قصة جديده

الساعة وحده بعد نص الليل .. كنت مخنوق اوي، طلعت فوق السطح جايز لما اقعد لوحدي ارتاح.. فضلت سرحان.. مش عارف قد ايه..
نمت على ضهري وفضلت أتأمل السما والنجوم، عيني بدأت تتقل.. محستش باي حاجه بعدها. نمت قد ايه معرفش..
صحيت على حاجه مسكت رجلي.. اتنفضت من مكاني..
لقيت اللي مسك رجلي ده كان أرنب من الأرانب اللي مربينها فوق السطوح.. برجلي دفعت الارنب لحد ما جسمه خبط على الحيطه!
كنت متعصب لاني كنت هموت من الخضه..
رحت اشوف الارنب مات ولا ايه من الخبطه القوية دي..

وفعلا لقيته بينزف من رأسه فضل يتنفض ف الأرض لحد ما جسمه سكت خالص لانه كانت مات!
حد هيصدقني لو قلت إن الارنب اللي متأكد أنه مات، جسمه بقى لونه اسود زي الفحم، مش كده وبس، الارنب لقيته بيتحرك.
وقف على رجله الاربعه من تاني.. بصيت لعينه اللي قلبت وبقت حمره زي الدم!!
فوق يا محمد ده مش حقيقي ده هلوسة!!
الكلام ده كنت بردده بصوت عالي
لكن اللي شايفه حقيقي. الارنب أو الشيء ده منظرو اصبح مرعب، هو شكل الأرنب لكن الاختلاف اللي فيه لونه الاسود, القرنين اللي ف نص رأسه!!
ده غير حجمه إللي بدأ يكبر لحد ما بقى حجمه مش طبيعي!!
خد وضع الاستعداد زي القطط  وبدأ يزوم!!
أنين مخيف كان بيخرج منه!
فجأة هجم عليا ووقعني على الأرض..
محستش بأي حاجه غير بامي واخويا الكبير وهما جنبي.

كنت مرمي على الأرض وهما حوليا بيحولوا يفوقوني.
اتنفضت من مكاني وقعدت أصرخ.. اللي على لساني جمله وحده " الارنب كبر اوي بقى زي الشيطان كان هيموتني"
الارنب فعلا كان ميت ومرمي على الأرض!! يعني ف جزء صغير من اللي شُفته حقيقي وهو موت الارنب اللي كان بسبب  دفعتي القوية لي!!

من بعد اليوم ده وانا بشوف الكائن ده ف أحلامي.
بشكله الوحش, حجمه إللي مينفعش يكون حجم أرنب، لونه الاسود، القرنين اللي ف وسط رأسه!

بعد كام يوم لقيت ماما واخويا الكبير داخلين عليا وكان معاهم حد، من منظره وشكل لبسه والسبحه اللي ف ايدو عرفت أنه شيخ.
دخل وطلب من ماما واخويا يخرجوا بره
خرجوا وبقيت انا والشيخ لوحدنا، هو بصراحه ما كُناش لوحدنا كان معانا الارنب أو الشيطان!
واقف ف جانب من الاوضة وبيبص لي وهو كله شر
ف اللحظه دي الشيخ لقيته بيقول لي:
- ما تبصش عليه اعتبره مش موجود في الاوضه هو جبان خايف من وجودي معاك!
بكل لهفه قلت للشيخ:
- يعني انت شايف اللي انا شايفه يعني انت مش هتقول عليا مجنون زي ما هما بيقولوا
رد وقال لي:
- متخفش مش هيقدر يأذيك انا هنا عشان اساعدك بس انت كمان لازم تسمع كلامي اللي هقولهولك
طلب مني الشيخ احكي له كل حاجه، حكيت من اول ما طلعت فوق السطوح لحد موت الارنب بسببي وظهور الشيء ده..
رد الشيخ عليا وقال:
- مكنش ينفع يابني تعمل اللي عملته ده، الأرانب أو القطط أو الكلاب كل جنس الحيوانات مينفعش نتعرض لهم بليل لانك متعرفش مين ساكن اجسدهم في الوقت ده!!

هنا لقيت الكائن قرب للسرير اللي نايم عليه
قرب الارنب على ودني ولقيته وبيهمس وبقول لي:
- خرجوا من هنا مش هيقدر يساعدك!!
انكمشت وانا خايف لان عارف هو هيعمل ايه، هيغرز حوافر أيده في جسمي وهتوجع أوي.
هو مش حابب وجود الشيخ

***

الأرنب بدأ يغرز حوافر أيده في كل جزء في جسمي
جسمي بيتألم، مش قادر استحمل الوجع، صوته وهو بيصرخ مش قادر استحمله، شوفت امي واخويا الكبير دخلوا في اللحظه دي الاوضة.
حاسس بكل حاجه لكن مش عارف استنجد بيهم من كتر الالم, شايف خوف امي واخويا، حتى الشيخ لقيته قام من على الكرسي وهو خايف!!
سمعت صوت الشيخ وهو بيحاول يسيطر على نفسه
بدأ يقرأ قران بصوت عالي أوي
كل ما كان بيزود كل ما كان الالم بيزيد عندي.
بيزيد معاه الكائن غرز حوافره في جسمي. حسيت اني بتشال من على السرير وبتهبد في سقف الاوضة!!
شوفت النار اللي مسكت في البيت كله!!
لقيت الشيخ خرج من الاوضة، بمجرد ما هو خرج كل حاجه سكتت! النار طفت جسمي هدي من تاني
كل حاجه اختفت معاده الارنب!
واقف بكل ثبات وبيبص لي وهو بيبتسم بكل نصر
قرب عليا وهمس في ودني:
- مش قلتلك خرجوا من هنا محدش هيقدر يساعدك، انت عملت ذنب عظيم في حقنا انت موت حد مننا و عقابك هو انا هفضل كده معاك، هتتألم كل دقيقة، ومحدش هيقدر يلحقك!!
حتى الاوضة اللي انت فيها دي مش هتقدر تخرج منها

نفذ وعدوا ليا انا مش بخرج من الاوضة لأنه مش بيسمح لي بده ابدا، لو خرجت من الاوضة، بلاقي سكاكين بتقطع فيا والنار بتمسك في كل حته في الشقه!
ده كمان اخويا الكبير كان هيموت في مره لما حاولت اخرج من الاوضة
بمجرد ما خرجت لقيت اخويا بيصرخ ف اوضته!!

انا ببعت الجواب ده ليكم عشان محدش يأذي اي حيوان بليل لانكم متعرفوش ايه اللي ممكن يكون مستحوذ جسمه في الوقت ده.

تمت

.
.
.

محمد مهني