الشقه المسكونه الجزء الاول

الشقه_المسكونه  الجزء_الاول
- اتفضل يا استاذ عادل ، ديه مفاتيح الشقه وبكره همر عليك اشوفك لو محتاج اي حاجه
= شكرا جدا يا استاذ مصطفي ..
طبيعه شغلي كمهندس تخليني ادور علي الراحه في اي حته ، انا عادل سليم .. مهندس بترول في الكويت ، نزلت اجازه واضطريت أجر شقه في منطقه بسيطه لاني يومين وراجع ، مبلغ الايجار كان قليل بطريقه مبالغ فيها وتثير الجدل لكن منتبهتش المهم انام واستريح ..
عنيا مكانتش قادره تروح في النوم ، بتأمل الاوضه بكل ركن فيها ، اربعه جدران رماديه تبث الاحباط ، اضاءه خافته مع صوت مفصلات الباب ، بلكونه نظامها قديم علي الشمال وعليها ارقام مش مفهومه ، كان في صوت حركه غريبه ، طلعت كاسر الملل اتحقق في ايه كانت المروحه دايره ، لسا طافيها قبل ما ادخل انام ! ، بشيل الفيشه لمحت اللمبه اللي كانت منوره اتعكست مع اللي كانت مطفيه ، طفيت الانوار خالص ودخلت انام ساحب رجلي مع سيطره من الخوف والقلق ، مجرد ما دخلت الاوضه وقبل ما اخش في احضان السرير سمعت خبط علي البلكونه ، فتحتها ببطء وخوف لقيت بنت واقفه علي سور البلكونه اللي قصادي ، الشعر مغطي وجهها بالكامل باستثناء جزء من عينها اليمين ، بصتلي مع ابتسامه خفيفه حسيتها في حركه الوش ونطت ، وقعت وعيني نازله معاها لحد ما وصلت للارض ، اختفت !! ..
قفلت البلكونه وانا ركبي بتخبط من الرعب ، حطيت وشي في المخده ومرفعتهاش غير تاني يوم بعد ما تدفق النوم في جسمي ، صحيت من اعماق نومي بسبب جرس المنبه المستفز ، قومت اغسل وشي علشان انزل اقابل استاذ مصطفى يفهمني حكايه الشقه ، بفتح الحنفيه بتنزل دم ! ، تليفون استاذ مصطفي مقفول ، اترسم علي وشي ملامح من الغضب من تجاعيد الجبهه ورقم 11 يتوسط الحاجبين ..
مخدتش وقت افكر ولبست وانا نازل خبطت في راجل شكله طيب ساكن في الشقه اللي في وشي
- لو سمحت يا استاذ ....
= محمد ، اسمي محمد
- متعرفش الاقي استاذ مصطفي صاحب الشقه فين ، تليفونه مقفول ولسا مأجر منه الشقه امبارح
= امبارح !! يبني استاذ مصطفي ميت بقاله 3 سنين
تسارعت ضربات قلبي و الدم نشف في عروقي  ، امال انا اتفقت مع مين ، نزلت قعدت علي القهوه اللي جنب البيت ، وعيني بتبص علي الشقه والشقه اللي في وشها ، مين البنت اللي شوفتها امبارح وراحت فين !!
لاحظت وقوف القهوجي بيبصلي باستغراب وبيتأمل حركه صباعي اللي بيرسم دواير في الفراغ
- شااي يباشااا  ؟
= اه .. اه شاي ، بقولك ايه انت شغال هنا بقالك قد ايه ؟
- يااه ده انا بقالي 10 سنين هنا
= تعرف استاذ مصطفي اللي كان ساكن في الخامس؟
- الله يرحمه بقا يباشا
= هو مات ازاي
- عمل حادثه هو وصاحبه اللي ساكن في الشقه اللي في وشه الاستاذ محمد ، وماتوا هما الاتنين
=  .........
اتعدلت علي الكرسي وبوق المايه وقف في زوري ، وشي احمر بشكل مبالغ فيه ، عيني تلقائيا بصت علي الشقه فوق ومعاها تحركت قرانيتي بشكل قوس
- باشاااا يا باشاااا ، هروح اجيب الشاي انت شكلك في حته تانيه خالص
قومت جري وطلعت الم هدومي علشان امشي من هنا ، دخلت الاوضه لقيتها واقفه ، نفس البنت بتاعت السور ، الرعب مليء قلبي وانا شايفها بتتحرك حواليا بسرعه رهيبه والمرعب اكتر لما لقيت رجلها مرفوعه من علي الارض ، وقفت قدامي بالظبط و رقبتها بتنزف بشكل مبالغ فيه ، شعرها نازل علي وشها ملامحها مختفيه تماما ، شاورتلي برعشه في ابهامها علي بلكونه الشقه اللي قصادي ، بصيت ناحيه البلكونه مش لامح حاجه ، رجعت بصيتلها تاني كانت اختفيت ، اتحركت ناحيه البلكونه وضيقت عيني تدقيقا قبل ما يصبني الذهول ، قدرت اشوف كل حاجه ، شوفت ...
" يتبع " ...
ل_حاتم_عشري