حمص

أنا صبي دجال أو بمعنى أصح عفريت أه بجمع معلومات عشان نجر بيها الزبون و نقنعه إن سيدنا عالم أصل في اللي بيعتمد على القرين و اللي بعتمد على العفاريت اللي زيي خصوصا في الأرياف و بدون ذكر أسماء شوفت العجب و الحقد في الناس اللي جاية تعمل عمل لفلانه عشان هي أصغر من بنتها و في عريس كويس متقدم لها، و جاي عايز يعمل حاجة لمراته عشان متخلفش لأنه اتجوزها غصب و عايز يلاقي حجة يتجوز بيها عليها ، و اللي عايزنا في رصد و اللي عايزة تعمل ربط لعرسان جداد على العريس ابن خالتها و كان المفروض يتجوزها هي غيرهم و غيرهم..

الفكرة إن الكبير أو سيدنا قبل ما يقعد مع الحالة بساعتين بيأخد الأسم و العنوان و يبعت العفاريت على العنوان نجمع معلومات أنا و اللي زيي، زي اسم الأم و علاقة الحالة دي بالجيران و أحنا لينا طريقتنا نعرف نجيب بيها المشكلة و في ظرف ساعة و نص بالكتير نكون روحنا بالمعلومات دي و يقعد سيدنا نص ساعة يفرز المعلومات و يدخل بيها بعدها على الزبون..

كنت بجمع وقتها معلومات عن واحدة هتموت و تخلف و اللي عرفته إنها جربت كل حاجه دكاترة و راحت بدل الشيخ لعشرة المهم إنها جت لنا و فهمنا الحوار و روحنا قولنا الحوار قبل ما هي تدخل كالعادة لكن الغريب إنها صدمة سيدنا بطلب غريب طلبت منه إنها تعمل سحر أسود لحماتها بالمرض و الموت و أنها راحت لكتير و رفضوا يعني مكنتش بتروح عشان خلفة لا عشان السحر ده، و الكل عارف يعني إية سحر أسود يعني أي غلطة يتقلب السحر على الساحر و مافيش مجال للهروب المهم سيدنا رفض لكنه طلع كتاب و قالها :

-الكتاب ده فيه كل اللي يلزمك و "حمص" هيساعدك..

بالمناسبة أنا حمص على فكرة المهم الست دي خدت الكتاب و نزلت روحت جيبت لها الطلابات من مكان ما بتعامل زي بخور معين و الذي منه، المهم فعلا عملت السحر لحماتها و بليل نزلنا تربة في مقابر البلد و خليتها تدفنه مع ميت لسة نازل جديد لكن الحوار مسكتش على كده أنا أتحولت من عفريت لخدام الست دي بدأت تأذي دي و تعمل عمل ل دي و بقيت مصدر أذية و أنا الخدام و أخر الحوار أنا أتأذيت يا باشا..

-طب و أنت جاي القسم تحكي ده كله لية؟؟! 

يا باشا الولية عملت لي أنا و حماتها نفس العمل بس ركنتني على جنب لحد ما تاخد كل اللي هي عايزاه و أنا المرض دلوقت أتمكن منى و جيت أبلغ و أعلن توبتي و خصوصا بعد موت سيدنا اللي فهمت إنه فهم اللعبة بسبب العفاريت و معجبهوش الوضع فعرضها و هي موتته و قالت له إن السحر اللي كان بيبع بسبب المياة على إنها عمل قلبت عليك أنت بس المرة دي بجد و أنا جيت لك بقى يا باشا عشان أقلب السحر على الساحر...

-والله بقولك أية احنا مش فاضين للحوارات دي روح يا حمص مطرح ما كنت بدل ما أدخلك الحجز..

ماشي يا باشا و خرجت و طلعت على بيت سيدنا و دورت لحد ما لاقيت النسخة التانية من الكتاب و دلوقت أنا هشتغل عشان أقلب المصير ما أصل أنا مش هموت بخسارة بعد ده كله ..

الحياة لعبة كبيرة و الموت هو النهاية أو الحقيقة الوحيدة فيها أه لكن اللعبة نهايتها يا كسبان يا ميت و الحياة بقي يا تموت كسبان يا تموت خسران و أنا قررت و نويت و الموت كده كده جاي فنلعب و مش مهم النتيجة و ما دام الحكومة رفضت يبقي نعلن بقي عن الشيخ حمص أو بمعنى أصح حمدان ...

*تمت*