من مكانها والهدوم أحياناً نلاقيها بره الدولاب او مكانها متغير ، والدي قرر يغير الشقة تاني لا غالباً العفريت جه معانا .

المره دي العفريت اعترف بعمايله لان والدي عرض الشقة للبيع ، العفريت المرة دي كان "يزيد" ومقالبة .

تمت 

شقة العفاريت

جيكيناز_جورج