قصة شبح الموتوسيكل

حكايات جدتي

(الموتوسيكل)

لما جدتي خلصت الحكاية، بصيتلها باستغراب وقولتلها وانا بضرب كف بكف..

-لا حول ولا قوة الا بالله.. انتي قولتيلي هحكيلك على قصة رقاصة بقى وقولت هنفرفش ونسمع قصة حلوة، في الاخر برضه طلعت قصة كئيبة وكل ابطالها ماتوا، انتي ماعندكيش حكايات اصحابها عايشين ابدًا يا ستي؟!

لما قولتلها كده ضحكت وقالتلي..

-لا عندي يا موكوس.. عندي، والحكاية اللي هحكيهالك دي كل ابطالها واللي عاشوها وحتى اللي شافوها عايشين لحد النهاردة.

مسكت الورقة والقلم وبصيت لجدتي وقولتلها..

-احكي يا ست الكل.. احكي اما نشوف اخرتها.

ابتدت جدتي تحكي وتقول..

عُمر كان شاب طيب وغلبان، لكن ظروفه وظروف اهله المادية كانت وحشة اوي، ولأنه كان شاب زي بقية الشباب وله متطلباته، ف جه في يوم وقال لابوه انه عاوز يشتري موتوسيكل.. وفي الوقت ده موضة الموتوسيكلات كانت طالعة جديد وكل شاب من الشباب كان بيتمنى أن اهله يجيبوله واحد، بس عُمر لما قال لابوه كده، ابوه رفض وقال له انه مامعهوش فلوس يجيبله موتوسيكل لأنهم زي ما قولتلك كانوا ناس غلابة، المهم ان الواد لما سمع الكلام ده من ابوه ماهمهوش وقرر انه يشتغل عشان يجيب الموتوسيكل من فلوسه، كان بيخلص جامعته وبعد كده يروح يشتغل في المحلات لحد ما قدر يجمع مبلغ قليل او بالتحديد يعني مبلغ اقل من انه يجيبله متوسيكل، بس الغريب بقى ان الواد بالمبلغ ده.. قدر انه يشتري موتوسيكل مستعمل، طبعًا ابوه كان فرحان بيه لانه قدر يعتمد على نفسه ويشتري حاجة من فلوس شغله، بس اللي حصل بعد كده خلى حياة الواد وحياة اهله تتقلب بغم ونكد..

الواد من يوم ما جاب الموتوسيكل وهو حاله اتقلب، بقى يخرج بيه بالليل ويلف في الشوارع زي العيل الصغير اللي ما صدق لقى لعبة، وفي مرة من مرات اللي كان عمر بيلف فيها بالموتوسيكل بالليل، اتأخر اوي لدرجة انه ماوصلش البيت لحد الساعة ٦ الصبح، وقتها ابوه قلق عليه وراح يسأل في الاقسام وفي المستشفيات، وفعلًا اللي حسبه طلع صح، ابوه لما سأل في المستشفى لقاه فعلًا، وعرف ان الناس لقوه بالليل مرمي جنب الموتوسيكل بتاعه وراسه كانت غرقانة دم، الناس خدوه وودوه على المستشفى والموتوسيكل الشرطة خدته، المهم ان الواد كان في غيبوبة.. لما فاق منها كان عمال يبص لأهله ويعيط ويقول لهم ان الموتوسيكل هو السبب، ولما ابوه سأله عن اللي حصل، رد الواد وقال له انه في الليلة دي وهو بيتمشى بالموتوسيكل بالليل طلعله خيال اسود كبير في نص الشارع، والحاجة الغريبة بقى واللي مالهاش اي معنى ولا ليها تفسير، ان الشارع ده كان فاضي خالص وماحدش كان ماشي فيه وقتها..!

بيكمل عمر كلامه لابوه وبيقوله انه اول ما شاف الضل الاسود ده وقف، وقف بالموتوسيكل بتاعه وقبل ما ينزل من عليه فجأة لقى الموتوسيكل بيمشي وبيرجع ورا لوحده، حاول وقتها انه يوقفه او يدوس على الفرامل او يعمل اي حاجة... لكن للأسف، الموتوسيكل ماكنش راضي يقف وكان بيرجع بيه لورا بسرعة رهيبة.. سرعة خلت عمر يخاف وينط من عليه وهو ماشي، واول ما عمر نط بيقول انه مافتكرش اي حاجة من اللي حصل بعد كده غير انه فقد الوعي، بس قبل ما يفقد الوعي شاف الموتوسيكل وهو واقف في مكانه وكأنه ماكنش بيمشي بيه من ثواني.. طبعًا ابو عمر اما سمع الكلام ده ماصدقش ابنه وقال انه بيخرف، وقال له كمان انه بعد ما هيخرج من المستشفى هيروح للقسم ويستلم من الحكومة الموتوسيكل وبعد كده هيبيعه، عمر وقتها ماتكلمش وسمع كلام ابوه.. ابوه اللي بعد ما ابنه خرج من المستشفى راح القسم عشان ياخد الموتوسيكل، بس المصيبة بقى ان الرجل لما راح لقى الحكومة قبضت عليه بتهمة ان المتوسيكل ده مسروق وصاحبه لقوه مقتول في نفس اليوم اللي اتسرق فيه!

طبعًا الرجل لما سمع الكلام ده اتصدم وماكنش مصدق اللي هو بيسمعه، لكن الظابط اللي في القسم حس ان الرجل فعلًا مالوش اي علاقة بسرقة الموتوسيكل، ف طلب الظابط من الرجل انه يحكيله حكاية الموتوسيكل ده وابنه جابه ازاي ومنين، وفعلًا بعد ما الرجل حكى للظابط، الظابط بعت جاب عمر وسأله هو اشترى الموتوسيكل ده من مين بالظبط، وبعد استجوابات وتحقيقات، الحكومة اكتشفت ان الموتوسيكل ده اللي باعه لعمر، واحد اشتراه بسعر رخيص من عصابة.. والعصابة دي متخصصة في سرقة الموتوسيكلات وهم اللي طلعوا بالليل على صاحب الموتوسيكل الاساسي.. وقتلوه، قتلوه وبعد كده خطفوا منه الموتوسيكل وراحوا باعوه للرجل اللي عمر ده اشتراه منه، طبعًا الكلام ده الحكومة عرفته بعد بحث وتدوير لمدة كام يوم، وفي الأخر العصابة دي اتقبض على كام واحد منهم واتقبض كمان على الرجل اللي باع لعمر الموتوسيكل، اما بقى عمر وابوه ف دول دفعوا غرامة وخرجوا من القضية وماتحبسوش، واما عن الموتوسيكل.. ف هو رجع لاهل الرجل اللي اتقتل، ولو هتسألني عن مصير العصابة ف انا هقولك انهم اتقدموا للمحاكمة وحقيقي انا ماعرفش هم اتحكم عليهم بايه، لكن ولو هتسألني بقى عن عمر، ف انا هقولك انه من بعد اللي حصل.. بقى بيشوف الضل او الخيال اللي شافه ده كل ليلة، وابوه داخ معاه عند الدكاترة والشيوخ لحد في مرة واحد صاحب ابوه، قال له ان في ست كويسة اوي بتعالج الملبوسين من غير فلوس ولوجه الله، الرجل لما سمع الكلام ده خد عمر وراح بيه للست دي.. الست اللي بعد ما قرأت عليه قرأن واديتله ورقة كده يقرأ اللي فيها بالليل قبل ما ينام وهو مابقاش يشوف اي حاجة وخف ورجع زي القرد..

لما جدتي قالت كده رديت عليها وقولتلها..

-لا ما هو باين انه قرد فعلًا، ماهو لو بيفكر وعنده مخ، كان عرف ان الموتوسيكل اللي سعره رخيص اوي كده ومن غير ورق، اكيد وراه مصيبة.

لما قولتلها كده ردت عليا وقالت لي..

-ما هو يا ابني كان شاب صغير وكان نفسه في حاجة، واول ما قدر انه يجيبها مافكرش بقى اذا كانت سليمة ولا مش سليمة.

لما جدتي قالتلي كده سرحت شوية بعد كلامها وبعدين بصيتلها بتركيز وقولتلها..

-طب انتي قولتيلي ان في ست عالجته، هي الست دي مين؟!

لما سألتها السؤال ده جاوبتني وقالت..

-الست دي يا سيدي كانت واحدة بتعالج بالقرأن من نفس منطقتنا دي، الست دي كانت عايشة لحد فترة قريبة، يلا الله يرحمها.. كانت ست طيبة وكل اهالي المنطقة كانوا بيحبوها، بس تعرف.. انا فاكرة كويس اول مرة سمعت فيها عن الست دي.. انا عرفتها عن طريق واحدة بنت واحدة جارتنا هي عالجتها.

ركزت مع جدتي ومسكت القلم وقولتلها..

-طب ما تحكيلي حكاية حكاية بنت جارتكوا دي وازاي الست دي عالجتها!

هزيتلي راسها بالموافقة وابتدت جدتي تحكي وتقول..

يتبع

(دي كانت حكاية من حكايات جدتي.. اللي بالمناسبة يعني، هي جدتي فعلًا وهي اللي بتحكيلي الحكايات دي وانا بكتبهالكوا )

#محمد_شعبان

#حكايات_جدتي