رسام الموتي🖌الجزء الثاني

رسام_الموتى
الحلقة الثانية
فتحت الفيس ورحت على صفحة الشاب اللي شفته في منامي,, واتفاجئت لما لقيت أصحابه بينعوه ومن وسط التعليقات عرفت أنه مات بازمه قلبية ليلة إمبارح وعلى جسمه أثر حروق
ساعتها اترميت على كنبة الأنتريه وأنا مش عارف أعمل ايه أو اتصرف إزاي,,
وبدأ يسيطر على تفكيري إن البورتريه اللي رسمته ليه في الميدان والصوره اللي اترسمت ليلة إمبارح على لوحتي وانا نايم,, ممكن تكون هي السبب في اللي حصل له,,
كنت مرعوب وبفكر في مصير الأربعه اللي رسمت لهم صور في نفس اليوم دا,,
وبدأت افتكر كمان الراجل اللي رسم عندي صورة من أكتر من أسبوع ولقيته ميت في نفس الصباح اللي لقيت فيه اول رسمه للجزيرة وبنفس طريقة موت الشاب دا,,  بس دا مماتش تاني ليله بعد ما رسمت له الرسمه,, دا مات بعدها باسبوع وبعدين الرسمة بتاعته ماكانتش بورتريه ,, دي كانت صورة جايبهالي في ورقه وكأنها مقطوعه من كتاب وانا رسمتهاله
ساعتها فتحت موبايلي وطلعت الصورة من ملف كان إسمه.. صور طلعت بيه,, مانا كنت عامله فولدر باسمه ومعشم نفسي إن الشغل بينا هيزيد,,
وأول ما فتحت الصورة حسيت بانقباض في صدري ورعشة في أيديا ونظري كأنه ضعف وعينيا زاغت وشايف الصوره مبهمه قدامي لدرجة إن التليفون كان هيقع من إيدي فحطيته على مخدع الكنبة وبصيت حواليا عشان أشوف الصورة دي اللي مشوشه ولا انا نظري اللي حصل له حاجه,, فحسيت إن رؤيتي كلها مشوشه وفي وسط ما كنت بدور بعينيا في غرفة الانتريه لمحت كيان زي الكيانات اللي بشوفها في أحلامي بس كان أضخم بكتير وقاعد متربص بعينيه اللي بتلمع في ركن الغرفة والهالة الخضرة بتزيد وتقل فاتنفضت واقف من مكاني لقيت نظري رجع طبيعي والكيان اختفى ساعتها وكأني كنت بحلم ,, فقعدت تاني وانا قلبي بيتنفض من الرعب اللي بقا شيء معتاد والتفتت ناحية تليفوني عشان أحس بنفس الحالة بتتكرر فاتحاملت على نفسي وبصيت بصه خاطفه على الرسمه ,, ويمكن أول مرة ألاحظ إنها مقبضه وكئيبة أوي كده,, وكمان ما تقدرش تحدد لها سواء كانت بتنتمي للرسم التشكيلي الرمزي وجواها رسالة مبهمة ولا للرسم الانطباعي, كنت تحس أن الرسمه مقسومه بالعرض لنصين,, نص فوق لونه سماوي مريح والنص اللي تحت زي ما يكون بترولي مقبض وفي مجموعه من الخطوط المتشابكة السودة كانت عامله زي ما تكون موجات مستعرضه متقاربه والحد الفاصل بين اللونين السماوي والبترولي هو إتجاه أنتشار الموجه اللي بتتعامد عليه القمم والقيعان بتاعت الموجات او الخطوط دي,, القمم كانت في اللون السماوي والقيعان شبه باهته في البترولي وفي رموز عبارة عن صور حيوانات,, عامله زي الكتابة الهيروغليفية بتتخلل القمم ورموز تانية في القيعان
بعدها قفلت الصورة وأنا مش عارف أفكر ولا قادر أربط أي أحداث ببعضها
فكرت أتصل بالناس دي وأقولهم يحرقوا الصور اللي رسمتها لهم لكن قلت أكيد هيقولوا عليا مجنون
وكمان لو حصل ومات منهم حد بعد مكالمتي وكان حكى لحد على المكالمة دي أنا اللي هروح في الرجلين وماحدش هيصدق موضوع الرسمة وبردو هطلع في الآخر مجنون
ساعات قضيتها في التفكير وشرب السجاير والقهوة ومقاومة رغبة عنيفة في التهام علبة تونه كل نص ساعه تقريبا
أنا ماكانش ليا نفس آكل أصلا,, وفي نفس الوقت حاسس إني محتاج أكل تونه,, نفس إحساس اللي فصل من آخر إسموك ومحتاج إسموك جديد
فبعد ما أكلت علبة التونة التالته في ست ساعات تقريبا من وقت ما صحيت قررت إني هعمل اللي في أيدي وهو أني أشيل حامل اللوحات دا خالص وأحرق اللي باقي عندي من لوحات بيضة وارمي ألواني وأحرق الرسمتين اللي عندي
أي حاجه تخص الرسم هحرقها وارميها ومش هرسم حد تاني لفترة,, لغاية ما اشوف أنا هعمل إيه
وبالفعل اتخلصت من كل حاجه تخص الرسم وعدى اليوم سريع وجا الليل وانا مرعوب من فكرة إني أنام
وفضلت أقاوم النوم لغاية ما عينيا غفلت غصب عني عشان ألاقي نفسي في نفس المكان والشجرة الضخمه مشتعله وتلات شجرات غيرها أقل منها في الحجم والع فيهم النار وأربع كيانات ضخمه بتقرب في أربع دروب ووقفوا على بعد خطوات وفجأة اتقدم منهم اتنين,,, واحد منهم بقا على يميني والتاني على شمالي,, عشان فجأة ألاقي نفسي غادرت الغابة ورؤيتي إتقسمت لنصين شايف فيهم الولد والبنت اللي كانوا اترسموا سوى بس كل واحد منهم في نص من مجال الرؤية وكل واحد منهم على سريره في بيته والاتنين بينتفضوا نفس الانتفاضه لغاية ما جسمهم همد والزبد الابيض خرج من بين شفايفهم في نفس اللحظة تقريبا
فقمت من النوم مفزوع
لكن اللي فزعني أكتر إني لقيتني راسم نفس الرسمه بتاعت الجزيرة على الحيطه بتاعت أوضة نومي بس بلون احمر,,
تقريبا اللون دا كان من دمي,,
خاصة لما بصيت على إبهامي المجروح اللي الدم إتجلط فيه بعد ما أدى مهمته,,
الرسمه بنفس دقة التفاصيل بس اللون الاحمر ضايفلها رعب أكتر
ففتحت الفيس بسرعة وأنا واثق من اللي هشوفه من قبل ما افتحه
تقريبا أنا بقيت رسام الموتى,, بس الموتى جايين بترتيب عكسي اللي اترسم الأخر مات الاول وتقريبا كنت عارف مين اللي عليه الدور,, كان الشاب ابو شورت جينز وتي شيرت رمادي اللي كنت بقول عليه حكاك وجاي عشان يترسم قدام المزة اللي كانت واقفه بتترسم وقتها,, واللي هيكون عليها الدور بعده
ساعتها قررت اتواصل معاهم بأي شكل وفعلا بعتلهم رسايل,, فالشاب ماردش على رسايلي لكن بعد ساعه تقريبا لقيت البنت الاستايلش اللي كان أسمها مي ردت عليا
كنت باعت لها_صباح الخير
فردت في رسالة =إيه, عايز ترسمني تاني ولا إيه؟؟ على فكرة لو عايز ترسمني واحدة تانية فور فري أنا موافقه, لأنك بترسم حلو فعلا
فبعت لها صورة طلعت وصور الأربع أشخاص اللي رسمتهم في نفس اليوم اللي رسمتها فيه وصورة الرسمة اللي رسمتها لطلعت في البداية وقلت لها_تعرفي حد من دول؟؟
فشافت الرسالة لكن عدى يمكن حوالي دقيقة على ما ردت عليا
=بتسأل ليه؟؟
مش عارف إيه اللي دفعني إني أقولها إن في خطر على حياتها وبدأت أحكي لها الحكاية كاملة وقلت لها ممكن تتأكدي من الأكونتس بتاعت الناس اللي ماتت وبعتلها كمان صور البورتريهات اللي كنت رسمتهالهم في نفس اليوم اللي رسمت فيه البورتريه بتاعها لأني بصور كل رسمه برسمها واحتفظ بيها عندي
فردت ساعتها على طول_إحنا لازم نتقابل في أسرع وقت