التحدي الاخير (الجزء الاول)

(1)
مبروك انت العميل رقم الف لشركتنا وبالمناسبة دى ليك رحلة مجانية على خطوط*** الجويه لحضور مهرجان التحدى الأخير يوم 9 مايو 2019
والرحله شاملة الاقامه والانتقالات
**
ده كان نص رسالة غريبة جت لى ع الإيميل الساعة 11بالليل وانا قاعد ع اللاب توب إمبارح كنت فاكر أنها اشتغاله أو هاكر
بس لانى بحب المغامرة خدت الموضوع بجد وقررت أن هقبل الدعوة
مفيش دقايق وجتلى رسالة تانية نصها كالآتي
مسموح لك بأصطحاب 3 أشخاص لحضور التحدى الأخير
انا مين ؟
انا اسمى عمرو عندي 28 سنة بشتغل ف أحد شركات البرمجة الكبرى في مصر اعزب وانا الابن الوحيد لاهلى عايش لوحدي وهما مسافرين ف إحدى الدول العربية بيجو كل سنتين ودى فرصة علشان أفكر في العرض العجيب إللى جالى خصوصا ان الاسم (التحدى الأخير) شدنى وأنا من محبى التجربة والقراءه ف الماورائيات والظواهر الغريبة
قفلت اللاب توب ودخلت اوضتى علشان انام بس التفكير كان مستحوذ على يا ترى هاخد مين معايا ف الرحله دى ؟
مخدتش وقت علشان أقرر ملقتش انسب من احمد ورامي وكمال صحابي الاعزاء إللى لهم نفس الاهتمامات
وفعلا تاني يوم كان مبعوت لى التذاكر على البيت واتصلت بيهم وافقوا بدون تردد وكان السفر،بعد اسبوع وبالفعل جهزنا نفسنا ومكانش عارفين ايه اللي مستخبى لنا هناك
و فى ليله السفر بيتنا مع بعض انا وصحابى وقمنا الصبح خدنا شنطنا وطلعنا على المطار
واحنا ف المطار كان كل واحد فينا فى وادى قاعدين ساكتين
لحد.ما قطعت السكوت وقلت
-ايه يا جماعة مالكم في ايه أنتو واكلين سد الحنك ولا ايه ؟
رد كمال بخوف وتردد :انا مش مطمن للسفريه دى انا حاسس انك بتحضرلنا مقلب او مصيبة
رد رامى بلاش التشاؤم ده ي جماعة كلها دقايق ونطلع الطيارة ولما نوصل ونشوف اللي هيحصل
قلت لهم يعني انا الحق عليا اني طلعت اصيل معاكم ومستندلتش وكان ممكن اطلع لوحدى بس انا مهانش عليه اطلع الطلعة دى من غيركم انا عارف انكم زى حالاتى بتحبوا المغامرة علشان كده جيتو على بالى اول ما جاتلى الرسالة و
التذاكر
احمد:- ده العشم ي صاحبى
دقايق وندهوا اسامينا ف الاستعلامات شيلنا الشنط وخرجت مع صحابي لمكان تخليص الإجراءات وبعدين طلعنا الطيارة
الرحله خدت تلات ساعات وبعدها وصلنا البلد اللي فيها المسابقة هى بلد ف قاره اسيا بدون ذكر اسمها ووصلنا الفندق اللي هنقعد فيه ولاقينا واحد مستنينا هناك
شكله كان غريب جدا جسمه عريض ونظراته لينا مش مريحة ومكانش بيتكلم الا ف اضيق الحدود وكانه كان متلقن يوصلنا وينفذ اوامر وبس
شالنا الشنط وطلعنا الجناح بتاعنااللي في الفندق وفتح الباب علشان ندخل وبعدين سابنا ومشى
دخلنا ولسه بنقفل الباب احمد لمح ظروف أصفر مكان م الراجل اللي وصلنا كان واقف رجع و كان عايز ياخده فقلت له ي عم سيبك م الظرف ده ياللا عايزين نرتاح من السفر
لكن هو مسمعش الكلام مصمم ياخده وبصراحة انا كمان الفضول كان قتلنى وكنت عايز أعرف الظرف فيه ايه
خدناه ودخلنا وكان رامى وكمال سبقونا وفتحوا الشنط
وأنا بكل ثبات خدت الظرف وفتحته وبدأت اقرأ
«ان هذا التحدى صمم خصيصا لاصحاب القلوب القوية لابد من تنفيذ التحديات كاملة ولا مجال للانسحاب من المسابقة باى حال والا فالهلاك ف انتظارالمتخاذلين مادمت اتيت إلى هنا فاكمل النهايه ولا تتاثر بما تسمع أو ترى المفاجآت مازالت فى انتظار من يكمل حتى« التحدى الأخير»
انا كنت مستغرب من الكلام جدا وكمال لاحظ فقالى
- ايه سايبنى محتاس ف الشنط وعمال تقرا كلام ملوش معنى هات الورقة دى يا عم ونتش الورقة وقراها حسيت بالقلق والتوتر على وشه بس محبيتش ابين له ولا لهم انا كمان كنت خايف وحسيت انى اتسرعت بس خلاص معدش فيه فايدة من الهرب وبعدين طبق الورقة وحطها ف الظرف تانى
لاحظت انا وصحابى لما دخلنا الجناح بتاعنا في الفندق أنه مليان كاميرات مراقبة مكنتش حاطط الموضوع ده، ف دماغى كنت فاكر ان من قوانين المسابقة عادى
وضبنا هدومنا ف الدولاب وغيرنا علشان نرتاح كلنا كام ساعة
وقمنا على أربعة العصر اتغدينا تحت ف بوفيه الفندق و طلعنا علشان نلبس ونخرج
قعدنا نلف ف البلد ونشترى شوية حاجات ورجعنا الفندق ع الساعة عشرة ونص بالليل علشان نلاقي مفاجئة مستنيانا
صندوق كبير ع الباب ولما احمد مسكه علشان يفتحه
سمعنا صرخة جايه من حمام الجناح بتاعنا سيبنا احمد قدام الباب وجرينا ناحية مصدر الصوت ولما دخلنا نشوف ايه اللي بيحصل لاقينا إللى مكانش يخطر على بالنا
لاقينا...
يتبع
التحدى_الأخير