قصة ضحايا
(جميعنا مذنبون....جميعنا ضحايا)
أروح للدكتور أقوله أيه؟، أقوله بنتي بترجع شعر علشان شربت عصير من ست ماتعرفهاش!!
أنا أم زي أي أم؛ بحب بنتي و بخاف عليها بس انا بحب بنتي زيادة شوية عن أي أم تانية لأن بنتي مش زي كل البنات، هى مش مريضة و مش غريبة لكنها من صغرها بتحب تقعد لوحدها و مابتحبش تلعب زي بقية الأطفال و حتى لما كبرت كمان فضلت بتحب الوحدة و بتفضل إنها تبقى منعزلة عن الناس حتى بعد ما خلصت دراستها فضلت قاعدة فالبيت لأن والدها رافض إنها تشتغل و لأننا ف مجتمع شرقي كان لازم الاقيلها عريس و كمان لأن انا شايفه أن لو اتخطبت خطيبها ممكن يخرجها من اللي هي فيه و طبعا أفضل طريقة لإصتياد العرسان هى الافراح علشان كده أي فرح لحد من العيلة أو من الجيران كنت باخدها و بنروح بس برضه المشكلة ماكانتش بتتحل لأنها كانت بتفضل قاعده ساكته و لوحدها لحد ما ف يوم كنا ف فرح واحدة جارتنا و جت ست كبيرة ف السن قعدت جنبي و سألتني عن سن بنتي و قالتلي إنها جايبة لها عريس و العريس ده يبقى أبنها و هو بيشتغل مهندس تعدين و أغلب الوقت بيكون مسافر بسبب شغله و علشان كده هو سايبلها حرية اختيار العروسة و هى شافت أن بنتي محترمة و مؤدبة؛ علشان كده عزمتنا على الغدا عندها بعد أسبوع من يوم الفرح...
خليت (أسماء) بنتي لبست لبس مابيطلعش إلا فالمناسبات و روحنا للست إللي المفروض ابنها هيتعرف على بنتي على أمل إنها تعجبه و يتجوزها، وصلنا البيت إللي كان ف أحد أحياء القاهرة و استقبلتنا الست أحسن استقبال و قدمتلنا مشروب و كانت الصدمة لما الست قالت أن أبنها مقدرش يجي من السفر لأنه وراه شغل كتير و بيعتذر و بيأجل المعاد لأول الشهر اللي جاي، طبعا انا اتضايقت رغم أن الست حاولت بشتى الطرق إنها تخرجنا من جو الزعل بكلامها البايخ اللي بتضحك عليه و هى بتقوله و احنا بنضحك معاها كمجاملة ليها لكن فجأة (أسماء) تعبت جدًا و قالت أن هى عاوزة تدخل الحمام لأن بطنها بتوجعها، دخلت الحمام و خرجت و هي برضه تعبانه و ماسكة بطنها و عشان كده اعتذرت للست و خدت بنتي و روحنا البيت.
وصلنا البيت و أسماء كانت بتتألم بشدة و عمالة تصرخ لأن معدتها كانت بتوجعها، نزلتها المستشفى و الدكتور قال إنها كويسه و كتبلها مسكنات و كام دوا للمعده ف ارتاحت شوية لكن تاني يوم برضه رجعت بطنها توجعها و لما حكيت لخالتها قالتلي إنها ممكن يكون فيها حاجة و محتاجة تروح عند شيخ و قالتلي إنها تعرف واحد كويس و فعلا روحناله و ادالها أزازة فيها ماية و قالها تشربي منها صبح و ليل لمدة ٣ ايام و خد تمنها ٥٠٠ جنيه، ف أول يوم بدأت (أسماء) تبقى ساكته اكتر و انطوائية اكتر و اكتر لحد ما تاني يوم دخلت عليها الأوضه بتاعتها و حاولت اتكلم معاها لكنها كانت بتبصلي و هى ساكته كأنها مش واعية و لا مدركه اللي حواليها، مسكتها من دراعتها و قعدت اهز فيها علشان تفوق لكن برضه ماكانتش بترد لحد ما ضربتها بالقلم و أول ما عملت كده لقتها فتحت بقها و فضلت ترجع على السرير بس كانت بترجع شعر....
- طب و انتي ليه ما وديتيهاش عند دكتور تاني؟
- أروح للدكتور أقوله أيه؟، أقوله بنتي بترجع شعر علشان شربت عصير من ست ماتعرفهاش!!، أنا جيت لحضرتك لما قالولي لازم اوديها لدكتور نفسي.
- طيب اتفضلي استريحي بره و انا هقعد اتكلم مع أسماء شوية و لما اخلص هنادي على حضرتك.
******************
شاب أسمر و طويل، بيجيلي كل يوم بالليل ف أوضتي بعد ما بابا و ماما يناموا.....
دايمًا كنت بحس أن انا غريبة عن الناس و ماليش صحاب و لا أهل، يمكن ده لأني ماليش اخوات و ماما على طول مش بتكون موجودة فالبيت و بابا طول اليوم فالشغل، مانكرش أنهم بيحاولوا يعوضوني ماديًا و خصوصًا بعد ما تيته أم ماما ماتت و ماما ورثت منها كل فلوسها و أملاكها لأنها هى الكبيرة لكن برضه كنت لوحدي و ماليش صاحبات.
كنت دايمًا بحس من نظرات بابا أن انا عامله عمله أو وجودي فحياته مش مرغوب فيه و كنت بحس أن انا بنت ماما و بس رغم أن ماما برضه كانت بتبقى دايمًا مشغولة عني إلا أنها كانت بتحاول ترضيني لحد ما ف يوم خدتني و روحنا للست اللي ابنها المفروض هيشوفني عشان يخطبني، يومها الست حطتلنا عصير من بعد ما شربته و انا معدتي بقت بتوجعني بس مش دي المشكلة، المشكلة أن ماما حالها اتبدل هى كمان و بقت بتعمل حاجات غريبه و بقت بتقعد ف أوضتها بالليل لوحدها كتير و ماكانتش بتبقى جنبي و انا تعبانه و برغم أنها ودتني للدكتور اللي بعد ما كشف عليا قال أن معدتي سليمه و المغص اللي بيجيلي ده موضوع عابر إلا أنها برضه كانت مش مظبوطه و مش مهتمه بيا حتى نص الاهتمام بتاع الأول لحد ما تاني يوم قولتلها أن انا الوجع اللي ف بطني هيموتني ردت عليا و قالتلي اتصلي بخالتك و هى تشوفلك حل و لما اتصلت بخالتي و حكيت لها قالتلي أديني أمك وغالبا قالتلها أننا لازم نروح لشيخ و فعلا روحناله و اداني أزازة فيها مايه شكلها غريب من ساعة ما شربتها و انا بقيت بحس أني تايهة و مش دريانة بحاجة من اللي حواليا و بقيت لما بيجي الليل عليا و انا لوحدي ف أوضتي بشوف حاجات غريبة و تحديدًا كنت بشوف شاب أسمر و طويل، بيجيلي ف أوضتي بعد ما بابا و ماما يناموا، لحد ما تاني يوم ماما جت قعدت جنبي و فضلت تكلمني لكني برضه كنت تايهة و كنت حاسة أن انا مش سامعها، وقتها سابتني و دخلت المطبخ و خرجت ب أزازة فيها ماية من اللي الشيخ اداهلنا و خلتني اشربها و بعد ما شربتها لقيت بطني وجعتني اوي و حسيت ان انا عندي شعور بالترجيع و غصب عني لقيت نفسي مش قادرة اتنفس لحد ما ماما ضربتني بالقلم و قالتلي بطلي دلع و أول ما عملت كده لقيت نفسي برجع شعر أسود، حصل اللي حصل ده و زعقت مع أمي و قولتلها أن انا مش مرتاحة للشيخ و لازم اروح لدكتور نفسي و بابا جاب عنوان حضرتك و لأنه مشغول أنا جيت لحضرتك تشوفلي و تشوفلها حل......
- طيب يا أسماء بصي، أنا هكتبلك علاج تمشي عليه لمدة شهر و بعد كده تجيلي و العلاج ده هكتبه لمامتك تحطيهولها فالعصير و هى هترجع أحسن و بأذن الله ماتقلقيش، و ده عنوان دكتور باطنة كويس تروحي تعملي عنده سونار و تخليه يكشف عليكي و تجيبيلي التقرير بتاعه أول ما يطلع.
- حاضر يا دكتور هعمل كل اللي قولت عليه.
***********************
هي السبب ف كل اللي حصل، بقالها فترة كبيرة بتقعد فالأوضة لوحدها فالضلمة و تفضل تكلم نفسها و كانت تعباني و تاعبه البنت معاها.....
كنا كويسين لحد ما من حوالي اسبوع بقت غريبة و بقت تكلم ناس مش موجودة و بقت تروح لدجالين و تشرب بنتي مايه فيها سحر و كانت بتشرب منها هى كمان لحد ما ف يوم بنتي رجعت شعر ساعتها قولتلهم إنهم لازم يروحوا لدكتور نفسي و جبتلهم عنوان دكتور و راحوا عنده و حضرتك ممكن تسأله، بس حتى بعد ما راحوا للدكتور حالتها كانت بتسوء لحد ما امبارح رجعت من الشغل و فتحت باب الشقة و دخلت و أول ما دخلت لقيتها دابحة البنت و قاطعه شراينها و نايمه جنبها.....
- أهدى طيب يا استاذ راضي أهدى، أنا مقدر اللي انت فيه، البقاء لله و حقيقي مش عارف اقولك ايه بس لازم تمضي على اقوالك و انا هستجوب الدكتور و بعد كده هقفل القضية.
- ياريت يا بيه أقدر استلم جثثهم و ادفنها من غير شوشرة مش هتبقى بهدلة و هم احياء و فضيحة و هم اموات و انا مش ناقص بصراحه موت و خراب ديار.
************************
أنا ماعملتش حاجة زيادة عن واجبي، أدعيلي بس و ابقى افتكرني زي ما وعدتني.
أنا نفذت اهو كل اللي انت قولت عليه يا (راضي) يا ابني؛ من أول ما روحت قعدت معاها ف فرح جارتكم لحد ما سقيتهم العصير اللي معمول بالمايه اللي اديتهالي، أظن كده يبقى عداني العيب.
- والله ما عارف اقولك أيه يا ماما سعاد، انتي عملتي معايا اللي أمي لو كانت عايشه ماكانتش هتعمله.
- أنا ماعملتش حاجة زيادة عن واجبي، أدعيلي بس و ابقى افتكرني زي ما وعدتني.
- ما تقلقيش زي ما وعدتك اهو، دول ٥٠ الف جنيه.
- تسلم أيدك يا حبيبي، بس عارف؛ هي تستاهل كل اللي جرالها هى و بنتها بنت الحرام دي.
- اه والله عندك حق، و لولا أن انتي خلتيني وعيت أننا مابنخلفش ليه بعد البنت عمري ما كنت هعرف أنها مش بنتي و عمري ما كنت هروح اعمل تحاليل و اكتشف أن انا مابخلفش، بس ساعة ما عرفت مابقتش عارف اعمل ايه ولا اتصرف ازاي لحد ما ف يوم لقيت ام نجوى اختها بتتصل بيا و بتقولي أن هي حاطة أيدها على كل الورث بتاعهم لأنها الكبيرة و مش راضية تديها جنيه واحد، ساعتها حكيتلها و قولتلها على اللي اكتشفته و اتصدمت أنها كانت على علاقة ب ابن خالتهم اللي كانت بتحبه قبل ما تتجوزني و لأن ماكنش ينفع اقتلها و لا كان ينفع اختها تقتلها علشان تاخد منها حقها ف الست الله يباركلها فكرت ف فكرة أننا نعملها سحر و نخليها تتجنن هي و بنتها بس الشهادة لله برضه لما جيت حكتلك أنتي خططتي صح و كانت فكرتك أنك تعملي نفسك أم عريس و تحطيلها السحر فالعصير لأنها ماتعرفش أنك جارتي و جارة أهلي من زمان و انتي اللي مربياني.
- يا ابني اللي حصل ده كان لازم يحصل، الست دي كانت شيطانه و بعدين مش كفاية أنها خلتك تربي بنت مش بنتك و بصراحة أنت كمان استفدت و طلعت بقرشين حلوين و اديت ل اختها حقها.
- اه و انتي كمان طلعتي بقرشين حلوين بس بصراحة مش خسارة فيكي و لا خسارة فالدكتور النفسي اللي كتب لهم على برشام يخليهم يهلسوا و حالتهم تسوء و لا خسارة ف الرجل الدجال المبلغ اللي خده علشان يعملهم سحر و يخليها تتجنن هي و بنتها بس الظاهر برشام الهلاوس مع السحر خلاها تشوف بنتها جن و تقتله.
- يلا خدوا نصيبهم، المهم دلوقتي انت مالي إيدك من الدكتور ده، لا يغلط بكلمة كده ولا كده قصاد الظابط.
- يا ستي ماتقلقيش، الدكتور هيقول أنها كانت بتعاني من اضطرابات نفسيه و خلت البنت هي كمان تتعب بسببها و هو كتب لهم مهدئ و كده كده تأثير البرشام اللي خدوه مش بيبان فالتشريح زي ما قالي ف الأمور متظبطه من الناحية دي و من ناحية الرجل الدجال كمان؛ اللي خد القرشين اللي خدهم و اختفى تمامًا بعد ما ام نجوى قالتله أنه ما يظهرش خالص.
- طيب كده تمام، اعملك عصير؟؟؟
- ههههه، لأ عصير ايه أنا ماليش فالعصير، خليها قهوة على روح الخاينة و بنتها بنت الحرام.
***********************
أقفلت القضية على إنها حالة انتحار لسيدة مريضة نفسيًا قتلت أبنتها ثم انتحرت و ذلك بناءًا على تقارير الطب الشرعي و شهادة الطبيب النفسي المعالج و شهادات الشهود و بذلك يرث الزوج كل أملاك و أموال المنتحرة و يقوم بتقسيم الميراث على أخواتها.
تمت
#محمد_شعبان
أروح للدكتور أقوله أيه؟، أقوله بنتي بترجع شعر علشان شربت عصير من ست ماتعرفهاش!!
أنا أم زي أي أم؛ بحب بنتي و بخاف عليها بس انا بحب بنتي زيادة شوية عن أي أم تانية لأن بنتي مش زي كل البنات، هى مش مريضة و مش غريبة لكنها من صغرها بتحب تقعد لوحدها و مابتحبش تلعب زي بقية الأطفال و حتى لما كبرت كمان فضلت بتحب الوحدة و بتفضل إنها تبقى منعزلة عن الناس حتى بعد ما خلصت دراستها فضلت قاعدة فالبيت لأن والدها رافض إنها تشتغل و لأننا ف مجتمع شرقي كان لازم الاقيلها عريس و كمان لأن انا شايفه أن لو اتخطبت خطيبها ممكن يخرجها من اللي هي فيه و طبعا أفضل طريقة لإصتياد العرسان هى الافراح علشان كده أي فرح لحد من العيلة أو من الجيران كنت باخدها و بنروح بس برضه المشكلة ماكانتش بتتحل لأنها كانت بتفضل قاعده ساكته و لوحدها لحد ما ف يوم كنا ف فرح واحدة جارتنا و جت ست كبيرة ف السن قعدت جنبي و سألتني عن سن بنتي و قالتلي إنها جايبة لها عريس و العريس ده يبقى أبنها و هو بيشتغل مهندس تعدين و أغلب الوقت بيكون مسافر بسبب شغله و علشان كده هو سايبلها حرية اختيار العروسة و هى شافت أن بنتي محترمة و مؤدبة؛ علشان كده عزمتنا على الغدا عندها بعد أسبوع من يوم الفرح...
خليت (أسماء) بنتي لبست لبس مابيطلعش إلا فالمناسبات و روحنا للست إللي المفروض ابنها هيتعرف على بنتي على أمل إنها تعجبه و يتجوزها، وصلنا البيت إللي كان ف أحد أحياء القاهرة و استقبلتنا الست أحسن استقبال و قدمتلنا مشروب و كانت الصدمة لما الست قالت أن أبنها مقدرش يجي من السفر لأنه وراه شغل كتير و بيعتذر و بيأجل المعاد لأول الشهر اللي جاي، طبعا انا اتضايقت رغم أن الست حاولت بشتى الطرق إنها تخرجنا من جو الزعل بكلامها البايخ اللي بتضحك عليه و هى بتقوله و احنا بنضحك معاها كمجاملة ليها لكن فجأة (أسماء) تعبت جدًا و قالت أن هى عاوزة تدخل الحمام لأن بطنها بتوجعها، دخلت الحمام و خرجت و هي برضه تعبانه و ماسكة بطنها و عشان كده اعتذرت للست و خدت بنتي و روحنا البيت.
وصلنا البيت و أسماء كانت بتتألم بشدة و عمالة تصرخ لأن معدتها كانت بتوجعها، نزلتها المستشفى و الدكتور قال إنها كويسه و كتبلها مسكنات و كام دوا للمعده ف ارتاحت شوية لكن تاني يوم برضه رجعت بطنها توجعها و لما حكيت لخالتها قالتلي إنها ممكن يكون فيها حاجة و محتاجة تروح عند شيخ و قالتلي إنها تعرف واحد كويس و فعلا روحناله و ادالها أزازة فيها ماية و قالها تشربي منها صبح و ليل لمدة ٣ ايام و خد تمنها ٥٠٠ جنيه، ف أول يوم بدأت (أسماء) تبقى ساكته اكتر و انطوائية اكتر و اكتر لحد ما تاني يوم دخلت عليها الأوضه بتاعتها و حاولت اتكلم معاها لكنها كانت بتبصلي و هى ساكته كأنها مش واعية و لا مدركه اللي حواليها، مسكتها من دراعتها و قعدت اهز فيها علشان تفوق لكن برضه ماكانتش بترد لحد ما ضربتها بالقلم و أول ما عملت كده لقتها فتحت بقها و فضلت ترجع على السرير بس كانت بترجع شعر....
- طب و انتي ليه ما وديتيهاش عند دكتور تاني؟
- أروح للدكتور أقوله أيه؟، أقوله بنتي بترجع شعر علشان شربت عصير من ست ماتعرفهاش!!، أنا جيت لحضرتك لما قالولي لازم اوديها لدكتور نفسي.
- طيب اتفضلي استريحي بره و انا هقعد اتكلم مع أسماء شوية و لما اخلص هنادي على حضرتك.
******************
شاب أسمر و طويل، بيجيلي كل يوم بالليل ف أوضتي بعد ما بابا و ماما يناموا.....
دايمًا كنت بحس أن انا غريبة عن الناس و ماليش صحاب و لا أهل، يمكن ده لأني ماليش اخوات و ماما على طول مش بتكون موجودة فالبيت و بابا طول اليوم فالشغل، مانكرش أنهم بيحاولوا يعوضوني ماديًا و خصوصًا بعد ما تيته أم ماما ماتت و ماما ورثت منها كل فلوسها و أملاكها لأنها هى الكبيرة لكن برضه كنت لوحدي و ماليش صاحبات.
كنت دايمًا بحس من نظرات بابا أن انا عامله عمله أو وجودي فحياته مش مرغوب فيه و كنت بحس أن انا بنت ماما و بس رغم أن ماما برضه كانت بتبقى دايمًا مشغولة عني إلا أنها كانت بتحاول ترضيني لحد ما ف يوم خدتني و روحنا للست اللي ابنها المفروض هيشوفني عشان يخطبني، يومها الست حطتلنا عصير من بعد ما شربته و انا معدتي بقت بتوجعني بس مش دي المشكلة، المشكلة أن ماما حالها اتبدل هى كمان و بقت بتعمل حاجات غريبه و بقت بتقعد ف أوضتها بالليل لوحدها كتير و ماكانتش بتبقى جنبي و انا تعبانه و برغم أنها ودتني للدكتور اللي بعد ما كشف عليا قال أن معدتي سليمه و المغص اللي بيجيلي ده موضوع عابر إلا أنها برضه كانت مش مظبوطه و مش مهتمه بيا حتى نص الاهتمام بتاع الأول لحد ما تاني يوم قولتلها أن انا الوجع اللي ف بطني هيموتني ردت عليا و قالتلي اتصلي بخالتك و هى تشوفلك حل و لما اتصلت بخالتي و حكيت لها قالتلي أديني أمك وغالبا قالتلها أننا لازم نروح لشيخ و فعلا روحناله و اداني أزازة فيها مايه شكلها غريب من ساعة ما شربتها و انا بقيت بحس أني تايهة و مش دريانة بحاجة من اللي حواليا و بقيت لما بيجي الليل عليا و انا لوحدي ف أوضتي بشوف حاجات غريبة و تحديدًا كنت بشوف شاب أسمر و طويل، بيجيلي ف أوضتي بعد ما بابا و ماما يناموا، لحد ما تاني يوم ماما جت قعدت جنبي و فضلت تكلمني لكني برضه كنت تايهة و كنت حاسة أن انا مش سامعها، وقتها سابتني و دخلت المطبخ و خرجت ب أزازة فيها ماية من اللي الشيخ اداهلنا و خلتني اشربها و بعد ما شربتها لقيت بطني وجعتني اوي و حسيت ان انا عندي شعور بالترجيع و غصب عني لقيت نفسي مش قادرة اتنفس لحد ما ماما ضربتني بالقلم و قالتلي بطلي دلع و أول ما عملت كده لقيت نفسي برجع شعر أسود، حصل اللي حصل ده و زعقت مع أمي و قولتلها أن انا مش مرتاحة للشيخ و لازم اروح لدكتور نفسي و بابا جاب عنوان حضرتك و لأنه مشغول أنا جيت لحضرتك تشوفلي و تشوفلها حل......
- طيب يا أسماء بصي، أنا هكتبلك علاج تمشي عليه لمدة شهر و بعد كده تجيلي و العلاج ده هكتبه لمامتك تحطيهولها فالعصير و هى هترجع أحسن و بأذن الله ماتقلقيش، و ده عنوان دكتور باطنة كويس تروحي تعملي عنده سونار و تخليه يكشف عليكي و تجيبيلي التقرير بتاعه أول ما يطلع.
- حاضر يا دكتور هعمل كل اللي قولت عليه.
***********************
هي السبب ف كل اللي حصل، بقالها فترة كبيرة بتقعد فالأوضة لوحدها فالضلمة و تفضل تكلم نفسها و كانت تعباني و تاعبه البنت معاها.....
كنا كويسين لحد ما من حوالي اسبوع بقت غريبة و بقت تكلم ناس مش موجودة و بقت تروح لدجالين و تشرب بنتي مايه فيها سحر و كانت بتشرب منها هى كمان لحد ما ف يوم بنتي رجعت شعر ساعتها قولتلهم إنهم لازم يروحوا لدكتور نفسي و جبتلهم عنوان دكتور و راحوا عنده و حضرتك ممكن تسأله، بس حتى بعد ما راحوا للدكتور حالتها كانت بتسوء لحد ما امبارح رجعت من الشغل و فتحت باب الشقة و دخلت و أول ما دخلت لقيتها دابحة البنت و قاطعه شراينها و نايمه جنبها.....
- أهدى طيب يا استاذ راضي أهدى، أنا مقدر اللي انت فيه، البقاء لله و حقيقي مش عارف اقولك ايه بس لازم تمضي على اقوالك و انا هستجوب الدكتور و بعد كده هقفل القضية.
- ياريت يا بيه أقدر استلم جثثهم و ادفنها من غير شوشرة مش هتبقى بهدلة و هم احياء و فضيحة و هم اموات و انا مش ناقص بصراحه موت و خراب ديار.
************************
أنا ماعملتش حاجة زيادة عن واجبي، أدعيلي بس و ابقى افتكرني زي ما وعدتني.
أنا نفذت اهو كل اللي انت قولت عليه يا (راضي) يا ابني؛ من أول ما روحت قعدت معاها ف فرح جارتكم لحد ما سقيتهم العصير اللي معمول بالمايه اللي اديتهالي، أظن كده يبقى عداني العيب.
- والله ما عارف اقولك أيه يا ماما سعاد، انتي عملتي معايا اللي أمي لو كانت عايشه ماكانتش هتعمله.
- أنا ماعملتش حاجة زيادة عن واجبي، أدعيلي بس و ابقى افتكرني زي ما وعدتني.
- ما تقلقيش زي ما وعدتك اهو، دول ٥٠ الف جنيه.
- تسلم أيدك يا حبيبي، بس عارف؛ هي تستاهل كل اللي جرالها هى و بنتها بنت الحرام دي.
- اه والله عندك حق، و لولا أن انتي خلتيني وعيت أننا مابنخلفش ليه بعد البنت عمري ما كنت هعرف أنها مش بنتي و عمري ما كنت هروح اعمل تحاليل و اكتشف أن انا مابخلفش، بس ساعة ما عرفت مابقتش عارف اعمل ايه ولا اتصرف ازاي لحد ما ف يوم لقيت ام نجوى اختها بتتصل بيا و بتقولي أن هي حاطة أيدها على كل الورث بتاعهم لأنها الكبيرة و مش راضية تديها جنيه واحد، ساعتها حكيتلها و قولتلها على اللي اكتشفته و اتصدمت أنها كانت على علاقة ب ابن خالتهم اللي كانت بتحبه قبل ما تتجوزني و لأن ماكنش ينفع اقتلها و لا كان ينفع اختها تقتلها علشان تاخد منها حقها ف الست الله يباركلها فكرت ف فكرة أننا نعملها سحر و نخليها تتجنن هي و بنتها بس الشهادة لله برضه لما جيت حكتلك أنتي خططتي صح و كانت فكرتك أنك تعملي نفسك أم عريس و تحطيلها السحر فالعصير لأنها ماتعرفش أنك جارتي و جارة أهلي من زمان و انتي اللي مربياني.
- يا ابني اللي حصل ده كان لازم يحصل، الست دي كانت شيطانه و بعدين مش كفاية أنها خلتك تربي بنت مش بنتك و بصراحة أنت كمان استفدت و طلعت بقرشين حلوين و اديت ل اختها حقها.
- اه و انتي كمان طلعتي بقرشين حلوين بس بصراحة مش خسارة فيكي و لا خسارة فالدكتور النفسي اللي كتب لهم على برشام يخليهم يهلسوا و حالتهم تسوء و لا خسارة ف الرجل الدجال المبلغ اللي خده علشان يعملهم سحر و يخليها تتجنن هي و بنتها بس الظاهر برشام الهلاوس مع السحر خلاها تشوف بنتها جن و تقتله.
- يلا خدوا نصيبهم، المهم دلوقتي انت مالي إيدك من الدكتور ده، لا يغلط بكلمة كده ولا كده قصاد الظابط.
- يا ستي ماتقلقيش، الدكتور هيقول أنها كانت بتعاني من اضطرابات نفسيه و خلت البنت هي كمان تتعب بسببها و هو كتب لهم مهدئ و كده كده تأثير البرشام اللي خدوه مش بيبان فالتشريح زي ما قالي ف الأمور متظبطه من الناحية دي و من ناحية الرجل الدجال كمان؛ اللي خد القرشين اللي خدهم و اختفى تمامًا بعد ما ام نجوى قالتله أنه ما يظهرش خالص.
- طيب كده تمام، اعملك عصير؟؟؟
- ههههه، لأ عصير ايه أنا ماليش فالعصير، خليها قهوة على روح الخاينة و بنتها بنت الحرام.
***********************
أقفلت القضية على إنها حالة انتحار لسيدة مريضة نفسيًا قتلت أبنتها ثم انتحرت و ذلك بناءًا على تقارير الطب الشرعي و شهادة الطبيب النفسي المعالج و شهادات الشهود و بذلك يرث الزوج كل أملاك و أموال المنتحرة و يقوم بتقسيم الميراث على أخواتها.
تمت
#محمد_شعبان
التعليقات على الموضوع