الملاك الهارب👼الجزء الخامس

#الملاك_الهارب
#الجزء_الخامس
أين المهرب من حبك ،من عينيك كلما حاولت الهروب عُدت إليك ركضاً وكأنك آخر الرجال وأولهم ،منذ وقعت عيني عليك منذ اليوم الأول وأنا أتمني أن أكون لك رغم يقيني أنك لن تكون لي ،انت الرجل الوحيد الذي تمناه قلبي .
في الصباح استيقظت ملك لتواجه يوما جديد ملئ بمصاعب الحياة لا تعلم ماذا تخبئ لها الأيام
عز : خير صاحية بدري ليه ؟!!
ملك : نازلة الجامعه أجيب الورق
عز : يا بنتي الورق بياخد كام يوم لحد ما يخلص
ملك : لا ما عبد الرحمن كلمني هو خلصلي الورق وهروح أخده منه
عز بضيق : اه عبد الرحمن  طيب استني أخدك في طريقي
ملك : ماشي
في السيارة .....
عز : كتر خيره بصراحة خلصلك الورق وهيسلموا بنفسه خدوم عبد الرحمن ده
ملك : اه ده جدع جدا وخدوم
عز : اه كمان طب كويس ، امال ايه محبتوش بعض بقي وانتوا في الجامعه بما ان في تفاهم بينكم كده
ملك : والله هو عرض عليا بس انا رفضت ، هو طول عمره بالنسبة لي أخ وصديق
عز : مش ممكن تغيري رأيك يعني
ملك : مش عارفه القلوب والمشاعر بتتغير كل يوم
عز : طيب وصلنا انزلي
ملك : تمام نهارك سعيد
عز : نهاري سعيد أيه أنا جاي معاكي
ملك : نعم ؟! وشغلك
عز : مش مهم هستأذن واتأخر شوية
ملك : أنت غريب
عز: انجزي بقي ،كلمي زميلك ده
أخرجت ملك هاتفها وهاتفت عبد الرحمن ،مع نظرات عز الثاقبة التي جعلتها تتوتر قليلاً
عز : ها قالك ايه
ملك : جاي اهو
عز : يعني خلاص مكنتيش هتعرفي تجيبي الورق لوحدك
ملك : ما خلاص بقي هو حب يساعد ايه المشكلة
عز بضيق : لا خالص مفيش مشاكل
عبد الرحمن : ازيك يا ملك عامله ايه ، ازيك يا ......... اسمه ايه نسيت
عز : حقك تنسي وبعدين حد طلب منك تفتكر اسمي
ملك : اسمه عز
عبد الرحمن : أهلا ،مالك قافش كده
عز : مالكش فيه
عبد الرحمن : خلاص براحتك ، الورق اهو يا ملك 
ملك : شكرا جدا يا عبد الرحمن ،مش عارفه من غيرك كنت عملت ايه
عز : كنتي عملتي الورق برده عادي، وبعدين مش خدتي الورق يالا نمشي
عبد الرحمن : معلش يا ملك ممكن تستني شوية عايز اتكلم معاكي
عز : لا كده مش هنخلص
قاطعه صوت هاتفه : أنجزي يا ملك هرد علي التليفون ونمشي
عبد الرحمن : هو ماله كده ، شكله غيران عليكي
ملك: غيران ايه بس ، احنا لسه حتي منعرفش اي حاجه عن بعض
عبد الرحمن : ملهاش علاقة صدقيني
عز : ها يا ملك خلصتي ، طلبوني في الشغل ولازم أمشي  ،يالا عشان أوصلك
ملك : معلش يا عز ممكن تروح شغلك ، أنا هستني شوية
عز : هتستني ليه ؟!
ملك : لما نروح نتكلم ،معلش يا عز روح شغلك
عز : هتعرفي ترجعي
عبد الرحمن : متقلقش عليها ،هوصلها
نظر لها عز نظرة ذات معني  وقال : خدي بالك من نفسك وكلميني لما تروحي وهما ربع ساعة وامشي ماشي
ملك ضاحكة : ماشي
عبد الرحمن : مش قولتلك بيحبك
ملك : يا بني مستحيل حتي لو هو فعلا في مشاعر من ناحيتي همنعه
عبد الرحمن: ليه يا ملك واضح عليكي جدا انك معجبة بيه ان مكنش أكتر من إعجاب
ملك : اقولك حاجه ، هو الراجل الوحيد اللي شوفته وحسيت من أول ما شوفته اني نفسي أكمل معاه ،وجوايا عارفه انه مستحيل نكمل بس اعمل ايه في قلبي
عبد الرحمن: ليه مستحيل
ملك : أنت عارف حياتي  وعارف اللي مريت وبمر بيه ،أنا مش هدخله حياتي يعاني او اعرضه لمشاكل ،أنا الأسهل بالنسبة لي إني أقفل عليه جوا قلبي بدل ما يتأذي مش هتحمل أنه يتأذي بسببي ،مش هتحمل إنه يتأذي اصلا
عبد الرحمن : صحيح والدتك كلمتني تسألني عليكي
ملك بخضة : وقولتلها ايه  اوعي تكون قولتلها انك شوفتني
عبد الرحمن : متخافيش ، قولتلها أني معرفش ،بس هي متأكدة انك هتحاولي تكلميني ، لأنها سألت عليكي عند ابوكي وقال إنه ميعرفوش عنك حاجه
ابتسمت ملك بسخرية : وهو من إمتي يعرف عني حاجه
عبد الرحمن : هو عادل لسه بيضايقك
ملك : أنا خايفة أوي هو مش هيسيبني في حالي  ،كلمني وقال إنه بيدور عليا ومش هيسيبني
عبد الرحمن : متخافيش المرة دي مش هيعرف يرجعك
ملك : ربنا يستر ،أنا مبنامش من الخوف
عبد الرحمن : متخافيش أنا جنبك وكلنا جنبك مش هيقدر يقربلك تاني
ملك : ربنا يستر ، أنا همشي بقي
عبد الرحمن : هوصلك
ملك : لا عايزة اتمشي واشوف الناس
عبد الرحمن : طيب طمنيني عليكي
ملك : حاضر ان شاء الله
سارت ملك تتمشي بي الناس ،تفتقد ذاك الشعور بالأمان بالحرية ،فهي قضت نصف عمرها سجينة والنصف الآخر هاربة ، تذكرت عز ونظراته وما حدث أمس وترددت في رأسها أغنية فيروز " في ناس كتير لكن بيصير ما في غيره"
وصلت للمنزل لتجد ليلي تركض نحوها وتحتضنها
ليلي : شوفتي مين ده عندنا
ملك : مين ؟!
ليلي : عمتو جيهان وبنتها رحمة
وقفت ملك مترددة بين أن تدخل وتلقي التحية ،وتسمع فيض أسئلتهم عن حياتها أو تخرج وتعود بعدما يرحلون ولكنها لا تعرف حقا مني يرحلون ،لذا قررت المواجهة
ملك : السلام عليكم
جيهان : هي دي ؟!
محمد: أيوه دي ملك ، تعالي سلمي يا بنتي ، دي جيهان اختي ودي رحمة بنتها
ملك : ازيك يا طنط ، ازيك يا رحمة
جيهان : أهلا ، وهي قاعدة معاكم لامتي ان شاء الله
محمد : ده بيتها يا جيهان نقعد وقت ما تحب
ملك : ليلي ما تيجي نحضر الغدا عشان طنط
ليلي : وهتخليني اساعدك بجد
ملك : طبعا انتي شطورة
دخلت ليلي وملك للمطبخ وملك تسمع كلام جيهان عنها وهي عاجزة عن الرد عن الدفاع عن نفسها حتي
أنهت ملك الغدا وبدأت في تحضير السفرة
الأكل جاهز يا عمو
محمد : اتفضلوا يا جماعه يالا
رحمة : وعز يا خالو هيجي امتي
في دخول عز من الباب : أنا جيت
ركضت رحمة نحوه بلهفة مع أنظار ملك الساخطة عليها
جلسوا جميعا لمائدة الطعام ، ورحمة لم تتوقف عن النظر نحو عز
نظرت جيهان نحو ملك وقالت : أصلهم في حكم المخطوبين ،عقبالك يا حبيبتي لما تفتكري مكان أهلك وترجعيلهم يعني لو ليكي أهل
ملك : عن إذنكم هعمل الشاي
عز : اقعدي كملي أكل
ملك : لا خلاص شبعت شكراً
دخلت ملك إلي المطبخ وهي تحاول كتم دموعها ،دخل عز وهو يحمل بيده بعض الطعام
عز : بدل مش عاجبك الجو بره ،ناكل هنا
ملك : مينفعش أخرج عشان خطيبتك وعمتك متضايقش
عز : أولا هي مش خطيبتي ، ثانيا يتضايقوا عادي براحتهم بقي
ملك : مش خطيبتك ازاي وكلام عمتك
عز : دي أحلام مالناش دعوة بيها ، المهم يالا ناكل عشان جعان
شرعوا في تناول الطعام ولكن ملك تشعر بألم يجتاح قلبها ،هي تعرف النهاية ولكن أنا يقاوم قلبها تلك النهاية المتوقعة والمنطقية ، لم يكن اول شخص تخسره ولكن الجرح في قلبها غائر ومؤذي ولكن علي الأقل هي توقعت الألم منذ البداية.
عز : بتفكري في ايه ؟!
ملك : مفيش ،هعمل شاي تشرب
اقترب عز منها وأمسك يدها : حاسس بيكي عارف أنك خايفة ومتوترة وتايهه ، بس صدقيني كل حاجه هتمشي زي ما انتي عايزة طول ما انا موجود ،لو يعني حابة وجودي
ملك :  مفيش حاجه بتمشي زي ما انا عايزة أنا حياتي .......
قاطعهما دخول رحمة : أنت سايبني وقاعد هنا ليه ،تعالي اقعد معانا شوية قبل ما نمشي
عز : ماشي
نظرت له ملك تترجاه ان يذهب معها ، خرج عز معها وبقيت ملك تصارع أفكارها
ملك : اتفضلوا الشاي
جيهان : شكرا يا حبيبتي ، مقولتليش بقي هتعملي ايه في حياتك
ملك : أستلم شغلي بس يا طنط وهمشي متقلقيش
جيهان : هو انا قولت أمشي ، أنا بس خايفة عليكي قعدتك هنا في وسطهم وحشة وانتي بنت
عز : ملك بنت ب100 راجل متخافيش عليها ، واحنا زي ما انتي عارفه هنحافظ عليها زي ليلي ورحمة ويمكن أكتر
جيهان : مقصدش بس ....
عز : من غير بس يا عمتو اقفلي الموضوع ده
ملك : عن إذنكم هدخل ارتاح شوية
دخلت ملك إلي الغرفة وشرعت في البكاء ،حاولت كتم شهقاتها حتي غلبها النوم
رأته في حلمها كان يحتضنها ويحميها من العالم أجمع لأول مرة منذ زمن تحلم حلم جميل كهذا ، استيقظت من النوم علي صوت طرقات خفيفة علي الباب ، فتحت الباب لتجد عز يحمل ليلي علي كتفه نائمة ، دخل ووضعها علي السرير وقام بتغطيتها جيداً
عز : صحي النوم انتي نايمة بقالك كتير
تذكرت ملك الحلم وتاهت في عينه ولم تنتبه لحديثه
عز : سرحانة في ايه ؟!
ملك : لالا مفيش دي آثار النوم
عز ضاحكا: خلاص تمام كملي نوم ، تصبحي علي خير ،مع اني كنت هقولك نقعد بره شوية
ملك : نقعد ماشي
عز : يعني مش عايزة تنامي دلوقتي
ملك ضاحكة : لا خلاص فوقت
جلسوا علي درج المنزل في مكانهم المعتاد
عز : انتي عملتي من عمتي النهاردة
ملك : هي عندها حق
عز : في ايه ؟!
ملك : انتوا جبتوا واحدة من الشارع دخلتوها بيتكم وخلتوها تعيش معاكم بدون اي مقابل
عز : أولا انتي مش اي واحدة ،انتي مختلفة ،مع انك حزينة طول الوقت عنيكي فيها كلام كتير وأسرار وبحس انك دايما عايزة تعيطي، بس من يوم ما دخلتي حياتنا وكل حاجه اتغيرت حاسس ببهجة دخلت بيتنا ، حاسس كأن أمي رجعت تاني
ملك : ورحمة ؟!
عز : طول عمرها موجوده وعمرها ما جذبتني ،حتي هي أمها هي اللي كبرتني في دماغها غير كده مكنش هيبقي في اي حاجه
ملك : بس هي مناسبة ليك ، تعرفها ،مش هتجبلك اي أذي
عز : مين قال ، اقولك حاجه عارفة ان الحب اللي بيدوم هو الحب الصعب اللي فيه ألم وحزن وخذلان ووجع ، الحب اللي بيوجع قلبنا مبيتنسيش  يا ملك
ملك : بس أنا كلي عيوب وكلاكيع وجوايا حزن مغطيني مش هقدر أسعدك
عز :مع بعض هنصلح كل ده ، طول ما انتي معايا كل حاجه هتتغير صدقيني
ملك : أنا خايفة عليك
عز : من أيه ؟!
ملك : خايفة عليك مني
عز : وانا مش خايف ، مستعد استحمل اي حاجه بس تبقي معايا
ملك : اوعدني ان لو حصل حاجه وقولتلك ابعد عني تبعد
عز : اوعدك عمري ما هبعد عنك
الحب يصنع المعجزات ، ليست جملة عابرة ولكنها حقيقة مؤكدة ، ولكن المعجزة كانت اني وقعت في حبك
Hadeer_saeed