تجربة الموت (الجزء الثاني)

تسجيل صوتي 2
فشلي في كل التجارب اللي فاتت كان بسبب إني بختار غلط بس خلاص أنا قربت من النجاح أنا حاسس بكده آخر مرة الجين إشتغل بنسبة 90% بس للأسف الخلايا بدأت تهاجم بعضها من تاني وكان لازم أشوف حل وفي محاولتي التفكير بشكل علمي  إكتشفت إن كل اللي أجريت عليهم تجاربي كانوا رجالة وإن طبيعة تركيب الجسم والهرمونات وطريقة عمل الجسم مختلفة تماماً دا غير إن ألماً الستات أقوي جسدياً وبدنياً من الرجالة بس للأسف مفيش وقت الشرطة بدأت تبحث عني  ونزلوا صوري في الجرايد والأخبار الأغبياء بيقولوا عني مهووس ومجنون وإني قتلت 100 شخص بسبب تجاربي المجنونة  وأيه المشكلة أن 100 شخص يموتوا في سبيل الحصول علي الكمال في سبيل إن البشر يكون ليهم قدرات وقوي خارقة مش بكره هيفهموا لما تجاربي تنجح وهيشكروني بس نظراً لأن الوقت ضيق قررت أجري التجربة الأخيرة علي مراتي دكتورة أمل 
* صوت صراخ في الخلفية *
متخافيش يا عزيزتي هتبقي أحسن بكتير والتجربة هتنجح المرة دي صدقيني إنتي مثالية بشكل مش معقول إنتي أنسب واحدة للتجربة دي جيناتك مثالية معندكيش أي عيوب أو خلل وراثي ولا حتي عندك إستعداد لأي مرض أعضاءك في حالة ممتازة وكمان عندك قدرات عقلية رهيبة
* صوت صرخات مكتومة هقتلك صدقني هقتلك * 
أوعدك أنك هتشكريني بدأت أحقنها بالمادة السائلة بدأت تجري في وريدها كالمعتاد مع صرخات متألمة وعرق غزير  وكالمعتاد غابت عن الوعي .
مش هقدر اوصفلكم الموضوع ممتع إزاي فكرة إنك تجري تجاربك علي بني آدمين تتوغل جوه أجسامهم تشوف كل حاجة شغالة إزاي بصورة دقيقة تسمع صوت صرخات الألم تشوف الخوف والتوسل في عنيهم وتراقب خروج الروح من أجسادهم وكل حاجه بتقف ويبقي قدامك جثة هامدة شعور السيطرة وأنك متحكم في الشخص اللي قدامك ده شعور ممتع وعشان كده هقولكم سر دي مش أول تجربة أعملها أنا بعمل التجارب دي من سنوات  الموضوع في الاول مكنش ليه علاقة بالعلم قد علاقته بالفضول بالمتعة ولو التجربة دي فشلت وقدرت أهرب مش هبطل تجارب أبداً.
بعد 24 ساعة فحصت أمل مرة تانية وأخدت عينة من دمها والغريب إن الجين مكنش ليه أثر والخلايا كانت طبيعية ومفيش أي مشكلة فضلت يومين فاقدة الوعي تماما ومش عارف افوقها تقريبا دخلت في غيبوبة اخدت عينة من دمها وروحت احللها وفوجئت باللي شوفته الجين فعال بنسبة 100% وفجأة النور قطع وكل الأجهزة فصلت جريت علي أوضتها بس ملقتهاش السرير فاضي تماماً وكل حاجة في الأوضة متكسرة لسه هخرج سمعت صوتها بره هو مكنش صوتها اللي اعرفه كان صوت قوي رخيم بتقول بشر  : مش قولتلك هقتلك
أنا مش عارف أهرب حتي لو هربت هتلاقيني بسهولة هي مش أمل اللي أعرفها هي كائن تاني أنا صنعته يقدر يقتلني في ثانية وبدون مجهود أنا هستسلم لقدري نصيحة مني لو حد فيكم شافها يستسلم لقدره لأن الهروب هيقوي عندها غريزة الصيد وساعتها هيبقي القتل أبشع استسلموا لقدركم ...
* صوت صراخات مرتفعة *
#تجربة_الموت

تسجيل صوتي 3
صوت تنفس تقيل مع أصوات خبطات وأدوات معدنية بتقع علي الأرض
صوت أنثوي قوي : ده هيكون آخر تسجيل لينا أيوه أنا لسه عايشة بس بحتضر حصل إنهيار في الخلايا زي كل التجارب ما هو مش طبيعي دكتور فاشل زيه يقدر يخترع حاجة بالقوة دي أكيد بتتسألوا دلوقتي عن مصير دكتور أحمد متقلقوش لسه عايش أصل شخص زيه مينفعش يموت موتة سهلة لازم يجرب كل اللي عمله فينا خليني أنقلكم المشهد كما هو
دكتور أحمد نايم علي سريره الطبي أيديه وقدميه مقيدة بسلاسل ضخمة بدأ يستعيد وعيه ببطء شديد فتح عيونه
*صوت صراخ عالي * إنتي هتعملي إيه
صوت ضحكات  هعمل ايه يادكتور مش المفروض تبقي أذكي من كده اكيد مش هقتلك بالسهولة دي لازم تجرب
* صوت الصراخ مستمر مع محاولاته لفك القيود *
بسخرية متخافش يا عزيزي مش هيصيبك أي اذي انت مثالي للتجربة دي مثالي بشكل مش معقول جيناتك مثالية وعندك إستعداد هايل للتغيير صدقني هتشكرني بعد كده
حقنته السائل في وريده
دكتور أحمد : كنت عارف إن نهايتي هتكون كده ده حصاد اللي زرعته من سنين حقنتني بالسائل وحسيت بألم بيمشي جو وريدي صوت صراخي ملأ المكان مع صوت ضحكاتها المستفزة حاسس بسكاكين وألم في كل جسمي ألم لا يحتمل كنت بصبر نفسي وأقول هفقد الوعي دلوقتي زي كل الحالات بس لقيتها بتضحك بشماتة وبتقول أنا عدلت الجين مش هتفقد وعيك يا عزيزي يعني ألم أكتر وموت بطئ كنت بصرخ من الألم  وبحاول أبان متماسك بس مش قادر جسمي بيتمرد عليا صرخت فيها وقولتلها متفرحيش كده هتموتي ضحكت بشماتة وقالت : ومين مش هيموت بس كفاية إننا هنموت سوا زي ما نفذنا كل الجرايم دي سوا
ساعات متواصلة من الألم للدرجة اللي بتمني الموت الصورة بدأت تغيم بطلت أشوف أي حاجة كل الأصوات بدأت تختفي بدأت أغيب في ظلام دامس بدأت أغرق في الظلام من غير ما أحس وكان آخر حاجة سمعتها صوت طلقات نارية واستسلمت للظلام يبدو إنها النهاية .......
تم العثور علي جثة الطبيب وزوجته بعد إرتكابهم مئات الجرائم في حق الإنسانية ربما لم يكن هذا الطبيب هو الوحيد الذي أستخدم البشر كفئران تجارب ولن يكون الأخير ........
Hadeer_saeed