محكمة الجن

محكمة الجان

****

*انا لا اُلقي الضوء على حدث بعينه أنا فقط أوضح بعض النقاط*

****

كل واحد فينا ممكن يتعرض لموقف مع الجن ، كلنا معرضين لده ، لكن الغريب اللي حصل معايا مكنش موقف ، كانت محاكمة ! 

محاكمة كاملة من قاضي ومستشارين وشهود ومُدعي ، والمتهم كان انا 

إسمي عرفة ، بشتغل دليفري في يوم جالي اوردر لبيت قي منطقة الواحد بيكره نفسه وهو داخلها بسبب ضيق الشوارع والحواري

اترجيت المدير إنه يعفيني من المشوار ده بحجة إن المكنة عطلانة بس كان رده "زمايلك كلهم برا يا عرفة ، هنعمل ايه هنقول لا لأكل العيش؟ " 

دورت المكنة واتوكلت على الله ، من شارع لشارع ومن حارة لحارة   والمكنة عمالة تشيل وتحط فيا

لمحت قطة من بعيد حاولت افاديها معرفتش بسبب ضيق الشارع ، لدرجة إني كنت هقع وأنا بحاول افاديها ، دي روح برضو ، ودوستها ووقعت 

جسمي اتكسر وجروح في كل حتة ، جروح متتناسبش تمامًا مع الوقعة اللي كانت بسيطة ، والغريبة إن المكنة اشتغلت زي الفل وده دليل إن الوقعة فعلًا كانت بسيطة ، امال ايه اللي حصلي ده كله 

بسيط على القطة ملقتش أي حاجة! 

روحت وانا ميت من التعب ، اترميت عالسرير وحاولت أنام ، كانت محاولة ، مجرد محاولة 

حر ، جهنم ، صفير وهمس اتحول لزعيق وصريخ ، حركة مش طبيعية في الشقة وتكسير في المطبخ مع إني عايش لوحدي! 

قومت ابص مفيش أي حاجة

دخلت اوضتي وحطيت المخدة على دماغي وودني علشان مسمعش حاجة بس الأمر وصل إني حسيت بضربة قوية جدًا على ضهري! 

قومت بصيت حواليا لقيت خيالات كتير بتتحرك 

صرخت وظهر من العدم 

كائن أسود طويل ومرعب بلف علشان اجري منه لقيت اتنين شبهه ورايا مسكوني والرؤية انعدمت! 

يوم ، التاني عايشهم مكفوف ، مش شايف حاجة ، فراغ حواليا مهما اتحرك مفيش حدود في المكان ده ! 

بعد اليوم التاني الرؤية رجعت ، كنت في مكان شبه السجون لكنه مرعب لدرجة فوق الوصف دخلوا عليا الاتنين اللي مسكوني وبنفس الطريقة خرجوني 

وصلت لمكان واسع ، فيه الكائن اللي ظهر في البيت وجنبه كائن تاني شبهه ومن بعيد واقف تلاتة 

اتكلم اللي واقف في النص من غير ما شفايفه تتحرك " لقد قمت بإذاء  أحد سُكان العالم السفلي بدهسك له مُستخدمًا دراجتك النارية وستنفذ العقوبة في حالة عدم إثباتك حسن النية وعدم التعمد 

رديت بسرعة وخوف " مكنش قصدي ، دي كانت قطة مكنتش اعرف وحتى لو قطة أنا حاولت افاديها معرفتش مكنش قصدي "

بصوا التلاتة لبعض وكأنهم بيتكلموا ، بصوا لواحد من اللي واقفين واتكلم "أشهد أنا قيين المدعو عرفة إنه حاول عدم التعرض بأذي لأبن جنسنا ولكنه لم يستطع رغمًا عنه "

وكان رد الكائن اللي بيتوسط تلاتة "عفونا عنك ، أما أنت -بيلتفت لجني ٱخر- اخبرني الآن عن سبب تجسيدك ووجودك في عالم البشر في هذا الوقت "

الجني المُدعي : كنت اتسكع فقط يا سيدي 

الجني القاضي : احضروا لنا الكلب لنرى مدى صدقه 

كل اللي شوفته الكام يوم دول كوم والكلب ده كوم تاني 

اسود وضخم ، وطوله وهو واقف على اطرافه الأربعة طول البشر ! 

قوي لدرجة أن أربعة ماسكينه ومش قادرين يسيطروا عليه ، قرب من الجني المُدعي ، بدأ يشم فيه وفجأة نبح بصوت هز أجساد كل الموجودين 

اتكلم القاضي : انت تكذب ، تحدث بالحقيقة 

وبمنتهى الصراحة قال " كنت أنوي إيذاء عرفة ، ستطلب شهادته في أحد القضايا وطلب مني أحد الدجالين أن امنعه من ذلك 

دماغي رجعت لحادثة حصلت قدامي من شهر كانت خناقة بين شابين وواحد منهم قتل التاني

اتكلم القاضي : كنت تنوي إيذاء أحد أبناء بني آدم ولدينا عهد بعدم التعرض لهم بأذى ، تعمل مع أحد الدجالين ، لذلك ستنفذ العقوبة ضدك انت " 

الكلب هجم عليه بمنتهى القوة والقسوة 

المنظر كان صعب لدرجة إني فقدت الوعي  

فوقت لقيت كل حاجة رجعت زي الأول بالظبط ، بيتي ، هادي طبيعي جدًا ، فعلًا تاني يوم وصلني إن شهادتي مطلوبة في وقعة جريمة القتل ، روحت وشهدت بالحقيقة واتفاجئت بعدها إن القاتل بمساعدة اهله ذوات المناصب خد عقوبة مخففة برغم شهادة الكثير ضده 

وكأن محكمة الجان كانت أعدل من محاكم البشر!