قصة انتقام هند

حكايات جدتي

(هند)

لما جدتي قالتلي الكلام ده، رديت عليها وقولتلها..

-والله معاكي حق يا ست الكل في كل كلمة قولتيها، المهم بقى ان الحكاية اللي فاتت دي بالرغم من انها جميلة وكلها عبر، الا انها حزينة ومأساوية اوي.. ما تحكيلي حكاية تانية بقى تكون سعيدة كده ومافيهاش ميتين ولا عيال بيرموا اهاليهم ولا كل النكد ده.

لما قولتلها كده ضحكت وقالتلي..

-طيب يا سيدي.. انا هفرفشك وهحكيلك حكاية هند الرقاصة.

اول ما قالتلي كده ضحكت وانا بقولها..

-اه.. طالما فيها رقاصة يبقى احكي.. احكي وانا هركز معاكي في كل تفاصيل الحكاية.

ضحكت انا وهي شوية وهزرنا مع بعض لحد ما ابتدت ملامحها تاخد شكل الجد وتحكيلي حكاية هند الرقاصة لما قالت..

الحكاية اللي هحكيهالك دي على لسان واحدة قريبتنا ساكنة في منطقة غير منطقتنا، قريبتنا دي حكيتلي الحكاية وانا هحكيهالك زي ما هي حكيتها بالظبط..

من حوالي ٤٠ سنة كده يا ابني، كان في رجل موظف في هيئة البريد ساكن في نفس المنطقة اللي قريبتنا دي منها، المهم ان الرجل ده كان متجوز وعايش مع مراته وعياله في بيتهم وحياتهم كانت ماشية زي الفل، لكن حياة الرجل ده كان فيها حاجة غريبة ومش مفهومة.. الرجل كان متعود يسافر ما بين كل فترة والتانية ويغيب بالأيام، ولما مراته كانت بتسأله انت بتغيب فين كل الايام دي، كان بيقولها انه بيخلص شوية مصالح تبع الشغل في محافظة تانية، ومع مرور الوقت مراته ابتدت تشك فيه لحد ما شكها زاد اوي وحبت تتأكد من انه فعلًا بيسافر يقضي مصالح تبع الشغل ولا لأ، وعشان تتأكد الست من أن جوزها مابيكدبش عليها، راحت في يوم للمصلحة عشان تسأل على جوزها.. وفعلًا الناس أكدوا لها ان جوزها بيسافر يخلص ورق متعلق بالشغل في فرع المصلحة اللي في اسكندرية، بعد ما الست سمعت كلام الناس في المصلحة واطمنت، خدت بعضها وروحت وماقالتش لجوزها اي حاجة، وحياتهم استمرت من غير اي مشاكل لحد ما في يوم الرجل ده تعب وجت له غيبوبة السكر وهو في البيت، وعقبال ما اتحركوا بيه من البيت للمستشفى كان الرجل طلع في الروح.. مات الرجل الطيب ومراته فضلت حزينة عليه لمدة ٣ ايام.. بس في اليوم الرابع اتفاجأت الست بواحدة جت لها البيت ومعاها عيل الصغير، الواحدة اللي جت لها دي كانت من اسكندرية وكان اسمها هند.. هند دي لما قعدت اتكلمت مع الست مرات الرجل، قالتلها انها هي كمان كانت مراته على سنة الله ورسوله، وقالتلها ان الواد اللي معاها ده يبقى ابنه، طبعًا الست اول ما سمعت منها اللي سمعته ده.. كدبتها وقالتلها ان كل كلامها ده مش حقيقي، لكن لما ورتلها قسيمة الجواز وورتلها شهادة ميلاد الولد.. الست فضلت في حالة ذهول وفضلت مش مصدقة هند، واتعصبت عليها وشتمتها وحصلت بينهم مشكلة كبيرة انتهت بأنها طردتها من البيت وقالتلها انها بتتبلى عليهم، بس هند دي كانت مش سهلة لانها كانت بتشتغل رقاصة والرجل ده اتجوزها من ورا مراته وخلاها تتوب لما قعدها في البيت وكسب فيها صواب.. ولأن هند كانت مش سهلة زي ما قولتلك فهي قالت لمرات الرجل وهي نازلة مطرودة من عندها من البيت..

(وديني وما اعبد لا اطفشك من البيت اللي طردتيني منه ده، وكل مليم من حق الواد اليتيم ده، انا هاخد قصاده اضعاف اضعاف)

قالت هند كلامها ده للست، لكنها برضه شتمتها وماهمهاش التهديد ولا كل الكلام اللي اتقال، مشيت هند وخدت ابنها معاها والست فضلت قاعدة هي وولادها في البيت لحد ما الحاجات الغريبة ابتدت تحصل، الست بدأت تحصل لها حاجات غريبة وبدأت تضرب عيالها في عز الليل ضرب مش طبيعي لدرجة انهم زهقوا منها وراحوا عاشوا عند عمتهم.. عمتهم اللي بالمناسبة يعني ماكانتش تعرف موضوع هند الا لما الرجل مات زيها زي مراته بالظبط، بس لما هند راحتلها هي كمان وحكت لها، صدقتها وقالت ان الرجل كان من حقه انه يتجوزها لانه ماعملش حاجة غلط.. ده اتجوز على سُنة الله ورسوله، المهم العيال بعد ما راحوا قعدوا عند عمتهم، الست مرات الرجل حالتها ابتدت تسوء، بقت بتتخانق مع الجيران وتشتمهم من غير اي سبب، واوقات كتير كانت بتقف في بلكونة بيتها وتفضل تشتم في اللي رايح واللي جاي من غير اي مبرر، ومع مرور الوقت.. الناس طلبولها البوليس لانها في مرة مسكت عيل من ولاد الجيران وفضلت تضرب فيه وهي بتقول انه كان عاوز يموتها!

الحكومة لما جت خدت الست دي نقلوها لمستشفى المجانين اللي اول ما دخلتها رجعت هند وخدت البيت بتاع الرجل هي وابنها، وطبعًا ده كان بسبب انها اثبتت انها فعلًا كانت مراته وان الواد اللي معاها ده يبقى ابنه، وفعلًا نفذت هند كلامها وخدت البيت اللي بعد ما عاشت فيه هي وابنها حوالي سنتين والعيال ولاد الست فضلوا عايشين مع عمتهم، ماتت هند.. جالها المرض الخبيث في معدتها وماتت، والبيت خدته الست اخت الرجل وعاشت تربي فيه الواد ابن هند والعيال ولاد الست وعيالها هم كمان، واللي انا نسيت اقولهولك بقى، ان قبل ما هند تموت بحوالي سنة كده، الست مرات الرجل ماتت هي كمان في مستشفى المجانين، ولو هتسألني عن السبب اللي خلى الست تتجنن، ف انا هقولك ان وارد تكون هند دي عملتلها عمل وخلتها وصلت للحالة اللي وصلتلها دي، ووارد كمان انها تكون اتجننت من بعد الصدمة اللي خدتها في جوزها، كل دي ممكن تكون احتمالات واردة وممكن جدًا انها تكون حصلت.. لكن اللي مش ممكن نغفل عنه، ان هند ماقعدتش كتير في البيت وجالها مرض خبيث ماتت بسببه، وكأن ربنا اراد انه ينتقم للست اللي اتجننت، بالمرض اللي صاب هند ده.. اه يا ابني، ماهو ربك زي ما اسمه الرحمن الرحيم، اسمه برضه العدل.. ومستحيل ربنا يبقى شايف ومطلع على حد ظلم حد ومايجبلوش حقه.. ربك يا ابني بيمهل الظالم بس مابيهملوش، والظاهر كده ان هند دي ظلمت الست مرات الرجل، وعشان كده ربنا رد الظلم ده بالمرض اللي جالها.

لما جدتي خلصت الحكاية، بصيتلها باستغراب وقولتلها وانا بضرب كف بكف..

-لا حول ولا قوة الا بالله.. انتي قولتيلي هحكيلك على قصة رقاصة بقى وقولت هنفرفش ونسمع قصة حلوة، في الاخر برضه طلعت قصة كئيبة وكل ابطالها ماتوا، انتي ماعندكيش حكايات اصحابها عايشين ابدًا يا ستي؟!

لما قولتلها كده ضحكت وقالتلي..

-لا عندي يا موكوس.. عندي، والحكاية اللي هحكيهالك دي كل ابطالها واللي عاشوها وحتى اللي شافوها عايشين لحد النهاردة.

مسكت الورقة والقلم وبصيت لجدتي وقولتلها..

-احكي يا ست الكل.. احكي اما نشوف اخرتها.

ابتدت جدتي تحكي وتقول..

#محمد_شعبان

#حكايات_جدتي