بئر برهوت

بيقولوا أن حظ الإنسان بيبان من يوم ولادته ، و انا اتولدت في مكان كل الناس بتخاف تيجي ناحيته ، حظي السئ بيلازمني انا و كل اهل قريتي ، لمجرد بس أن حد يعرف انك من وادي برهوت !! 

أو برغوت زي ما ستي بتقول ، وادي برهوت 

المكان دا في منطقة  فيجوت – مديرية شحن محافظة المهرة - حضر موت اليمن . 

بلد جميله و هاديه بس فيها لعنه ، بئر برهوت ، دا بئر رهيب اتساعه أكثر من 100متر  ، و عمق ٢٥٠ متر .

اسمي جليله من و انا صغيرة و امي تضربني لو فكرت اروح ناحيته ،و بتقولي أن العيال اللي بتروح ناحيه هناك مش بترجع ، كنت فاكره أنها بتقولي كده بس عشان مبعدش عن البيت ،

لحد ما جت فترة علي الوادي المياه قلت ، و الناس فكروا ينزلوا حد بحبل في البئر دا عشان يجيب لنا مياه ،

الناس كلها كانت بتخاف تيجي جنب البئر دا ، فا شيخ البلد قال إن هنطلع كلنا بالنهار عشان نونس بعض و عشان يأكدلنا أن مفيش حاجه خطر فيه .

اتجمعنا كل اهل البلد ، و رحنا و ربطوا ابن عمي و نزلوه في البئر ، و عدي ٥ د و سمعنا صراخه ، سحبوه بسرعه ، بس طلع متاكل نصه ، من غير رجليه ، مات بعدها علطول من النزيف .

و في مرة ست بترعي الغنم و سابت ابنها الرضيع في حته جنب البئر ، و راحت تجيب غنمه شاردة ، رجعت ملقتهوش !! 

دا غير اللي كان بيخيم قريب من هناك كان بيشم ريحه بشعه بتطلع من البئر دا ، و مرة راجل سمع بليل صوت طالع من البئر بيقول( دومه دومه ) و دومه دا الملاك الموكل بالكفار .

لما كبرت شويه ابويا فهمني أن دا بئر فيه أرواح الكفار و أن أي حد بيموت لو روحه طيبه بتطلع السما ، لو روحه خبيثه ، كافر يعني، بتطلع بس مبتدخلش السما بترجع تتحبس في البئر دا ، و أن الحفرة بتاعه البئر دي مش من صنع البشر .

و فيه ناس بتقول أن واحد من ملوك اليمن زمان اوي هو اللي أمر الجن يحفروا له البئر دا عشان يخبي فيه كنوزه .

الكلام كتير علي البئر دا ، و كمان علي بن أبي طالب قال أن: أبغض البقاع إلى الله تعالى وادي برهوت بحضرموت فيه بئر ماؤها أسود منتن يأوي إليه أرواح الكفار.

كبرت و اشتغلت في السياحه و بيجي زوار من كل مكان عشان يتفرجوا علي البئر دا ، و عرفت انه مش خطر اوي اقف جنبه و اتصور كمان .

في مرة فوج من ٦ أفراد  ٣ سيدات و ٣ رجال طلب اننا نخيم جنبه ، حذرتهم من اللي بيتقال عليه و أن مفيش شبكه هناك و دا خطر لو حصل لنا حاجه مش هنعرف نتصل بحد يجيلنا، بس هما حب المغامرة سيطر عليهم و عرضوا عليا فلوس اكتر عشان نخيم هناك ليله واحده ، وافقت من غير اي زياده في الفلوس ، بس هما مسؤوليتي و كنت خايفه اني ابات هناك .

بس بالفعل نزلنا البلد و اشترينا معدات التخييم و استأذنت شيخ البلد ، اللي بدوره حذرني و قالي يا بنتي انتي عارفه حكاوي اللي بيباتوا هناك ،بس قررت اسيبها علي الله .

اتقابلنا بليل هناك و نصبنا الخيام ، وولعنا حطب و عملنا ليله تخييم مثاليه ، 

بعد ما الوقت أتأخر و ابتدي ناس تدخل تنام ، الجو برد و جات ريح طفت النار ، بس قلنا عادي و دخلنا ننام ، بعد وقت قصير سمعت صوت همس و حركه ، خفت يكون حد من السياح صحي و محتاج حاجه ، خرجت بسرعه ملقتش حد بس شميت الريحه البشعه اللي كانوا بيحكوا عليها ، ريحه عفن محدش يقدر يستحملها 

دخلت خيمتي بسرعه و بدعي الليله دي تعدي علي خير و حاولت اجيب اي شبكه بالموبايل بس مفيش خالص  ، شويه و سمعت صوت صراخ عالي ، خرجنا كلنا لقينا واحده من السياح بتحلف أن حد كان معاها في الخيمه و حست بنفسه بس اول ما قامت ملقتش حد ، و كل اعتقادهم أن فيه حرامي أو متلصص ،

 هديتهم و قررت انا و واحد معايا اننا مش هنام و هنفضل قاعدين نحرصهم لحد ما النهار يطلع و نروح ، لان العربيه اللي جابتنا مشيت مش هينفع نرجع الا لما تجيلنا .

ولعنا النار تاني و عملنا شاي و قعدنا نتكلم و و الباقي دخلوا ناموا ، بعد شويه النار اطفت بنفس الطريقه ، بس بما اننا في مكان مفتوح فا وارد يحصل كده ، كنا قاعدين ضهرنا للخيام ووشنا للبئر ، شفت كأن حاجه بتحاول تطلع منه، ايد أو خيال اسود ، قلت دا اكيد من الهلوسه و فركت عيني ،عشان ابص تاني و ببص للي جنبي لقيته متنح ، عرفت انه هو كمان شايف اللي انا شايفاه ، بس هو اخد الكشاف و رايح يشوف ايه دا ، طبعا انا منعته ، بس هو اصلا جاي مستني اي ظاهرة غريبه عشان يصورها  ، فا بعد ايدي عنه و راح بالكشاف لحد ما قرب من الخيال اللي استقر في مكانه لما وجهنا الكشاف عليه ، راح و بص بالكشاف و كان بيسجل فيديو ، بعد شويه و  اتمشي شويه يمين و شمال البئر ، لف وشه ناحيتي عشان يطمني انها اكيد مجرد خيالات عشان احنا مهيأين عقولنا علي كده ، بس قبل ما ينهي جملته كان الخيال اللي انا شايفاه من عندي سحبه من رجله جوه البئر !!!!! 

صرخت و صحيتهم كلهم و قولتلهم أنه وقع ، جابوا حبال و رموها من كذه جه ، و فضلوا ينهدوا عليه كتير و طبعا من غير رد ، و انا حاولت احذرهم من الوقوف قريب كده بس الصدمه كانت صعبه علينا كلنا ، بعد فترة كبيرة من الصمت و كلنا قاعدين حول النار و عنينا متثبته علي البئر ، سمعنا صوت صريخ ناس كتير ، و سمعنا حد بيقول دومه دومه .

و فجاه النار ولعت في الخيام بتاعتنا و طفيناها بالعافيه و بعد ما خلصنا اكتشفنا أن ناقصين حد كمان  يعني كانوا ٦ بقوا اربعه ، فضلنا ننده عليه يمكن جري وقت النار أو حاجه ، بس من غير فايده، عشان بعدها نسمع صوته هو و اللي اتاخد في الاول بيستنجدوا بينا ، و هنا قرر واحد من الجروب أنه يربط نفسه و ننزله يمكن متعلقين في مكان قريب و يقدر ينقذهم .

بعد محاولات مستميته مني أنه ميعملش كده بس هو و باقي الجروب كانوا مصممين خصا أن هما عائله واحده .

ساعدتهم في اننا ننزله ، و معاه كشافه و بعد شويه و هو لسه بينزل و بيكلمنا عشان نطمن أنه كويس ، صرخ و قال طلعوني بسرعه ، 

سحبناه و لما طلع بعد ما هدي من نوبه الذعر اللي كان فيها ، قالنا أنه كان نازل و كله تمام لحد ما ابتدي يحس أن فيه حاجه بتسحبه و كأن البئر بيتقفل عليه .

فضلنا قاعدين جنب النار تاني ساكتين و خايفين و عنينا متنحه علي البئر ، و طول الوقت شامين الريحه البشعه و الاصوات المرعبه اللي طالعه من البئر .

و فجأه قامت واحده من المجموعه رايحه ناحيه البئر ، بس شكلها كان كأنها سمعت صوت احنا مسمعنهوش ، راحت بس انا منعتها ، لكن هي مكنتش في وعيها و لما منعتها فضلت تصرخ بهستريه لحد ما اغم عليها ، فوقناها و طمناها ، و حكتلنا أنها حست أنه حلم و أن صاحبها اللي اتبلع في البئر بينده عليها و بيقولها ساعديني !! و محستش باي حاجه لحد ما احنا فوقناها .

في الواقع انا مكنتش متخيله أن الليله دي هتعدي و حد مننا عايش ، بس عدت و جت العربيه مع طلوع الشمس و طلعنا علي الشرطه بلغنا عن اللي حصل و طبعا قالوا لنا أن مستحيل حد ينزل ، و أن اصلا ممنوع النزول فيه ، و السياح سافروا بلدهم و انا فضلت قاعده من الشغل بسبب اليوم دا ، و نشرت القصه دي في كل مكان عشان محدش يفكر يقرب من البئر ولا يعمل تخييم هناك .

و هيفضل اللي جوه البئر دا لغز علينا محدش هيشوفه ، و محدش يعرف عنه غير أن ميته سودا و وحشه و أنه مكان الأرواح الكافرة الخبيثة .

احب أختم القصه بحديث رسولَ اللهِ صلَّى اللهُ عليه وسلَّم قال (خيرُ ماءٍ على وجهِ الأرضِ ماءُ زَمْزَمَ فيه طَعامٌ مِن الطُّعمِ وشِفاءٌ مِن السُّقمِ وشرُّ ماءٍ على الأرضِ ماءٌ بِوَادي" بَرَهُوتَ "بقُبَّةٍ بحَضْرَمَوْتَ عليه كرِجْلِ الجَرادِ مِن الهَوَامِّ تُصبِحُ تَدَفَّقُ وتُمسِي لا بِلالَ بها)

ملحوظه 

موضوع بئر برهوت حقيقي ، القصه اللي حوليه هي بس اللي تأليفي ، إذا نقدر نقول انها أغلبها قصه حقيقيه .

المصادر 

اسلام ويب 

اثار البلاد و اخبار العباد - للقزويني

ندي_الشناوي