الملاك الهارب👼الجزء السادس

#الملاك_الهارب
#الجزء_السادس
لقد وقعت في حبك خطأ ، لم يكن خطأ كان قدر ، هذا الحب يؤلمني ،يجعل قلبي ينزف وفي لحظة يجعلني اضحك حتي يصل صوتي للغيوم والنجمات، انقذني مني ،من حبك ،من العشق الذي أدمي قلبك ، خذني إليك ،احتضني حتي تنكسر ضلوعي حتي أشعر أنك حقيقة وليست إحدى خيالاتي .
في الصباح استيقظت ملك علي صوته وهو يغني أثناء تحضير الفطور ، يدندن أغنية قديمة " أنا هويته وإنتهيت ،ليه بقي لوم العزول "
إبتسمت ملك لعزوبة صوته ،دخلت نحو المطبخ
ملك : بتعمل ايه بدري كده
عز : صوتي صحاكي
ملك : أيوه
عز ضاحكاً : معلش كنت قاصد
ملك : نعم ؟! قاصد تصحيني
عز : أيوه ،صاحي من بدري لوحدي زهقت
ملك : تقوم تصحيني أنا
عز : يعني يرضيكي اصحي لوحدي
ملك ضاحكة : لا إزاي حرام، وريني كده عملت أكل أيه
مدت يدها والتقطت بعض الطعام ،واكلته بتلذذ
ملك : بس انت شاطر اوي واكلك حلو ،احلي من اكلي
عز : لما نتجوز هعلمك
ملك : نعم ؟
عز : ايه مش هنتجوز، هنفضل كده
سعلت ملك بقوة ،فضحك عز وناولها كوب ماء
ملك : أنا هحضر السفرة وهصحي ليلي
عز : لسه بدري يا بنتي سبيهم براحتهم وتعالي نقعد بره شوية
ملك : فاكر لما قولتلك ان الليل له ريحة ، الصبح بدري برده غمض عينك واتنفس كده
عز بيبصلها بإعجاب: انتي بني آدمة غريبة أوي
ملك : ليه
عز : بحس أنك عايشة في عالم تاني ،وسط النجوم والغيوم ،بتحبي الورد وبتعرفي تهتمي بيه ،بتهتمي بالناس أوي ومن أول لحظة بيحسوا انك جزء منهم كأنك فرد من العيلة ، بتخافي علي نفسك اوي ،بتخافي من الأحلام والناس مع انك عمرك ما بتخافي من حاجه
ملك : عارف اللي شوفته في حياتي يخليني أخاف من كل حاجه ،بس العكس اللي حصل بقيت أخاف علي نفسي وبس أخاف عليها من الاذي والوجع والحزن ، أنا بحس اني استاهل ابقي مبسوطة يا عز ابقي مطمنة والله ما عايزة حاجه تاني
عز : متقلقيش أنا جنبك ومعاكي ومش عايز حاجه غير انك تبقي مطمنة
ملك : أنا بقيت مطمنة بيك
أمسك بيدها وتعلقت هي بيده دون كلام ، وضعت رأسها علي كتفه وأغلقت عينيها لتشعر بالأمان الذي افتقدته لو لمرة في حياتها
ليلي : انتي فين يا ملك
ملك : أنا بره  يا ليلي تعالي
ليلي : انتي صحيتي من بدري
ملك: لا لسه صاحية من شوية
ليلي : ابقي صحيني بعد كده عشان بخاف اول ما بصحي ومش بلاقيكي
عز : يا سلام ومفيش صباح الخير يا أبيه
ليلي : آسفة  يا أبيه انشغلت مع ملك
عز : لالا أنا زعلان
اقتربت منه ليلي وقبلته علي خده : لسه زعلان
عز : لا بس خدي التاني زعلان
قبلت خده الآخر : لسه زعلان يا أبيه
ملك : لا بقي انا اللي زعلانة
ضحك عز : بطلي تقلديني بقي
محمد : صباح الخير يا ولاد
ملك وعز  : صباح النور 
محمد : الجو النهارده حلو اوي
ملك : ايه رأيك يا عمو نفطر في الجنينة
محمد : فكرة حلوة ،افرشوا حاجه علي الأرض ونفطر هنا
ملك : ممكن الست ليلي هانم تساعدني
ليلي : طبعا هساعدك
عز : وانا كمان هساعدكم
تناولوا جميعا الفطور في غاية السعادة
ليلي : بابا هو انت سمتني ليلي ليه
محمد : مش عارف ماما هي اللي اختارت الإسم
ليلي بحزن : لو ماما كانت هنا كنت عرفت
ملك : بس أنا عارفه
ليلي : بجد يا ملك ،طب  قولي
ملك :عارفة من زمان اوي خالص  من ايام ما كان الناس بتسكن الخيام وبيعيشوا في الصحراء ،دايما كانت البنت الحلوة الجميلة بيكون إسمها ليلي ، ودي بقي كان بيقع في حبها كل شباب القبيلة وبيكتبوا فيها أشعار وقصايد وكلام حلو خالص عشان هي بس ترضي عليهم  او تحبهم ، وكان بيبقي يا بخته اللي ليلي تحبه ، عارفه حتي زمان كان في واحد بيحب بنت عمه اللي اسمها ليلي وكتب فيها قصايد كتير واتجنن عشان اتجوزت غيره
ليلي : وهي ايه اتجوزت غيره
عز : عشان هي محبتوش
ملك : لا هي كانت بتحبه بس أهلها منعوها تتجوزها
ليلي : بابا لما حد يحبني ويكتب فيا شعر اوعي تمنعه يتجوزني
ضحك الجميع
محمد : حاضر مش همنعه أبدا
عز : ايه رأيكم نخرج النهارده في اي حته نغير جو
محمد : ياريت يا بني مخرجناش من زمان
ليلي : عايزة اروح ملاهي يا أبيه
عز : ايه رأيك يا ملك
ملك : زي ما تحبوا
عز : ايه رأيك يا بابا نروح ملاهي عشان ليلي وبعدين ندخل سينما او حاجه
محمد : موافق بس لحد ما تروحوا الملاهي هروح اشوف عمتك واقابلكم
عز : تمام يا بابا اللي تشوفه، يالا نجهز بقي
ملك : يالا يا لولي عشان نلحق نلبس
ارتدت ملك وليلي ملابسهم وخرجوا ليجدوا عز في انتظارهم : الأميرة ليلي ايه الحلاوة دي
ليلي : ملك هي اللي اختارت الفستان ده
عز : أنا قولت برده الذوق الحلو ده ميطلعش غير من العيون الحلوة دي
ملك : وانا بقول برده نمشي أحسن
عز ضاحكا : ماشي
وصلوا إلي مدينة الملاهي
ليلي : أنا عايزة العب دي يا أبيه
عز : يالا يا ملك معانا
ملك : لالا أنا بدوخ ومبحبش الألعاب
عز : لنركب كلنا يا اما بلاش
ليلي : بليز يا ملك ،متخافيش دي مش بتدوخ
ملك مبتسمة : ماشي
ركبوا اللعبة جميعا وشعرت ملك بالدوار فأغلقت عينيها وأمسكت بيد عز تقبض عليها من شدة خوفها ، فأبتسم عز بحب وشد علي يديها
عز : اتبسطتوا
ليلي : جدا جدا يا أبيه اتبسطت اووووي
عز : وانتي يا ملك ،مبسوطة
ملك : جدا
عز : أنا كلمت بابا وقال مش هيجي دلوقتي إحنا هنروح المول نشتري شوية حاجه ونطلع سينما ونرجع البيت ايه رأيكم
ليلي. : أيوه يا أبيه عايزة أتفرج علي نيمو
عز : نيمو ايه بس يا ليلي ، احنا بنتفرج عليه في البيت كل يوم
ملك : أنا كمان عايزة اشوف نيمو
عز ضاحكا : انتوا اتفقتوا عليا
ملك : أيوه عندك اعتراض
عز : لا خالص براحتكم يا أميرات ، عايزك تختاري لليلي كام دريس ولبس بيت مريح ولو في حاجه حاسة أنها نقصاها نجيبها
ملك : تمام
أنهوا جولتهم أخيرا بعد عدة ساعات
ملك : كده تمام مش ناقص حاجه
ليلي : أنا تعبت يا أبيه وجعانة
عز : وانا كمان تعالوا نروح نتغدي ونرتاح شوية
ملك : تمام
تناولوا طعامهم وخرجوا
ملك : يالا نرجع البيت بقي كفاية كده
ليلي : لا ماليش دعوة عايزة اشوف نيمو
ملك : بصي  هنشغله واعملك فشار كتير ونعمل حلويات ونقعد نسمعه كلنا ، عشان نقيس اللبس الحلو اللي اشترتيه
ليلي : خلاص موافقة
عز : طيب استنوني هنا شوية وراجع
ملك : هتروح فين ؟!
عز : متخافيش راجع علي طول
رن هاتف ملك برقم مجهول أجابت
وحشتيني
ملك : أنت ايه مبتحسش ،متعرفش ربنا
لا مبحسش ، قولتلك انتي ليا أنا وبس ....
ملك : عمري ما هابقي ليك علي جثتي ، معرفش ازاي اصلا بتفكر بالقذارة دي ،أنا عمري ما شوفت حد اوسخ منك
انتي لسه مشوفتيش حاجه ، بس قريب هوريكي وساختي بجد ، وهترجعي هنا زي الكلبة تبوسي رجلي عشان اخليكي تعيشي معانا
ملك : عمري ما هعملها ولو هموت حتي
عز : بتكلمي مين ؟!
أغلقت ملك الهاتف بتوتر وقالت : رقم غلط
شعر عز بالقلق وقال : متأكده
ملك غاضبة : وهكدب عليك ليه
عز : خلاص اتضايقتي ليه يالا نروح
رجعوا إلي المنزل وملك تائهة ،غابت إبتسامتها
حل محلهاقلق وخوف
عز : انتي كويسة يا ملك
ملك : أيوه يا عز متقلقش
أمسك عز بيدها : بس أنا قلقان انتي اتغيرتي فجأة وأنا مش فاهم
ملك : مالكش ذنب في كل ده
عز : عارف بس انا عايز اعرف ايه اللي بيحصل
ملك : هحكيلك والله كل حاجه مبقتش عارفة اشيل السر جوايا
عز : تمام بالليل نقعد ونتكلم
ملك : ماشي
عز : ممكن بقي تفكي التكشيرة دي وتضحكي شوية
ملك مبتسمة : حاضر
ليلي : بص يا بابا عز جابلي ايه
محمد : الله حلوين اوي
ليلي : ملك اللي اختارتها كلهم
محمد : ملك ذوقهاحلو أوي
ليلي : استني يا بابا أنا هقيسهم واوريك
محمد : تمام يالا بسرعة عايز اشوفهم
دخلت ملك مع ليلي الغرفة كادت تغلق الباب حتي اصطدمت بعز ويحمل عدة أكياس
عز : قيسي دول يا ملك ،أتمني يعجبوكي
ملك : ايه ده ؟!
عز : افتحي الشنط وشوفيهم
ملك : مش عارفه اقولك ايه ،مكنش في داعي لكل ده ،أنا متشكرة جدا
عز : مفيش بينا شكر ،واتفضلي قسيهم بقي
ملك : حاضر
بدأت ليلي في عرض ملابسها الجديدة لأبيها وهي سعيدة
محمد : الله حلوين أوي
ملك : يالا تغيري بقي عشان نسمع الفيلم
ليلي : ماشي يالا
بدأ عز في تشغيل الفيلم بينما دخلت ملك المطبخ وبدأت  في إعداد بعض الأطعمة الخفيفة ، جلسوا جميعا أمام التلفاز لرؤية الفيلم
"متمشيش أرجوك ، أنا بفتكر كل حاجه معاك حتي شوف ،بي شيرمان 42 ، أنا فاكرة ،أنا لما بشوفك بحس بأمان "
ملك : هدخل ليلي نامت
محمد : أنا كمان رايح انام تصبحوا علي خير يا ولاد
دخلت ملك ووضعت ليلي في سريرها واطفأت الضوء وخرجت
عز : تحبي نقعد بره شوية ولا هتنامي
ملك : لا نقعد بس عايزة اشرب قهوة
عز : بس كده احلي قهوة عشان خاطرك
ملك : لا طبعا أنا هعملها ،انت بتطبخ اشطر مني بس محدش بيعرف يعمل قهوة زيي
عز ضاحكا : خلاص يا ستي اعمليها انتي
عز : اتبسطتي النهاردة
ملك : أنا لو قولت ان ده أحسن يوم في حياتي مش هابقي كدابة ،أنا عمري ما فرحت كده
عز : أنا معملتش حاجه
ملك : أنت رجعتني طفلة بضفاير ، صحيت جوايا حاجات نسيت اصلا إنها موجودة
عز :كل اللي بعمله هو رد فعل للي أنتي عملتيه معايا ، انتي زرعتي الورد في قلبي ، فطبيعي ريحته تفضل في ايدك
ملك : أنت أكتر من أحلامي ، مهما حلمت وحاولت أحلم مكنتش هلاقي زيك ، هو انت اصلا في زيك
عز ضاحكا : يوووه كتير ، مش هتحكي بقي
ملك : مش عايزة ابوظ اليوم الحلو ده ،كل حاجه فيه حلوة ،مش عايزة ابوظها بمشاعري ولا ذكرياتي السيئة
عز : مش هضغط عليكي وقت ما تحسي انك مستعدة احكي
ملك : شكرا
عز : علي ايه ؟!
ملك : أنك فاهمني اكتر من نفسي ، فاهم لخبطتي وحزني وقلقي فاهم احتياجي ليك ،فاهم خوفي
عز : اقولك قومي نامي وكفاية شكر ،اليوم كان طويل جدا
ملك : تمام تصبح علي خير
عز : وانتي من أهل الجنة
" لم تكن فارس أحلامي ،بل انت أجمل منه وأفضل ،لم يسعفني حتي الحلم لأحلم بمثلك ،انت مميز لا يوجد مثلك ولا حتي في الأحلام ، أحبك "
في الصباح استيقظت ملك علي صوت ليلي
ليلي : قومي بقي يا ملك بقينا الضهر
ملك : في ايه ؟!
ليلي : عمتي بره و معاها رحمة كمان وانا مش عايزة اقعد معاهم
ملك : يعني أنا اللي عايزة اقعد معاهم
ليلي : خلاص تعالي نقعد هنا ومنخرجش
ملك : ياريت يبقي احسن
ليلي : طيب احكيلي حدوته بقي
ملك : طيب يا ستي هحكيلك
بدأت ملك في سرد القصة  ثم لعبوا سوياً ألعاب مختلفة حتي سمعت صوت عز خارجا ينادي بإسمها خرجت ملك من غرفتها لتجيبه
ملك : نعم
جيهان : يعني مخرجتيش غير لما عز جه
رحمة : ده عز بقي يا ماما مش اي حد
ملك : أنا خرجت عشان هو نادي عليا انما محدش فيكم نادي عليا ومخرجتش
عز : بصي معايا بس احنا عايزين نخرج نشوي في الجنينة ونتغدي بره تعالي ساعديني
ملك مبتسمة : حاضر يالا
رحمة : وانا كمان جاية معاكوا
خرج ثلاثتهم وبدأوا في تحضير الشواء في ضيق من ملك لاحظه عز وجعل قلبه يبتسم وضيق من رحمة وحقد علي نظرات عز نحو ملك ، رن هاتف ملك فتركتهم ورحلت
ملك : الووو مين
انتي فاكرة انك هتهربي مني
ملك : أنت مبتزهقش ارحمني بقي
انا خلاص عرفت انت فين
ملك : المفروض أخاف
طبعا تخافي علي الطفلة الصغيرة المتعلقة برقابتك خصوصا انك عارفة اني ممكن اعمل اي حاجه في الدنيا عشان ارجعك
ملك : أرجوك ليلي لا ،الناس دي ملهاش اي دخل باللي بينا سيبهم في حالهم
يبقي ترجعي ......
أغلقت ملك الهاتف وجلست علي أحد درجات السلم تلتقط أنفاسها وتحاول كتم دموعها
عز : في ايه يا ملك مين بيكلمك ؟!
ملك : ده عبد الرحمن كان بيسألني عملت ايه في الشغل
عز بضيق : وهو ماله
ملك : خلاص يا عز محصلش حاجه
مر اليوم وملك يبدو عليها القلق والتوتر ،تشعر أنها في عالم والجميع في عالم آخر ،تشعر أحيانا أنها لا تسمع أصواتهم ، استأذنت منهم باكرا ودخلت غرفتها محاولة النوم ولكن حلمها السئ ظل يراودها .
خرج عز في منتصف الليل ليجد ملك تجلس علي الدرج ،تتابع القمر المكتمل ،والحزن يكبر في قلبها
عز : قاعدة كده ليه
ملك : مفيش قلقت من النوم
عز : انتي إمتي بس بتنامي كويس ،أنا بحس انك مبتعرفيش تنامي زي الناس
ملك : فعلا أنا مبنامش زي الناس
عز : انتي كويسة ؟!
ملك : احضني
عز : نعم ؟
ملك : احضني
احتضنها عز بينما تعلقت ملك بثيابه ، ودموعها تتساقط علي اكتافه  ،تود لو تشعر بالأمان لآخر مرة ،تشتم رائحته وتشعر بقربه لآخر مرة
عز : انتي كويسة
ملك : لا مش كويسة أبدا ، بس هابقي ،اكيد هأبقي كويسة
عز : احكيلي مالك ،عمتي زعلتك
ملك : ممكن تسامحني
عز : علي ايه
ملك : علي اي حاجه ممكن اكون عملتها او هعملها
عز : انتي معملتيش غير كل حاجه حلوة يا ملك
ملك : أنا مش عايزاك تتأذي أبدا
عز : محدش هيقدر يأذينا طول ما احنا مع بعض
ملك : محدش هيأذيك أبدا ، أنا هنام تصبح علي خير
عز : خليكي شوية
ملك : حاضر
" تمنيت أن أخفيك بين ضلوعي ، لكنها الحياة يا قدري ،كتبت لي إلا تكون قدري ، أن أرحل عنك او ترحل عني ، أن أكمل طريقي وحدي بدونك وبدون قلبي "
Hadeer_saeed