الحياة برفقة الجن (كاملة)

قصة ( الحياة برفقة الجن ) كاملة
عمرك سمعت عن حد بيشتغل مع الجن ؟!
انا ياسر .. او الشيخ ياسر زي ما الناس بتقول شاب 38 سنة خريج كلية حقوق
الحكاية بدات مع حبي الشديد للقراءة وخصوصا عن الجن والسحر الاسود
لكل شئ سبب مافيش حاجه مالهاش سبب ومافيش حاجه مالهاش حل
انا عمي بعد وفاة والدي سرق ميراثي ... اتبهدلت معاه في المحاكم ما نولتش منه غير انه لبسني في قضية كبيرة واتنازل عنها عشان خاطر ما سيبش امي لوحدها فالبيت طبعا اتنازل بعد ذل وعياط وعشان ما يضيعش مستقبلي زي ما بيدعي
واخر كل شهر يدينا كام ملطوش من فلوسنا اللي سارقها ومشغلها ... اشتغلت كل حاجه مبيعات, شيف, ويتر , في قهوة , فرد امن , كل حاجه والشغل مش عيب بس العيب انك تموت نفسك طول النهار فحت وردم واخر الشهر تاخد مبلغ اقل من المتواضع
حبي للقراءة ما توقفش بالعكس زاد رغم اننا زمان كنا مرتاحين جدا ماديا لان عمي ووالدي كانوا شغالين في المقاولات وبيكسبوا كويس .. بس الطمع مش بيخلي الانسان يرضى حتى بالكتير قوي
فعلا ما يملاش عين الانسان غير التراب ... بس في يوم صحبي مسكني وقالي هتفضل تتمسكن هتعيش طول عمرك حقك ضايع ومش هتلاقي اللي يجبهولك .. يا تشغل دماغك وتاكل عيش ولحمة .. يا تفضل قفل زي مانت وتاكل عيش وناشف
أمي بعدها بدات تتعب .. والدواء اسعاره بقت غالية مش عارف اعمل ايه خلاص الدنيا حتى بقليلها مش مستحملة .. فضلت كده لحد ما في يوم الزهق والتعب النفسي وحبي الشديد في موضوعات الجن والسحر شدتني اقراء حاجات ماكنش لازم اقراها ابدا وصلت لحاجات صعبه جدا بس خلاص كان لازم اخد الخطوه دي دلوقتي
انا كده كده مش باقي على حاجه .. وللاسف الحاجات دي اللي بيدور عليها هي كمان بتدور عليه عشان كده بيقولوا المثل اللي بيخاف من العفريت يطلعلوا لان الحاجات دي بالذت قوتها طرديه ناحيتك لما تفكر فيها فبتنجذبوا لبعض بسرعه شديده
جمعت ورق من اكثر من كتاب ولقيت فيها تعاويذ ورق كتيره جدا .. حاجات من مكتبات قديمة محدش بيروحها دورت ما بين الكتب الصفراء المركونه اللي عليها تراب وما بين مواقع كتير على الانترنت ..انا من النوع اللي لما بحب اتعلم واعرف معلومه بعرف اوصلها دي نعمة ماقدرش انكرها بس للحاجه اللي انا شغوف بيها بس
وفي يوم بعد ما رجعت من شغلي كسواق دليفري لمطعم مشهور.. جبت كل المطلوب عشان التعويذة تتم كانت اخف تعويذه لقيتها بتكسر الحاجز اللي بينك وبين العوالم الموازية لينا .. بتخليك تشوفهم وتسمعهم .. تعويذة بالنسبة لشخص مجنون بالجن فرصة ذهبية
انا مش عارف ليه الناس بتخاف من الجن انا شايف سبب الخوف ده ان الانسان بطبعة بيخاف من المجهول انما الحاجه اللي عارفها بيبقى عارف اخرها فين وهتئذية بجد ولا لا .. يعني من الاخر الانسان بيتوقع اوحش سيناريو في اي حاجه مجهولة.. او رد فعل مستقبلي لا اراديا بيفكر في اوحش حاجه وبيسلم بيها حتى يثبت له العكس
وبالفعل جبت قطة صغيرة من الشارع من قطة كانت لسه والده تحت العمارة .. سرقت قطة صغيره من عيالها وجبت ورقه رسمت عليها مربعات وارقام وحروف وجبت طين وبعدها ذبحت القطة الصغيرة ونزلت دمها على الورقة و قريت التعويذه المكتوبه وحرقتها وبعدها قلبت الرماد المحروق بالدم مع الطين وحطيته على عيني بعد ما غمضتها وعلى راسي ورى وداني
وبعدها شيلت الطين ده وشيلت القطه في كيس ورميتها من البلكونه ...  بعد ما نضفت الاوضه كويس, بعدها فضلت صاحي في الاوضه وانا طافي النور .. وقلبي بصراحة كان بيدق جامد مش خوف وقلق على قد ما هوا اثارة وحماس وجنان ..بعدها فضلت مستني حولي 3 ساعات ما حصلش اي حاجه بدات اتعب وقومت ممدد جسمي عالسرير وبعدها فكرت في اللي حصل وقعدت اعيط كتير اوي
حسيت قد ايه انا بائس قد ايه كل حاجه مش راضية تمشي معايه فشل التجربه اتقلب مع مأساة حياتي وقلبي وجعني من كتر البكاء والنواح لحد ما فجأة وانا بعيط لقيت الدولاب زي ما يكون انفجر من جوة سمعت صوت عالي اوي من الدولاب وانا مش شايف في الضلمة .. الخضة وقفت نفسي ووقفت العياط في ثانية للحظة فضلت ساكت وبعدها قومت ولعت النور لقيت الدولاب مفتوح والهدوم كلها واقعه على الارض فتحة الدولاب بالقوة دي
حسيت ان كان في قنبلة جواه وانفجرت .. فضلت شويه ولسه هعدل الهدوم بعدها طنشت وقومت طافي النور ونايم بعدها بدات احس بصداع رهيب في راسي وعيني بتوجعني .. بعدها حسيت اني مش قادر اتنفس بدات اسمع صوت النار .. صوت ألسنة اللهب في ودني وصوت صفير جامد اوي .. صوت الجن دا اكيد
الصوت بيزيد وسامع جمل غريبه بتتقال بيقاع ثابت جمله ويسكتو وجملتين ويسكتو وجملة ويسكتو اصوات كتير بسمعها من كل حتى حواليا حاولت اقوم اشرب او اولع النور مش قادر اتحرك حاسس ان جسمي متكتف عالسرير حسيت بعدها بسخونة كبيرة تحت ضهري وانا نايم بدأت أتالم بجد حاسس ضهري بيسيح ومن كتر الصداع في عيني حاسس عيني هتنفجر وصداع الصوت في وداني عمال يزيد فضل الحال مستمر لحد ما اغمى عليا
صحيت تاني يوم لقيت الاوضة زي ما يكون مافيش حاجه حصلت فيها والهدوم اللي سبتها على الارض رجعت الدولاب وكل حاجه في مكانها قولت جايز امي شالتهم الصبح وانا نايم بس بعدها بفتح باب الاوضه لقيتني قافله بالمفتاح مش عارف اميز دا كله كان حلم ولا واقع
المهم فطرت ونزلت عالشغل اليوم عدى عادي لحد اخر اوردر كنت بوصله الساعة 12 بليل اخر الشيفت بتاعي وصلت الاوردر وانا سامع الصوت اللي كنت سامعه امبارح الصوت اللي سمعته وانا نايم عمال يزيد كل ما اقرب من الشقة لحد ما فتحلي راجل كبير شكله زعلان جدا وعليه الهم ولما فتح الباب الصوت زاد اديته الاكل قالي ثانية هجبلك الفلوس وانا سامع الصوت من جوة
لما جالي قولتله في مشكله يا حج عندك .. بصلي باستغراب بعدها وشه رجع لملامحه الطبيعيه وقالي مافيش حاجه يابني وسابلي تبس كبير مكنتش مصدق بس لقيتني بقول حاجه قبل ما يقفل الباب على طول قولتله انت في حد عندك الجن لابسه كان قفل الباب وبعدها لسه هنزل عالسلم لقيته فتح الباب بسرعه تاني وعينه مبرقه وبيقولي انت قولت ايه ؟؟ !
قولتله في حد عندك الجن لابسه ولا حاجه ؟ فضل ساكت وبيبصلي انا قلقت قولت شكله هيتخانق معايه ايه العبط اللي انا بقوله ده ؟ لسه هعتذرله لقيته بيقولي انت عرفت منين ؟ معرفتش اقول ايه ساعتها الرد فاجئني قولتله ياحج بيني وبينك انا عندي حاجه مميز فيها اني بحس بالجن قالي طيب تعالى يابني ساعدني لو تعرف وهديك اللي انت عايزة او حتى دلني على شيخ كويس يساعد بنتي
قولتله ممكن اشوفها ياحج قالي اتفضل بدون تردد دخلت البيت والصوت عمال يزيد جمل بتتقال كانها غناء وصوت طبل وفي كل ركن في البيت شايف نار مولعة وقفت عندها وهوا يقولي مالك قولتله مافيش اكيد هوا مش شايفها لحد ما وصلت عند اوضه مقفوله قالي استنى هنا .. ودخل وانا سامع صوت عالي جاي من جوه
طلع وهوا شكله حزين وعينه بتدمع هوا وزوجته قالولي اتفضل حضرتك .. دخلت الاوضه شوفت حاجه ماكنتش اتوقعها ابدا لدرجه ان الدم وقف في عروقي وحسيت بكتمه في نفسي وعيني برقت لما لقيت ....
------------------------------------------------------------------------------------------------
وعيني برقت لما لقيت بنت جميله في منتصف العشرينات نايمه وفي أربعه من الجن كل واحد ماسك طرف من اطرافها  والبنت عماله تتئوه من الوجع فضلت واقف شوية .. انا عرفت انهم جن رغم اني ما شوفتهمش قبل كده اجسامهم نحيفه جدا ودرعاتهم وارجلهم طويله لونهم رمادي غامق زي ما يكون مسحوب منه الدم أظافرهم أسود غامق شعرهم أبيض وطويل جدا وعينيهم واسعه كلها سوده مافهاش ابيض زينا فكهم واسعع واسنانهم حاده
منظرهم يقرف وهما بيتصرفوا بهمجيه شديده في ايذاء البنت دي .. بس لما بصيتلهم لقيتهم بيبصولي وهما مستغربين ان عيني جت في عينيهم فضلت باصص على عيونهم كلهم بصوا لبعض .. طبيعي في حياتنا عنينا تيجي في عين الجن بس بعدها انت بتحيد بنظرك بعيد عنه ومش بتركز معاه لانك مش شايفه
بس المرة دي انا شايفه كويس جدا وهوا باصصلي وانا بصصله .. هما دلوقتي استوعبوا اني شايفهم بدأو يفتحو بقهم ويطلعو صوت العزيف اللي شبه الصفاره المزعجه صوتهم الغريب اللي مش بنفهمه .. واحده واحده لقيت والد البنت وامها بيعيطوا وبيقوليلي انت مش بتقرب منها ليه وانت شايف ايه طمنا يابني
قولتله ياحج ما تقلقش كل حاجه هتبقى كويسه هاتلي ميه مغليه وهاتلي كل الملح اللي في البيت .. لقيت الجن بيصرخ بصوت عالي لدرجه سديت وداني من الألم ولقيتهم بدأ يتعفرطوا وهما بيشدوا اجزاء البنت لدرجه ضوافرهم علمت على ايديها ورجليها ابو البنت وامها لما رجعوا لقوا بنتهم مجروحه انهاروا اكتر قولتلهم اطلعو انتو بره دلوقتي بسرعه وسيبوني معاها
كان لازم اعمل حاجه كان لازم اتصرف بسرعه دووبت الملح في المية واحده واحده حسيت ان في غشاء اتشال من ودني حسيت زي ما تكون ودني كانت مسدوده وبدات اسمع دلوقتي لقيت الجن بيصرخ انه مش هيسيب البنت دي وانهم هيتغذوا على روحها وانا لازم اخرج قبل ما يئذوني .. لكن لاحظت حاجه غريبه في واحد شبهي واقف جنبي بس لونه مختلف عني وشه شبه وشي بس لونه زيهم واطرافه اطول من اطرافي ولما ببصله بيبصلي
تقريبا دا القرين بتاعي .. هما كانوا خايفين منه اكتر من نظرات عينيهم .. دا انا في العالم الموازي دا انا في عالم ماكنتش بشوفه بعيني .. وتقريبا قوة القرين بتاعي هوا قوتي في عالم الجن .. حطيت ايدي في المياه المالحه وبدات اقرب من الجن اللي بدا يتشنج ويصرخ اكتر .. لحد ما رشيت عليهم المية وبدأو فعلا يسيبو اطراف البنت ويهربوا على اركان الاوضه الاربعه بدات ارش عليهم ميه في ركن الغرفه لحد ما كلهم طلعوا من سقف الغرفه واختفوا والبنت هديت وهي نايمه
طبعا ندهت ابوها وامها جم وهما مش مصدقين ان بنتهم بطلت تتحرك بالتشنجات الغريبة اللي كانت بتتحرك بيها ووالدها فضل يشكرني لدرجه انه باس ايدي وهوا بيعيط وانا كنت من الخضه بقوله مافيش حاجه سيبته ومشيت وانا على باب الشقه ندهلي ولقيته بيديلي ظرف وعمال يحلفني اخده وما ارفضوش وعمال يقولي انت بركه وراجل مبروك شكرته ونزلت ركبت الموتسيكل اللي بوصل عليه الطلبات وانا مش مستوعب لسه اللي حصل معايه في الشقه دي
بصيت على موبايلي لقيت الشغل مكلمني 8 مرات .. رجعت الشغل لقيتهم بيتخانقوا معايه وبيهددوني بالرفد فعلا ماكنتش قادر اعمل اي حاجه غير اني اقدم استقالتي واريح دماغي من الهم ده روحت البيت وفضلت قاعد اتخيل اللي حصل مش راضي يروح عن خيالي بصيت في الظرف اللي الراجل ادهولي لقيت فيه ..7000 جنيه بصراحه كنت محتاج فلوس لعلاج والدتي فرحت ونزلت جبتلها علاج
وبدات اقرا اكتر عن موضوع الجن وبقتي اعرف اشوف قريني او ما اشوفوش بقيت بختار الطبقه اللي ببص بيها بعيني اشوف بيها عادي ولا اقدر اشوف بيها الجن .. واتوقع ان اللي وقع الدولاب وعمل الربكه دي يومها كان القرين ..توسعت اكتر وبدات اقراء في السحر الاسود ومع قدراتي حاليا هقدر اشوف الجن وهوا بينفذ مهمته اللي هستدعيه عشانها  بس مش عايز الجئ للحل ده دلوقتي مر بعدها 13 يوم
وانا بصرف من الفلوس اللي معايه وبدات تخلص .. وكنت قريت كتير في موضوع الجن لحد ما لقيت تلفوني بيرن برقم غريب رديت عليه لقيته الراجل اللي كنت عنده بيشكرني تاني وبيقولي في حد في المنطقه برده مراته مش طبيعية وبتصرخ طول النهار وتتشنج وتقول كلام مش مفهوم وبترجع كتير قالي لو تقدر تساعدنا قولتله هجيلك وقبل ما اروح قولت البس لبس مختلف المره دي عن اللبس العادي لبست جلبيه بيضا ونزلت
بصراحه رايح وانا كلي حماس للتجربه التانيه .. وصلت للراجل سلم عليه وبنته جت شكرتني هي وامها بعدين اتحركنا على شقه الراجل اللي كان بيحكيلي عليه ده .. وصلنا عنده لقيت الناس بتستقبلني بحفوة والشيخ وصل الشيخ وصل
دخلت الاوضه عند مراته ولقيت الناس مجهزة مية سخنه وملح ..وجوزها بيقولي فضلنا نشر المكان كله بالميه والملح ومافيش فايده الظاهر ان ايدك فيها البركه يا شيخ ياسر.. قولتلهم استنوا الست كانت ساكته ما بتتحركش شايف صوابع كبيره مسكاها بس انا رجلي بدات ترتجف في اربع صوابع ماسكها جسمها اربع صوابع كبيره جدا لونها ازرق .. ايه الكائن الغريب ده .. لما اللي ظاهر منه صوابع ايده بس بقيه جسمه فين ؟!
اتحركت ناحية الست وهي بتبصلي وجسمها متكتف وهما مش عارفين متكتف ليه .. بصيت من شباك غرفتها وكانت الصدمه هوا ساكن في الدور السادس ..و في كائن ضخم واقف في الشارع ووشه واصل للدور السادس وماسك البنت من جسمها طبعا هما ماعندهمش حواجز زي الحيطان والارض كائنات لها تكوين مختلف لجزيئات جسمها .. بصيتله وهوا ضخم جدا ولابس تاج ذهبي كبير فوق راسه .. وبعدها لقيته بيبصلي.. وبدأ يتكلم معايه بس من غير ما يفتح بقه حتى بيخاطبني بعقلي .. قالي انه ملك من الملوك السبعه للجن الازرق .. والبنت دي حاولت تقرأ تعويذات سحر وفتحتله بوابه وبعدها تراجعت في قرارها .. والعقد المبرم مع الجن صعب تخلفه .. فعقابها انها تفضل كده لحد ما تموت
مابقتش عارف اعمل معاه ايه انا لو رشيت عليه مية بملح هيعطس بس مش هيتئذي .. مش هتاثر فيه .. هنا كان لازم افاوضه .. ايوه الجن بيتفق زي الانسان برده بس اتفقاته صعبه .. فقولتله اطلب طلب مقابل انك تسيبها .. قالي طلبي انك تاخد روح مكانها .. قولتله ازاي ؟
قالي بانك تختار شخص تاني اخد روحه مكان البنت دي وتكتب اسمه في ورقه وتحط عليها نقطه من دمك وتحرقها واول ما تعمل كده هاخد روحه بدل البنت دي .. للحظات فكرت وبعدها قولتله موافق .. فجأة لقيته اختفى من قدامي ببص عالبنت لقيته بتاخد نفس كانها كانت تحت البحر ولسه طالعه عالشط بتشهق شهقه كبيرة وبتتنفس بقوة زي ما يكون نفسها كان مكتوم
اهلها جريو عليها والناس بدات تحتفل وكلهم جايين يبوسوا ايدي ووانا ماشي لقيته مديلي ظرف كبير قالي دي اقل حاجه اقدر اقدمهالك عشان انت راجل بركة خدت منه الظرف ومشيت روحت البيت كنت في منتهى السعاده اني عرفت اساعد البنت دي بس المصيبه دلوقتي اني لازم اختار حد يموت مكانها هختار مين؟
معرفتش انام من كتر التفكير بس بعدها جاتلي فكره بس كان لابد منها .. روحت تاني يوم بليل لعمي قولتله اكتبلي كل املاكك باسمي .. بصلي وقالي انت اتجننت اكيد وحاول يطردني قولتله اقعد ياعمي .. قالي ومالك لابس جلبيه ومدروش وعاملي فيها شيخ كده هحترمك يعني قولتله اقعد ياعمي ونتكلم انت ماتعرفش انا بقيت اشتغل مع الجن .. قالي وانا مابخفش من الجن الازرق قولتله ايه اللي يثبتلك اني بشتغل معاهم عشان تسمع كلامي فضل يشتمني وقالي هطلبلك البوليس وبعدها ابنه الكبير جه .. ما يافرقش عن قذاره ابوه
حاول هوا وابنه يطردوني من البيت قولتله اخر حاجه هعملها وهمشي بعدها عشان تصدقوني طلعت من جيبي الورقه والقلم وكتبت اسم ابن عمي وعضيت صوباعي نزل دم عالورقه لقيت عمي وابنه بداو يتوترو وهما بيشوفوني بعمل ايه بعدها ..طلعت ولاعه وحرقت الورقه وهي لسه بتولع قولت لعمي ابنك هيموت دلوقتي
لسه ابنه هيشتمني ويتخانق معايه كانت الورقه اتحرقت خالص لقيته وقع على الارض قبل ما يكمل جملته برغم اني عارف اللي هيحصل لولا ان الموت ليه هيبه بتخوف كل انسان عمي اتصرع من الخوف على ابنه وفضل يبكي وينده باسم ابنه وهوا حاضنه وفضل يحسبن عليا ومن الزعل والخضه والخوف مش قادر يقوم من الارض
طلعت بعدها ورقه تاني وكتبت فيها اسم عمي وحطيت عليها نقطه دم وروحت مولع الولاعه وقربتها من الورقه قولتله تحب تموت انت كمان ولا تكتبلي كل املاكك قالي هديك اللي انت عايزة يابني بس رجعلي ابني .. خد كل فلوسي والبيت والارض والشركه رجعلي ابني الوحيد ماليش غيره عايش عشانه بشتغل ليل نهار عشان يعيش مرتاح
قولتله الكلام ده وقته عدى يا عمي يا اخو ابويا .. كنت فين وانت سارق فلوس اخوك اللي عملها عشان ابنه كنت فين وانا بلف من شغله لشغله ومش لاقيين اكل لاخر الشهر كنت فين وامي عيانه ومش عارف اوديها مستشفى تتعالج .. كنت فين لما خلتني اتجنن واقتل بايديا ابن عمي .. كنت فين كل ده
قالي رجعلي ابني .. مش عايز حاجه خد كل الفلوس خد كل حاجه ورجع ابني .. وفضل يعيط جامد وهوا راجل كبير لدرجه وشه احمر بعدها ومقدرش ياخد نفسه لقيت نفسي بجري اجبله كوبايه مية وهوا نفسه اتقطع فعلا ووشه احمر الدم اتحبس فيه لحد ما ما مات
فضلت باصص عليهم هما الاتنين مش عارف اعمل ايه ؟ هل انا غلطان انا كنت باخد حقي اللي ضاع حقي اللي اتسرق .. مش قصدي اقتلهم هما الاتنين بس ثانية واحده وليه اقتل حد فيهم اصلا .. انا ايه اللي دخلني في المصيبه السودا دي .... اي كان اللي عملته دا قتل .. بعدها قومت دخلت غرفه عمي فتحت دولابه لقيت فلوس كتير جدا خدتها في شنطه ورجعت البيت حطيت الفلوس في دولاب والدتي
وجيبتلها الدواء بتاعها وقولتلها انا رايح مشوار وهتاخر .. لقيتها بتبصلي وبتعيط وبتقولي مش هتاخر عليك سيبتها ونزلت
روحت لحد البحر اكتر حاجه بخاف منها .. فضلت واقف قدامه فتره بفكر في كل اللي فات بعدها بدات امشي لحد مادخلت في العميق انا مابعرفش اعوم انا فعلا بنتحر عشان الموضوع بقى صعب عليا اتحمله ما بقتش محتاج اي حاجه في حياتي اللعب بالجن والسحر مش سهل مشيت معايه مره تاني مره هتكون العواقب قاسيه جدا عواقب ما تقدرش تتحملها وتتعايش معاها
بدات رجلي تبعد عن الارض بدات احس بالموج العالي بدات اشرب مية مالحه فعلا فجأة افتكرت اخر حاجه اتقالتلي من امي وانا بودعها .. قالتلي مش هتاخر عليك .. الكلام ده معناه ايه ؟ هي عرفت منين اني مش راجع وهي هتجيلي طب لو هي هتجيلي هل دا معناه انها عارفه اني رايح انتحر ولو عارفه معناه ايه مش هتتاخر عليا
انها مش هتعيش وهتموت هي كمان هي لسه تعبانه .. عايز اكون معاها قبل ما تموت حاسس الميه بتسحبني لتحت عايز ارجع الشط دلوقتي مش عايز اموت دلوقتي غير وانا مع والدتي بطمنها .. عايز ارجع الشط بس انا دخلت جوه لدرجه اني مش عارف ارجع ..عايز ارجع الشط ..بس انا اتسرعت وماسمعتش كلام كتير حلول كتير كان ممكن ارضى بيها في حياتي .. عايز ارجع الشط .. بس الوقت عدى عالندم وانك تصلح اللي فات .. كام واحد عالشط وبأيده ما يغرقش نفسه ويصلح حياته قبل ما يدخل برجليه في بحر عميق ماحدش بيعيش فيه عايز ارجع الشط عشان اقول لوالدتي اني .

تمت ... النهاية
بقلم_عمر_ليمونه