عين من عالم اخر (كامله)

قصة ( عين من عالم اخر ) كاملة
حاسة ان جوزي بيخوني
مع اننا كنا بنحب بعض جدا زمان وكل حاجه بنعملها مع بعض
بس فجأة بقى متغير عليا .. بيجيله شغل كتير بليل على غير العادة
بيتاخر بيجي واكل برة .. ماسك الموبايل 24 ساعة .. الوضع دا ما يرضنيش
وخصوصا اني لما بحاول اكلمه بيرد ردود مستفزة ويقلب الموضوع هزار ويمشي
احساس صعب اوي لما تحس ان حد قريب منك وانت عمرك ما قصرت معاه بيخونك مع حد تاني
انا كلمت صحبتي وحكيتلها على اللي بيحصل .. واجتمعت انا وهي ودا في حد ذاته أمر خطير
لاننا عمرنا ما اجتمعنا على حاجه واتفقنا عليها وما نفذنهاش ..
وفعلا اتقابلنا وحكيتلها  على كل اللي بيحصل
وقالتلي ان عندها حل رهيب .. لانها سمعت ان في ست مبروكة من طرف خالتها
تقدر تحطلي عين على جوزي بحيث اعرف هوا بيروح فين وبيجي منين؟!!
قولتلها انتي كلامك مش منطقي وضحيلي أكتر ؟!!
قالتلي بتعمل شويه حاجات بتقراها على عيني الشمال وبجيب حاجه من طرف جوزي وبعدها بغمض عيني يمين وافتح الشمال بس
ساعتها هشوف بعين جوزي هشوف كل حاجه بيشوفها بعينه يعني لو قاعد مع شخص وجوزي باصصله هبقى شايفاه معاه يعني انا وجوزي هنشوف بعينه هوا
ولوفتحت عينيا الاتنين هشوف بعيوني أنا عادي .. وفي أي وقت هفتح فيه عيني الشمال بس
هشوف بعين جوزي كانها عيني .. موضوع يخوف بس هعمله عشان اطمن لاني مابقتش قادره انام
كان لازم اجرب .. جبت فرشة الاسنان بتاعة عمرو جوزي وروحت انا وصحبتي وخالتها للست المبروكة دي
وبالفعل قعدت تسالني عن اسم جوزي عمرو بالكامل وحاجات عن حياته واسم امه وابوه وبعدها كتبتها في قماشه
ودبحت خروف وخدت عينه الشمال مع الفرشه اللي جبتها ولفتها في الكلام اللي كتبته في قماشة وحرقتها وحطت ايدها على عيني الشمال
وقعدت تتمتم بشوية حاجات قلبي كان مقبوض بصراحه
وبعدها  قالتلي دلوقتي تقدري تغمضي عينك اليمين وتشوفي بعين جوزك
انا كنت خايفة جدا وصحبتي فضلت تطمني وتقولي ما تخافيش ..
وفعلا قررت اجمد قلبي عشان اعرف انا ظلماه ولا لا
وغمضت عيني اليمن وفتحت الشمال بس بعدها شوفت...
==============================================
جوزي بيسوق العربية بتاعته وباصص للطيرق وركن عند قهوة ونزل قفل العربية
انا قلبي كان بيدق بقوة فعلا .. قابل واحد من صحابه اللي شوفتهم معاه قبل كده
وقعدوا يتفرجوا على ماتش مع كل رد فعلا جوزي بيعمله بلاقي ايدي بتتحرك معاه لا اراديه
كان الحاجه دي بتحصلي انا اول مره اشوف حاجه بعين حد تاني اكتر حاجه كانت مضيقاني
اني مش سامعاهم لو كنت اقدر اسمعهم برده كانت هتبقى جميلة اوي ..بس اني اشوف كفايه
كفايه عليا اعرف بس هوا بيخوني ولا لا .. يمكن مش هيقابلها النهارده عشان في ماتش مهم وهوا بيحب الكوره جدا
المهم فتحت عينيا الاتنين وقولتلهم تمام .. ودفعت الفلوس للست ومشيت انا وصحبتي وانا وشي لونه متغير
صحبتي قعدت تهدي فيا وتقولي ماتخافيش ان شاء الله هيطلع كويس ومش بيخونك وانا بقولها اتمنى اني اكون ظلماه
وبعدها صحبتي وصلتني البيت .. وقعدت معايه شويه ومشيت .. بعدها فضلت قاعده على سريري شويه وقولت اشوفه بيعمل ايه وقومت مغمضه عيني اليمين شوفت باب غرفتنا حد بيفتحه وشوفتني قاعده على السرير
من الخضه فتحت عيني الاتنين وانا بشهق بنفسي لقيته واقف قدامي بيقولي مالك في ايه بتحلمي وانتي صاحيه
كان رجع البيت وانا معرفش بس الموضوع كان مرعب وانا شايفاني بعينه قولتله لا مافيش حاجه كنت سرحانه وانت دخلت فجأة خضتني
بعدها نام جنبي عالسرير قولتله مش هتتعشى قالي لا كلت بره ونام .. قولت اغمض عيني اشوف هوا شايف ايه جايز اشوف احلامه بس لما غمضت شوفت ضلمه بس .. بعدها قومت كلت حاجه ونمت تاني يوم الصبح لما نزل الشغل جهزت الغدا وبصيت بعينه لقيته قاعد في الشغل في اجتماع وعمال يكتب على ورقه
بعدها اتصلت بصحبتي فضلنا نتكلم شويه .. وبعدها بصيت عليه تاني لقيته طالع من الشغل وركب عربيته وماعرفش رايح فين اتصلت عليه .. لقيته بص للموبايل وماردش اتصلت بيه تاني رد
قولتله خلصت شغلك ولا لسه
قالي لا هتاخر في الشغل النهارده عندنا حاجات كتير لازم نسلمها بكره .. قولتله يعني انت لسه في مكتبك
قالي ايوه لسه في المكتب في حاجه ولا ايه قولتله مافيش تيجي بالسلامه
وبعدها لقيته ركن عربيته عند فيلا ونزل طلع مفتاح من محفظته وفتح الباب .. ودخل قلع الجاكت .. كل دا شايفاه وانا قلبي بدأ يدق بقوة مش مصدقه عيني بجد
وبعدها طلع فوق على غرفة نوم .. لقيت واحده مقابلاه وهي متزوقه بقميص النوم .. مش عارفه ازاي يعمل حاجه زي كده
انا بعد اللي عملته معاه زمان دانا والدي اللي جابله شغله اللي هوا فرحان بيه دلوقتي .. دانا عملت كل حاجه ترضيك دي اخرتها .. لقيتني بتصل بصحبيتي تجيلي عشان كنت حاسه اني دايخه
دخلت الحمام رجعت وفضلت اعيط كتير ووقعت في الحمام .. مابقتش قادره اتنفس وفضلت كده كتير لحد ما صحبتي جت وحاولت اقوم افتحلها اعصابي تعبت جدا
صحبتي فضلت تهديني وساعدتني الم شنطتي عشان اروح بيت اهلي وبعدها فضلت تفكر معايه وقالتلي اللي هيجبلك حقك الست المبروكة دي تعالي نروحلها تاني
فضلت افكر اروح ولا لا .. بس قررت اروحلها في الاخر .. خدت قميص من قمصان عمرو وروحتلها انا وصحبتي من غير خالتها عشان اللي جاي ده ماكنش هيعجب حد ومافيش حد هيحس بيا ويشجعني غير صديقتي
روحتلها وطلبت انه كل ما يشوف ست يشوفها مسخ قدامه ... يشوفها كائن مقرف اي حد يخاف يبصله
قالتلي انتي متاكده من اللي انتي عايزاه ده .. قولتلها ايوه قالتلي خلاص خدت القميص كتبت عليه شويه حاجات ودفعتلها الفلوس وروحت على بيتنا
فضلت قاعدة لحد ما باب الشقة فتح بسرعه وعمرو شكله مخضوض ووشه عرقان ومش قادر ياخد نفسه
بعدها لقيته بيبصلي بخوف قولتله مالك ما عمرو ياحبيبي فيك حاجه وبقرب منه .. لقيته بيصرخ وقام ضاربني بايده وهوا ماسك المفاتيح وقعت اغمى عليا
صحيت لقيت نفسي ماشيه في الشارع وجسمي نايم مابقتش فاهمه في ايه لقيت ايد بتمسك ايدي وصوت صحبتي بتكلمني بتقولي انتي كويسه .. وحكيتلي اني اغمى عليا والجيران بلغوا ونقلوني المستشفى وعمرو لما شافني
شافني انا كمان مسخ وانا نسيت اقول للست يشوف كل الستات ما عدا انا .. لما قربت منه خاف وضربني بالمفاتيح في عيني اليمين اتفقعت وبقت عيني الشمال بس اللي بشوف بيها
وطول ما الشمال بس اللي مفتوحه هشوف بعين عمرو يعني انا مش هشوف غير بعين عمرو بعد كده انا كاني بقيت عمياء
قولت لصحبتي لازم نروح للست انا غمضت عيني لاني مش قادرة اشوف اللي عمرو بيشوفه بشوف اشكال غريبه في الشارع وعمرو عمال يصرخ منهم
بقيت اغمض عيني.. مناظر مرعبة فعلا .. فضلت مغمضه احسن .. وروحنا للست انا وصحبتي بعد مالطلعت من المستشفى بس قالتلي ان اللي حصل مالوش حل يرجعه زي الاول
صرخت في وشها وقولتلها اتصرفي اتعصبت وقالتلي لو ماطلعتوش منهنا هئذيكو وفعلا طلعت انا وصحبتي وفضلت اعيط كتير ..مابقتش قادر افتح بعدها فتحت عين عمرو لقيته واقف في حته عاليه وبيبص لتحت وقام نط والارض بتقرب منه بسرعه ..غمضت عيني
عمرو انتحر ماقدرش يستحمل اللي بيشوفه حواليه .. فتحت عيني لقيت ضلمه .. خلاص عين عمرو اللي بشوف بيها اختفت انا دلوقتي بقيت عمياء فعلا ..
فضلت افكر في كل اللي حصل ... وماعرفتش دا غلطي ولا غلط عمرو ولا غلط صحبتي وخالتها
اللي كنت متاكده منه اني كان لازم اشوف اي حل تاني غير اني افكر أضر اي حد بالسحر.. بس الكلام دا وقته عدى خلاص
عدت ايام كتير وصحبتي اختفت مابقتش تجيلي البيت وانا بقيت عايشه مع أبويا وامي.. حاولت اتصل بيها اقابلها وهي مش بترد وغيرت رقمها كانها مش عايزة تعرفني تاني بعد اللي عملته فيا بسبب افكارها الغبيه
لحد ما جاتلي فكرة .. ورجعت للست المبروكه بمساعده واحده تانيه من صحباتي فالشغل قبل ما اسيبه
وروحنا للست المبروكه وقولتلها عيني الشمال سليمه بس عمرو مات ممكن تنقلي العين دي لصحبتي اللي كانت بتيجي معايه هنا واديتلها حاجه من الهدوم اللي خددتها منها زمان
عارفه اني هتجسس على صحبتي وهشوف بعينها من وراها بس انا مافيش حل تاني قدامي .. هي اللي اقترحت عليا وبعدها بعدت عني .. وجه الوقت انتقم منها هي كمان

النــهــايـــة
بقلم_عمر_ليمونه