قصة جديده

أنا من النوع اللي لما ييجي يعمل سيرش عالفيس يقعد يدخل من جروب لجروب ومن صفحه لصفحه ومن شخص لشخص, المهم أني في مره وصلت لصفحة أسمها شمس المعارف الكبرى لواحد اسمه شهاب الدين أحمد البوني,, كان الاسم ده اتردد على ودني كتير وأعرف أنه كتاب الناس أختلفت في أمره ما بين كونه كتاب سحر ولا كتاب علم,,دخلت الصفحة لقيتها كلها ناس بتبيع نسخ مختلفة بتواريخ طباعة مختلفه من الكتاب ده, وشوية بوستات عن أذكار لفك الحسد والسحر والحمايه  وصور هندسية زي دواير ومربعات ومثلثات متوزع فيها الارقام والحروف متاخده من الكتاب ,, الموضوع شدني دورت اكتر فلقيت أن مؤلفه جزائري اقام في مصر في عهد الدولة الفاطمية وألفه وقتها,, والكتاب في منه نسخ كتير جدا ونسخ مأخوذه عن نسخ, ونسخ محرفه لدرجة أن في نسخ بخمسين جنيه ونسخ ب 5000 جنيه, تلاقي مصادر بتقول أن من أملاه على كاتبه هو الشيطان نفسه وفي ناس تانيه بتقول أنه مأخوذ عن اللوحة الزمردية ودي بتاعت شخص كان مسمي نفسه [هرمس المثلث العظمة]  وفي ناس بتقول أن اللي فيه ده مش طلاسم بل دمج بين علم الرياضيات وعلم الحروف والعلم الشرعي وعلم النجوم خاصة أنه كان بيتكلم دايما عن أسماء الله وخدّام أسماء الله وعن البسمله وخدّام البسمله والحروف المقطعه في القرآن وايات قرآنيه معينه ويعمل أشكال هندسية يوزع فيها الحروف والارقام بصور معينه,, كنت خلاص قررت أفض الاشتباك اللي في دماغي وقررت أشتريه ونزلت سور الازبكية فعلا,, لقيت صاحب مكتبة هناك شكله كده محترم وكان عنده الكتاب, قاللي...أنت عارف الاول الحكم الشرعي لفتح الكتاب ده؟؟
قلتله... الصراحة لا, أنا مبحثتش في الموضوع
فابتسم وقاللي... بص الرأي الأرجح عند جمهور العلماء أن الكتاب ده كتاب سحر بيّن لا علاقة له بالدين بل الأنكى أنه سحر متستر برداء الدين,, ومجرد الاضطلاع عليه حرام قد يصل للشرك, أما محاولة قراءة التعاويذ  اللي فيه بصوت مسموع فده ممكن يكون سبب في استحضار الجن,, أنت لسه شاب صغير وهتلاقي ناس قالولك أنهم قرئوه كامل بصوت مسموع ومحصلش حاجه
أنا محدش قاللي حاجة زي كده بس جاريته وشاورت براسي فيما معناه أنه حصل فعلا , فكمل هو كلامه ...البشر يابني نفسهم بيختلفوا فيما بينهم بخصوص أمكانية الرؤية فمنهم الشخص الظهروي والشخص الكشاف والجن مبيظهرش لأي حد هو بيصطفي الشخص اللي ممكن يظهرله أما قراءة التعاويذ نفسها دون ظهور جن فده مش معناه أنك نفدت فممكن الجن ميظهرلكش لكن يمسك أو يلمسك ويسبب لك الضرر والأذى,,
أنا مقتنعتش ذهنيا بس الراجل ده زي ما يكون أقنعني نفسيا المهم اني مشتريتش ورجعت بيتنا بس بقيت بتردد كتير على الصفحة دي لغاية ما في حاجة أثارت انتباهي
كان شخص كل ما حد يعرض نسخة من شمس المعارف للبيع يدخل يسأل عن تاريخ طباعة النسخة,, الشخص ده كان حاطط صورة بروفايل غريبة جدا في الاول مكنتش واضحه نهائي بس لما اخدتها على اللاب وكبرتها لقيت أنه مصور مرايه في أوضه اضائتها خافته ركزت أكتر وكبرت الصوره لقيته مصور خياله عالحيطه اللي منعكس في المرايه اللي قصاد الحيطه دي,, حيطه فيها مرايه قصادها حيطه ساده وجمب جدار من الاتنين التانيين بتوع الاوضه دي, في تقريبا شمعه في ارتفاع منخفض عشان خياله يبان ضخم وواضح في الاضاءة الخافته بتاعت الشمعه وهو منعكس على الحيطه اللي قصاد المرايه,, الخيال المنعكس على الحيطه ده بقا ليه صوره في المرايه نفسها هو ده اللي مصوره ومش عارف بقا هو مداري نفسه عن المراية ومش ظاهر لأنه قريب من الشمعه مش في مواجهة المراية,, ولا الصوره اتقصت على اد الخيال بعد ما اتعملت ,, دخلت على صفحته عرفت أن مسمي الصورة بُعدي التاني,, منطقي بردو ما هو بُعده الأول هو خياله اللي على الحيطه وبُعده التاني هو انعكاس خياله في المرايه,, كانت دي الصورة الوحيدة اللي مسموح تشوفها, كان عامل برايفسي عالي للاكونت بتاعه مفيش منشورات مفيش أصدقاء,, صحراا,, لكن لما دخلت على مزيد من المعلومات عن الشخص لقيت ان الجروبات اللي هو مشترك فيها مكنش معمول عليها برايفسي,, فلقيت جروب أسمه المخنوس,, أسم غريب ضغطت لقيته جروب مغلق سري يعني مفيش سبيل للوصول ليه الا أن حد يدعوك أو توصل بالطريقة اللي أنا وصلتلها دي,, يعني من خلال تتبع معلومات حد مشترك فيه,, لأنه مبيظهرش في السيرش,, طلعت في دماغي أعمل طلب انضمام مادام جروب سري وبتاع واسمه المخنوس مفيش غير احتمال من اتنين يا اما العيال دي عيال مطرقعه وشغل تهييس,, يا اما مجموعه بيربطها رابط معين,, سحر بقا ولا عبدة شيطان ولا أذناب الميتافيزيقيا,, أيا كان عملت الطلب فظهرلي سؤال .... أذكر أحدى تعويذات الحماية؟؟..هرشت في راسي وطفيت سيجارتي وولعت واحده تانيه,, أنا فاكر كويس أن كان في رسمه نازله على صفحة شمس المعارف دي كان مكتوب عليها تعويذة حمايه بس مكنتش عايز يبقى اسمي نقلت أو كتبت أي حاجه من التعاويذ دي تنفيذا لكلام الراجل اللي نصحني بالبعد عنها,, بس أنبهاري بالموضوع وتفكيري فيه كتير خلاني عملتها,, فاخدتها وبعتهالهم
ساعه أتنين تلاته معملوليش ابروفد,, حاولت أوصل للجروب تاني تقريبا اتعملي بلوك من عليه معدش بيظهرلي,, كبر الموضوع في دماغي أكتر وقلت لازم اشوف حل فقررت أعمل أكونت جديد واحاول اوصل تاني,, وانا بعمل الاكونت الجديد جيت احط الصورة الشخصية افتكرت الصورة بتاعت الواد اللي تتبعته فقلت هعمل واحده زيها للاكونت الجديد قبل ما ابعتلهم تاني
أنا أصلا ليا أوضه على سطوح بيتنا بقعد فيها لوحدي وببات فيها,, أولا لان شقتنا تحت صغيره البيت كله على 80 متر,, وعشان ابويا شايف اني كده بعيد عن اخواتي الصغيرين فاعرف أذاكر,
الاوضه اتنين متر ونص في اربعه متر فيها سرير ودولاب عليه مرايه بطول الدولاب وترابيزه للمذاكره ظبطت الاوضه والدولاب وظبطت الشمعه بالليل عشان ميأثرش نور النهار ويعمل خيالات,, وطفيت النور وصورت الصوره ومجرد ما لقطتها الشمعة أنطفت كأنها كانت مستنيه الصورة تتاخد,,ببص في التليفون لقيت الخيال بتاعي اللي أخدت صورته من المرايه واضح قدامي وضوح غريب وكأن ليه عينين,, عينين بلون الدم بتبص عليا وكأنها فيها حياة,, التليفون وقع من أيدي من الخضه وفصل,, الدنيا بقت ظلااام دامس,, ساعتها حسيت اني مش في اوضتي انا كان جمبي حيطه لو مديت ايدي هلمسها مديت ايدي ملمستهاش مديت ايديا الاتنين جمبي وحواليا مش لامس اي حاجه كنت زي التايه في أوضتي ومش عارف أبعادها,,حتى بصيص النور اللي بيدخل من الشباك او من تحت عقب الباب مش شايفه,, مشيت في الاوضه مش عارف هو انا مبتحركش, ولا ليه مبوصلش لأي جدار,, فقلت... هو في أيه,, حسيت أن صوتي بيتردد بصدى صوت,, كأني في ساحة واسعة جدا,, بس تحت الأرض لأن الظلام ده أستحالة يكون فوقها,, كانت ثواني, جسمي كله فيها بيرتجف وكانها سنين لغاية ما لمست حاجه بس مكنتش حيطه كانت حاجه زي جسم البشر بس متغطية بطبقة جلد سميكه وحرارتها عاليه وبتتنفس,, اتنفضت وبعدت ايدي,, وقعدت على الارض خبيت راسي تحت ايديا وقعدت أصرخ,, لغاية ما فقدت وعيي,, قمت الصبح كنت على سريري,, قلت الحمد لله كان حلم,, فتحت الموبايل لقيت الصورة اترعبت,, عشان أهدّي نفسي قلت أنا حصلي صدمة لما نور الشمعه انطفى وعشان كده شفت الخيال بعنين,, فاترعبت ودخلت في شوك أنما مفيش حاجه, والدليل اني زي ما انا اهوه وقررت أكمل,, حطيت الصورة صورة بروفايل      
وبعت طلب انضمام للجروب لقيت طالعلي سؤال تعويذة الحماية؟؟
فرحت حاطط نفس الاجابه الاولانيه,, المهم أن بعد ساعه لقيت رسالة من واحد حاطط صورة خياله بردو زي صورتي الجديده بيقول فيها...وانو برناشا قربونو؟؟
مكنتش عارف أرد أقول أيه, وهل هو الموضوع جد ولا هزار, بحثت على جوجل ملقيتش حاجه كنت زهقت منهم ومن قرفهم رحت رادد ب... نعم,, مكنتش أقصد نعم اللي هي أه,, كنت أقصد نعم اللي هي معناها زي الاستفهام كده او السخرية أو هات أخرك, زي نعم يالدلعدي,, لقيت أتعمللي أبروف واتقبلت في الجروب
ساعتها حسيت باحساس مريب,, خوف قلق ترقب,, الجروب كان عليه أقل من 2000 مشترك بس كلهم بنفس صورة البروفايل,, تقريبا متقبلتش أول مره عشان كده,, وواضح انهم من جنسيات مختلفة بس اغلبهم من شمال افريقيا مصر وليبيا وتونس والجزائر والمغرب, وكانوا عاملين لقاءهم السنوي من كام شهر هنا في مصر في فيلا في احدى التجمعات العمرانية الجديدة,, الجروب كله بيتكلم عن أشكال تعاويذ وسحر وحاجات اول مره اسمع عنها في عمل السحر زي جلد حمار وحشي وقرون الفيله العاج ودم الغزلان,,وانواع من البخور والقرابين,, اللي فهمته بردو أن دي طائفه من السحرة أو من الشباب الراغب في الالتحاق بالسحر وان المخنوس دة زي الساحر الاكبر أو الجني اللي بيسترضوه لسه مقدرتش أستوعب,, لكن بعد شوية ظهر فيديو تم أضافته من أدمن الجروب,, بس الغريب أنه تقريبا محدش شايفه على الجروب غيري لان مرت اكتر من ساعه ومكنش معاه اي تفاعل,, ممكن تبقى برايفسي بقا بيحددوا بيها الاشخاص اللي ممكن يشوفو الفيديو مش عارف,, فتحت الفيديو وكنت مضطر اضلم الاوضه عشان الفيديو,, كان عباره عن سواد بس, دام لمدة 20 ثانيه بعدها,, في وش قرب من الشاشه فجأه وكأنه كان بعيد عن كاميرا التسجيل وقربلها ,, كان لابس غطاء أسود للراس بارز خارج راسه بحيث مكنتش شايف وشه في الضلمه دي واتكلم بصوت أخنف وقال.. أهلا بك كقربان جديد للمخنوس موضوع لرغبته متى يشتهي سكنك
أنا أتنفضت في مكاني وقمت بسرعة قيدت النور وطلعت على السطوح,, كنا تقريبا المغرب أو بعد المغرب بشوية أخدت نفسي ولفيت على السطح لفه بس الغريب أن في سطح جمبنا بتاع عماره لازقه في عمارتنا بس اعلى مننا بدور في واد جارنا عنده بتاع 22سنه حصله أضطراب نفسي من تلت سنين لما أصحابه الاتنين ماتوا غارقانين وهو اللي نجا,, اثناء ما كانوا طالعين يصيفوا في مطروح,, معدش بيكلم حد ونظراته مشوشه وكأنه بيسمع حاجات مش سامعينها حاولو يعالجوه كتير في مصحات نفسيه وجابولو رقاه شرعيين مفيش فايده,, آخر ما زهقوا  وبعد تصرفات جنونيه منه زي أنه حاول في ليله يقتل أبوه,, عملولو اوضه فوق السطوح من سنتين, بيبيتوه فيها,, وبالنهار بيسيبوه عالسطح بس رابطينه من رجله بحلقه حديد موصوله بجنزير عشان مينطش ينتحر, أمه الله يرحمها ماتت من سنه وأخواته كلهم رجالة,, ومن بعدها أحيانا كانوا بينسوه في الليل وميرجعهوش اوضته ويبات منه للنجوم, في الصيف كنت بسكت وبقول عادي أنما في الشتا لما كانوا بينسوه كنت بتصل بأخوه الكبير وأقوله أنتوا نسيتوا السيد,,  الغريب أنه بقاله سنتين لا بيكلم حد ولا بيقاوم  كل اللي بيعمله دايما انه تايه في الملكوت,, المهم أنه الاول مكنش بيعتبرني موجود أصلا على الرغم من أني حاولت أتواصل معاه كتير بمشاوره أو ضحكه أو أي طريقه بس في الليله دي أول ما شافني حسيت أنه خاف,, أتفزع,, وطا جسمه تحت سور السطوح واستخبى بحيث مشوفوش,,مكنتش فاهم سر خوفه الجديد دا ايه,, الغريب أني ندهت عليه باسمه قلت اطلع يا سيد متخافش
مفيش ثواني لقيته قام من ورا السور بالراااحه وعينه في عيني وكلها خوف,, بس خوف حد عاقل,, لقيت نفسي بتلقائيه برفع ايدي وبشاورله راح مشاورلي وفجأه بدأ يتشنج,, يتشنج بصوت عالي كأن بيتكهرب أهله طلعوا على صوته كنت أنا أستخبيت وبتابعهم من ورا اوضتي شالوه عشان يحطوه في اوضته مكنش رافع عينه من عليا,, رجعت أوضتي وانا مرعوب حاولت افتح الصفحة دي تاني لقيتني أنضافت لمجموعة ميسينجر فيها خمسين فرد كلهم نفس الصورة,, بس لقيت عينيا مزغلله ومش قادر وحاسس بصداع نصفي لا والأدهى أني حاسس بتقل في ايدي اليمين كأني ماسك صخره مش تليفون وحسيت أني عايز أنام,, طفيت نور الاوضه ومددت جسمي وحاولت أنام لكن بعد شوية بدأت أسمع صوت نقطة مياة بتقع,, تقريبا كانت نقطة مع كل دقه من دقات عقرب الثواني في ساعة الحائط,, تك....تك....تك عارف لما تحس أن النقطه بتقع على قلبك أهو ده كان أحساسي مش عارف جات منين وحاسس ان جسمي همدان ومش قادر اقوم اشوفها,, كنت بعافر عشان أنام وحاسس بتنميل في أطرافي,, بس بعد شوية صوت نقطة الميه دي راح وانا بتقلب عيني جات على شيش شباك الاوضه اللي بيطل على السطح كان في حد واقف وراه كان خياله باين من انعكاس الانوار اللي بره بيحاول يبص عليا من الفراغات اللي موجوده في الشيش الخشب,, عرفت أن الصوت ده كان صوت خطوات مش صوت قطرات,,,... أفتحلي أنا السيد,,   رحت وقفت ورا الباب وانا برتعش مش ملموم على اعصابي  كمية اندهاش وخوف وهلع محسيتهمش قبل كده,, قلتله...عايز ايه يا سيد أرجع سطوحكم لو مرجعتش هتصل باخوك
...كان بيتكلم بصوت واطي أوي.. افتح لمصلحتك,, متخافش احنا بقينا في مركب واحد,,, كان داير في خيالي أنه عايز يقتلني زي ما حاول يقتل أبوه كنت بفكر أصرخ ولا أتصل بحد من أخواتي
لقيته بيقوللي...أنت أخترقت الحُجُب وانا عايز الحقك قبل ما يبقى مصيرك أصعب من مصيري,, قلت في دماغي هو في أصعب من مصيره,, دا عايش زي الحيوانات تقريبا,
... هفتح,, بس هفتشك يا سيد قبل ما تدخل عندي
...افتح ياعم وفتشني زي ما أنت عايز
ساعتها فتحتله فدخل بسرعه كان خايف حد على الاسطح اللي جمبنا يشوفه ورفع ايديه وقاللي...فتش
فتشته بسرعه كنت خايف يكون مخبي سكينة ولا اي حاجه يقتلني بيها بس طلع معهوش,, هو ك جسم ميتخافش منه خاصة أنه بقا هزيل جدا وعينيه مبرقه من بعد ما اتحبس حبسته دي
قعد على طرف السرير وسحبت كرسي المكتب وقعدت قصاده,, كانت راسه فيها هزه كده بس هزه خفيفه لفوق ولتحت وايديه فيها رعشه,, تقريبا دا بقا العادي بتاعه,, فقاللي...أنت عملت أيه؟؟
لغاية دلوقتي مكنتش مترجم ازاي سيد بيتكلم طبيعي وبيقدر يتواصل مع الناس بس فهمت هو يقصد أيه بسؤاله,, ماهو مش هيسألني عالميدترم يعني أكيد على البلوه اللي أنا فيها,, فحكيتله على حكايتي,,فزوا شفايفه بعلامة الأسف مع هز لراسه يمين وشمال وقاللي... انت غلطت نفس غلطتنا أنا وحسام وجمال,, فهمت أن حسام وجمال دول أصحابه اللي ماتوا غرقانين فقلتلو كانت ايه غلطتكم؟؟
قاللي أحنا كنا تلاته مبنفارقش بعض,, كنا دايسين في كل حاجه مع بعض,, خروجات, رحلات, حشيش, كحول, كل حاجة,, لغاية ما وقعنا في اللي سكته رايح مفيهاش جاي
عدلت نفسي على الكرسي وقلتله.. اللي هو؟؟
قاللي..جايلك في الكلام اللي محدش سمعه ولا عرفه قبلك,,
لما كنا في مطروح في السنه اللي قبل سنة الحادثة قررنا نطلع في الخلا يوم بليلته,, كنا رايحين نعمل كامبينج ,, بعد ما تقطع مسافه على الدولي الساحلي اتجاه السلوم,, بتسيب الطريق وتنزل الصحرا وتبعد لغاية ما تبقى في الليل مش شايف نور, وتعيش بقا حياتك,, طلعنا بعد العصر نصبنا خيمتين وظبطنا قعدتنا وشوينا عالفحم وأكلنا ورلّينا وشربنا ورلّينا تاني وتالت, وسكرنا ورقصنا على اغاني شعبي,, ولما همدنا وقعدنا جمب النار في الليل ,, كنا بنحس بالعفاريت حوالينا,, خيالات في الافق المظلم البعيد بتجري أو بتطير أو بتزحف عالارض عيون باينه في الضلمه كأنها بؤبؤين نار اصوات وشوشه في ودانك ,,كان احساس مخيف بس كان أحساس فوق الخيالي متعرفش بقا هو السُكر والجو والضلمة اللامتناهيه ولا كانت عفاريت بجد,,
أنت عارف أقوى أحساس في الدنيا احساس ايه,,

قلتله... ايه؟؟   فقاللي... الخوف,, الرعب الحقيقي,, هرمون الادرينالين من أقوى هرمونات الجسم,, هرمون الحفاظ على الحياة,, وانت خايف قواك بتضاعف ممكن تعمل حاجة جسمك بفسيولوجيته الطبيعيه ميقدرش يعملها,,احساس لذيذ وليه نشوه,,بيوت الرعب روايات الجن وما وراء الطبيعه, افلام الرعب والدم, دا نوع جديد من الادمان في وقت من الاوقات هيسبب كوارث لو متشافلوش حل, بص حواليك وشوف النهاردة الاقبال على افلام الرعب وعلى أدب الرعب,, تعرف كام واحد حاول يقرأ تعاويذ,,,  قلتله...اعرف نفسي,,
فكمل كلامه... المهم عشان متفلسفش عليك كتير,, قضينا ليلتنا ونمنا في خيامنا وصحينا الصبح رجعنا مطروح ,, ومحصلش حاجه غريبه بعدها,, في السنة التانية رحنا نفس المكان بس كنا في ليلة 14 من الشهر العربي منظر القمر في الصحرا يهوس,, وكررنا نفس الليله بتاعت السنه اللي قبلها بس المرة دي تقلنا العيار شويه,, وشربنا لحد ما سكرنا احنا التلاته,, جمال كان أكتر واحد شرب وكان ضايع تقريبا,, فقال أنا معايا كام ورقة بي دي اف كلهم تعاويذ تحضير على التليفون, ما تيجو نقرأ تعويذه يمكن يطلعلنا تلت جنيات حلوين بدل الخيالات اللي حوالينا دي وقعد يضحك أوي ,, لقيت حسام مشجع الموضوع وقال هيحصل ايه يعني أكتر من اللي بنشوفه,, كانت قناعتهم أن دي حاجة هتعلي المود ومش هيحصل حاجة, أما أنا فكنت رافض وقعدت أقولهم دا كله تخاريف وكلام فاضي قالولي مادام تخاريف تعالى,, شدوني من ايدي وقعدنا حوالين النار,, وقرأناها,,محصلش أي حاجه بعدها,, الخيالات هي هي وكل حاجه زي ماهي,, الحاجة الوحيده اللي حصلت بعد ما خلصنا قراية,, أن كلنا اتاوبنا [تثائبنا] واحد بعد التاني وكان اللي بيتتاوب بينام بعدها بشوية في مكانه,,
قطعت انا كلام سيد بأني اتاوبت فقاللي... هاتلي كوباية وحط نصها سكر ونصها ميه ودوبهالي ,,,رحت أعمله اللي هو عايزه وهو جمبي و بيكمل حكايته كان بيتكلم بمنطقيه وتلقائيه مش متناسبه مع التفاتاته شمال ويمين وفوق وتحت ومع رعشة أيده وراسه
وكمل وقال... نمنا احنا التلاته بعدها في اماكنا حوالين النار وحلمنا نفس الحلم كان حلم واضح كأنك لامسه,, كل واحد فينا شاف نفسه في مكان مظلم بس فيه نور خافت,, كان زي جبل بركاني خامد من الاف السنين وانا جواه ببص على فوهة الجبل البعيده شايف فوقها القمر, هو اللي عامل الاضاءة الخافتة,, فضلت معلق عينيا عليه متشبث بالنور اللي بيعني الامل الوحيد في عز الخوف الدامس,, لغاية ما جات سحابة سوده غطته وعم الظلام وفلت آخر خيط أمل,, ظلام دامس مكنتش شايف ايدي فيه,, ساعتها اتلفت حواليا لقيت كهف او نفق جوه الجبل جاي منه بصيص نور وفيه خيالات على جدرانه بتتراقص مشيت ناحيته وانا مرعوب لقيت نار وتلاته قاعدين حواليها زي ما كنا قاعدين,, قربت اكتر لقيتهم احنا,, بس واقف ورا كل واحد مننا شيطان بقرن واحد هيئته من دخان ومقرب راسه من راس اللي واقف وراه وخياله بيتراقص على جدار الكهف ومجرد ما بنخلص التعويذة بيدخل الشيطان اللي فوق كل واحد جواه من فمه وهو بيتثائب,, وتختفي الخيالات,, قمنا احنا التلاته  من نومنا مفزوعين واحد ورا التاني كان الصبح شقشق مكناش نمنا بتاع ساعتين,, فرجعنا على مطروح وكانت الدنيا بدأت تتغير معانا ميه وتمانين درجة من النقيض الى النقيض,, انا عن نفسي دخلت في حالة أكتئاب وزهقان ومكنتش عايز اتكلم مع حد ولا أشوف حد,, جمال كان اسرع واحد تاثرا فينا,, من تاني يوم لما روحنا الشاليه بتاعنا كان بيشوف حاجات ويشاور عليها وهي مش موجوده,, كان يتخض جامد ويبان على وشه الفزع زي ما كنا قاعدين في البرنده ولقيته بيقوللي...أضرب التعبان ده,, وقام رجع بضهره عند بابها وهو مبرق عينيه وبيرتعش,,انا اتنفضت من مكاني من منظره وقولتله... فين التعبان ياجمال ,, قاللي... تعبان كبير اهوه جاي بيزحف علينا من البلكونه,,...

قيس على كده بقا,, غربان كان يداري وشو عشان متخربشوش وكلاب وخفافيش واشخاص غريبه وظلال وكان دايما حاسس أن حد مراقبه بيتلفت وراه بصفه دايمه,, وبيسمع أصوات خطوات وخربشه على البيبان,, كان يدخل ينام في أوضته,, نسمع صواته وصريخه نجري عليه ونقيد النور كان يتفزع  من دخلتنا عليه  ويقعد يقول سيبوني أبعدوا عني ابعدوا عني وهو مكور نفسه في السرير,, حسام بردو كان بدأ يظهر عليه التأثر أكتر مني وأنا كمان بدأت أحس بحاجات زي كده بس حالة جمال كانت مخليانا ملهيين فيه اكتر من نفسنا ,, مكناش عارفين هيرجع لأهله دا ازاي,, لكن في اخر يوم لينا في مطروح وقبل المغرب بشوية كنا عالبحر,,قلنا نخده ونفك زهق يمكن يفوق,, كنت أنا وحسام بنشتري درة مشوي,, فجمال غفلنا وطلع جرى على البحر على ما وعينالو كانت  الميه وصلت عند رقبته واحنا لسه عالشط نزلت أنا وحسام وراه  جري,, كان دخل في الغريق وهو مبيعرفش يعوم,, كان رايح ينتحر,, كان يومها السحب [جذر البحر] عالي جدا كان بدأ يطفو ويغطس لما حسام وصلو فأتشعلق فيه وبقا السحب بيخدهم سوا وهما بيطفو ويغطسوا وانا شفت المنظر رجعت,, المنقذين ملحقوهمش والبحر اخدهم وانا طلعت أتصلت بأهلهم من تليفون حد عالشط بعد ماتليفوني باظ في الميه,, الجثث طلعت بعد 12 ساعه منفوخه جدا كان جسمهم ازرق وبهتان وشعرهم كله منحول,, كان منظر صعب جدا خصوصا مع وصول اهلهم ,,  وبكده كان أنتهى عذابهم,, اما أنا دخلت في حالة اكتئاب حاد مقرونه بزيادة ظهور ا الاعراض عليا بعد ما رجعت مع أهلي اللي كانوا جم على مطروح لما عرفوا باللي حصل اللي هو الغرق بس,, كل اللي كان بيعمله جمال بدأت أعمله وأفظع كمان,, بس الميول الانتحاريه كانت قليله,, متهيألي من كمية الرعب اللي حصلتلي من منظرهم قدامي وجثثهم منفوخه,, حادثة أبويا مثلا انا مكنتش بحاول أقتله أنا كنت بحاول أحميه من تعبان كان طالع على سريره وهو نايم في الليل,, مسكت السكينه وجريت بيها عليه, لو كنت هموته كنت غرزتها بس انا جرحته بس لاني كنت بضرب التعبان بس هم أفتكروني أني بقتله,, الكل كان فاكر أني مصدوم من موت أصحابي وفترة وهتعدي,, لكن الحقيقة كانت أصعب,, مع الوقت قرروا أنهم يعملوا فيا زي ما انت شايف,, زي كلب مربوط عالسطوح,, ودا كان أسلم حل,, أتعلمت بعدها أسيطر على مخاوفي وهلاوسي اللي بقيت بشوفها نتيجة المس اللي حصلنا,, اتعودت عالخيالات والوشوشات وصوت الصراخ وصوت الاقدام والخبط,, أتعودت على التمثل في صور الحيوانات,, لكن كل ده كان بسبب الانعزال وقلة الاختلاط بالناس وقراري بأني أظهر فاقد للنطق عشان أي حاجه هنطقها هظهر كمجنون, أما لو نزلت للحياة تاني أكيد هنتحر

وأول ما شفتك النهارده عرفت أنك ممسوس كانت أول مره أشوف هيئتك بالسواد ده ,, بعد سنتين قضيتهم لوحدي أكتشفت ان حالتنا دي زي اللي رقص عالسلم لا اللي فوق شافوه ولا اللي تحت سمعوه يعني ولا هو حاول يتواصل فعلا بصورة حقيقية مع الجن او يتعلم السحر ويبقى مشعوذ أو ساحر ودي قصة كبيرة جدا وليها طقوسها وقرابينها وده شرك بيّن,, ولا فضل طبيعي,, احنا اللي بينطبق عليهم بالظبط نص الآيه... وأنه كان رجال من الأنس يعوذون برجال من الجن فزادوهم رهقا,, اللي بيحصل ده رهق بمعنى أذى منهم لينا,, لأننا أستعذنا بيهم,, التمثل وسحر الحواس ده كله أذى مفيش منه أي نفع,, هم مش سحرة فرعون سحروا أعين الناس فشافوا الحبال والعصيان تعابين أمتلأ بها الوادي
السيد خلص كلامه كنت أنا في قمة ضياعي خاصة بعد ما بدأت فعلا أحس أني بشوف قزم بيظهر ويختفي في أركان الاوضه وأسمع صوت طفل جاي من تحت سريري وسيد لاحظ التفاتاتي
فقاللي.. الأمور هتبدأ معاك واحده واحده بالقدر اللي يتحمله عقلك ومتحصلكش سكته قلبيه,, ممكن تتجنن بس وغالبا مادام هي مجموعه وتنظيم مش هتبقى زي أعراضنا هتبقى أقل وطأه عشان تفضلوا عايشين منصاعين واكيد ليهم منكم غرض
كان هاين عليا اقوله لا فيك الخير يا سيد والله, طمنت قلبي الله يريح قلبك أو أرميه من عالسطح وأخلص, فقلتله..والعمل يا سيد
فقاللي قدامك حل من اتنين...يا اما تعمل زيي وتتربط عالسطح,, يا اما تعمل زي جمال وتنتحر,,,قلتله...مفيش تالت؟؟

فقاللي..في تالت ورابع بس صعبين,, قلتله... الحقني بيهم,,
قاللي التالت ومنصحكش بيه أنك تخاوي بجد يعني تكمل السلم ومتقفش عليه,, يعني تقدم قرابين وتعمل طقوس لغاية ما تخاوي,, ساعتها عقدتك هتتحل,, وأكيد كل العيال اللي في المجموعة دي متعشمين بكده,,بس صدقني لو شافوا حلمة ودنهم لا حد هينولك ولا هينولهم السر ولو فرض واحد في المليار نولتوه, كده تبقى  خسرتها دنيا وآخره وكفرت بالله
قلتله...طب والرابع؟؟ فقاللي الرابع ده ينفع في حالتك أنت مش في حالتي,, لأن أنت أو المجموعة اللي أنت ألتحقت بيها عارفين الجني اللي بيستعيذوا بيه ,, وأكيد عارفين طريقة خلاصك أما أحنا رحنا رمينا تعويذة في الصحرا أرض الجن 
كنت عايز أقوله أوعى تنزل الشارع يا سيد عشان لو حد سمع كلامك ده مش هيطلعوك من مستشفى المجانين طول عمرك
سابني سيد ومشى وطلع على سور سطحنا ومنه أتعلق في سور سطحهم وراح اوضته,, ونزلت أنا عشان أنام تحت في شقتنا جمب أخواتي لأني مكنتش هقدر أنام لوحدي بس وانا نازل عالسلم لقيت جاتلي رسالة بتفيد أجتماع للمجموعه بتاعتنا اللي على جروب المسنجر المكونه من خمسين فرد بعد يومين,, في ليلة أكتمال القمر
نزلت شقتنا تحت, كان كله نايم,, كنت بحاول أهيىء نفسي للإنكار يعني مش أي حاجه أشوفها أو حتى أسمعها أشغل دماغي بيها لغاية ما أروح الاجتماع وأشوف أيه اللي هيحصل بعدها,,
البيت تحت أوضتين وصاله ومطبخ وحمام,, كان في صالون زمان بس اتشال اترمى عالسطح واتعمل مكانه اوضه عشان هبه أختي تبقى في اوضه لوحدها وحسين وايمن يبقوا في اوضه وانا فوق,, أيمن نومه زي الزفت وبيتقلب زي القرموط وهو نايم, فمددت جمب حسين أخويا الأصغر مني على طول,, بيني وبينه ميكملش سنتين احنا زي الاصحاب مش الاخوات مشكلته الوحيده معايا انه هيموت ويخد الاوضه اللي فوق وانزل انا مكانه على سريره  ,,المهم انه حس بيا فقاللي وهو نايم على جنبه ومديني ضهرو
..مالك يا أحمد ايه اللي نزلك؟؟
قلتله... لا مفيش, السلك اللي شادينو للأوضه فوق فرقع والكهربا قطعت قلت أجي أنام هنا
قام قعد واتعدل ناحيتي وابتسم ابتسامه صفرا كده وقاللي... يبقى انت خايف يا معلم
حسيت أن الدم غلى في عروقي من كلمته وتجهمت جدا ورديت بانفعال...لم نفسك ياله أنت بتكلم أخوك الكبير,, انت هتستهبل ولا ايه,,
المشكله أن حسين سمج وبارد وافتكر أني بمثل الانفعال الزايد عشان أقطم الكلام,, انا مكنتش عارف أنا ليه اصلا انفعالي مبالغ فيه كده وهو ما صدق بقا مسك عليا حاجه زي دي, اني خايف.. فزود من ابتسامته الباهته ...لما أنت بتخاف أوي كده يا معلم ومش قادر تستحمل ليله من غير نور ماتيجي هنا بقا على طول واطلع انا فوق وكفى الله المؤمنين شر القتال
ساعتها كنت في فورة غضبي,, انفعلت لدرجة اني حسيت أن ملامحه قدامي بتتغير, ومادريتش بنفسي غير وأنا بضربه بالاباجوره اللي جمب السرير,, مره واتنين على راسه,, وقبل التالته كان ايمن بيشدني ونافورة الدم طالعه من دماغ حسين مفوقتش غير وانا شايف أمي,, كانت جات هي وابويا وهبه على صوت زعيق ايمن اللي ماسكني ومكلبش فيا من ضهري وصريخ حسين المرعوب المذهول من اللي حصل,, كنت حاسس ان مرت عليا دقايق,, لا كنت سامع حد ولا شايف حد فلما رجعت لوعيي كنت ببص باستغراب ومش مصدق اللي أنا عملته,, جروا بيه عالمستشفى وانا مرحتش معاهم انا مينفعش اروح في حته دلوقتي خالص,, فطلعت على اوضتي  
رجعوا بحسين بعد ساعتين كانت الساعة 3 قبل الفجر مكنتش نمت,, أمي وأبويا طلعولي, عشان يشوفوا ايه اللي حصل, وعرفت منهم أنه أخد 10 غرز في راسه وكان في اشتباه في ارتجاج بس الحمد لله بعد الاشعه طلع مفيش,,
ابويا لاحظ,, لاحظ نظراتي المشوشه والتفاتاتي اللي بدأت تظهر كأني بسمع حاجه هنا او هناك وحس أن في حاجة غلط
في اليوم التاني كان جايبلي راقي شرعي,, كان شيخ باين عليه الوقار,, مجرد ما حط ايده على راسي وبدأ يرقيني الا وبدات الدموع تسيل من عينيه,, بعد مارقاني واداني مياة للرقية الشرعية أشرب منها وأستحمى بيها أستغل أن والدي بعد عننا شوية وقاللي ...أنت عملت أيه؟؟ فقلتله...مفيش ياعم الشيخ,, فقاللي مش مهم,, بس الأهم أنت مسحور سحر مشفتوش قبل كده,, أو ممسوس مس نتج عن اتصال قوي,, اللي هقولهولك بعيد عن أنك تحافظ على صلواتك وأذكارك بقدر المستطاع, لغاية ما يتحل سحرك,, اياك والغضب اياك والغضب اياك والغضب,, الشخص العادي لما بيغضب بيزكي نار غضبه الشيطان,, أنت لما هتغضب هتتعمى بصيرتك,, والافضل انك تعتزل الناس لغاية ما تتحل عقدتك وانا هزورك تاني,,
عدى اليوم ده واليوم اللي بعده وانا خلاص كنت بدأت أنهار وفي ليلة الاجتماع بعد ترقب وانتظار على  أحر من الجمر وبعد ما كنت قلت خلاص محدش هيكلمني,, جاتلي رساله الساعة 12 بالليل أدوني عنوان مدينة العاب مهجورة وقالولي أني هنط من على سورها الخلفي وانتظر رسالة,, هي مدينة صغيرة أعرف أن صاحبها راجل أعمال متعثر والحكومة حجزت عليها بأرضها, بقالها أكتر من سنة لغاية ما بقت زي الاطلال معليهاش غير حارس عالبوابه الرئيسيه,, أتسحبت من البيت عشان محدش يشوفني وكنت جوه المدينة الساعه واحده بالليل بالظبط,,قاعد عالارض وساند ضهري لسورها ومستني رسالتهم,,المدينة فعلا كانت مضلمه الا من ضوء خافت جاي من الانوار اللي بره ونمى فيها عشب جمب الاسوار,, عمري ما زرت المدينة دي لكن جه لمحه على خيالي لما كانت المدينة دي شغاله وصوت الصرخات كان بيجلجل فيها,, بس اللمحه راحت من على ذهني في ثواني وفضل صوت الصرخات,, بدأ يتكرر في ودني الصوت اللي جاي من المجهول من بين الالعاب المهجورة لغاية ما اتقطع الصوت لما لمحت طفل صغير بيجري بينها واختفى في الضلمه لكن بعد شويه ظهر على لعبة الساقية الدوارة في الكرسي اللي واقف في أعلى نقطه ليها, كان بيشاورلي اني اطلعله,, فركت عينيا عشان أفوق ويختفي من عينيا خيال الطفل ده بس لما شيلت صوابعي من على عيني لقيته في وشي,, عينيه في عينيا وبيقولي..أنت خايف تيجي ليه؟؟؟ 
غمضت عينيا ودفنت راسي بين رجليا وقعدت أقول سلام قولا من رب رحيم واكررها,,
فتحتها لقيته طلع فوق تاني ووقف عالكرسي وبيقولي...شوف
وراح ناطط من فوق وقبل ما يوصل للأرض أختفى
أختفى شويه وفجأه سمعت صوته على يميني كان قاعد جمبي... لعبه حلوه أوي ياعمو تحب تموت هناك زيي ,,,
انا كان لساني أتشل تقريبا لما جاتلي الرساله ...الاجتماع عند اللعبه رقم 13 مشيت وأنا منور نور الموبايل مش شايف أي أرقام على الالعاب في الضلمه دي والاشباح اللي بتجري حواليا.. لغاية ما لقيت فعلا حاجة زي بيت ومكتوب عليه 13 بلون احمر زي الدم,, كان بيت الرعب,, قلت أكيد دا المكان الوحيد اللي مقفول وينفع فيه اجتماع وهي كده كده سوده فخليني أشوف أخرتها
مجرد ما حطيت رجلي فيه,, الخفافيش قابلتني في وشي باعداد مهوله,, لدرجة أنها جرحت وشي,, وكنت سامع صوت رفرفة أجنحة جوه زي ما يكونوا الاف
اترددت في الدخول وقبل ما أخطي جواه خطوه لقيت جاتلي رساله.. نجحت في الاختبار وعديت المرحلة الاولى انتظر مننا رسالة المرحلة التانية
أه يا ولااااااااد الكلب
حسيت أن الاختبار ده كان مقصود منهم لسببين أولا عشان أنتقل لمرحلة أعلى من الهلوسه في وقت سريع ودا حصل, والتاني يختبروا ولائي ليهم وأني مش هبلغ عنهم
تاني يوم جاتلي رسالة منهم أني لازم أودع ما قيمته الف دولار في حساب بنكي بعتولي رقمه,, طبعا مكنوش بيردوا على اي رسايل مني بستفسر فيها,, بس المرة دي لما بعتلهم وقلتلهم ليه؟؟
قالولي أنت اللي ضافك للجروب مقالكش,, عامة أيا كان أنت في مرحلة الهلاوس ومش هتعديها الا بدخولك للمرحلة التانيه مرحلة التوجية وبعدها المرحلة التالته مرحلة السيطرة ودي اللي بتوصل فيها مبتغاك,, قلتلهم ..مينفعش ارجع طبيعي,, كان ردهم للاسف مستحيل,,
مكنتش عارف هتصرف في المبلغ دة ازاي,,مستحيل أصلا أعرف أجمعه ومكنتش عارف أعمل أيه وكانت حالتي ساءت جدا  بفقد السيطرة على عقلي خيالات بتطاردني في كل وقت,, كنت شايف مصير سيد قدامي,, الوحيد اللي بقيت بشوفه غير ابويا وامي,, أنا عايش حياة مجنون في توب بني ادم عاقل وحاسس أن مفيش اي امل في النجاة وياريت على أدي أنا,, لكن انا بأذي اللي حواليا منظر أمي وهي بتعيط وتخدني في حضنها كل ما تطلع عندي وتشوفني وانا راسي بدأت تتهز وعينيا زايغه معدتش قادر استحمله معدتش قادر اتخيل استمرار حياتي كده حتى الاجتماع طلع فنكوش,, فقررت انتحر بعد ما اتقفلت في عينيا كل البيبان,,
جبت حبل الغسيل اللي عالسطح وقطعته وعملت العقدة وعلقت الحبل في جنش المروحه وجبت الكرسي وقفت عليه ودار شريط حياتي قدام عينيا لما غمضتهم وانا بحط العقده في رقبتي,, نطقت الشهاده وحدفت الكرسي بعيد برجلي
لكن للاسف ماحستش بأي ألم الا ألم في مؤخرتي ،،الأوضه بتاعتي اللي فوق السطح مسقوفه بعروق والواح خشب فوقها طبقة أسمنت خفيفه,, مجرد ما جسمي حمّل على الجنش وقع من السطح,, بس الاستفاده اللي حصلت لي إني لما دار شريط حياتي قدام عينيا كان فيه صوره مركزه أوي
صورة عم ابراهيم صاحب المكتبه,, زي ماتكون رسالة
معرفش ليه جالي احساس قوي أني لازم أروحله وفي ساعتها كنت عنده,, مجرد ما شافني داخل عليه قاللي تعالى على جوه
....مسمعتش كلامي صح
...قلتله للأسف أه,,, فقاللي..وصلت لحد فين
فحكيتله القصه كلها من الألف للياء ووقف وقاطعني وركز عند جزئيتين,, وانو برناشا قربونو؟؟ اللي جاتلي في رساله قبل ما اشترك ورديت قلت نعم والتانيه بتاعت... أهلا بك كقربان جديد للمخنوس موضوع لرغبته متى يشتهي سكنك
فابتسم وقاللي...خدمة قصاد خدمة,,
قلتله تقصد أيه؟؟ ممكن يبقى في حل؟؟
فقاللي..ما خلق الله من داء الا وخلق له الدواء واللي أنت فيه دا داء
قلتله.. انا على استعداد اقدم روحي بس اخلص من اللي انا فيه ده
قاللي امين,, هتسلمنا الناس دي
قلتله ازاي,, ومين اللي هيمسكهم,,الحكومة مثلا؟؟
قاللي.. لا الحكومة يعني تحقيقات ومباحث وافلام ومش هيعرفوا يوصلوا في الاخر لادانة كامله,, دول حدهم في الشرع القتل بس الروس الكبيرة مش العيال الصغيرة,, واحنا هنعرف نوصلهم لما نوصل لريس المجموعه بتاعتك دي,,
قلتله...مين اللي هينفذ,,
فقاللي.. الشباب اللي نفسه يطبق شرع الله في الناس دي كتير أوي فوق ما تتخيل,, والناس اللي أتأذت من السحر اكتر,, أنت هتخد الفلوس وتحولهالهم وبعد كده أكيد هيبقى في اجتماع ومش هعرف أحلك من اللي انت فيه غير لما تروح عشان أحتمال يقروا عليك تاني,, وصدقني أوعى يضحكوا عليك بالكلام ويقولولك انهم هيوصلك لمرحلة المشعوذ او الساحر,, دول هسيسيبوك كده زي الكلب تلهث وراهم في كل سبيل
وفعلا أخدت منه الفلوس وحولتها وكانت نفسيتي بدأت تتحسن لما عرفت أن في حل وفضلت مستني رسالتهم
اللي وصلت بعد تلت أيام من التحويل ,, وفعلا زي ما اتوقع وكانت في فيلا في تجمع عمراني من التجمعات العمرانية الجديده,, زي الاجتماع اللي كنت شفته على مجموعتهم على النت,, كان عباره عن جلسه تعاويذ في بهو الفيلا اللي كان مظلم وسط ريحة بخور كريهه وموسيقى اوبراليه غريبه شغاله ووشوش كلها زي الشياطين او هي الشياطين نفسها
يعني كنا شياطين وحوالينا شياطين
المهم انه تم تنفيذ المهمه بنجاح
لما هجم علينا فجأه اكتر من خمسين واحد ملثمين واتمسك التلاتين واحد من الجروب اللي حضروا الاجتماع واتاخدوا في ميكروباصين,,
المنظمين دول على الرغم من حنكتهم اوي عالنت الا ان كانت ثغرتهم ان مكنش حد فيهم متخيل أن واحد من التلاتين المرووشين دول ممكن يبلغ مكنوش حاطين خوانه نهائي خاصة بعد النجاح في الاختبار الاول
ثانيا الشرطة لو جات مش هتمسك فعلا عليهم حاجه دا واحد بيقول تعاويذ وشباب بيردد وراه اللي معملوش حسابه عم ابراهيم ورجالة الرقوة الشرعيه وكل من تطوع للعمل ده
وجه الدور على عم ابراهيم في تنفيذ وعده ومليش دعوة انا بقى هيمسكوا الروس الكبيرة ولا لا
لكن الحل مكنش زي ما كنت متخيل,, انا كنت فاكر انهم هيعرفوا تعويذة الحل زي ما سيد قال لكن عم ابراهيم صاحب المكتبة
قاللي بأسف كبير.... مفيش الكلام ده,, انت لما بتستعيذ اصلا قوتك الروحانيه بتنهار, مناعة الروح بتضعف بالمعاصي وانت ارتكبت اكبر معصية,,, السحر,, بمعنى اخر,, زي مناعة الجسم, الروح كمان ليها مناعة وزي لما مناعة الجسم بتضعف بيعدي عليها اي مرض بيخترق الجسم, بردو مناعة الروح لما بتضعف ممكن يمسّك أي جن وبتسقط في مستنقعات الهوى يعني أحنا استحاله نعرف ايه المس اللي مسك,, انت اللي عملته كان مس قوي استعاذه سلطت عليك ما لا قبل لك به وأضعفت روحك ,, محاولة أنك تلتزم وتقرب من ربنا وتترقى كتير ممكن تجيب نتيجة بس طريق طويل وانت شكلك طول عمرك ضعيف من الناحية الايمانيه وممكن تقع مننا في وسط الطريق وتنتكس وتبقى افظع من الاول,, الحل دلوقتي,,,
أنك تموت زي السحره اللي زيك وطلع مسدس من جنبه ووجهه ناحيتي وانا في قمة ذهولي وضربني رصاصة
بعد فترة مش عارف اد ايه فوقت لقيت نفسي في لحد خشب مقفول عليا تحت الارض كنت فاكر أني ميت بس لقيت جمبي قوارير ميه شربت منها بالعافيه واتاكدت أني عايش لما الميه روت عطشي وفضلت عالميه لمدة بردو معرفهاش لغاية ما سمعت صوت حد بيحفر فوقي ,, وطلعوني عشان اعرف التفسير للي حصل ده
وانو برناشا قربونو تقريبا معناه بالسرياني موافق تكون قربان
والتانيه أهلا بك كقربان جديد للمخنوس موضوع لرغبته متى يشتهي سكنك
فهمت من عم ابراهيم انهم لما قدموني قربان او عقدوا عليا سحر بما يعني ذلك مكنش هيتحل الا بموت القربان اللي هو انا او بموت الساحر الاكبر اللي مش عارفين هنوصله امتي او بموت الجني نفسه,, الى جانب زي ما حكالي ان ممكن تكون حاجه تانيه مستني
وقال ...الجن مبيعرفش الروح طلعت منك ولا لا,, سيدنا سليمان لما مات الجن معرفش انه مات الا لما الأرضه نخرت تحت عصاه,, لا يعلم الغيب الا الله,, الجن ممكن يدور في الظواهر,, ربنا بيقول يسئلونك عن الروح قل الروح من أمر ربي يعني محدش هيعرف الروح طلعت ولا لا الا ربك,, وياما ناس نبضها وقف وتنفسها ولقوا نشاط في جذع المخ,الأنس والجن ملوش غير الظاهر,,الرصاصة دي كانت مخدر بينزل بنبضك وتنفسك للحد الادنى و بمجرد ما وقعت كلفتناك في كفنك مكنش اي مخلوق يعرف بالموضوع الا انا  وواحد معايا حتى مكناش بنتكلم مع بعض بما يوحي انك عايش,, كنا بنتكلم بس بما يوحي ان لازم نخلص من جثتك وسبناك تلت أيام على قوارير الميه لغاية ما الانس والجن محدش يعرف انك عايش ولغاية ما اللي كان مسك يتوه في الملكوت بعيد عنك
ومجرد ما طلعت حصناك بمية زمزم مقري عليها الرؤية الشرعية من واحد من أهل الثقه وحصناك بكل آيات التحصين وخليناك تتوضى وهتفضل على وضوئك اطول فترة ممكنه كل ما تنقض وضوئك ترجعله,, ومتقلقش الجن مادام رحل عنك مش هيرجعلك الا بتسخير جديد لو لعبت تاني في الغيبيات