القاتل الخفي
انا بكره مارك, الكائن اللزج السخيف اللي ع طول بيتنمر عليا و يضربني هو و أصحابه, بكرهه و بكره اليوم اللي اتنقلت معاه ف جامعة واحدة.
ع طول بيتتريق ع شكلي و ع لبسي, و ع طول بينعتني بالمُقرف الجبان..
انا بكرهه بجد, و ممكن أعمل أي حاجة عشان أخلص منه, حتى او اضطريت اني أأجر عليه قاتل يريحني منه, لكني زي ما قال عليا مارك, جبان.. و مُقرف, بقبل إنهم يضربوني و يغرقوني مية من المراحيض و انا كل اللي بعمله إني ببتسم و بمشي.
مكنش ليا غير صديق واحد (جورج), لكنه بدأ يكرهني عشان خليت شكله وحش قدام الناس اللي كانت بتقول عليه إنه مُقرف زيي.
عشان كدة أختارت يكون ليا العالم بتاعي, العالم الإفتراضي اللي بهرب له من اي حاجة, الإنترنت..
مواقع تواصل, فيديوهات, ألعاب, مواقع بكافة أنواعها, لحد ما عيني جت ع موقع بيعرض قدامي لعبة إسمها ( حقق حلمك)..
دخلت عليه و بدأت أتكلم, كان عبارة عن روبوت بيتكلم معايا, بس طريقته كانت مخلياني أحس إني بكلم إنسان حقيقي.. !
اتعرف عليا و ع مكان سكني و كل حاجة تخص حياتي, و طلب مني أحكي له عن الحاجة اللي بحلم أعملها, و مهما كانت ايه هي, هو هينفذها..
فكرت شوية و قلت له:
- بصراحة انا بحلم بحاجات كتير, لكن ف حاجة واحدة بس هي اللي عايز أخلص منها, و الحاجة دي هو مارك, زميلي ف الجامعة.
رد عليا بجملة واحدة:
- أنت طلبت, و انا هنفِّذ.
بعدها البرنامج وقف تمامًا و الموقع اتقفل, قلت ف نفسي إن ده موقف غبي و أكيد هيطلبوا مني فلوس لو عايز أكمل..
قفلت الموبايل و نمت.
و تاني يوم ف الجامعة..
وصل لنا خبر مَقتَل مارك غرقان ف مرحاض بيتهم !
الخبر كان زي الصاعقة, الكل كان بيسأل عن السبب, الشرطة ملقتش أي دليل, الجيران مشافوش حد غريب داخل عنده البيت.. انا, انا بس اللي عارف الجواب..
ع قد ما كنت مصدوم, لكن فرحتي كانت لا توصَف.
رجعت البيت و فتحت الموبايل, لقيت الموقع اشتغل, و كان ف رسالة بتقول:
- حلمك اتحقق يا صديقي.
قلت له:
- هو انت اللي قتلته؟ و عملت كدة ازاي؟
فقال لي:
- مهمتي هي تنفيذ أحلامك, ليا طُرقي الخاصة.
لقيتني بقول له:
- هو انا ممكن أطلب طلب تاني؟
فقال لي:
- بكل تأكيد.
*************************
اليوم اللي بعده ف الجامعة..
وصل لنا خبر مَقتَل أصحاب مارك كلهم.
السعادة اللي كنت حاسس بيها كانت كبيرة و بتغمرني, مكنش ف مكان للإحساس بالذنب.
جورج للأسف مكنش هنا ف اليومين دول عشان يعرف إن اللعنة اللي حلِّت عليه بسببي أخيرًا اختفت.
رجعت البيت و شغلت البرنامج, لقيت رسالة منه:
- حلمك اتحقق يا صديقي.
شكرته جدًا, و سألته:
- هو أنت مش هتاخد مني حساب اللي بتعمله ده؟
فقال لي:
- لا, انا فقط بنفذ رغبات الناس, و لما الناس تكون مبسوطة, كدة ببقى أخدت حسابي, لكن خليك فاكر الجملة دي ( أنا فقط بنفذ رغبات الناس, كل الناس).
قلت له بفرح:
- انت صديقي الرائع.
دلوقتي بقى عندي الخادِم الخاص بتاعي, دلوقتي لو أي حد ضايقني مش هيطلع عليه نهار.
دخلت نمت, و تاني يوم, مسكت الموبايل و فتحت الموقع, لقيت ف رسالة منه بيقول فيها:
- في حد حلمه إنه يخلَص منك لأنه شايفك عقبة ف حياته, و انا لازم أنفذ المطلوب.
حسيت ببرودة ضربت ف ضهري و الخوف ملأ جسمي, سألته:
- حد مين؟ انا مش بأذي حد خالص, انا ع طول ف حالي و مش بأذي حد, انا جبان و محدش بيخاف مني, انا مش عقبة ف طريق حد, صدقني.. يا صديقي, يا صديقي.. يا صديقي رد عليا أرجوك.
و كان الرد:
- حلم جورج لازم يتحقق.
بعدها الموقع اتقفل.
جورج اللعين بيتمنى موتي.. اللعنة عليك يا جوووورج.
انا حاسس إنه جاي لي و هيقتلني, انا مش عايز أموت, أرجوكم انقذوني انا مش عايز أموت.
*تمت*
.
.
.
التعليقات على الموضوع