لعنه الافعي

فتحت عيني لقتني نايمه في مكان واسع كبير كنا بالليل المكان أشبه بالصحرا رمال كتير علي مرمى البصر ، وقفت مكاني عشان ألاقيني موقفتش لوحدي وقف معايه العشرات من الاشخاص اللي معرفهمش ولا عمرى شفتهم وقفنا كلنا بنبص لبعض ومش فاهمين لغاية لما بدأت الأرض تتهز من تحتينا زلزال ده ولا ايه ؟! بس إزاي زلزال في الصحراء مكنتش فاهمه حاجه بدأت أحاول أجري وازق في اللي حواليا دول كانو متسمرين مكانهم كان محدش فيهم بيفكر غيري ، لكن الأرض بدأت تتهز جامد لدرجة أني وقعت علي الأرض وشفت إيه سبب الهزه دي كانت حاجه زي أفعي عملاقه خرجت من تحت الارض و هي فاتحه بقها علي الأخر وأكلت مجموعة كبيرة من اللي كانوا واقفين ونزلت تاني في الأرض بدأنا نجري كلنا بعد اللي حصل ده ،  الكل حواليا بيصوت و يصرخ و كانت الأفعي كل شويه تطلع من تحت الأرض تخطف واحد مننا و تنزل تاني وإحنا بنجري لحد لما مفضلش غيري ٠٠ بجري لوحدي بدأت الأرض تتهز من تحتي جامد بدأت أحس إنها بتقربلي لكني موقفتش جريت لكنها فجأه خرجت من قدامي و لفت حواليا وبمنتهى السرعة كانت لفه ديلها حواليا و بتعصرني جامد أنا بدأت أصرخ بكل قوتي من الألم كانت بصالي بعينها الصفره دي و كل شويه تخرج لسانها المشقوق نصين لحد ما فجأه فتحت بقها علي أخره و هجمت عليا علشان تاكلني

ساعتها قمت مفزوعة من النوم وأنا بعيط وبصرخ بكل حرقه لقيت أمي وأبويا دخلوا عليا الأوضه أمي خدتني في حضنها و هي بتطبطب عليا وفضلوا يسألوني 

: مالك يا بنتي ، إيه اللي حصل ، ربنا يحفظك يارب

مكنتش قدره أتكلم ،  فضلت أعيط لحد لما بدأت أهدي واحده  واحده  وحكيت لماما كل اللي شفته فقالتلي

: الموضوع كده مينفعش يتسكت عليه لازم نروح للشيخ رضوان هو اللي عنده الشفاء بإذن الله 

بابا كان رافض الموضوع لكن ماما بعد حلفان كتير وخناقات بابا وافق اننا نروح مره لو محصلش تحسن هنرجع تاني نتابع مع الدكتور النفسي

وفعلا تاني يوم ماما خدتني وروحنا في قرية في محافظة تانيه بعيد أوي عننا قريه ريفيه مكناش عارفين حاجة هناك غير إسم الراجل اللي رايحين له الشيخ رضوان ده

فضلنا نسأل عليه لحد لما حد فعلا دلنا عليه كان باين فعلاً إنه شيخ كويس وبتاع ربنا كانت سيرته حلوه بين الناس كنا كل لما نسأل حد عليه يدعيله و يحاول يدلنا عليه

لحد لما وصلنا لجامع صغير أتوضينا وصلينا وبعدين  لقينا شيخ قاعد مربع بيسبح ، وشه كان بشوش جدا تحس أنه منور ما شاء الله ولحيته البيضاء مزوداه نور

قربنا منه وأمي سألته

: أنت الشيخ رضوان

رد من غير ما يرفع عينه من الأرض و قال

: بإذن الله يا حاجه أؤموريني يا أمي خير

: ما يؤمرش عليك ظالم يا إبني المشكله في بنتي يا شيخ بقالها شهر علي الحاله دي مبنمش غير لما نصحي علي صوتها وعياطها مش عارفه أعمل إيه يا شيخنا 

بصلي الشيخ و قال

:إن شاء الله ترجع زي الأول وأحسن يا أم العروسه بس أنا محتاج أسمع منها إيه اللي حصل بالضبط ؟ الموضوع بدأ إزاي ؟

كنت خايفه أوي ساعتها وأمي حاست بده فقربت عليا و مسكت كتفي و قالتلي بصوت واطي

: إحكي متخفيش يا حبيبتي إحكي

هديت شويه  أخدت نفس طويل وبدأت أحكي

الموضوع بدأ لما كنت سهرانه بالليل كان عندي إمتحان مهم في الجامعة تاني يوم و كانت عادتي اليوم اللي قبل الإمتحان بنام النهار كله و بذاكر بالليل كله وأروح علي الإمتحان ، كنت بذاكر و بحاول أجمع أكبر قدر من المعلومات لغاية لما حسيت إن خلاص دماغي فصلت مش قادره أركز أكتر من كده فقلت أروح المطبخ أعمل حاجة أشربها وأتمشي شويه في الجنينه اللي قدام البيت إحنا نظام العماير عندنا كده في المدينه الشقة الأرضي دايما ليها جنينه صغيرة خاصه بيها ، عملت نسكافيه  بالكراميل اللي بحبه  و طلعت الجنينه كان فيه كرسي هزاز بحب أقعد عليه دايما ، قعدت و فضلت باصه للنجوم بتأمل لكني بدأت اسمع صوت زي صوت جرز خفيف بيقرب الصوت كان واطي اوي قمت من مكاني و بصيت ورا الكرسي علشان اشوف لقيت

أفعتين جايين ناحيتي صرخت بكل قوتي ورميت الكبايه اللي في إيدي عليهم وجريت جوه البيت فضلت قاعده علي السرير بعيط و منهاره لحد لمانمت صحيت تاني يوم قلت لبابا علي اللي شفته قالي 

: إزاي حاجة زي دي تحصل !!؟؟ إحنا كده في خطر أنا هكلم شركة المبيدات الموضوع ده ميتسكتش عليه وريني إنتي شفتيهم فين

روحت معاه الجنينه وشاورتله من بعيد ورا المرجيحه راح بابا و فضل يدور ولقيته ببقول 

: إيه ده أعوذ بالله من الشيطان الرجيم 

لقيت بابا رجع بسرعه و جاب  قماش من المطبخ و رجع الجنينه وأنا فضلت أساله 

:فيه إيه يا بابا ؟! فيه إيه؟!

بابا مردش عليا ولقيته شال حاجة و حطها في القماشه ولفها عليها قلتله 

:فيه إيه يا بابا إيه ده؟؟

: ده تعبان  واضح أنك لما حدفتي الكبايه  عليه كانت سخنه وموتته 

أنا قلبي إتقبض أول لما قال كده معرفش ليه؟

:قولتله طيب والتانيه ملهاش أثر!!

قالي

:لأ مفيش ليها أي أثر أنا بردو هكلم شركه المبيدات أحتياطى 

وفعلاً بابا كلمهم وجم رشوا المكان كله وروحت إمتحاني ورجعت البيت وكنت تعبانه جدا 

شفت في حلمي كل اللي حصل تاني وشفتني وانا برمي كبايه النسكافيه علي  التعبان وشفته وهو بيموت وشفت نظرة التعبان التاني ليا نظره كلها كره فعلاً ومن يوميها وأنا كل لما أنام أشوف التعبان ده في أحلامي بياكلني وبيقطع جسمي حتت وساعات كمان بعد لما أصحي بشوفو جنبي علي المخده،  بس هو ده كل اللي حصل يا سيدنا الشيخ

سكت شويه الشيخ بعد اللي قلته ده وقال

: الموضوع واضح جداً أنتي قتلتي جوزها و ده غلط كبير ، رسولنا عليه افضل الصلاة والسلام

رددنا انا و ماما 

: عليه أفضل الصلاه والسلام نهي عن قتل أفعي البيت و تحذيرها لثلاث أيام وكان عنده حكمه في ده فعلا  ..بس الحل بسيط باذن الله أنا لازم أجي البيت عندكم و إن شاء الله الحل من عند الله

خرجنا من الجامع والشيخ رضوان معانا و ركب معانا العربيه ، طول الطريق كان بيقرأ قرأن ويسبح  وصلنا البيت ، بابا فتحلنا و اول لما شاف الشيخ سلم عليه وقاله 

: أتفضل

كان بيحاول يسأل ماما إيه اللي حصل  قالتلوا بصوت واطي 

: مش وقته دلوقتي هفهمك بعدين

فضل الشيخ يقرأ قرأن كتير 

لحد لما سأل فجأه

: الحيه ماتت فين

بابا خده وداه للجنينه و شاورله علي المكان اللي لقاها فيه ورا المرجيحه الشيخ طلب أننا نحرك المرجيحه من هناك خالص  وقال عايز المكان فاضي تماما 

بابا شال معاه المرجيحه و الشيخ طلع إزازة من جيبه مليانه ماء ورشها علي المكان بالكامل وبدأ يقرأ قرأن كتير آية  الكرسي وبعض ايات من سورة البقرة

لحد لما من وسط الزرع طلعت الأفعي وكانت جايه ناحيتي بسرعه صرخت بكل قوتي لكن الشيخ مسكها من رقبتها بسرعه ودخلها في كيس كان معاه وربطه وقال

: لازم نرميها في أبعد مكان عن هنا علشان متعرفش ترجع تاني وبدأ يقرأ  سور وآيات من القرأن بطلت تتحرك في الكيس 

بابا والشيخ ركبوا العربيه و مشيوا ورجعوا بعد ساعتين أو أكتر 

الشيخ قعد  معانا كلنا و قال

: الموضوع ده خلص أنا هحصنلكم البيت بردو ببعض الآيات وأنتوا خلو بالكم بعد كده من  الأفاعي بالذات التحذير تلات أيام و بعد كده القتل وأحرسوا علي قفل الشبابيك والبيبان وحفظكم الله إن شاء الله 

قلنا جميعا 

: إن شاء الله

شكرنا الشيخ جدا و بابا وصلوا لحد بيته ورفض ياخد مننا أي  فلوس جزاء مساعدته 

(حابب أقول في نهايه القصة ان القصه مبنيه علي احداث حقيقيه حدثت بالفعل في إحدي القري الريفيه ياريت كلنا ناخد بالنا و دمتم في حفظ الله...)

#أحمد_ساهر

#العازف