رسام الموتي🖌الجزء الثالث

الحلقة التالته
رسام_الموتى
وفعلا خلال نص ساعه كنا متقابلين في كافيه هادي في مدينة نصر كنا الضهر تقريبا والكافيه شبه فاضي حوالينا
واول ما قعدنا قلت لها _أنا عايز أفهم إيه اللي بيحصل
فطلعت سجايرها وهي بتتلفت حواليها بقلق وناولتني سيجارة وهي إيدها بترتعش ومرتبكه
وقالت= مش عارفه ابدا لك منين وهتفهمني ولا لا
_أنا مستعد افهم اي حاجه بعد كل اللي شفته دا
ففركت جبهتها بأيدها اللي فيها السيجارة وقالت=بص,, في الأول كده عشان تبقى فاهم,, من فتره حوالي سنتين او تلاته ظهر موضوع الدارك سايد زي موضه أو طرقعة وسط فئة معينة من الشباب المهتم بالبارانورمال كنوع من أنواع الهروب من الاكتئاب والطاقة السلبية والنفور من الحياة اللي سببته مادية الحياة وزيفها وبسبب بردو السوشيال ميديا اللي قتلت الحياة الحقيقية جوانا
فهزيت راسي_مش فاهم,, إيه الدارك سايد دا
=الدارك سايد دا اللي هو عالم الجن والسحر والاقتران بالجن بكافة أشكاله سواء مس أو تسخير أومخاواه وخلافه,, ماهو أي كارثه او مصيبه لو الناس حبت تقلل من وقعها بيلجئوا لإنهم يغيروا مسماها,,
زي الرشوة كده ما بقت مراضيه والاحتيال بقا شطارة وهكذا,,
وساعتها قطع كلامنا ظهور الوايتر فطلبنا أتنين قهوه بن ساده فاتح مانو,,
فكملت كلامها وهي عاقده حواجبها_اللي إسمه طلعت دا كان كدا,, ساحر أو هيدر,, وكان مكون مجموعة من خمس افراد غيره من سنة تقريبا عشان يحاول يستدعي عشيرة صغيرة من الجن ساكنة جزيرة نائية,, وكان من الشروط طبعا إنه بيقابل كل حد من المجموعة دي لوحده,, أقصى حاجه يكونوا اتنين مع بعض لو هم خايفين أوي وجايين مع بعض وانا كنت من المجموعة دي بس طبعا ماكنتش أعرف مجموعتي فيها مين لاني كنت بقابله لوحدي,, فقابلته تلات مرات في الليلة الاخيرة من الشهر العربي وقت ما بيكون القمر محاق لمدة تلات شهور
أول شهر أكلني لحمة نية, حته صغيرة جدا في طبق المفروض إنها لحم ميت
تاني شهر جابلي مياة وقالي أخد شاور بيها في الليالي القمرية التلاته في مكان مكشوف ولو مفيش غير الحمام يبقى أفتح شباكه عليا
تالت شهر تليت عهودي ونذوري
كل دا في مقابل إني هخد هديه اللي هي الخويه من الجن بس زي ما قلت لك  زاي كالد إيت هديه,, والمفترض إنها مش مؤذيه وهتساعدني في تجاوز أزماتي النفسية وتحافظ عليا ضد اي طاقه سلبية وتساعدني في الحياة عموما من غير ما أسحر للناس يعني وكده
_فاهمك فاهمك,, ها وايه اللي حصل بعد كده؟؟
ساعتها رفعت الخصله اللي نازله على جبهتها من شعرها الأحمر الناري وقالت _لكن بعد الشهر التالت وبعد ماكان بيخد مبلغ محترم جدا في كل لقاء,, ديسابيرد,, هو مش ديسابيرد بمعنى إنه اختفى نهائي,, لكن أنا لما غاب عني فترة ماحبيتش اسأل عنه ونسيت الموضوع,, عارف اللي بيبقى ماشي في حاجه وخايف منها بس زي ما يكون مكابر يرجع,, أهو انا كنت كده فلما اختفى زي ما أكون قلت كويس إنها جات منه
وماعرفش أي تفاصيل عن باقي المجموعة بس الاغلب بيكونوا كلهم نفس ظروفي وحتى لو مش كده عمر ما حد هيتجرأ أنه يطلب منه أنه يرجعله فلوسه مثلا,,,,, وات إيفر مش دا موضوعنا
ساعتها كانت رجعت تتلفت حواليها بقلق وهي بتطفي سيجارتها في الطفاية وبتطلع سيجارة تانية وبتولعها لما جا الوايتر بالقهوة فخدت رشفه صغيره وبعدها نفس من سيجارتها وكملت كلامها=اللي أنا متوقعاه دلوقتي أنه نجح بعد التسع شهور دول أنه يستدعي أمير العشيرة دي وعشيرته دي واضح أنها عشيرة طاقتها قوية جدا أو ماحدش بيتحمل حلولها أو الاقتران بيها وكنت أنت الوسيلة اللي بيستدعي من خلالها العشيرة دي
الرسمة اللي رسمتهاله دي اللي كلها موجات,,, تقريبا كده كانت تعويذة الاستدعاء لأمير العشيرة عشان اللي أسمه طلعت يقترن بيه ومن بعدها الأمير دا يجيب عشيرته تقترن بافراد المجموعة بتاعتنا وتقريبا طلعت مات بسبب الاقتران دا وبسبب موته ماقدرش يكمل باقي عهده أو إتفاقه,, وأنت حصل لك بسبب رسمك ليها مس من أمير العشيرة دا,, لأنك بقيت متداخل في الموضوع أو بمعنى آخر يعتبر أنتوا الاتنين اللي أستدعيتوه ومسئولين عن استكمال العهد عشان يكمل طقوس الاستدعاء لباقي عشيرته,, فلما مات طلعت بقيت أنت المسئول وامير العشيرة دا بقى يمسك وأنت نايم ويخليك تقوم ترسم تعويذة الاستدعاء بتاعت كل ليلة اللي بتحمل نص شق الاستدعاء أو السحر
أما الرسومات اللي هي تقريبا الشق التاني من التعويذه أو السحر اللي بتحدد الفرد اللي هيقع عليه السحر واللي أنت رسمتها للخمس افراد اللي هم المجموعه بتاعتنا فدي ماكانتش تلقائية وغير مدبرة
كل واحد فينا إحنا الخمسه اكيد إتوسوس له بشكل معين انه ينزل التحرير في اليوم دا وهو مش داري طبعا إن دي وسوسه,, ولما عدى عليك إتكرر الوسواس بطلب الرسمه
ساعتها نزلت فنجان القهوه من على بوقي وقلت_فعلا  أول واحد مات كنت سألته أنت جاي تترسم ليه فقال لي أنا لا عمري إترسمت ولا حبيت الرسم,, لكن شفتك كده وأنا في التاكسي حسيت إن في صوت بيتردد في عقلي بيقولي إن الرسمة دي هتبقى فال حلو ليا
فهزت راسها بمعنى الموافقة=أنا نفسي مش عارفه أنا نزلت عشان اترسم ليه أنا كمان
كل اللي فكراه إني شفتك فحسيت إن جمالي دا لازم يتعمل بورتريه
فقاطعت كلامها بابتسامه مش في وقتها طبعا وقلت_ودي حقيقة
فابتسمت ابتسامة متوترة وكملت كلامها_فمن ساعة ماحكيتلي أنت على النت بدأت أجزاء من اللغز تتفسر في عقلي
لكن مش معنى كده إن الدارك سايد متوغل فينا
لا بالعكس إحنا السبب,, عالم الجن وعالم الانس عالمين منبتين الصلة عن بعض مبيتقاطعوش الا بمسبب قوي وكل واحد فينا إحنا الخمسة بتوع المجموعة خلق المسبب لما راح لطلعت اما انت فعملت المسبب لما رسمت الرسمه المشبوهة اللي كلها تعاويذ عشان تخد أجرك وخلاص من غير حتى ما تسأل أنت بترسم إيه لكن عشان بردو أنت كنت مجرد راسم لتعويذه الاستدعاء ومش مقدم عهود ونذور فاللي بيمسك دا ما بيمسكش غير وأنت نايم وأنت طاقتك الروحيه في أدنى معدلاتها,, وممكن يكون كان بيوسوس لك أو بيمسك مس خفيف وأنت بترسمنا عشان ترسم التعويذه بين ثنايا الرسمة بتاعتك يعني مش مقترن بيك بشكل كامل وإلا كان بقا مصيرك زي اللي ماتوا
ساعتها برقت عينيا وهاين عليا أقولها طب وانا مال أمي,, أنا ما كانتش أعرف حاجه لكن قلت وأنا بحاول أكون ثابت وأبن ناس _فعلا أنا ماكنتش عارف ليه برسم السما بثنايا غريبة في البورترية بنفس شكل السما في الرسمه اللي بصحى أتفاجئ بيها؟؟ لكن السؤال دلوقتي بيموتوا ليه؟؟
ساعتها كانت بترمي السيجارة التانيه وبتولع التالته=بص,, انا اللي كنت عرفته بعد كده لما موضوع إنتمائي للدارك سايد فكس إن في ناس من اللي دخلت الدارك سايد دول كملوا حياتهم عادي ويمكن احسن من الأول كمان,, بس اغلب اللي دخلوا كانوا بيتبهدلوا,, سافرينج حقيقي,, اللي كانوا بيتعذبوا بحروق في جسمهم وكوابيس مفزعه ونفسية متدمرة واللي منهم انتهى بيه الحال في مستشفى نفسي واللي منهم انتحر
لان الدارك سايد تقريبا مش مستوى واحد من الطاقة دي مستويات متفاوته جدا,, وبعد ما بتتصل بمستوى عالي منهم,, زي ما انت بتطلب هم بيطلبوا واكبر بكتير مما انت بتطلب 
وفي مستويات عالية جدا اللي بتسبب الموت مصروع بمجرد الاقتران ده لو ما استحملتوش
_طب والحل ؟؟
=أهو دا اللي إستحاله أعرفه,, ممكن تقول إن الموضوع ممكن يتحل بحرق البورتريه مثلا, وأنا فعلا حرقت البورتريه لكن أنا ماظنش إن الحل بالسهولة دي خاصة إن إحنا الخمسة تلينا عهود ونذور يعني دا مش سحر حد لحد تاني على صورة ,, دا إحنا اللي طالبين الاقتران دا,, وأغلب ظني كمان أنه مادام الشخص إترسم فبكده حصل التحديد عليه خلاص تمهيدا للاقتران دا,, وفاضل بس تعويذة الاستدعاء اللي أنت بتعملها,, فممكن نقول إنك لو مارسمتش,, ممكن نقطع الصلة دي بس دا بردو أظن إنه صعب جدا,, لأنك مابتبقاش في وعيك وأنت بترسم وماظنش إن حد هيقدر يسيطر عليك وقتها أو يمنعك وبردو هنجرب دا ,,  بس ممكن ....
ساعتها سكتت وبرقت عينيها وقالت=الرسمة الأصلية اللي أنت رسمتها لطلعت,, اللي استدعى بيها امير العشيرة واللي بناءا عليها اقترن بيه هو من البداية ووافق على شروطة بجلب العشيرة للاقتران بافراد المجموعه,, أظن دي اللي يعتبر فيها العهد ولو وصلنالها ممكن نقطع العهد الأساسي اللي إترتب عليه كل شيء 
_طيب ودي هنوصل لها إزاي؟؟
=أنت رسمته له الرسمه فين
_في شقته اللي في الشروق
=أمممم,, تقريبا كده ماكانش غيّر مكانه,, بص أنا اللي أعرفه إن الراجل دا ماكانش ليه أهل,, زي ما بيقولوا كده مقطوع من شجرة,, فأنا شايفه إن لو قدرنا ندخل شقته دي ممكن نلاقيها لسه مقفولة وممكن نلاقي فيها أي طرف خيط
_طيب ودي هندخلها إزاي
فابتسمت نفس الابتسامة المتوترة=البواب بتاع العمارة دي ممكن ماتكونش إنت لاحظت أنه كان شغال مع طلعت,, وده اللي في أيده أنه يدخلنا ليها,, وهنشوف ممكن نراضيه إزاي
_يبقى نتحرك دلوقتي,, ساعتها هزت راسها بالموافقة وقمنا
وزي أي راجل جنتل مان صممت إني أحاسب وانطلقنا في عربيتها لغاية ما وصلنا عند العمارة وقابلنا البواب في مدخلها
كانت نظراته لينا مريبة وتحديدا لمي,,
_خير يا أساتذه
ساعتها توليت أنا الكلام وقلت له=إحنا طالبين منك خدمة صغيرة وهنراضيك باللي أنت تأمر بيه
كان بيكلمني أنا إنما باصص لمي وهو بيقول=وأنا خدامكم,, أأمروني
فتجاوزت موضوع أنه باصصلها وبيكلمني أنا وقلت له=انت ممكن تكون فاكرني,, أنا كنت هنا من كام يوم كنت بعمل شغل لطلعت بيه, وكنت سايب عدة الرسم بتاعتي فوق على أساس إني هرسم له كام رسمه تانية لكن إتفاجئت بموته
فبص لي ساعتها وقال_الله يرحمه كان راجل أمير
=والعدة دي فيها حاجات مهمة جدا ومحتاجها ضروري ف..
ساعتها قاطع كلامي_لا, أنتوا كده تتفضلوا عندي في السكن عشان نخد راحتنا في الكلام لأن الصوت بيتردد هنا في المدخل 
ودخل قدامنا وهو بيقول_إتفضلوا إتفضلوا يا أهلا وسهلا
وساعتها قعدنا على كنبه في صالة سكن البواب
فسألنا_بيبس ولا فانتا
فقلنا له مالوش لزوم وكده لكن هو صمم فقلناله بيبسي فخرج من المدخل تقريبا ناحية الكشك اللي جنب العمارة ورجع بعد خمس دقايق تقريبا بالبيبسي
_ها يا أستاذ , كنت بتقول إيه؟
=كنت بقول يعني لو ينفع أدخل الشقة أخد حاجتي اللي فيها وهديك كل اللي تأمر بيه
فظهر على وشه علامات الأسف_لكن والله يا أستاذ الشقة دلوقتي على البلاطة,, كل اللي فيها طلعت بيه قبل ما يموت وصى أنه يتباع ونتبرع بيه للجمعيات الخيرية
وقتها كنت عايز أعمل له حركه بمناخيري وأقوله لا يا شيخ,, لكن قلت له=يعني ماينفعش نطلع نهائي
_والله يا بيه لو كان فيها حاجه كنت طلعتك,, وبعدين الشقه,, محامي طلعت بيه عارضها للبيع عشان يكمل الوصية ويطلع فلوسها بردو للجمعيات الخيرية,, ممكن تشتروها وتطلعوا براحتكم وأنا بردو ليا حلاوتي
ساعتها قمنا وقفنا واحنا مستغربين على إيه الضيافه دي كلها لما الشقة اللي بنتكلم عنها مافيش منها أمل,, لكن بمجرد ما ركبنا العربية وانطلقنا,,, عرفت كان إيه سر الضيافة
يتبع