وصال الجزء الخامس

وصال5
فتحت عينيها بصعوبه كانت الرؤيه غير واضحة بعد والصوت مشوش ،جاهدت كي تستعيد وعيها..

-أزيك يا فرحه يا بنتي؟!
=ميين.. ميين هناك ؟
-مش عارفه صوتي يا بنتي
=انت مين انا معرفكش
-بس انا أعرفك يا بنتي ولو ركزتي هتعرفيني

اقترب منها حتى أصبح موازيا لها ،أغمضت عينيها وفتحتهما مرارا وتكرارا لتتبين ملامحه.. رجل كبير اشيب الشعر و اللحيه يرتدي إحدى القمصان البيضاء على بنطال ابيض ونعل ابيض ..
=لا مش عارفاك برضو
-انا يا فرحه .. عمك نجم !!
=نععععععم!!!!!
-بنت عييب متعليش صوتك على راجل قد ابوكي
=انت هتستعبط ،انت مييين يا راجل انت وازاي ..ازاي اصلاااا جبتني هنا واساسا..
-م تبس بقى اديني فرصه أتكلم

اندهشت فرحه من طريقة كلامه فهي لا توحي بأنه رجل عجوز بالمره ،دققت في وجهه لكن تجاعيد وجهه كانت ظاهره الشعيرات البيضاء أسفل الذقن وحتى النمش على يده..
=بصي يا بنتي انا عارف ان الأمر يبدو جنوني بعض الشيء لكن صدقيني انا نجم
-وافرررض يعني أنك نجم اللي هو شخصيه خياليه اصلا من وحي خيالي تجسدت في الواقع وخطفتني ليييه خيير

اقترب منها بضعة سنتيمترات.. -شوفي يا بنتي انا..
-ورا
=نعم
-ارجع لورا مكانك
=يا بنتي دانا قد ابوكي ليه التفكير اليساري ده
-انشالله تكون قد جد جدي برضو ارجع ورا
تراجع بضعه خطوات للوراء ثم عاد للحديث مجددا وعلى وجهه ابتسامة غامضه ..
-شوفي يا فرحه انا زهقت من كوني مجرد شخصيه في خيالك رايح جاي في دماغك الناشفه دي
=نعم
-تخرسي خالص لحد م اخلص كلامي
=انت ازاي تكلمني كـ
-بننننت
=اتفضل
-بس يا ستي فقولت لنفسي يا واد يا نجم إيه رأيك لو تخرج تشم هوا في العالم اللي بره بدل م انت محبوس جوه ،وفعلا خرجت وكنت معاكي من غير م تحسي في كل مكان حتى في أفكارك واكتشفت اكتشاف رهييب كان لااازم ولا بد اقولك عليه..
=عظييم عظييبم وايه بقى الإكتشاف الرهيييب ده ؟!
-انك عميا..
=لا دانت قليل الأد..
اقترب منها دون أن يغمض جفنه بنظرات حادة وملامح خاويه اشاعت الرعب بداخلها اكمل حديثه وعيناه مثبتتان عليها فعادت برأسها إلى الوراء حتى كادت أن تسقط من أعلى الكرسي المقيدة عليه فأمسك به وتابع..

-ومش بتشوفي ،لا عارفه تستوعبي أن في حد حواليكي ولا قادره تشوفي الحب اللي ممكن يكون جمبك مستني أشاره منك بس أشاره عشان يدخل حياتك ،ماشيه طريقك لا بتبصي وراكي ولا قدامك ولا جمبك كأنك في سباق مش عارفه نهايته ،جئت بس افوقك ،اصحيكي ،اخليكي تفوقي لنفسك شويه وتدي نفسك فرصه أن حد ياخد باله منك ،يحبك من غير شروط ،من غير خوف ،يكون أمانك بدل م انتي خايفه طول الوقت..

ضغطت على شفتيها وابتلعت غصة في الحلق تؤجج جوفها منذ زمن بعيد وكأنه يقرأ كتابها الذي وارته عن الأنظار وأغلقت عليه بألف مفتاح والقتهم في الخلاء..
انننت.. انت متعرفش.. ملكش حق أن انك تتكلم مع..

-تفتكري مأخدتش بالي
طريقتك في الكلام اللي بتنهيها كل م سمحتلك فرصه كأنك حتى خايفه حد يشوف اللي جواكي من خلال كلامك، لما بتكلمي بتمسكي ايد شنطتك كأنك بتمسكي بيها خايفه من حاجه متعرفهاش أو عارفها بس بتخبي
الضحكه اللي لو حصل وطلعت قسرا عمرها م كملت وبسرعه بتودي وشك الناحية التانيه
شغلك اللي كل م سمحتلك الفرصه بتقبلي زياده عن طاقتك وكانك قاصده متفضيش
حملك تقيل وضهرك هينحني قريب لو م ادتيش لنفسك فرصه ترتاحي..

=انا عكاز نفسي!
والسند ربنا مفيش غيره ، ولا غيره يلزمني!
=فكني خليني اروح بيتنا كلامك لا هيقدم ولا هيأخر
-اديني فرصه اا..
=اللي بتحاول توصلهولي رفاهيات اللي زيي ملهومش حق فيها ..خليك بعيد.. فضلا روحني

تنهد واغمض عينيه قليلا وفتحتهما على ابتسامة يقابل بها وجهها الواجم ،
-ربنا كريم انتي قولتي كده قولتي انه بيحبنا واستحاله يعمل حاجه تأذينا يبقى ليه متفكريش إني هنا عشانك..

اطرقت فرحه للحظات تحاول تذكر المكان الذي قالت فيه تلك الجمله ولمن..
-مش انتي قولتي أن هو احن علينا من أبونا وامنا نفسهم يبقى خليكي واثقه انه مش هيضيعك..
تذكرت،لكنها لا زالت غير متأكده ليس هنالك سوى طريقة واحده لمعرفة هوية نجم هذا الذي أمامها..
-يا فرحه انا..
رفعت حاجبيها فجأة
-انااا مش قولتلك مية مرررره مترفعيش ح..
نظر إليها لتقابل نظرته بأخرى غاضبه فقد كشف أمره..
-انتي ذكيه ليه كده ؟!
=فكني وعييب على سنك
-مبقتش نجم خلاص سني إيه بقى
=بس المفروض انك راجل ناضج وعاقل
-يا شيخه روحي انتي خليتي فيا عقل
=افندم
-لا بقولك ايه هتعمليلي فيها جارحه وصعبه أحب أفكرك انك مربوطه على كرسي في حته  الجن الأزرق نفسه مش هيعرفلك فيها طريق جره ..
=لو فااااكر نفسسسك هتخوفني بالكلمتين دول ..
-والشيطان شااااطررررر وطالع بامتياز السنه دي
=يبقى عندك حق انا خوفت فعلا ،بالله فكني وروحني إلهي يخليك وصال بنتك
-انتي لحد الان مفهمتيش
=مش فاهمه ايه؟
-إني استحاله أذيكي
=روحني من فضلك اللي بتعمله ده مفيش فايده منـ..
اقترب امير ببطء وهو يزيل الشعر المستعار ويمسح من على وجهه كل تلك المساحيق التي جعلته يظهر في هيئة رجل مسن ،كانت تراقبه بحذر ودهشه وقليل من المشاعر المختلطة لا تدري لماذا لا تشعر بالخوف منه رغم تظاهره بالحذر.. نكس على ركبتيه أمامها وفك قيدها في ذهول منها الجم لسانها ،نظر إليها بكل صدق العالم تكلم وعيناه تسبقه..

من اول يوم..
من اول يوم عيني جت في عينك وكنت عارف ان فيه حاجه حصلتلي لا عارف ولا قادر افهم إيه هي ،
لقيتني بطلب أشوفك زي وصال واكتر،طفل صغير مستني امه توصل الساعه تسعه كل يوم الصبح ،وبقيت عايز أمامي بدري عشان أطوي ساعات الليل وتعدي بسرعه عشان أشوفك تاني يوم ، بقيت حافظ تفاصيل تفاصيلك وعطشان لاكتر واكتر كمان ..
ساعتك السوده اللي بتلبسيها في ايدك الشمال ،
خاتمك ألفضه في الايد اليمين ،
دبوسك الفيونكه اللي دايما بيقع منك وترجعي تحطيه،شنطتك الزرقا اللي فيها ميداليه فضي ،
خمارك الزهري اللي بتحبيه،
ضحكتك اللي مبتكملش وسرعان م تحطي ايدك علي وشك عشان تخبيها،عنيكي اللي بتديق لما بتضحكي، الغمازات ،الحسنه اللي فوق حاجبك اليمين ،
تحبي اكمل!
=انا..
-متقوليش حاجه ،اقصي حاجه ممكن تقدميهالي انك تسمعيلي..
كله ده انا مش قاصده انا غصب عني لقيتني بعمله يا فرحه
انا.. انا اتورطت فيكي ..غرقت في تفاصيلك.. انا في مصيبه !.... 
انا حـبـيـتــك !!! 
شهقت واتسعت عينيها علي اوجهما وضعت كفيها علي فمها ورفعت حاجبيها..
-يادي النيله عليا وعلي اهلي يانا ياما بقي اقولك انا في مصيبه وحبيتك رايحه ترفعيلي حواجبك دااانتي لو قاااصده اني اعمل حاجه غلط مش هتعملي كده
=احترررم نفسسسسك
-بت انتي بحبك قولتي ايه !
=بقولك احترررم نفسك
-هو انا بقولك تجوزيني عرفي انتي عبيطه
=برضو عايز ايه ؟!
-عايزك طيبه
=الله يخليك
-بت
=اييه ايييه عايز ايه برضو ايه يعني خاطفني وبتحبني وجو دراما و..
-تتجوزيني!
=وفاكرني عبيطه وهتضحك عليا بكلمتين و..انت قولت ايه؟
-تتجوزيني!
=سيبني افكر
-طيب يا قلبي اسيبك انا هنا تاخدي وقتك في التفكير براحتك علي بال م ارجع انا و..
=استني خلاص خلاص يا امير
-امير حاف كده من غير باشمهندس انتي عشان هتبقي مراتي قوم تجرديني من الالقاب كد
رفعت حاجبيها.. -  اجردلك نفسي من ممتلكاتي لو حابه كمان والله

"يقول نجم : قد يكون الوصال ألفا  نفتتح بها الكلام وقد يكون لغة ثانيه بين عيني عاشقان اتحد قلبيهما للتو لتخلق لغة جديده وعالما ثالث وزمنا موازي "
..
-نعم يعني احنا يا بنت الناس مش متفقين م تقولي حاجه يا ست ام فرحه
-يا بنتي امير عنده حق حد يكره الراحه
=لااء يعني لاء لولا م اخلص جهازي بفلوووسي وتعبي لولا م اتجوز
-يا ستي وانا طلبت منك حاجه انا عايزك كده بهدومك بالبيجامه بالشبشب باي نيله
=نعم
-هتبقي احلي نيله والله
=بص يا امير الملام ده فض مجالس ومفيش كده وكل واحد يعمل واجباته وانا لا يمكن اسمح لحد انه يجي في الاخر يقولي انتي مجبتيش حاجه في جهازك او يأذيني بكلمه انا في غني عنها
-انتي بتحضري هندي كتير وشغل السلايف والحموات ده مأثر علي دماغك
=امير من فضلك
-دانتي اللي من فضلك ،بصي يا حماتي احنا نكتب الكتاب وتجهز براحتها بس مش قوي قدامك اسبوعين تلاته علي بال م..
=نععععم ايه اسبوعين تلاته ماكونش اخدت مرتب شهر حتي
-ثانيه واحده اللي سمعته ده حقيقي ولا بجد انتي كماااان هتشتغلي
=زي م انا
-ده اللي ناق..
لمعت في ذهن امير فكره وارتسمت علي ثغره ابتسامة خبيثه حتي نظر الي فرحه وبكل هدوء..
-بالظبط زي م انتي ،بكره الساعه تسعه متتأخريش علي وصال يااا مس فرحه
انصرف امير وترك فرحه وفضول جوارحها طغي علي قسمات وجهها
..
=مش مستريحاله يا حنان فجأه كده اتحول وقالي موافق ومتتاخريش بكره وبتاع
-انتي عبيطه انا لو منك اكتب الكتاب واعلي الجواب وخلصنا انتي اللي غاويه تعب
=لا طبعا مش بالسهوله دي في اصول وتقاليد
-دراما كوين في نفسك يا فرحه
=اطلاقاااا ده حتي احناا البنات !!
-سكر نبات
ضحكا في الهاتف سويا ،اما فرحه فكان قلبها يقفز فرحا لا يضحك
أغلقت الهاتف وتوضأت صلت القيام ووضعت يدها علي قلبها واطلقت العنان لروحها تبث الله دعاها ونجواها فهو الحي القيوم من يحيي فينا الآمال سواه.. جلّاه!

"كل تلك الندبات التي قسمت ظهر روحي وتلك الغصات التي لطالما طاردتني ،والمطبات التي انكستني على ركبتي أرضا فما وهنت ولا ضعفت فما اخضعت جبهتي ولا بثثت شكواي لسواك ،أتيتك اليوم أدعوك حمدا وتبجيلا فأسقِ هذا القلب من عذب رضاك وجد لي بوصل منك سبحانك لا إله سواك
انت منحته لي ،أهديتني إياه فبرحمتك اللهم اتمم لنا نعمتك واصلحه لي واصلحني له"

"يقول نجم :ان الحب وان تهادي غيبا فما هو الا دعاء "
...
-يادي النيله شكل العربيه عملتها تاني
=يا نهار ابيض في نص الطريق كده يا عم مدبولي دنا متأخره وحدي اساسا
-طيب استني نشوف تاكس ولا حاجه يا مس فرحه
=مش شايفه اي تاكسيات هنا يا عم مدبولي
وقف عم مدبولي في منتصف الطريق ملوحا بيديا لتقف له إحدى السيارات..
=دي ملاكي يا عم مدبولي مش تاكس
-معلش يا افندي والله كنت فاكرك.. مييين دكتور علاء!
...
-هي اتاخرت كده ليه ؟ ولا وفونها مغلق الهانم،طب اتجوزها واحبسها في برطمان دي ولا اعمل فيها إيه
=أهدي يا بابا الغايب حجته معاه
-ست العاقلين انتي يا وصال والله مانا عارف مين بابا مين هنا
=بابا
-هااه
=انت فعلا تتجوز مس فرحه
-قولي يا مسهل
=طيب هتجيبلي أخ العب معاه
-بس هي تيجي ونشوف سوا الموضوع د..يااا صلاااة النبي احسسسسن !!!
أغلقت فرحه باب السياره أمامها عم مدبولي ودكتور علاء يراقبهما امير من الشرفه يكاد يلقي بنيازك مشتعله من عينيه ،توقف علاء ليتكلم معها فجأة ابتسمت فرحه..
-دي بتضحك! مييين هيتجاب من شعره ناو
ترك امير الشرفه وأخذ السلم في ثلاثة خطوات وربما أقل حتى فتح الباب ليجد فرحه أمامه تهم بالطرق عليه..
=معلش ع التأخير والله اصل..
-ادخلي كده
سحبها من يدها واغلق الباب في وجه دكتور علاء والذي كان يقف مستعدا للدخول خلفها
=يا نهار ازرق دكتور علاء على الباب الحق افتحله
-ايييه ده بجد مأخدتش بالي خااالص
فتح امير الباب ببطيء حتي ظهرت جبهة دكتور علاء له وسرعان ما اغلقه مجددا
-معلش يا دكتووور الباب بيعلق ،زقه كده من عندك
امتثل المسكين لكلام امير وبدأ في دفع الباب بالفعل حتي همس امير في نفسه.. -شوف البجح وكمان بيزقه بجد ،طيييب
وفي حركة مفاجئة فتح امير الباب بسرعه مما ترتب عليه اندفاع دكتور علاء للداخل ووقوعه..
-يا سااتر ياا رب قوم يا ولدي قووم ,اخص ع الباب
=بسيطه بسيطه مفيش حاجه يا باشمهندس
=حضرتك كويس يا دكتور
-روحيله العياده اطمني عليه بالمره
=امير
=اهاها انتي لسه هتعرفي امير هو كده دمه خفيف
=لسه بتعرف والله اهو يا دكتور
-اتنين لموون يا ام علي شكل القعده مطوله
=لا لا متجبش حاجه لازم اروح العياده دلوقت
-طب ومستني ايه
=هاه
-اقصد م تخليك منورنا
=الله يكرمك المهم اني اطمنت ع الانسه فرحة اصل العربيه بتاعتكم كانت عطلانه ولقيتهم في الطريق فاضطرت تركب معايا هي وعم مدبولي
-وقعتها طيييين
=هي مين؟
-العربيه يعني عشان عطلت في الوقت ده
=اه ,طيب استأذن انا فرصه سعيده يا انسه فرحه..
ابتسم الدكتور علاء ماددا يده نحو فرحه ليصافحها حتي وجد بد اخري صافحته بحراره وعنف..
-مبتسلمش الانسه فرحه شرفتنا

ما ان اغلق الباب خلفه حتي نظر امير إلى موضع فرحه ليجدها علي اخر درجة بالسلم ولت ساقيها للريح..
-خدددي يااا بت
...
ايوه يا دادي.. اه من بدري وصلت.. اديني مستنياه في الاوضه خليت ام علي تفتحهالي.. اوكيه هكلمك تاني
..
كان امير يركض في الممر بينما تعدو فرحة عدوا امامه حتي وصلت لاخر غرفة بالممر وفتحتها لتهم بالدخول والاختباء منه لكنها توقفت مما رأت حتي وصل إليها امير واصطدم بها ،
-يعني هتروحي مني فيـ..انتي بتبصي علي ايه ؟
نظر امير الي موضع بصر فرحه لتجحظ عيناه..
-هاااااي ميرووو
ببطء استدارت اليه فرحه وعقدت يديها امامها..
=مين دي يااا ..ميروووو ؟
-هاه
"يقول نجم : إن الهوي وإن كان عسل مصفي فإن طباع البحر المالح تعتريه احيانا فما بين مد وجذر يكون شراع الحب الموجَ والبحّار "

يتبع