السم في العسل (كاملة)

قصة ( السم في العسل ) كاملة
أنا جميلة جدا
الناس بتقولي ما ينفعش اقول على نفسي كده
بس دا كلام كل الناس اللي بتشوفني
احساس الجمال ده شئ مختلف
لما تحس الناس كلها بتبصلك بإعجاب شديد
الناس كلها عايزة تتكلم معاك .. نفسها تبص عليهم بس
ولو ابتسمت وانا ببص لحد ممكن ما ينامش اليوم ده
بس الجمال متعب بيخليني احافظ على اكلي اختار لبسي بعنايه ..
اهتم بالميكب كويس .. زائد جمالي اللي اتخلقت بيه طبعا
الحكايه بدات لما اتعرفت في الشغل على واحد اسمه حازم .. هوا مش شيك ولا وسيم ..يمكن اقل واحد وسامه من وجهه نظري في الشركة .. بس لاحظت انه الوحيد اللي عمره ما جه يكلمني الصبح او يصبح عليا
ولا عمره جابلي شكولاته وقالي اي حجه وخلاص ولا عمره قالي هاتي رقمك ولا الفيس ولا ماتيجي نتغدى سوى في البريك بتاع الشغل
الراجل الوحيد في الشركه اللي ماحاولش يكلمني .. بس انا مش عارفه ليه حازم بقى ينرفزني .. مش بيبصلي حتى مع ان مكتبه قدام مكتبي .. لحد ما في يوم قررت مش عارفه ليه تخيلت شكل المكتب كله هيبقى عامل ازاي لو عملت كده .. بس روحتله وقولتله صباح الخير ياحازم اخبارك ايه ؟
بعد الجملة دي الشركه عدى عليها ثانيتين ما تسمعش فيهم نفس حتى .. بعدها لقيت حازم وشه احمر وبدا يتوتر وقالي مساء النور ... مع اننا الصبح .. قالي مساء النور انا كويس انتي عاملة ايه ؟
قولتله انا كويسه حبيت بس اسلم عليك .. بعدها سيبته وقعدت على مكتبي .. الاغرب بقى انه ما بصليش بعدها ولا ضحكلي ولا كلمني بالعكس شوفت المكتب كله في حالة صدمة .. وذهول مش مصدقين عينيهم
المهم الموضوع بليل لما روحت كبر في دماغي قومت تاني يوم قومت جايباله شكولاته الصبح .. فرح بيها جدا ولقيته فك عن امبارح ووقف يتكلم معايه وكان واضح انه صارف النهارده واشترى قميص جديد
يعني كلام امبارح جاب نتيجه معرفش ليه من غير مقدمات .. قولتله ما تيجي نخرج بعد الشغل نتغدى .. قالي اوكي تمام .. قولتله في حاجه ولا ايه شكلك متوتر لو مش حابب خلاص .. قالي لا عادي يلا

نزلنا نتغدى بعدها قولتله تحب تاكل فين ؟.. قالي محلات غريبة بتعمل اكل مش بحبه .. قولتله ايه رايك في بيتزا ..وشه جاب الوان .. قولت اكيد ماعهوش فلوس ..
فعجبني الحوار أوي .. روحت قولتله خلاص هوديك مطعم حلو طبعا هوا راكب معايه في العربية فروحت بيه على مطعم غالي .. ونزلنا وهوا رجل ورى ورجل قدام دخلنا وبحاول افتح معاه اي موضوع لدرجه انه بقى مش قادر يتكلم حرفيا فتحنا المينيو بص في الاسعار وبدأ يعرق حرفيا
المهم بعدها انا طلبت حاجات كتير وهوا جاب حاجه واحده .. وكلنا وخلصنا اكل وهوا بعا ما شبعش وانا سيبت اكلي .. مش قادر اخلصه وشايفه عينه عليه .. بعدها قولتله بعد اذنك انا رايحه الحمام وطلعت بره المحل جري ولفيت من حته ما يشوفنيش فيها والمحل كله زجاج عشان اراقبه واشوفه هيعمل ايه ..؟
=======================================================
المهم الجرسون جاله وبعدها .. حازم وقف وفضلوا يتكلموا مع بعض كتير بعدها لقيت الجرسون بيلم صحابه وفجأة نزلوا فيه ضرب .. انا اتخضيت اول ما شوفت الضرب اشتغل ماعرفتش اتحرك من مكاني من الصدمه ما عرفتش حتى ادخل انقذه او اتدخل
معرفش ليه فضلت اتفرج حتى مش عارفه امشي وخلاص .. بعدها الناس ادخلت وخلوه يمشي .. انا بعدها طلعت عالبيت بسرعه .. مكنتش اعرف ان الموضوع هيوصل للدرجه دي
جسمي كان كله بيترعش مش عارفه اتصل بيه اطمن عليه ولا هقوله ايه ساعتها .. المهم فضلت كده لحد تاني يوم فالشغل وانا عارفه انه مش هيجي بعد اللي حصله امبارح .. بس الغريبة اني لقيته جاي تاني يوم وباين عليه التعب
دخل من غير ما يسلم على حد وقعد قدام الجهاز بتاعه يشتغل وانا ببصله من بعيد والقلق اتحول لخوف .. هوا ممكن يعمل فيا ايه بسبب اللي حصله ؟؟
روحتله في البريك وقولتله حازم مالك شكلك تعبان معلش انا مشيت امبارح جالي تلفون وكان في مشكله في البيت..لقيته بيقولي وايه الاخبار حليتوا المشكلة ؟
انا اتصدمت دا بيطمن عليا اصلا .. قولتله ايوه الحمدلله حليناها انت مالك حصلك ايه ؟!
قالي مافيش شويه مشاكل كده والحمدلله عدت ماتشليش همي المهم انتي كويسه .. مابقتش عارفه ايه ده بجد !!
كل همه يطمن عليا ..في حاجه عقلي مش قادر يترجمها .. المهم خلصنا شغل واصريت اوصله البيت بعربيته وما اخلهوش يركب مواصلات وهوا كان رافض ومحرج جدا .. بعدها ركب ووصلته البيت
وكلمته بليل كان صوته فرحان رغم التعب والوجع اللي فيه .. كان فرحان اني قلقانه وبطمن عليه .. بعدها عرفت منه ان ابوه متوفي من صغره وعايش مع والدته هما الاتنين بس
حسيت بتأنيب ضمير رهيب على اللي عملته معاه .. وبقيت كل يوم في الشغل اجيب معايه اكل لينا ناكله في البريك كان بيبقى مكسوف بس بعدها بقينا ناكل سوى عادي واغلب الايام بيصر يجيب هوا الفطار
عددت الايام لحد ما غاب في يوم عن الشغل .. واتصلت عليه لقيته تعبان حسيت ساعتها انا قد ايه اتعلقت بيه وقد ايه حبيته فعلا .. واتصلت بيه وفضلنا نتكلم طول اليوم تقريبا وبعدها انا قررت احكيله عن الموقف اللي عملته معاه عشان ما بقتش قادره اخبي عليه اكتر من كده
كنت مقلقه بس كان لازم اقوله .. وبالفعل لما حكيتله فضل ساكت شويه وبعدها قالي دي احسن حاجه حصلتلي في حياتي .. لانها قربتنا من بعض .. مالقتش كلام اقوله غير انه عنده حق فعلا دي احسن حاجه حصلت
بعدها هوا اترقى في الشغل .. وبقى في مكان احسن بقيت فرحانه ليه جدا .. ووضعه المادي اتحسن كتير وفي يوم لقيته بيقولي بحبك واتفقنا يجيلي البيت يتقدملي
وبالفعل قرينا الفاتحه لاني عرفت اهلي كل حاجه عنه وقد ايه هوا انسان محترم .. وبعدها اتجوزنا وقضينا شهر عسل جميل وبعد جوازنا بسنه .. اكتشفت اني مش هعرف اكون حامل .. كان نفسي يكون عندي عيال .. وحازم كان نفسه يجيب عيال كتير ملوا علينا حياتنا
فضلت مكتئبة كتير بس كان حازم دايما يطمني ويقولي انتي كفايه عليا مش مهم اي حاجه تانيه ربنا مدينا نعم كتير انا وانتي بنعيشها كل يوم .. واكيد ليه حكمه في منعه هذه النعمة عننا
كلامه بيطمني .. وانا فعلا وجود انسان زي ده جنبي اكبر نعمه وبحمد ربنا عليها .. كشفت كتير وروحت لدكاتره برة مصر حتى ومافيش فايده .. لحد ما قررت انا وحازم نعيش حياتنا مع بعضنا بس ونستمتع بيها ونعيش احنا دور الطفل والاب والجد والحفيد .. ونستمتع بوحدتنا سوى وبالحاجات اللي نفسنا نحققها
جايز شاب تاني كان طلقني عشان مش هعرف انجبله الاولاد اللي بيحلم بيهم بس حازم كان مختلف
كان راجل زي ما الكتاب بيقول بيخاف عليا عنده ايمان بالقدر بيفكر قبل ما يعمل اي حاجه بيبص دايما للجزء الايجابي في اي موضوع كان دايما عارف ان كل اللي جاي خير مهما كان ظاهر انه شر

النهاية
بقلم_عمر_ليمونه