رواية احببت طباخة 💠الحلقة الاولي💠
الحلقة الاولي (أحببت طباخة )
قبل ما نبدأ الرواية دي هقول حاجة
مش عيب يكون عندك حلم الناس شايفينه مستحيل ..خليك عارف إن ليك رب على كل شئ قدير
إحلم و ادعي في السماء بحلمك ...وإسعى ورا عشان تحققه
سيبك من الأشخاص السلبين الى ممكن يقفو في وش حلمك
متقلقش المستقبل بيد ربنا ..والماضي راح و مش هيرجع ...أما الجاي 😉..عيش كل لحظه فيه لأن ..العمر واحد مفيش غيره
و ده اللي هنعرفه في قصتنا بتحكي عن بنوتة عندها حلم الناس شايفينه تافه و ازاي تحققه قصته مجنونة و جديدة شوية و يا تري البنت دي هتقدر تحقق حلمها ده ولا لا
في مكان راقي جداااا حفلة كبييييرة اوي و فيه بنت زي القمر واقفة مبسوطة اوي بعدها شخص اتكلم و قال : انهاردة يوم تحفة جدا هنكرم احسن شيف و طباخة في مصر و مش بس في مصر لا دي في العالم كمان بنوتة صغيرة جدا بس قدرت بذكاءها و موهبتها تكون شيف كبيرة و عظيمة جدا رحبو معانا بالشيف ( شهد عبد الله )
الناس بتصقف و مبسوطة بيها جدا و شهد كانت لابسة فستان روعة و لونه ازرق و حاطة ميكب جميل و وصلت للشخص اللي بيقول اسمها
بيقولها : اتفضلي يا شهد جائزة احسن شيف ( طباخة )في مصر
شهد : انا مش مصدقة نفسي ميرسي اوي بجد لحضرتك انا فرحانة اوي
_________
في مكان تاني بقا
ملك (اخت شهد الصغيرة ) : شهد .....شهد قومي ايه اللي وقعك من علي السرير كدا
شهد :ااااااه ياني يا ضهري ايه ده ايه في ايه وقعني كدا يا ملك
ملك : معرفش انا لقيتك وقعتي مرة واحدة و صحيتك تقومي
شهد بحزن : ليه يا ملك بتصحيني ليه حرام عليكي ليه
ملك : زعلانة عشان صحيتك من الحلم كنتي بتحلمي بايه بقا
شهد : ياااه يا ملك كان حتة حلم روعة بجد صحيتيني ليه 😢😢😢 نامي نامي بقا عشان وراكي مدرسة الصبح
ملك : طيب هنام
شهد نيمت ملك أختها و قامت من علي السرير
الله اكبر ،،، الله اكبر
اذان الفجر فى اجمل مدينة فى الدنيا اسكندرية بلد جميلة ليها جمال خاص فيها كل حاجة مميزة بحرها و هواها فعلا هي عروسة البحر المتوسط
احداث قصتنا في منطقة عادية ممكن نقول ناس حالتهم المادية متوسطة فى الدور الرابع
بعد ما شهد نيمت ملك أختها البلكونة بتتفتح وواقفة بطلتنا (شهد) بتبص على السما و شعرها مفرود و بيطير بتستمع بالهوا وهى بتدعى ربنا ربنا و بعدها دخلت الحمام اتوضت و صلت الفجر بعد ما خلصت صلاتها شهد عادتها كده انها تدعى و هى باصة للسما وتخلص شهد صلاة مامتها تدخل
تعالو نتعرف على بطلة الرواية
(شهد بنت مخلصة ثانوية عامة و داخلة كلية اعلام انجلش عندها 18 سنة ليها اخت اسمها ملك في أولى ابتدائي بابها وماتها ربوها على التواضع و الاعتماد على النفس بيحبوها جدا و بيعتبروها صاحبتهم بييثقوا فيها جدا وهى قد الثقة دى بتحب باباها و مامتها و ملك و شيماء صاحبتها الانتيم هنتعرف عليها شوية كدا و كل الناس بتحبها جدا
شهد بتحب الطبخ و المطبخ جدا و نفسها تشتغل شيف بس طبعا مجرد حلم محدش هيرضي و هيتريقو عليها لأنها بنت و كمان داخلة كلية عالية بس الطبخ عندها هواية بتعرف تعمل اكلات من جميع البلاد سوري و هندي و ايطالي و .....)
الام ( امل): صباح الفل يا شهد بحسبك لسه نايمة
(امل ست بيت اغلي ناس عندها شهد و ملك و باباهم بتهتم ببيتها وبناتها و بتحب شيماء زي بنتها برضو )
شهد :تجرى عليها و تبوس راسها و ايدها :صباح الفل يا نبع الحنان يا ست الكل انام ايه يا امولة بس انا قمت من بدرى اتوضيت وصليت و هفطر كمان
امل: ربنا يتقبل منك يا حبيبتى هروح احضرلك الفطار
شهد :لا يا امولة خليكي هحضره انا صحيح هنروح انا و شيمو انهاردة عشان نقدم في الكلية
امل:ماشي يا حبيبتي ربنا معاكو يارب
شهد:و يخليكي ليا يا امي يارب عيب لما تحضريلي الفطار انتي ناسية قدرات بنتك ولا ايه عايزة الناس تقول بنت امل مبتعرفش تطبخ ولا ايه
امل : ههههههه لا طبعا ده كلو الا اكلك يا شوشو هو فيه زيه
يدخل الاب (والد شهد ) (عبد الله ) راجل محترم و طيب جدا و بيعرف الشخص اللي قدامه كويس و بيحب امل و شهد و ملك جدا هما اغلي حاجة في حياته بيتشغل موظف في البنك محاسب
عبد الله (بابا شهد ): وهو انتي فاكرة أنها بنتك لوحدك يعني
تبتسم شهد و تجري عليه و تحضنه : حبيبي يا بابا لا طبعا ده انت اللي في القلب يا حبيبي من وانا بيبي لسة قد كدا
امل : يا بكاشة انتي 👊
شهد :ههههههه حبايبي ربنا يخليكو ليا يارب اما اتصل علي البت شيمو اصحيها
امل : انتي مغلبة البت دي معاكي والله
شهد : هروح احضرلكو الفطار
تخرج شهد و تتصل علي صاحبتها شيماء
(شهد متعودة تصحيها كل يوم تصلي الفجر ) تعالو نتعرف علي شيماء
شيماء دي بنوتة عسولة عينيها بني شعرها بني و طويل و بيضة و قصيرة صاحبة شهد من الطفولة بيحبو بعض جدا و هي صاحبتها بجد و بتخاف عليها هما مش صحاب هما اخوات بجد و متربيين سوا و دخلو كلية واحدة شيماء مستواها المادي اعلي من شهد باباها متوفي و عايشة مع مامتها و مامتها بتحبها جدا )
شيماء كنسلت علي شهد و شهد فهمت أنها صحيت و هتصلي و تكلمها
شهد دخلت المطبخ تحضر الفطار و في خلال نص ساعة كان الفطار جاهز بتحطه علي السفرة و صحت اختها ملك و ندهت مامتها و باباها يفطرو معاها و هما بيفطرو بيتكلمو
باباها :هتروحي انهاردة يا شهد الجامعة انتي و شيماء صح
شهد بفرحة: اه يا بابا هنروح نقدم ورقنا
باباها :تحبي اروح معاكي
شهد:لا يا بابا متتعبش نفسك حضرتك روح الشغل و انا لو في حاجة هكلم حضرتك اقولك
باباها: ماشي يا حبيبتي ربنا معاكي يارب و يوفقك في اللي جاي
مامتها: خلي بالك من نفسك يا حبيبتي و ربنا معاكي و يوقفلك ولاد الحلال يارب
شهد :يارب يا امي ادعيلي
ملك: بابا انا عايزة اكبر زي شهد و اروح الجامعة
شهد و مامتها و باباها بيضحكو
باباها: بس كدا حاضر يا حبيبتي كلها 12 سنة و تكوني زيها
شهد: ياريت ارجع طفلة زيك يا ملوكة
ملك:لا انا عايزة اكبر زيك ماليش دعوة 😡
نسيب دول يكملو فطار و نروح مكان تاني خالص
_____________
في فيلا و مكان راقي جدا و واضح من روعة المكان ان مستواهم المادي عالي في مدينة الإسكندرية في فيلا شاهر الحناوي
تدخل بنوتة عندها 18 سنة لاخوها تصحيه
ريماس:زياد ....يا زيااااد
يوووه بقا اصحى
زياد: اممممممم سيبني انام يا زفتة
ريماس : يا زياد قوم بقا هنتاخر
زياد لسة نايم و حط المخدة علي راسه و نام
ريماس : طيب انا عارفة ايه اللي هيصحيك
ريماس فتحت الثلاجة جابت منها زجاجة مياه تلج جدا و رشتها علي زياد
زياد قام من النوم مفزوع و بيتمطع :الله يخربيتك يا شيخة ايه اللي عملتيه ده
ريماس بتضحك: انا عملت ايه يعني ده يا دوب رشيت عليك ماية بس و بعدين انت كسول مش بتصحي الا بكدا و كمان يا أبيه وفرت عليك غسيل وشك
زياد بعصبية:كدا طيب انا هعملك ازاي تعملي كدا تاني تعالي بقا
و قام جري ورا ريماس و مسك دراعها جامد
ريماس : خلاص ولله خلاص مش هعمل كدا تاني انا اسفة ولله اسفة سيب ايدي بتوجع ولله
زياد ساب ايديها
زياد بنرفزة:حد يصحي حد كدا يا شيخة حرام عليكي
ريماس بتضحك :اعملك ايه يعني انت ناسي انك رايح تقدملي انهاردة في الجامعة كمان ساعتين
زياد : تقومي تصحيني بدري لسة ساعتين حرام عليكي
ريماس: عشان تفطر يا بيبي و كمان مازن تحت ييفطر و قالي اطلع اصحيك يلا بقا فوق كدا و انزل
زياد: منك لله يا مازن الكلب بيفطر تحت و باعتك ليا حاضر يا سوسو هقوم اطلعي عشان اغير هدومي
ريماس : حاضر يا بيبي يلا انا نازلة و متتاخرش
تعالو نتعرف عليهم :
الاب : شاهر : مهندس عنده شركة كبيرة و بيحب شغله جداااااا و أولاده جدا
الام : رباب :عندها اتيليه فساتين و مهتمة بالازياء و الفاشون جداااا و خروجات أصحابها و مش بتههم ب زياد و ريماس خالص ولا تعرف عنهم حاجة
زياد :شاب عنده 25 سنة متخرج من كلية هندسة بيتشغل مدير في شركة باباه نشيط في شغله جدا و بيحب رانيا جدا و بيخاف عليها
و هو عنده عضلات و وسيم جداا عينيه لونها رصاصي و عنده دقن خفيفة
ريماس :18 سنة اخت زياد الصغيرة بتحبه جدا و دلوعة شوية و دمها خفيف و بتحب الناس جدا و متواضعة عيونها بني و شعرها بني و طويل و بيضة أمورة جدا
دادة فاطمة : دي مربية زياد و ريماس و بيحبوها كأنها مامتهم الحقيقة و هي طيبة جدا و حنينة عليهم اكتر من مامتهم
__________
قام زياد من السرير و دخل الحمام اخد شاور و غير هدومه و نزل يفطر معاهم
زياد:صباح الخير يا بابا صباح الخير يا ماما
مازن(ابن خالة زياد و قده في السن متخرج من كلية اعلام بيتشغل مخرج في التليفزيون باباه و مامته متوفيين و عايش في الفيلا لوحده): صباح الخير يا معلم
شاهر: صباح الخير أخبار الشغل ايه يا زياد
رباب بنرفزة:شاهر فى مكتب تتكلموا فيه بخصوص الشغل لكن دلوقتى احنا بنفطر
شاهر:خلاص انا قايم
رباب :لا كمل اكلك الاول
زياد:بابا انا هتاخر انهاردة ع الشركة عشان هوصل ريماس و اروح اقدملها في الجامعة
شاهر: ماشي يا حبيبي
ريماس: بابا فين العربية اللي وعدتني بيها لما اروح الجامعة
رباب : انتي لسة صغيرة عربية ايه دلوقتي
شاهر :حاضر يا حبيبتي هجبهالك قريب و غمزلها
ريماس قامت باست باباها و حضنته : يخليك ليا يا بابتي يا حبيبي يا اسطا
رباب : ايه الطريقة السواقين اللي بتتكلمي بيها دي
مازن و زياد كاتمين ضحكتهم
ريماس :حاضر يا ماما مش هتكلم كدا تاني
رباب:اسمي مامي مش مانا
ريماس:حاضر يا امة قصدي يا مامي
زياد بص ل مازن: هقوم البس عشان تودينا الجامعة عشان عربيتي عند الميكانيكي هجبها وانا راجع كمل فطارك لحد ما انزل
مازن: لا انا شبعت ريمو ممكن تجيبيلي قهوة انا هقعد برة في الجنينة
ريماس: حاضر
زياد طلع فوق اوضته عشان يغير هدومه و مامته بتتفرج علي أحدث صيحات الموضة في المجلات و باباه خرج عشان يروح الشغل
و ريماس عملت القهوة و بطلعها ل مازن في الجنينة
_________
ريماس: اتفضل يا مازن القهوة
مازن:ميرسي يا ريمو تعبتك معايا
ريماس:اخبار شغلك ايه
مازن :تمام الحمد لله
خلاص كبرتي يا ريمو و هتدخلي جامعة بقا
ريماس بتضحك:و هنطلق بقا يا عم
مازن:أيوة بقا عارفة لو عملتي حاجة في الجامعة ولا كلمتي حد هعرف مش معني ان احنا مش معاكي ان اخبارك مش هتوصلنا
ريماس :متخافش مش هعمل حاجة هفضل زي م انا
مازن تليفونه رن :ثواني هرد عالفون يا ريمو
مازن:ايه يا رانيا
(رانيا معدة البرامج اللي بيخرجها مازن ): سوري يا مستر مازن اتصلت بيك بدري بس الأستاذة مي اللي هتقدم البرنامج الجديد عايزة تستضيف بنتين بدل 3 بتقول عشان وقت البرنامج و كدا
مازن بعصبية:هي مالها هي انا اختارت البنات و خلاص هي مالهاش دعوة ولا هي عايزة تتكلم كتير وخلاص انا اصلا مش برتاحلها المذيعة دي
رانيا:طب حضرتك اقولها انك مش موافق
مازن:قوليلها احنا جبنا البنات و اتفقنا معاهم هي بقا مالهاش دعوة يلا هكلمك بعدين يا رانيا
رانيا :سلام يا مستر مازن
و قفلت معاه
ريماس :عسولة اوي رانيا دي
مازن بصلها باستغراب: اه جدعة و هي اللي شايلة حاجات كتير عني
ريماس :اممممممم هي مرتبطة علي كدا
مازن:لا لسة بتسالي ليه
ريماس: ها.... لا ولا حاجة عادي
__________
في بيت شهد
شهد: ماما بابا انا نازلة رايحة ل شيماء اشوفها لبست ولا لسة
امل : طيب يا حبيبتي خدتي ورقك كلو
باباها:ماشي يا حبيبتي
شهد :اه يا ماما سلام دلوقتي اراكي ظهرا خرجت شهد و باست باباها و مامتها و قفلت باب الشقة و نزلت جري علي العمارة اللي قصادها بالتحديد في الدور الرابع و دي بقا شقة صاحبتها و حبيبتها شيماء
___________
في بيت شيماء
شيماء:امي يا امي يا ماما يا حاجة يا ست الكل يا امه
وفاء بعصبية:اييييييييه صدعتي امك و اللي جابوها
شيماء:بتزعقيلي ليه ده انا حتي داخلة كلية حلوة
وفاء:يعني انتي داخلاها ليا ما هو ليكي يا بنت الموكوسة
شيماء:ماشي يا موكوسة قصدي يا ماما
وفاء:عايزة ايه
شيماء :عايزة اخرج
وفاء:مفيش خروج
شيماء:شهد عايزة تخرج معايا بعد ما نروح نقدم في الكلية
وفاء :طالما شهد معاكي اخرجي
شيماء: ماما هو انتي امها ولا امي انا
وفاء :امكو انتو الاتنين دي اكتر من اختك اصلا لازم أحبها و بثق فيها زيك ده انا اللي مربياها اصلا
شيماء :انتي مش امي انتي اكيد امها و متبنياني
وفاء:طيب روحي البسي عشان متتاخريش و بطلي تنتيش في البطاطس
شيماء :حاضر هلبس و اجي اكل
وفاء:اومال لما تخرجي هتعملي ايه
شيماء بتضحك:هاكل برضو
وفاء :يارب صبرني بتاكل و مبيبنش عليها ده انتي قربتي تختفي يا بت
شيماء:يا نبع الحنان يا ست الكل انا بخبي عشان الحسد بس
جرس الشقة بيرن
ترن ترن ترن
شيماء :افتحي الباب يا ماما
مامتها (وفاء ):انا في المطبخ افتحي انتي
شيماء بتبص لاخوها الصغير (كريم ) في أولي ابتداءي:وانت يا قرد ما تفتح
كريم:هو كل حاجة كريم كريم اووف
شيماء بتفتح الباب و تظهر شيماء و هي عاملة زي ابلة نظيرة و رابطة طرحة علي شعرها و هدومها مش متظبطة شكلها كوميدي جدا
شهد: خير اللههم أجعله خير حرام عليكي يا شيخة ليه بتعملي فيا كدا خضتيني
شيماء بنرفزة:حد يصحي حد الفجر حرام عليكي
شهد بتضحك:الحق عليا بصحيكي تصلي يا كسولة عشان تدخلي الجنة
شيماء :هو اللي يعرفك يطول جنة
كان نفسي انام منك لله يا شيخة يخرييت معرفتك
شهد:بتقولي ايه
شيماء: شيبسي و كراتيه
شهد بتضحك:مش هقول ايه تاني
ادخلي البسي طيب علي كل اشوف فوفا (مامت شيماء )
شهد:يا فوفا انتي فين
وفاء :انا في المطبخ يا دودو تعالي
شهد:حبيب قلبي القمر بتاعنا وحشتيني
وفاء بتضحك: يلا يا بكاشة
عاملة ايه
شهد :الحمدلله
شهد :ازيك يا فوفا
وفاء:ازيك يا دودو ادخلي يا حبيبتي
شهد :الحمدلله يا فوفا
وفاء:مبروك يا دودو أخيرا هشوفكو في كلية واحدة ولله و كبرته
شهد:الله يبارك فيكي يا فوفا دي بركات دعواتك انتي و امي ولله
بعد ربع ساعة كانت شيماء جهزت و خرجت ليهم و كانت وفاء بتحط الاكل هي شهد علي السفرة و ندهت شهد علي كريم ياكل
شهد :انتي لحقتي تلبسي
شيماء :اومال بطيئة زيك
شهد :انا برضو يا بت اللي بطيئة
وفاء:نسيت اعملك حاجة تشربيها يا دودو
شهد:لا شكرا يا طنط انا هقوم اعمل لنفسي
شيماء :وانا اقول البت دي بقت مؤدبة ازاي
وفاء : زي السكر في الشاي
شيماء:بس يا فوفا متخليناش نخسر بعض انتي قاعدة ليه اصلا
وفاء:يعني اقوم يرضيكي يا دودو
شهد :انا جاية عشان فوفا اصلا
كريم:بس بقا اسكتو عايز اكل
كلهم ضحكو و بدؤ ياكلو
وفاء :واد يا كريم انزل هاتلي قبل ما تنزل طلبات من السوبر ماركت
كريم: ايدك علي 5 جنيه تمن المشوار
وفاء :5 جنيه ليه يا يلا ايه تكون انت كمان بتغلي مع الدولار
كلهم ضحكو و نزل كريم يجيب الطلبات
و بعدها الجرس بيرن
وفاء :قومي افتحي يا شهد انتي اقرب عشان بنت الموكوسة دي مش هتفتح
شيماء:لا استني انا هقوم افتح
وفاء :صبرني يا ربي
فتحت شيماء الباب
لقت إبراهيم
تعالو نتعرف علي إبراهيم
(إبراهيم ده بيشتغل محاسب في بنك خريج تجارة انجلش عنده 25 سنة و وسيم جدا عيونه عسلي و شعره بني )
ابراهيم :صباح الخير
شيماء واقفة متنحة مش عارفة ترد من الفرحة :مساء النور
إبراهيم بيضحك :هههههه بقولك صباح الخير تقولي مساء الخير
شيماء اتكسفت :اهو اي بتنجان وخلاص
إبراهيم كان جايب بوكيه ورد احمر :الورد ده ليكي اتفضليه بمناسبة نجاحك و انك هتدخلي الجامعة خلاص
شيماء :ها. ... ليا انا بجد
وفاء: مين اللي حماته بتحبه ده ... مين يا شوشو
إبراهيم بصوت واطي: هي فعلا بتحبني اوي
شيماء : ها .... ده ده إبراهيم يا ماما
وفاء :اتفضل يا هيما
إبراهيم دخل :ازيك يا طنط
وفاء:ازيك يا حبيبي اتفضل اقعد
ابراهيم: صباح الخير ازيك يا شهد
شهد :ازيك يا إبراهيم اخبارك ايه
إبراهيم بص لشيماء و ضحك:تمام عشان شوفتكو
وفاء:عشان شوفت مين ب الظبط
إبراهيم :ها...عشان شوفتكو كلكو ولله يا طنط
وفاء:مبحبش طنط دي ..قولي يا فوفا
ابراهيم:ماشي يا فوفا.... انا قولت اجي ادي ل شيماء بوكيه الورد ده بمناسبة دخولها الجامعة خلاص
وفاء:ربنا يخليك يا حببيي كلفت نفسك ليه
شهد بصت لشيماء و غمزتلها و ضحكو :طيب اقعد افطر معانا بقا
ابراهيم:لا متشكر انا جيت اشوفكم و ماشي
وفاء:لا اقعد يا هيما تلاقيك لسة مكلتش
ابراهيم:مش هتعزمي عليا يا شيمو
شيماء متنحة راحت شهد قرصتها
شيماء :اااه ها ..... اه اه افطر معانا
نسيب دول يفطرو
_______
عند فيلا زياد
كان زياد خلص كل حاجة و لبس وخرج من اوضته و نزل ل ريماس و مازن في حديقة الفيلا
وهو واقف معاهم تليفونه بعد عنهم و رد على الفون
زياد:أيوة يا ميار
ميار (ميار دي بنت صاحبة مامته بتحبه جدا لكن زياد مش بيحبها و مامته عايزة تجوزهاله و هي تافهة شوية زي مامته كدا هي عندها 23 سنة متخرجة من كلية السن)
ميار :ده رد برضو يا زيزو
زياد بعصبية:قولتلك اسمي زياد مش زيزو
ميار:كدا برضو يا زياد يعني الحق عليا اني بدلعك
زياد ببرود: ميار بصي لغاية دلوقتي مفيش اي حاجة رسمية بيني و بينك عشان تتكلمي معايا كدا وانا بصراحة مش فاضي للتفاهة و الدلع ده
ميار:طيب خلاص يا زياد انا اسفة و غلطانة اني اتصلت بيك
زياد : ميار انتي مش صغيرة وعارفة طبيعة شغلي و اني مش فاضي للهبل ده
ميار :طيب يا زياد فهمت خلاص
زياد:ماشي سلام دلوقتي
بعدها راح زياد ناحية ريماس و مازن قالهم يلا عشان منتاخرش
___________
عند شيماء و شهد خلصو فطار و كريم راح المدرسة و ابراهيم نزل شغله و شهد و شيماء نزلو يركبو عشان يروحو الجامعة
________
مازن جهز العربية و زياد و ريماس ركبو معاه و هما في الطريق
زياد :حاااااااااااسب يا مازن حاسب
مازن اتصدم لما شاف .................
استوووب
التعليقات على الموضوع