مغامرة مع مريض نفسي
جلال طالب بكلية الطب، عايش مع اسرته البسيطة اللي بتتكون من اب على المعاش وام ربت منزل و اخته مروة اللي اصغر منه بسنتين..
جلال شخصية فضولية جدا بيحب يبحث ويقرا عن عالم ما وراء الطبيعة والغيبيات، من وهو صغير في عمر ال ١٥ سنه بيقرا سلاسل الجيب اللي كانت بتصدر عن المكتبة العربية الحديثة، اكتر سلسلة هو اتربى عليها لسسلة ما وراء الطبيعة للدكتور احمد خالد توفيق السلسلة دي هي اللي حببته اكتر في عالم المورائيات.
ولما كبر اكتر ودخل الكلية بقى بيسمع تجارب اصحابه وماعرفه، وباسلوب جلال الخاص كان بيحولها لقصص وينزلها في مدونة خاصة بتعرض التجارب الحقيقية في عالم ما وراء الطبيعة.
بدأ يمل من التجارب والحكايات اللي بتتحكيله اللي كلها شبه بعض، جلال عايز مغامرة هو يخُضها بنفسه ماتتحكيلوش.
جلال صديقه الوحيد واللي بيدرسو مع بعض في نفس الكلية اسمه ( بلال) بلال بيشارك جلال نفس الشخصية و الفضول، في يوم جلال كان قاعد مع بلال في القهوة اللي دايما متعودين يقعده فيها.
جلال: بقولك يا بلال انا عايز منك خدمه وارجوك تنفذها لي
بلال: قول يا ابني في ايه عايز فلوس
جلال: لا يا عم اسمعني بس، بص من غير مقدمات كتير عايزك تكلم لي قريبك اللي دكتور ف مستشفى العباسية عايز ادخلها عايز اخوض تجربتي ليوم الهالوين جوه المستشفى!
بلال بيقوم يقف من مكاني وهو مش مصدق اللي بيقولوا صاحبه
بلال: انت مجنون يا ابني، جوه مافيش عفاريت عشان تصورها، دول مرضى
جلال بإصرار: عارف ده انا عايز اسمع حكايتهم، اكيد محدش بيتولد مجنون، في حاجه وصلتهم لكدا
بلال: معرفش يا جلال بس متاكد انه مش هيوافق بدا
جلال: ياعم ملكش دعوة انت بس كلمهولي
بلال بيئس: حاضر يا جلال بس بقولك من اولها انه مش هيوافق اصلا
جلال: انت بس قول له واحد صاحبي عايز يكلمك ف حاجه وانا هقنعه
بلال: حاضر يا لي هتوديني في داهية بجنانك
*******
تلات ايام بيزن جلال على الدكتور عشان يوافق، زهق الدكتور من زن جلال فوافق. قال له الدكتور انه هيدخل ويتكلم مع اي مريض على انه طالب عنده بيعمل بحث مطلوب منه في الكلية.
جلال كان في قمة سعادته انه هيعمل مغامرة جديدة
راح جلال مع الدكتور لمستشفى العباسية وكان محضر الورق اللي هيكتب فيه الحكايات اللي هيسمعها.
هناك في المستشفى مشي وسط الغرف فتح اوضة من الاوض، شاف مريض قاعد على السرير مفيش غيره ف الاوضة دي. بص جلال للدكتور واستفهم منه عن حالته
رد الدكتور عليه وقال:
- لا المريض ده بذات مينفعش تتكلم معاه لانه اصلا مهما حاولت مش هينطق بحرف تفهمه.
جلال اتحمس جدا انه يدخل للمريض ده دونا عن اي مريض..
جلال:
- انا عايز اقعد مع المريض ده
الدكتور بيقول له:
- براحتك بس قلتلك مش هتستفاد باي حاجه
تجاهل جلال كلام الدكتور ودخل.
قعد جلال على كرسي وفضل يبص للمريض، المريض قاعد على السرير و ورقه على السرير وقلم في ايده، عمال يرسم، قرب شوية جلال للمريض عشان يشوف بيرسم ايه.
كان بيرسم بيت و راسم وحده ست من ضهرها يعني شعرها نازل وبصه للبيت..
استغرب جلال المنظر، المريض بص له وقال جملة مفهمهاش جلال
المريض:
- هو مات لانه يستحق ده، هي مش هتسيب حد يدخل البيت الملعون، انت فضولي وهي اختارتك، هي اللي قالت لي كدا هي اختارتك!!
جلال سكت كان متوقع ده يحصل فسكت خلاه يكمل.
المريض:
- هحكيلك حكاية موافق؟!
جلال فتح الدفتر ومسك القلم عشان يكتب كل حرف..
جلال:
- ايوة موافق وسامعك احكي
المريض ساب الورقة والقلم وبص لجلال
المريض:
زمان كنت زيك كدا، شاب متهور، فضولي فوق متتصور، كنت بحب اقرا واكتب وابحث عن حكايات الغيبيات والعالم الاخر والجن والعفاريت. عملت مغامرات كتير، قضيت ليلة كاملة داخل قبر، دخلت بيوت مسكونه كتير، لكن البيت ده غير اي بيت مسكون ادخله!. سمعت عن البيت ده من صديق قال لي ان احنا في البلد عندنا بيت مسكون، الحكايات اللي بنسمعها عنه ان اي حد بيدخل البيت ده بيخرج مجنون، مش بيخرج مجنون بس لا ده بيموت ابوه واخته بتنتحر!!...
الغريب ان اي حد بيدخل البيت لازم بيكون شاب عايش مع ابوه واخته والام بتكون ماتت، وحتى لو كانت عايشه بتموت بعد دخول الشاب البيت!!..
جلال بيسمع الحكاية بشغف وبيكتب زي المجنون كل كلمه بيقولها..
كمل المريض الحكاية
المريض:
- بقى عندي فضول ان ادخل البيت وافهم ايه اساس لعنة المكان ده، وليه اي حد بيخرج يقتل الاب والاخت بتنتحر.
انا قلت لصاحبي عايز ادخل البيت ده، قال لي مش هيسمحوا ليك تدخل البيت غير في يوم معين وهو يوم ٣١ اكتوبر. كل يوم في الوقت ده لازم شاب يدخل البيت ده، محدش يعرف ايه الحكمه ف الميعاد ده بذات.
كنت محظوظ ساعتها لان كان فاضل على يوم ٣١ اكتوبر يوم واحد بس. فاخدت منه العنوان ورحت.
سألت على البيت، اي حد اسئله عن البيت بيبعد عني وهما خايفين، لحد ما في الاخر حد قال لي هو فين، وصلت البيت، بيت عادي جدا، من دورين وجنينه صغيره حوالين البيت، قربت للباب و زقيته اتفتح، دخلت جوه اكتر لحد ما وصلت لباب البيت الرئيسي اللي هيدخلني جوه البيت.
اللي شفته كان صدمه بالنسبالي، لا مش زي ما انت مفكر، مشفتش عفاريت، انا شفت نفسي ف نص صالة بيتي انا!!!
متستغربش يا جلال، هو ده فعلا اللي شفته، عارف يا جلال بعد كدا شفت مين راكع تحت رجلي؟! ابويا! ابويا كان راكع تحت رجلي بيترجاني ف حاجه انا معرفش ايه هي!! كنت في اللحظة دي عندي كُره لابويا، بكرو لدرجة اني نزلت على الارض وخنقت ابويا لحد ما مات!!
بصيت حواليا بعد كدا لقيت كل حاجه اختفت، انا في البيت المسكون وواقف جوه ف الدور اللي تحت!!
انا خفت من اللي حصل لي من دقائق فطلت اجري.
ركبت العربية وروحت على البيت.
من اللحظة دي وحياتي اتحولت ل ١٨٠ درجة.
ابويا اللي كنت بحبه جدا، بقيت اكره، ابويا اللي كنت مرتبط بي اوي بعد موت امي، بقيت كاره اقعد معاه.
ليه مش قادر اعرف!!
سكت المريض هنا ومنطقش بكلمة.
جلال حاول كذا مرة يخلي يكمل الحكاية لكنه رافض تماما
المريض رجع لحالته الاولى، قاعد ساكت، ماسك الورقة والقلم وبيرسم..
زهق جلال من كتر ماهو عمال يتكلم من غير فايده ، فقام واتحرك علشان يمشي .
قبل ما يقرب لباب الاوضه المريض اتكلم !
المريض: هستناك علشان اكمل لك الحكايه .
ضحك المريض ورجع لورقته وقلمه تاني ....
خرج جلال من المستشفى ، رجع بيته وكتب كل حاجه حصلت ونزلها على المدونه بتاعته ونام ....
صحي جلال مفزوع من النوم لدرجة ان ابوه واخته مروه جم جري عليه ، جلال كان مرعوب من الكابوس اللي شافه ، طمنهم وقال لهم انه شاف كابوس مش اكتر ورجع ابوه واخته يناموا بعد ما اطمنوا على جلال .
فضل جلال يفتكر احداث الكابوس تاني .
جلال شاف نفسه انه بيقتل ابوه فى الحلم
هو مبقاش مصدق نفسه مبقاش عارف ده ايحاء من عقله الباطن بسبب اللي سمعه والا ده مجرد حلم .
قام جلال . فتح جهاز اللاب بتاعه . ودخل على المدونه وكتب الكابوس اللي شافه، وفي الأخر وجه سؤال لأعضاء المدونه : اللي حصل له ده معناه ايه ؟؟
ويكمل للاخر والا يكتفي باللي حكاه ؟؟
الردود كانت متنوعه مابين انه يكمل ، او انه يكتفي لأن ده ممكن يبقى حقيقي وحياته تدمر !!!!!
بس جلال متعودش يدخل مغامره وينسحب منها .
قرر جلال يكمل للاخر !!!!!
********
جلال عارف ان الدكتور مستحيل انه يرضى يدخله تاني للمريض ، فقرر انه هيدخل المستشفى بالليل .
لبس هدومه ونزل راح المستشفى الساعه كانت ١.٣٠ صباحا يعني ده افضل وقت يتسلل فيه للمستشفى
لما وصل جلال نط من السور بشويش علشان محدش يلاحظه ودخل لجوه المبنى اللي فيه غرفة المريض .
الحركه كانت قليله في الوقت ده .
جلال شاف ممرضه خارجه من اوضة المريض فاستخبى علشان ماتشوفهوش، وبعدها جري للاوضه وفتح الباب لقى المريض قاعد ومبتسم له .
المريض : كنت عارف انك هتيجي ، انت شفت انك بتقتل ابوك في الحلم ، خلاص كده هي عايزاك انت المره دي .
تعالى علشان اكمل لك الحكايه ...
قعد جلال جنب المريض وهو خايف ، المره دي ماكنش معاه ورقه وقلم . كان معاه تليفونه .
فتحه وشغل التسجيل لأنه مش في وضع يسمح له انه يكتب اي حرف .
المريض بدء يحكي :
بقيت اكره ابويا زي ماقلت لك ، وكمان مبقيتش اقعد في البيت وكنت ببات بره .
بس كنت بتواصل مع اختي بالتليفون، عايز اطمن عليها ،وكنت خايف عليها قوي .
كذا مره اقول لها سيبي البيت وتعالي عيشي معايا ، انا اجرت شقه .
كانت ترد عليا وتقول لي بطل خيالاتك المريضه دي ، انت لازم تتعالج ، ارجع البيت وبطل الجنان اللي بتفكر فيه ده .
الحت عليا كتير اني ارجع البيت ، لحد ما رجعت في الاخر .
لما رجعت البيت الوقت كان متأخر فتحت باب الشقه ودخلت لأختي .
مادخلتش عند أبويا اشوفه لأني مش طايقه اصلا .
دخلت لأختي وقفت قدام باب اوضتها لأني سمعتها بتعيط جوه !!
اتصنت علشان اعرف هي بتعيط ليه ؟ سمعتها بتعيط وتقول : كان عندك حق تكرهه ده مستحيل يكون اب ده شيطان
لما فتحت الباب لقيت اختي مرميه على الارض وحواليها دم كتير وبتموت . اختي انتحرت
جلال عينيه برقت ، وجسمه بقى متغطي بالعرق ، وبقى خايف ومش مصدق اللي بيقوله المريض !!!!!!!
كمل المريض كلامه : جريت على اختي واترميت عليها وبرفع راسي لقيت ورقه مرميه جنبها .
اخدت الورقه وقرأت اللي فيها
" انا اسفه ماكنش ينفع افضل عايشه لأن حياتي انتهت ، واللي نهاها هو اقرب الناس ليا "
فهمت كل حاجه !!!!
ابويا اعتدى على اختي
الدنيا اسودت في وشي وجريت من اوضة اختي .
جريت على اوضة ابويا ، لقيته منكمش على نفسه وحاطت راسه بين رجليه وبيعيط !!! بص لي وقال مش عارف انا عملت كده ازاي .
صدقني انا ندمان على اللي عملته ، انا معملتش ده بإرادتي ...
دمي فار ، جريت عليه ، سحبته ورميته على الارض .
كان بيترجاني وهو راكع تحت رجلي .
ماسمعتلوش نزلت على الارض وخنقته لحد ما مات ...
جريت وسبت الشقه ، وفضلت اجري لحد رجلي ما جابتني لهنا !!!!
*******
سكت المريض وجلال فضل يبص له وهو مصدوم من اللي قاله .
وقال له جلال بخوف : هو انا هيحصل لي زي ما حصل لك ؟؟؟؟؟؟
ابتسم المريض و قال : لو دخلت البيت هيحصل لك .
اطمن جلال وقال انا مش هدخل البيت .
ضحك المريض جدا وقال له لأ ما انت هتدخله برضاك او غصب عنك .
وانا مش هدخل البيت ده ودي اخر مره هجيلك .
المريض بأصرار : عينيك بتقول غير كده عينيك بتقول انك هتدخل البيت ، وهي كمان بتقول انك هتدخله ...
قام جلال من مكانه واتحرك للباب فالمريض مسك ايده وتبت فيها جامد وقال بنبرة صوت خاف منها جلال : ده عنوان البيت ،مستنيك تشرف جنبي هنا ، انا محتاج ونيس .
جلال خد منه العنوان بسرعه وخرج من المستشفى .
روح بيته، كتب كل اللي حصل في المدونه وقفل ونام ...
*******
صحي جلال على صوت حد بينادي عليه ، بنت بتناديه بأسمه ، قام مفزوع لأن ده مش صوت اخته !!!!
اول ما قام شاف بنت قاعده على السرير و ضهرها ليه .
قال جلال بخوف : انت مين ؟؟؟؟
البنت قامت من مكانها ، وبصة لجلال ،كانت بنت حلوه قوي شعرها نازل لنص رجلها ولونه بني ، وعينيها كانت حلوه جدا ولونها بني ، البنت كانت آيه في الجمال .
سرح جلال شويه في تفاصيلها ، وبعدها وعي ان دي مستحيل تكون بني ادمه دي شبح ، عفريت ، جن ، شيطانه ، اي حاجه غير انها تكون آدميه .
البنت قالت له بصوت ناعم جدا : قوم روح البيت ، انا مستنياك هناك .
جلال زي مايكون البنت دي سيطرة عليه .
لقى نفسه بيقوم ويركب عربيته ويروح عند البيت .
وصل جلال ودخل البيت .
لما دخل لقى نفسه في بيته هو ،ونفس المشهد بيحصل
جلال واقف وابوه راكع على الارض لحد المشهد بيختم بقتله لابوه .
بعد لحظة قتله لابوه بيلاقي كل حاجه اتحولت ل ١٨٠ درجه .
بيلاقي نفسه واقف جوه البيت المسكون و مفيش اي حاجه من اللي شافه .
*******
بيجري جلال ويخرج من البيت وهو في قمة الخوف ، ويجري بالعربيه لحد مايوصل بيته .
ابوه واخته اول ما شافوه اتخضوا من منظره ، جلال منطقش بأي حرف ودخل اوضته وفتح المدونه وكتب كل حاجه حصلت له !!!!!
********
الردود كانت سريعه مئات الرسايل ، كلها بتقول له مايصدقش اللي اتحكى له من الشخص ده ولا يصدق اللي شافه في البيت ده ...
جلال قال لنفسه :
كل ده مش حقيقي !!!!!
المريض ده لعب في نفسيتي وخلاني اصدق كل ده واعتبره امر واقع
بس جلال قفل المدونه واللاب لأنه مقتنع ان ده حصل فعلا .
جلال اصلا بدء يحس بكره لأبوه .
وكره الشقه اللي هو عايش فيها .
كان عايز يخرج من البيت حالا ، بس كان بيحاول ويجاهد نفسه علشان ميصدقش كل ده ...
*******
انا اسمي فريد ، من متابعين مدونة جلال .
كنت بتابع الحكايه دي من اول حلقه على المدونه .
توقف جلال عن نشر الحلقات ، اخر حلقه نزلها هي لما خرج من البيت ، ومبقاش بيكتب ، او يدخل المدونه ، اختفى جلال نهائي
*******
صعب عليا جلال جدا ، وصدقت حكايته .
بقى عندي يقين ان جلال حصل له حاجه ، لإنه مرجعش يحكي تاني .
انا قررت أدور عن عنوان بيته .!
وفعلا عرفت العنوان ، ولما روحت إكتشفت ان جلال اختفى ، بعد ما قتل ابوه ، واخته كمان انتحرت .
قدرت اوصل لصديقه الوحيد ، والحيت عليه علشان اعرف ،اذا كان جلال كتب حاجه عن اللي حصل له قبل ما يختفي ...
وعرفت ان جلال كتب فعلا عن قتله لأبوه وأخر حاجه حصلت له قبل ما يختفي وسابها في الشقه ووصلت لصديقه بعد كده ...
قال جلال : بعد ما قتلت ابويا ، لما شفته بعتدي على اختي .
**********
شاف جلال البنت
ظهرت له بمجرد ما قتل اخته وقالت له : ده جزاء اللي يدخل بيتي ، انا ابويا قضى على حياتي ، بعد ما اعتدى عليا جنسيا ...
انتحرت ، والبيت بقى ملعون اي حد يدخله هيتكرر معاه نفس اللي حصل لي .
انا مقدرتش اموت ابويا ، لكن اقدر اخلي اي حد يدخل بيتي يتكرر معاه اللي حصل ليا ، ويقتل ابوه ، وحياته تدمر .
ليه انا بس اللي حياتي تدمر ؟؟؟؟
ده اللي عرفته و قرأته من اخر ورقه كتبها جلال ...
انا حابب جدا ادخل البيت ، واكتشف اذا كان الكلام ده صح فعلا ، والا دي مجرد حكايه .
انتم ايه رأيكم ، اروح واكتشف حقيقة الحكايه ؟؟؟؟؟
والا مروحش .
بس انا هروح ، وأكيد هكتب لكم كل حاجه اول بأول على صفحتي .
سلاااااام .
تمت
التعليقات على الموضوع