عذبني حبك الحلقة 31

الفصل الحادي والثلاثون

وتمر الساعات ويأتي الليل بظلامه الكاحل، فيسود بظلامه الكون، ويغفي من يغفل، ونجد من سهران يجافيه النوم، يتأمل بوجه القمر ويناجيه، ويشكو له من عذابه والامه، حتي لا يشعر بنفسه والشمس تشرق بضياءها معلنه يوم جديد مملوء بالامل والتفاؤل، علي الجميع، فينتبه ايهاب بأشراقه الشمس فيحدث نفسه مرددا،،

- ياااه انا معقول محستش بنفسي كل ده، وانا سهران الفجر شقشق ولا انا داري بحالي، اااه يانوري سرقتي النوم من عينيا، ربنا يسامحك ياشيخه، مش عارف انام خالص اااه ياربي،،،

#عذبني حبگ بقلم إيمووو كمال

في مكان اخر بعيد مازالت تجلس نانسي في غرفة العنايه المركزه الخاصه بالجراحه، وبجوارها ادم الذي يطمئن عليها بإستمرار، وانصرف عنها، ودلف الي مكتبه ليجري اتصالا الي عمه حتي يطمئنه عليها، وانتظر الرد، ثم قال؛؛

- مساء الخير ياعمي

سمير بلهفه، يقول،،،

ايوة يا ادم يابني اخبار نانسى ايه طمني عليها

ادم بفرحه، يرد عليه،،،

الحمدلله والشكر لله ياعمي، فاقت وزي الفل، هي بس هتستمر في العنايه المركزه بالجراحه كمان يومين، وبعدين هتروح عنايه عادية لمده ٣او اربع ايام كمان، وبعدين تنتقل غرفه عاديه

سمير بقلق،،،

يااه كل ده، طب انا عايز اشوفها، امها مش مبطله عياط عشانها

ادم بضيق، يقول،،،

ياعمي مينفعش كده، هي الحمدلله في استجابه وحست برجليها، بلاش تخلي طنط تعيط، وحضرتك اكيد عارف ان الزيارة في الوقت ده حرج ومينفعش خالص صدقني، وانا بطمنك اهو

سمير برجاء، يقول،،

طب يا ابني عشان خاطري، نشوفها حتي من وراء الزجاج نطمن بس عليها

ادم بضعف، يرد قائلا،،

خلاص ياعمي، تعالي وانا هخليك تشوفها من ورا الزجاج بس هتروح بعدها اتفقنا

سمير بفرحه، يقول،،

اتفقنا يابني، مسافه الطريق وهكون عندك

ادم؛ متتحركش ياعمي، انا بعتلك السواق بالعربيه، هو علي وصول عقبال ما تجهز يكون وصلك

سمير بحب، يقول،،،

ربنا يكرمك يا ادم يابني، انت فعلا نعم الابن والله

ادم؛ علي ايه بس ياعمي، حضرتك عارف غلاوتك عندي في مقام بابا الله يرحمه، ربنا يديك الصحه ويبارك في عمرك يارب

سميربنبره حانيه يقول،،،

ويبارك فيك ياادم يارب، ويعوضك خير ان شاء الله علي اللي بتعمله معانا يارب

ادم بترجي،،،

يارب ياعمي، يفرحنا بشفاء نانسي، ويجمعني بيها علي خير يارب

سمير؛ يارب يابني، اسيبك انا عشان اجهز

واغلق معه وتوجه الي زوجته، فوجدها جالسه حزينة تبكي فقال لها،،،

- يالا يازهيرة امسحي دموعك دي، وقومي صلي معايا ركعتين شكر لربنا، نانسي فاقت وادم هيبعت العربيه عشان نشوفها

زهيرة بفرحه، تقول،،،

بجد ياسمير، فاقت والنبي صحيح وكويسه كده وبتتكلم

سمير بفرحه قال،،،

اه والله ادم لسه قافل معايا، يالا بقي روحي اجهزي واتوضي وانا كمان هتوضي

زهيرة تركض مسرعا لتبديل ملابسها، وتوجه لتتوضأ لتصلي ركعتان لله شكر لرب العالمين، وبعد مضي حوالي ربع ساعة وصل السائق ودلفوا الي المشفي، واستقبلهم ادم وتوجهوا الي غرفة العنايه، وشاهدوا ابنتهم خلف الزجاج، وشاورت لهم بايديها بضعف، ثم انصرفوا في هدوء، داعيين الله ان تمر الايام القادمة علي خير

#عذبني حبگ بقلم إيمووو كمال

ومر الوقت واذا بفارس ياتي ويطرق غرفة صديقه طالبا الاستئذان للدخول، فقام بفتح الباب له فوجده امامه فقال،،

- ياعم ايه الادب اللي نزل عليك ده، ما تتدخل علي طول

فارس ينظر الي غرفته بتعجب وذهول يقول،،.

- ايه اللي قلب كيان الاوضة كده، يانهاري عليك

ايهاب بحيرة، ممسكا بيده اليمني بدله واليسري بدله اخري وثم يقول،،،

مش عارف يافارس اختار اي بدله انزل بيها، نور هي اللي كانت بتعملي كل حاجه، وبتجهزلي كل كبيرة وصغيرة في حياتي، انا مش عارف اعيش من غيرها يافارس، مش عارف ولا قادر، انا تعبت اوي من غيرها،،،، ثم يجلس علي فراشه ويضع يده علي راسه وينظر لاسفل

فارس يقترب منه ويذيل يده ويسنده ليقف امامه، ثم يردد قائلا،،

- اجمد ياصاحبي، ازمه وهتعدي، وبكرة هتبقي ذكري تفتكرها من وقت للتاني، وان كان علي البدله ياسيدي، دي اسهل حاجه، انا هختار معاك ياصاحبي

* وتقع عينه علي بدله باللون الاسود، غايه في الجمال والذوق الرفيع، فيمسكها ويقول له،،،

- هي دي ياهوبا، ومعايا القميص الابيض ده، والجيرافت الاسود ×الابيض كده تمام اوي

ايهاب ينظر لما اختار نظرة حزينه ثم يقول،،،

انت عارف البدله دي، اخر حاجه اختارتها نور ليا واشترتها لما كنا في رحلة لبنان، غير طبعا بدله الخطوبه الشوم اللي قطعتها عشان متفكرنيش باليوم ده

فارس بنظرة عطف،،،

انسي يا ايهاب، حاول تنسي، وفكر بس النهاردة فيها، وكويس انك هتلبس البدله دي بالذات، عشان تحس انك فاكرها

ايهاب بتنهيده،،،

وهو انا امتي نستها ياصاحبي

فارس بنظرة تشجيع،،،

طيب ممكن بقي تدخل تاخد شور وتجهز عشان نلحق

ايهاب ينهض ثم يقول،،،

حاضر، هجهز وانزل علي طول

وبعد مرور بعض الوقت، جهز ودلف اليه متوجها الي مكان تسجيل البرنامج، واذا تتفاجأ نور بوجوده داخل البلاتوه، فتتعجب وتسأله،،،

- ممكن اعرف انت بتعمل ايه هنا؟

ايهاب بنظرة شوق، وحنين يقول،،،

وحشتيني اووي يانور عيني

نور تنظر في مقلتيه فتجد نظرة تعلمها جيدا، نظرة كلها حب وشوق، فتسرح فيهما،وتنظر الي ثيابه، وتكتشف انه يرتدي نفس البذله التي قامت بشراءها له، فتحاول ان تداري فرحتها، ثم تفوق وتقول؛؛؛

- مجاوبتش علي سؤالي؟

ايهاب ببرود يضع قدما علي الاخرى، وبيده يحرك الميدليه ذات القلب الماسيه التي اهدتها له في رحلة لبنان، فنظر اليها ولاحظ انها تنظر لما بين يده بحزن، فشتد بها ثم نظر لها بحب وقال،،،

انا ضيف هنا، زي زيك

نور بضيق وغضب،،،

طب انا همشي، ومش هسجل لو كنت اعرف انك موجود مكنتش هوافق

فارس بهدوء قال،،،،

اعقلي يانور، مينفعش كده، بلاش عشان خاطري انا ياستي، عشان خاطر الجمهور اللي حاضر هنا، وجمهورك اللي بيشوف الحلقه، دي علي الهوا مباشراََ، ينفع كده تكسفي الجمهور

نور تصمت لحظات، ثم تقول بعد تفكير؛ خلاص مش همشي، بس متخلهوش يوجهلي كلام اتفقنا

فارس بتنهيده عاليه،،،،

مينفعش اوعدك، عشان انتوا الاثنين جايين، بعد نجاح اول دويتو ليكوا، يعني احتمال كبير هتغنوا مع بعض

نور باعتراض تنظر له نظرة كلها شرار،،،،

لا كده كتير، انا مش لاعبه

ايهاب يطلق ضحكه عاليه، ثم قال مبتسما،،،

حلوة اوي مش لاعبه دي، هو حد قالك اننا جايين نلعب يانوري

نور بتعصب وحده تقول،،،

لو سمحت بلاش نوري دي، اسمي نور بس

ايهاب يقترب منها اكثر، ويهمس لها، فيري نظرة حبها له برغم عنادها فيقول،،،

- لا انتي نوري انا، اللي ظلم من بعد ما سبتيني

نور بنظرة حزن وعتاب،،،،

ومين كان السبب في البعاد والظلمه دي، مش انت، استحمل بقي النتيجه، وقلبي اللي كسرته وجاي دلوقتي ماسكه وبتبينه ليا للاسف انت ضيعته يا ايهاب ومحافظتش عليه

ايهاب بنظرة حزن وندم،،،

غلطت ورجعت ندمان حزين، سامحي يانور بقي

نور بنفس الألم والحزن،،،،

انت ممكن تكون متصور اني مبالغه واوفر يا ايهاب، لكن انا فعلا لو قادرة اسامح كنت سامحتك من زمان والله، لكن قلبي لسه مجروح، ارجوك، سبني اداوي جرحي لوحدي

ايهاب ممسكاََ يداها بحب وينظر لها في عينيها ويقول،،،

خليني اداوي معاكي جروحك، واطيبها معاكي يانوري، ارجوكي

نور تشد يداها وتركض مسرعا رافضة اي تأثير من جانبه عليها،،،

ايهاب يوجه نظره لفارس مرددا،،،

شوفت عنادها يافارس هيوصلنا لفين

فارس بضيق،،،

اللي شايفه قدامي، واحده عاشقه بتقاوم حبها، لانها مجروحه منك، ومش قادرة تقف قدامك عشان متضعفش يا ايهاب، انا شوفت نظرة الحب اللي في عينها ليك، بس هي بتكابر معلش يا صاحبي استحمل

ايهاب بحزن وتنهيده،،

وهو ده اللي معذبني يافارس، اني شايف الحب في عينيها، بس بتعاند وتكابر، بتعذب قلبها وقلبي معاها، لكن هستحمل اي حاجه عشانها، مهما تعمل هصبر عشان افوز بيها تاني،، يالا اسيبك عشان المذيعه اهي وصلت، وتقريبا هينادوا نور

#عذبني حبگ بقلم إيمووو كمال

وتجلس المذيعه، وترحب بالضيوف، ثم يبدا التسجيل فتقول؛؛؛

- مساء الخير أعزائي مشاهدي برنامج ضيف على الهوا، ضيوفنا النهاردة حققوا شهرة غير طبيعيه، برغم انها لسه مبتدأه في الغناء لكن بصوتها العذب لفتت انظار الجميع اليها، والجميع تنبأ لها بمستقبل باهر في الغناء... معانا ومعاكوا مطربنا المحبوب، ايهاب عمر ومعه المطربه الصاعده التي حققت نجاح كبير في دويتو ولا عارف مع مطربنا نجاح كبير جدا في اخر البوم له المطربه نور زين الدين،،،

المذيعه تنظر لها ببتسامه تقول،،،

اهلا بالمطربه الجميله نور

نور بابتسامة : شكرا لحضرتك، بس كلمه صاعده دي كتيرة عليا اوي والله

المذيعه؛ ابدا انتي فعلا موهوبه يانور

المذيعه تنظر لايهاب متردده؛ اهلا بمطربنا المحبوب ايهاب، شرفتنا

ايهاب ببتسامه؛ الشرف ليا يافندم، وسعيد بوجودي معاكوا

المذيعه توجه سؤالها له قائله،، عايزين نعرف بقي ازاي اكتشفت صوت نور، وامتي قررت تعمل معاها الدويتو

ايهاب ينظر لنور ثم يقول،،،

بالصدفه بصراحه سمعت نور بتغني، وعجبني صوتها اوي واحساسها كان عالي جدا، فبحثت عن كلمات دويتو يكون مناسب كلماته مع صوتها، ولاقيته وحاولت اقنعها بيه، ووافقت وغنناه والحمدلله حقق نجاح كبير بفضل الله

المذيعه توجه سؤالها لنور مردده،،

وانتي يانور وافقتي علي طول اول ما عرض عليكي الفكره؟ وامتي اكتشفتي جمال صوتك.؟

نور تنظر اليه مردده،،،

اولا انا بشكر استاذ ايهاب علي تشجيعه ليا، وتقديمي للجمهور، ثانيا انا والدي اكتشف فيا صوتي منذ صغر سني بس كان خايف عليا جدا من الوسط الفني، فرفض تماما اني اغني، وانا من حبي... "سكت ولم تكملها" .... واشتغلت مديرة اعمال لكتير من المطربات، وحققت شهرة بين الوسط كبيرة ونسيت خالص الموضوع، لحد ما ايهاب قرر اني اغني معاه، خوفت ورفضت في الاول، لكن تحت اصراره واقتناعه بيا وفقت، والحمدلله

المذيعه تنظر لها،،،

طب مش هنسمع اغنيه من البومك الجديد

نور تمسك المايك وتقول،،

حاضر هسمعك اغنيه انا بحبها اوي واخترتها بعنايه جدا في البومي، اسمها زمان كان عندي قلب، اتمني تنال اعجابكم،،

ووقفت نور وقامت الفرقة بالعزف ونشدتها باحساس مرهف، حتي ادمعت عيناها وهي تنظر له وتقول؛

عشقتك وجرحتني عشقتك بكل كياني

وبإيدك ضيعتني ودلوقتي راجع تاني

بعد جراحي وأحزاني بدموعك تترجاني جرحك ليا خلاني كرهتك ومش عيزاك

زمان كان عندي قلب يوم ما جرحته جيت في ثانيه نسيته

معدش في قلبي حب وأنا بعد قسوتك أيوه أنا قسيته

زمان كان عندي قلب حب الحياه

زمان كان عندي قلب يوم ما ملكته جيت في ثانيه نسيته معدش في قلبي حب وانا بعد قسوتك أيوه انا قسيته

ثم صفق الجميع لها وشكرتهم وجلست علي مقعدها حزينه

المذيعه تنظر اليها ثم تقول،،،

الله يانور كلماتها جميله جدا بجد انتي فنانه مرهفه الاحساس

نور ببتسامه مصطنعه؛ اشكرك علي ذوقك

المذيعه توجه حديثها له وتقول،،

وانت يا ايهاب هتسمعنا ايه النهاردة

ايهاب ينظر لنور ثم يقول،،،

انا محضر اغنيه من اكتر من شهرين، النهارده اول مرة هغنيها، كنت مجهزها لاكتر انسانه حبتها واتمني انها تسامحني لاني جرحتها اوي، ثم ينهض ليبدأ في غناءها مع الفرقة الموسيقيه،،

سامحنى خلاص... سامحنى ياريت
انا غلطان.... وتهت وجيت

رجعت بأسفى، وندمى، وشوقى، ولهفة قلبى عليك

غلطت وضِعت فى بعدك ضِعت سامحنى الله يخليك

خد وردى وهات الشوك
وعيونى اللى بيحبوك

انا راجع وكلى حنين... وطلبت السماح ارجوك

اهون عليك وانا بين ايديك.. تبعد وتظلمنى... ندمان انا وازاى بقى
من روحى تحرمنى

ازاى تقوللى اختار.. بين البعاد والنار
هو الزمان قسٌاك.. ولا انت منى خَدوك

خد وردى وهات الشوك
وعيونى اللى بيحبوك

انا راجع وكلى حنين
وطلبت السماح ارجوك

بعد الغياب حلو العتاب.. أسمع وتسمعنى
هيهزنا صوت حبنا... واكيد هترجعلى

دنا قلبى زى ماكان.. بيفكرك بزمان
لو تدينى الامان... وكفاية خوف وشكوك

خد وردى وهات الشوك
وعيونى اللى بيحبوك
انا راجع وكلى حنين
وطلبت السماح ارجوك

سامحنى خلاص ..سامحنى ياريت
انا غلطان .... وتهت وجيت

كان ينظر اليها بنظرة حب وترجي، والكاميرات من وقت لاخر تقترب منها لتبين مدي تأثرها وحنينها له،ثم انتهي من غناءها وصفق الجميع اليه

#عذبني حبگ بقلم إيمووو كمال

المذيعه بتصفيق مردده؛؛

الله يا ايهاب جميله جدا، بس ياتري ايهاب بيقول لمين سامحني خلاص

ايهاب ينظر لنور ثم يقول؛؛

لاغلي واحب انسانه عندي في الوجود

وهنا الكاميرا تقترب من نور وتركز علي مقلتيها، وتجد بهم لمعه والدموع تتصارع بهما لتسقط

المذيعة تنظر اليها وتستشعر، انها المقصوده فتقول؛؛

والله بعد الكلمات الرقيقه والصريحه دي، اي واحده مكانها تسامح علي طول

ويستمر الحوارات بينهم، ثم توجه اليهم قائله؛؛؛

- النهاردة الرسايل كتير جدا علي صفحه البرنامج والكل اجمع علي انكوا تغنوا دويتو مع بعض وكان في اجماع علي اغنيه "لانك حببتي وحلمي اللي غاب "

فبدأت الفرقة بالعزف، وتقدمت نور ووقفت امامه ناظرة في عيونه، وامسكت بالمايك وبدأوا ينشدونها بأروع احساس، وبحب ظاهر للجميع حتي ادمعت اعينهم مش شده العشق والحب، فكلامتها لامست قلوبهم، بشده حين قال،،

ايهاب؛ لانك حبيبتى وحلمى اللى غاب
قلبى بيرفض يبطل عذاب

وكل اللى غايب تملى بينسى
ودايما يفكرنى بيكى الغياب

نور بحب : كل ما بقدر يوم انساك
برجع ادور واستناك

حابب تعبى لانة عشانك
راضيه بغلبي لانة معاك

لانك حبيبيى وحلمى اللى غاب
قلبي بيرفض يبطل عذاب

ايهاب : وكل اللى غايب تملى بينسي
ودايما بيفكرنى بيك الغياب

نور :بشوفك معايا ولو مش معايا
وادور وادور وعمرى يفوت

ايهاب : تعبنا ولا مرة قولنا كفايا
ولا حتى يقدر يفرقنا موت

نور :كل ما بقدر يوم انساك
برجع ادور واستناك

نور :حابب تعبى لانة عشانك
راضيه بغلبي لانة معاك

وانتهوا من اداءها، وصفق الجمهور بشده، وقالت المذيعة متردده،،

- برااافو براافو بجد اداء في غاية الروعه، ونطلع فاصل صغير ونعود اليكم انتظروني

#عذبني حبگ بقلم إيمووو كمال

وهنا تطلب نور الاستئذان، وتخرج خارج البلاتوه مسرعه تبكي بمفردها في غرفه خاصه بعمل الميكب، حزينه علي ما وصلت اليه، واستمرت علي هذا الحال حتي تم طلبها لعوده الارسال، فطلبت تستعين بكوافير ليصلح لها مكياجها لتداري اثار بكاءها، ثم توجهت اليهم لتكمل الحلقه

المذيعه ببتسامه تقول،،

عدنا أعزائي المشاهدين في كل مكان، وتوجه نظرها اليهم، وتقول،

- بلغوني في الاستراحة الاعلانيه ان نسبة المشاهدة في اليوتيوب علي الحلقه عدت الملايين، بجد الحلقه النهاردة من اقوي الحلقات اللي البرنامج اقدمها، وسعيده جدا بتشرفكم ليا، بس اكيد كل مننا له مطرب بيقتدي بيه، مين المطرب او المطربه اللي قدوتك ياايهاب

ايهاب؛ انا بحب جدا الفنان العظيم عبد الوهاب، والفنانة القديرة كوكب الشرق ام كلثوم

المذيعه؛ طب لو طلبت منك تغني مقطع من اغنيه لام كلثوم، تقول ايه

ايهاب يصمت ويفكر لحظات وينظر لنور ثم يقول،،،

انت روحي وكل عمري ونور حياتي
يا حياتي ايه انا بالنسبه لك

حبيبي ده انا مخلوق علشانك يا دوب علشانك... علشانك انت

وقلبي قلبي عاش على لمس حنانك يا دوب حنانك... حنانك انت

المذيعه؛ الله يا ايهاب، جميله جدا،بس صغيره اوي، غني مقطع تاني

ايهاب ينظر اليها، ثم يوجه نظره لنور ويقول،،،

حاضر هغني المقطع ده انا بحبه اوي من نفس الاغنيه، ثم يمسك المايك ونظره علي محبوبته قائلا،،

يا حبيبي يا عبير الشوق يا حبيبي
يا نصيبي من ليالي الشوق يا حبيبي

شعر ايه ده الكلام اللي ف عنيك
خلا احلى كلام يغير

عطر ايه ده العبير اللي ف ايديك
بيقول ايديك هيا العبير

من الربيع اللي ف شفايفك
من الليالي اللي ف عنيك

*قالها بتنهيده عاشق محب، ثم اكمل مردد،،،

من اللهيب اللي ف خدودك
من الحنان اللي ف ايديك

رحلة تاهت روحي فيها وتهت فيها
خبيني من الزمن خبيني
وبعيد عن عيونه داريني

الكاميرا موجه نحو نور، فقد كانت شارده تنظر له بكل حب وعشق هيمانه متذكره اجمل اللحظات بينهم، ثم توقفت عليه، فوجدته مغمضاََ العينين يلقي كلماته العذبه بكل شجن وحب، ثم نظر اليها بهيام مردد،،

عالفرحه الكبيره خوفي لا ياخدها ولا يخليني

خلينا نقول للدنيا فحالها
ولكل قلبي بدقته حس

يا دنيا حبي وحبي وحبي
ده العمر هوه الحب وبس

المذيعه تنظر له بسعادة وتصفق بشده مردده،،،

الله يا ايهاب بجد احساسك عالي جدا، شكرا انك اسعدتنا، واسعدت كل جمهورك

ايهاب ينظر لها مبتسماََ، ثم يقول،،،

اشكرك يافندم

ثم توجه كلامها لنور؛ وانتي يانور مين، مطربك وقدوتك

نور؛ انا بعشق برضو السيده العظيمه ام كلثوم

المذيعه؛ ممكن نسمع جزء من أي مقطع تحبيه

نور بتفكير تقول؛؛

انا بحب اوي اغنيه فات المعاد، خصوصا المقطع ده، ثم نظرت له بالم وحزن ثم قالت،،،

بينى وبينك هجر وغدر وجرح في قلبى داريته.. آه.. بينى وبينك ليل وفراق وطريق أنت اللى بديته... بينى وبينك ليل وفراق وطريق أنت اللى بديته

تنظر له نظرة حب وعتاب، ولوم، ثم تكمل

تفيد بإيه.. إيه.. إيه يا ندم يا ندم يا ندم.. وتعمل إيه.. إيه يا عتاب

آه

طالت.. ليالى.. ليالى.. ليالى الألم... طالت ليالى.. ليالى.. آه.. ليالى الألم.. واتفرقو الأحباب.. اتفرقو

وكفاية بقى.. تعذيب وشقى... وكفاية بقى.. تعذيب وشقى

ودموع في فراق.. ودموع في لقى

تعتب عليا ليه.. أنا بإيديا إيه... تعتب عليا ليه.. أن بإيديا إيه.. انا بإيديا إيه.. إيه.. فات المعاد فات.. فات.. المعاد

المذيعة بتصفيق حاد تقول؛؛

الله يانور بجد اكتر من رائعة، والله انا مش عايزة الحلقه تنتهي ابدا من جمالها، انتوا فعلا من اجمل الثنائي الموجود في الوسط الفني

ايهاب؛ شكرا جدا لحضرتك

واخيرا وليس باخر تحب يا ايهاب تقول كلمه لجمهورك تقوله ايه، الكاميرا معاك

ايهاب ينظر للكاميرا، ثم يردد،،،

احب اشكر كل جمهوري اللي بيتابع الحلقه، وبيتابعني شخصيا، اشكره بشده ولولا تشجعكم ليا ما كنت هستمر، واكون ايهاب عمر اللي بتحبوه، بحبكم من كل قلبي

المذيعه توجه حديثها لنور مردده نفس السؤال، فتجاوبها نور قائله،،،

- انا بشكر كل الجمهور العزيز اللي شجعني، وقال اي كلمه تشجيع في حقي، وبشكر ايهاب في وقوفه جنبي، واتمني اني اكون عند حسن ظنكم جميعا

المذيعه؛ والي هنا تنتهي حلقتنا من برنامكم ضيف علي الهوا، وانتظروني في حلقه قادمه باذن الله مع ضيوف اخرين، وتصبحوا علي خير

وينتهى التسجيل فتنهض نور مسرعا بدون اي حديث معه، فيحاول ان يلحقها لكن بدون اي فائدة

وصلت نور الي منزلها، فوجدت والديها في انتظارها، فقالت لهم مردده،،،

-مساء الخير عليكوا

زين؛ مساء الخير يانور، تعالي اقعدي ياحببتي

نور تجلس بجوارة؛ خير يابابا، ممكن تأجل اي كلام انا تعبانه جدا ومش قادره

سميه؛ معلش يانور، اسمعي بابا الاول وبعدين ادخلي ارتاحي

نور بحزن؛ ياماما انا عارفه بابا عايز يقول ايه، من غير ما يتكلم

زين بحنان وهدوء،،

ومادام عارفه، ليه بتوجعي قلبك يابنتي وقلبه

نور ببكاء شديد،،،

عشان غصب عني يابابا، عشان مش قادرة، كل ما بشوفه بضعف، قلبي بيحن ليه، بس بفوق وافتكر جرحي بخاف اسلمله قلبي تاني يجرحه، ساعتها مش هقدر اقوم منها وممكن اموت، بحاول البس قناع الشده، وانا بتقطع لما بسمع حاله، خصوصا لما غنالي اغنيته، كان هاين اجري عليه واضمه لحضني واقوله سامحتك ياضي نور عيني، بس مقدرتش، والله مقدرتش

يقترب منها والدها ويأخذها في حضنه ويضمها اليه ويربت علي ظهرها في حنان، ثم يقول هامسا،،،

- اهدي ياحببتي، كل حاجه هتتحل بفضل الله، انتي بس حاولي تفتكري الحلو اللي عمله، وقفته معاكي، سبب شهرتك وحب الناس ليكي، محاولاته معاكي، وتصميمه انك تسامحيه، كل ده ميغفرلهوش عندك يانور، فكري ياحببتي، وربنا يهديلك الحال

نور تمسح دموعها ثم تقول،،،

حاضر يابابا، عن اذنك هدخل ارتاح، تصبح على خير

وتدخل الي غرفتها، وترمي بجسدها علي وسادتها وتنهار من البكاء، ثم امسكت حاسبها وكتبت،،،

أراك في احلامي، و واقعي، اراك في كل وقت امام عيوني المتيمه بك... اراك تغرد لي بأعذب الألحان.. وتتغزل بسحري الخلاب... الا ترحمني من تخيلاتي... الي متي ستظل ترافقني في نوبة الصحيان والغفوه... اتركني حبيبي... اتركني المم ما تبقي مني حتي استطيع العيش بدونك... اتركني وارحمني فؤادي فقد اصبح ينذف من جراح ظلمك بي... الا يكفيك ما صرت اليه الان.. الا يكفيك ما انا به، معذبه جريحه، محطمه، مكسورة... ارحمني وابتعد فقد نال قلبي منك الكثير، ولا يستطيع تحمل شيئا اخر منك

ثم اغلقت حاسبها، وممددت علي فراشها وبكت كثيرا من اجله، حتي غفت بملابسها من التعب

#عذبني حبگ بقلم إيمووو كمال

يجلس هادي ونسمته بين احضانه، يستمتعون بمشاهده حلقه نور وايهاب، وحين انتهت قال لها مرددا،،،،،

- نور صعبانه عليا اووي يانسمه

نسمه ترد عليه مردده؛؛؛

هي اللي معذبه نفسها، ومعذباه معاها، بجد حرام اللى بتعمله ده، هو غلطت مقلناش حاجه، بس مش عشان غلطت تدبحه كده، اللي بيحب بيسامح ياهادي، نور مزوداها اوي بصراحه

هادي ينظر لها ثم يقول بحزن ؛؛

- غصب عنها يانسمتي، لما واحده بتحب الحب الكبير اللي بتحبه لايهاب، هتعرفي ان اللي بتعمله ده مش اوفر ولا صعب، هي اتجرحت واتصدمت فيه اوي، وفقدت الثقه في حبه ليها، وعشان تسامح لازم تحس انه بيثق فيها جدا، وانه مهما يحصل عمره ما يشك في حبها ابدا، انتي فهماني، اللي قضى علي حبهم شك ايهاب يانسمه، الحب اللي بتبني علي الشك، بيتهد بسرعه ويموت

نسمه تنظر له نظرة اعجاب ثم تقول؛،،

انت أعظم دكتور نفسي شوفته ياحبيبي

هادي بضحك :اعظم دكتور مرة واحده، كتير اوي عليا كلامك ده يانسمتي

نسمه بدلع؛ ده اقل كمان من اللي تستحقه ياعمري

هادي بحب، يقول،،

لا كده كتير اوي، وانا مش حمل مغازلتك دي ياقلبي

نسمه بنظرة اغراء ودلع تقول،،

تؤ تؤ تؤ انت ادها اوي بس مش واخد بالك

هادي بتنهيده وعشق،،،

نسمه انتي شكلك كده بتجرجريني للرزيله، وانا بموت فيها

وفجأة يحملها بين ذراعيه، ويدلف بها على غرفتهم وهو يمهمس لها،، انتي اللي جبتيه لنفسك ياعمري

ويغوص معها في بحور عشقهم

#عذبني حبگ بقلم إيمووو كمال

تجلس جنة برفقة معتز علي الاريكة فتاخذ نفسا عميقا ثم تحدثه قائله،،،،

- يانهاااري علي التعب، انا مش قادرة، خلاص حيلي اتهد يا معتز، اخيرا العمال خلصوا رص العفش، ووضبتها، ياااه انا تعبت اووي

معتز بتنهيده،،،

اجمدي، اجمدي، مش عايزة تتجوزي اشربي بقي

جنة وممسكه براسها من الصداع والاجهاد،،

ماسكه اهو ياحبيبي، تيجي تمسك معايا

معتز بضحك،،،

هو انا قادر أمسك نفسي ياجنتي، عشان امسك معاكي، لا انا كده تمام اووي

جنة بضحك؛ اجمد اجمد يابطل، امال هتعمل ايه لما مصطفي، يبعت حجاتي بكره ياميزو

معتز ينظر لها يذهول، ويمثل انه فقد للوعي،، فتضحك عليه بشده، ثم تقول،،

لا تقلق، هيجيب معاه حد يساعده في تنزيل الحاجه، متخافش قوم، وماما وطنط اميرة هيسعدوني في فرش الحاجه، كان نفسي نسمه تكون موجوده، بس خايفة عليها عشان الحمل، مش عايزاها تجهد نفسها

معتز بفرحه،،.

اه انا عرفت من هادي، وفرحتله اوي، ربنا يعوض عليه يارب، ويعوض علينا انا كمان، واتجوز واجيب اول النص دسته يارب

جنة تضحك، وتقول،،،

ياخوفي بعد كل التعب ده ويطلع ناقبي علي فشوش ياميزو

معتز يجري وراءها وهو مردد،،،

طب وديني ما سايبك وهوريكي ياجنة، ناقبك علي فاشوش ولا لأ، تعالي هنا هتروحي مني فين، واذا به يمسكها فتقع علي الارض فيجز فوقها مكتفا يداها، ثم يقترب منها، فيحمر وجهها من شده قربه، وتشعر بلهيب وحرارة وجهه، وانفاسه الحاره، فيهمس لها بعشق قائلا،،

- انا عندي استعداد دلوقتي اثبتلك، ومش بعيد نجيب اول عيل كمان، تحبي تشوفي

جنة تنظر في عينيه بحب، ونبضات قلبها في ازدياد، فتقول؛؛؛

- معتز مينفعش كده قوم، بلاش نظرتك دي ارجوك، انا مش حمل كده

معتز بنفس النظرة يقول؛؛؛

بحبك ياجنة، بحبك اووي، انتي مراتي، حلالي، ليه خايفه مني، انا عمري ابدا ما افكر اذيكي، ولا اكسر فرحتك، انا بس كنت بهزر معاكي ياقلبي

جنة بحب، تنظر في عيونه بهيام ثم تقول،،،

وانا كمان بحبك اوي يامعتز، وعشان كده مش قادرة استحمل نظره حبك ليا، ومقربش منك، عارفه اني مراتك، بس برضو ميصحش نقرب اوي كده

معتز يقرب اكثر منها ويحاول ان يساعدها علي النهوض، ثم يضمها بين احضانه، ويقول بهمس،،،

- وانا مش طامع في اكتر من كده، في حضنك ياجنتي، حضنك اللي بينسيني اي تعب، حضنك اللي بشتاقله وانتي حتي في حضني

جنة محتضناه بكل حب كأنها وجدت ملاذها اخيرا، بين احضانه فقد شعرت في حضنه بحضن الاب الذي افتقدته، وحضن الأخ السند، وحضن الحبيب، والزوج، كل هذا داخل حضنه، فشتدت في احتضانه، اكثر واكثر ثم همست في اذنيه مردده،،

-حضنك جميل يا معتز، حضنك زي الوطن، اللي بيضم الجميع بحنان، انا بحبك اووي اووي

معتز ينظر لها بنظرة عشق يتعجب منه، ثم نظر الي شفتاها، فقترب ببطئ وقبلها بكل حب وشغف عنيفه، ثم حاول ان يهدي، وابعدها بصعوبه، واستند راسه علي جبينها، ثم قال،،،

- انا بقول نمشي دلوقتي، عشان انا على أخرى يابنت الناس، ولو فضلنا دقيقه كمان، انا مش ضامن نفسي، انتي مش متخيله عملتي فيا ايه

جنة بنفس نبرة الهمس ترد؛؛

ولا انت عارف انت عملت فيا انا كمان ايه.؟ معتز

اممم
جنة تنظر له واقتربت منه وبهيام ثم تقول؛ انا انا بحبك... بحبك اوي

معتز ينهار ويهمس لها بحب؛؛

ارحميني ياجنة، كلامك ده بيولع فيا، انا بشر، مش قادر بجد، حبك ملكني واستوطتني فيه يا جنتي، انا بمجرد ما حاجتك تتفرش، هنحدد، معاد، احنا حالتنا بقت صعبه اووي، ولا ايه

جنة اومأت راسها بالموافقه، ثم قالت،،،

- يالا يامعتز روحني، منك لله علي عملته فيا، شكلي هشوف معاك ايام فله

معتز بضحك، ثم يقول،،،

يالا يامدوخاني، ومعذباني معاكي، اااه يلمني ويلمك الاوضه اللى هناك دي شايفاها، ورحمة ابويا ما انا هاعتقك ياجنة

جنة بضحكة وكسوف،،،

ماشي ياسيدي بكره نشوف، يالا بينا دلوقتي

وانصرفوا سويا، واستقلوا السيارة، وتم توصيلها الي منزل خالها، ثم تركها وانصرف

#عذبني حبگ بقلم إيمووو كمال

كان يجلس ايهاب في غرفته ينظر في شرفته، فنظر الي السماء فوجد البدر بضياءه ناظراً له ، فرأيت صورتك بداخله حبيبتي....فهمست له اناجيه واسأله عنكِ وعن احوالك فرد علي غضبان متسائلا،،،،

لماذا تسأل عنها وانت من تسببت في الآمها؟

فقولت له وقلبي يعتصر ألماً،،،

انها نار الغيرة أحرقتني، فأحرقتها معي

فقال له بحزن علي حالي،،،،

وكيف طاوعتك نفسك علي احزانها؟ ألم تحترق قبلها، فهل هانت عليك؟

فقلت بحزن وانا اشعر بقلبي يتمزق لما حدث مرددا،،،

لا تلومني ياعزيزي، فأنت لا تعرف العشق وناره، ولوعته... وانا نادم أشد الندم، فانت لا تعلم بحالي، كم شعرت بالنار تتأكل بداخلي حين اتخيلها معه... بين احضانه... تهمس له بأجمل عبرات الغزل، ولما لا فقد عشت من قبل في نفس نار الخداع، لكنها اشد وامر من زي قبل... ان نار الغيره تحرق الكون بأكمله، وانا بشر ضعيف سيطر على شيطان نفسي ووسوس لي بأبشع التخيلات، فصدر مني مالا يتخيله عقل، واحرقتها واحترقت معها، فقد سلب مني عقلي، ونسيت ان احكمه واتريث، فكذبته كثيرا ورفضت ما سمعت به اذناي، ولكن حين رايتها امامي تنتظره وتهاتفه شعرت بغيره مجنونه تمتلكني، اريد ان احرق الكون بأكمله... وحين عرفت الحقيقه، ادركت اني احرقت نفسي وهي بداخلي احترقت معي، هذه مأساتي، سردتها لك

فهل تساعدني؟

رد متعجباً،،،

وكيف تطلب مني مساعدتك وانت الجاني؟

قولت وانا اشعر بالأمل،،،

لانك حبيب كل عاشق سهران، حيران، يتذكر حبيبه

تبسم وقال،،،

وماذا تريد مني؟

قولت ببتسامه،،،،

ان ترسل لها سلامي الحار، وقبلاتي واشواقي.... ان تذكرها باجمل لحظات حياتنا سويا.... ان تحنن قلبها، وتحاول ان تنسيها الماضي بالامه

نظر لي وضحك بسخريه مرددا،،،

انت محتاج لمعجزة ياعزيزي، لا لم استطع فعل ذلك، فأنت تطلب المستحيل

نظرت له وعلي وجهي العبوس والغضب ثم قلت،،

ولما لا فانت من تحنن قلوب العاشقين، لماذا جئت الآن وتقول مستحيل؟

رد بحده ثم قال،،،،

لان جرحك أشد، واعمق، وسوف ارسل لها حنينك واشواقك ولا تنتظر مني اكثر من ذلك، فانت الذي عليك ان تحاول كثيرا ياعزيزي لتطيب الجروح، واعلم ان اصعب الجروح هو جراح القلوب، وتاخذ وقتاً طويلا، فلا تيأس

رديت وقولت له بتفهم مردد،،،

افهمك جيداً وشكرا لمساعدتك لي، وعلي نصيحتك الغاليه

ثم نظرت له وتبسمت له بحب، ودلفت بالداخل افكر فيما سرقت فؤادي واناجيها في أحلامي ويقظتي

* كانت نور في هذه اللحظات ايضا تنظر الي شرفتها ورات نور البدر ساطعاً في تمامه فتبسمت له فقد سحرها من جماله وضياءه، فشردت متذكره معذبها، متذكره اجمل واسعد ايام حياتها التي قضيتها بجواره، فتساقطت الدموع من مقلتيها وقالت له،،،،

كنت شاهد علينا يابدري، شاهد علي اجمل قصة حب بينا، شوفت عمل فيا ايه! شوفت جرحني وكسرني ازاي! ومع كل ده لسه قلبي بيخوني وافكر فيه، ويحن إليه

رد عليها ببتسامه مرددا،،،،

هو ده حال العشاق... حب ولوعه.. وفراق.. وحنين، لا تتعجبي عزيزتي، فهو حزين مثلك واكتر، وأرسل معي سلامه وقبلاته، واشواقه

نظرت له متعجبه ثم قولت له بلهفه وشوق ،،،،

هل قابلته ؟

قال : نعم وكان حزين، مكسور من بعادك... ندمان، حيران، وبعتلك معايا سلامه الحار وقبلاته

رديت بحزن والم،،،

حزين... مكسور.. حيران.. ندمان.. مش لوحده اللي اتكسر، انا اتكسرت واتمزق قلبي قبل منه، اشتاق اليه لكن قلبي يألمني، عقلي رافض المسامحه، وقلبي خايف من الوجع ليجرحه تاني، اعمل ايه دبرني يا عزيزي

ظل ساكتاَ حيران في هذان العاشقين لا يستطيع ان يرد، ثم بعد لحظات قال،،،

الحب مادام موجود بيغفر اي عذاب، واي جرح، مع الوقت عزيزتي الجروح بطيب وتداوي، حاولي رب العالمين بيسامح، انتي مش هتسامحي

نظرت له بألم ثم قولت،،،

عندك حق، ربنا يسامحنا جميعا، ويطيب خاطري يارب، والايام مسيرها هي اللي تداوي جروحنا

شكرا يا اجمل بدر نور طريقي

وتركته وتمنيت بداخلي ان الامي وجروحي تطيب

#عذبني حبگ بقلم إيمووو كمال

وانتهي اليوم ليبدا يوم جديد، فيجد ايهاب ان كل السوشال ميديا تتحدث عن حلقه امس، والجرائد الفنيه والمجلات، لا حديث غير الحلقه وحبهم الظاهر اما الجميع، متمنيين لهم العوده لبعضهما مره اخري، ومتمنيين لهم السعاده، خصوصا بعد اداءهم للدويتو "لانك حببتي وحلمي اللي غاب" ، فقد نال اعجاب الجميع، وكثير من المتابعين طالبوهم بتسجيله مرة اخري وتصويره معاََ، فتابع بشده كل التعليقات وردود الافعال في سعاده بالغه، حتي انتبه الي رنين هاتفه، فوجده فارس فرد مسرعا قائلا،،

- ايوة يافارس ازيك

فارس بنبرة فرحه وسعاده مردد،،،

تابعت ياهوبا ردود الافعال في السوشال ميديا علي حلقه امبارح

ايهاب بفرح شديد قال،،،

اه تابعتها، بصراحه نسبه المشاهده عاليه جدااا، وردود الجمهور كلها ايجابيه، يارب نور تشوفها وتابع

فارس بامل وتفاءل قال،،،

اكيد هتابع، الرسايل كتير جدا، الصفحات كلها ملهاش سيرة غير عنكوا، والكل بيدعي انكوا ترجعوا لبعض

ايهاب بتمني،،،

يارب يافارس

فارس بقولك في برنامج طالب مني اكلمك احدد معاك معاد تظهر فيه، ايه رايك؟ دي اخر فرصه ليك تأثر علي نور، لازم تكون حلقه اقوي من اللي فاتت، وتبعت فيها رسايل جامده، انت فهمني ياصاحبي، نور لازم تحس انك عرفت قيمتها، ووثقت فيها اكتر من الاول، اطلع واقول كل اللي جواك، الدنيا كلها عرفت بحبكم والخلاف اللي بينكوا، لازم انت بقي تكسب الكل في صفك يامعلم، وتخليها ترفع الرايه الاستسلام، قولت ايه؟

ايهاب بتفكير لحظات قال،،،

تمام يا فارس، هي فيها قول بعد كلامك ده يا صاحبي، والله انا مش عارف اودي كل جمايلك دي فين، شوف امتي المعاد، انا فاضي زي ما انت عارف، موقف كل شغلي، اتفق وبلغني

فارس بجديه وهدوء قال،،،

اوك هتفق معاهم وابلغك، وهيكون في اقرب معاد عشان نضرب علي الحديد وهو لسه تأثير الحلقه سخن ومأثر عليها

ايهاب بقتناع يرد،،،

عندك حق والله يافارس، بص لو ينفع النهارده، او بكره بالكتير يبقي كويس

فارس؛ ماشي ياصاحبي، هتفق وابلغك، سلامووز

ايهاب؛ سلام ياحبيبي

وينهي معه ويتساءل ياتري يانوري، رد فعلك هيكون ايه لما تقراي ردود افعال المتابعين، هتفرحي زي ولا هتضايقي؟

والي هنا تنتهى احداثنا الى هذا الحد لنتعرف غدا رد فعل نور، وياتري ايهاب ايه اللي ناوي يقوله في البرنامج، هياثر علي نور في اخر فرصه له معاها؟

الاحداث الجايه هتكون علي صفيح ساخن وهتولع جدا

كل هذا واكثر سنتعرف عليه في احداث جديده من روايتي المتواضعة

"عذبني حبگ"
إيمووو كمال ✍️

ملحوظه هامه
عارفه ان الحلقه فيها اغنيات كتير، عشان بس ده حلقه تلفزيونية وشئ طبيعي ان يكون فيها اغاني، بس انا مضفتهاش لحبي للاغاني، لا انا تعبت وبحثت عشان اختار كلمات تكون هادفه في سياق الروايه، وتعيش القارئ في جو الحلقه التلفزيونيه، خصوصا ان الابطال مطربين، فشئ طبيعي ان الحلقه تتضمن اغاني ليهم، عشان كده اتمني من القارئ ان يقرأها ليحس بمعني الكلمات ويتذوقها، وشكرا لكل المتابعين، واتمني ان الحلقه تنال رضاكم

إيمووو كمال ✍️