لعنة المرايا (الجزء السابع و الاخير)

لعنة_المرايا
الجزء_السابع والأخير 😃
خرجنا كلنا رايحين لدكتور سالم، طول  الطريق ساكتين تماماً  ، كل واحد  دماغه مليانة دوشة وحيرة ومش فاهمين هنطلع من المأزق ده إزاي،  وصلنا البيت كان دكتور سالم واقف قدام بيت ندي مستني 
أدهم:  خير يا دكتور لقيت أيه؟! 
الدكتور سالم:  نقعد الأول ونتكلم
دخلنا البيت وبدأنا نتناقش
دكتور سالم:  انا لقيت كتاب تاريخي بيتكلم عن المراية بيحكي قصتها وقصة الساحرات  وازاي بدأ  الأمر،  بيقول ان الأمر بدأ بأم بنتها ماتت إتجننت من حزنها ولجأت للسحر كان نفسها تشوف بنتها جداً  ، كانت مستعدة تعمل اي حاجه عشان تشوفها لجأت للسحر الأسود وعملت تعويذة عشان تشوف صورة بنتها في المراية بس عشان التعويذة تكمل كان لازم قربان  يتقدم للشيطان، وهي قدمت قربانها إن كل بنت من نسلها هتكون مسئولة عن خدمة المراية طول حياتها لحد ما ينتهي نسلها
طارق: عشان  كده انا متأثرتش من السحر
الدكتور سالم:  بالظبط،  انت كنت من نسل الذكور بس قربانها  كان علي كل بنات نسلها وفضلت المراية تتنقل بين الساحرات لحد ما وصلت لندي
الشيخ لقمان:  بس أنا مش فاهم  ، ايه الفايدة من إنتقال المراية من جيل لجيل ؟! 
الدكتور سالم: اللي فهمته من الكتاب، ان كل ساحرة إستخدمت المراية عشان  تخلي الناس يشوفوا أرواح اقاربهم اللي ماتوا واي روح ظهرت في المراية  اتحبست جواها للأبد
أدهم:  يعني حاجه زي حصاد الارواح كده صح؟! 
الدكتور سالم:  أيوه بالظبط،  والطقوس اللي الساحرات  بيعملوها يوم اكتمال القمر تعتبر  تجديد لعهد اسرتهم مع الشيطان
ندي:  أنا مفهمتش انا اتخلص من اللعنة ازاي دلوقتي، خلاص فاضل ساعات  علي منتصف الليل وبعدها مش هنعرف نعمل اي حاجه 
الدكتور  سالم:  بصراحة  طريقة التخلص من اللعنه مش واضحة اوي في الكتاب هو المفروض عشان اللعنة تنتهي لازم الأرواح تتحرر وانا مش عارف ممكن نحررها ازاي من غير  ما نكسر المراية
أدهم: كده الحل في مذاكرات جدتك، احنا لازم نقراها
فتحنا المذكرات اللي مكنتش مكتوبة بالعربي طبعا
أدهم:  دي مكتوبة  بالهندي، ومحتاجه وقت تترجم هنعمل ايه
ندي: انا بعرف اقرأ هندي
الشيخ لقمان:  مستنية أيه إبدأي
ندي
1-october
انا تعبانة ومش كويسة أبداً، الكوابيس مش بتخليني أنام الظلال اللي بشوفها في كل حته  وأمي اللي بتظهر في كل أحلامي، دكتوري النفسي طلب مني أكتب يومياتي عشان ده هيساعدني في العلاج
5-october
كتابة اليوميات دي حاجه في منتهي الملل قررت اني مش هكتب غير الأحداث المهمة،  إمبارح صحيت لقيت نفسي واقفة قدام  المراية وببص لحد شبهي  في المراية بس مش أنا ملامحها  شريرة ومخيفة
20-october
انا حالتي بتتحول للأسوأ الكوابيس بقت أصعب، ابني بيخاف مني جوزي بيطمني ان كل حاجه هتبقي تمام، بس انا عارفة انه بيكدب وضعي بيبقي أسوأ من الأول، انا قربت اتجنن،  بدأت أسمع أصوات بتتردد حواليا في مكان
5 november
جوزي  شال المراية ونزلها البدروم لانه صحي من يومين شافني واقفة قدامها  طول الليل  بيحلف ان انعكاسي في المراية كانت تعابير وشه مختلفة عني،  النهاردة صحيت  لقيتني واقفة في البدروم قدام المراية  ، انا سامعه اصوات جاية من تحت المراية بتناديلي، انا رايحة  ....
15 december
بطلت اكتب يومياتي بقالي كتير  بصراحة بفقد الوعي بالساعات ومش عارفة بصحي امتي وبنام امتي ابني خايف مني وبقي بيقفل اوضته عليه بيقول انه بيشوفني بتمشي طول الليل في البيت، بيقول  انه بيسمعني بكلم ناس في البدروم وانه كمان بيسمعهم بيردوا عليا، انا حاسة اني فقدت السيطرة علي نفسي تماماً  ، سامعة صوت المراية بتنادي  ، حضورهم أقوي مرة النهاردة  القمر مكتمل وكنت ناوية  اعوض  ابني وجوزي بسهرة في جنينة البيت بس مش عارفة  ليه عندي احساي قوي اني عايزة انزل للمراية دلوقتي، انا هنزل  واكمل بعدين
14 march
ابني ساب البيت وبطل يكلمني، فقدت السيطرة  علي نفسي تماما انا مش عارفة  ايه اللي بيحصل بس انا  خايفة من نفسي  ومحتاجة مساعدة، انا فوقت امبارح بعد ما قتلت قطة الجيران  ورسمت بدمها اشكال غريبة، بس انا بصراحة مبسوطة القتل ليه لذه غريبة اندفاع الادرنالين في جسمك وانت بتقتل ضحيتك وبتشوفها بتتألم قدامك ممتع
تفتكروا لو جربت القتل تاني هيبقي بنفس المتعه.......
17 july
فات ٧ سنين طارق إتجوز وبقي عنده ندي، انا بحلم بيها احلام  سيئة جدا،  ندي هي وريثتي هي اللي هتخدم المراية  بعدي، بس انا بحبها ومش عايزاها تتأذي زيي، انا لازم أدور علي طريقة  تنقذها مش لازم يحصلها زيي
14 october
بقالي ٣ سنين  بدور في كل كتب السحر عشان  انقذها واللي لقيته هيأذيها أكتر، بس لازم حد يضحي عشان اللعنة تنتهي،
ندي حفيدتي انتي هتلاقي المذكرات دي في يوم من الايام ولما تلاقيها اعرفي انك عشان  تتخلصي من اللعنه لازم..................
أدهم:   سكتي ليه
ندى بقلق:  خلاص عرفت الحل
دكتور سالم:  أيه الحل
ندي: اول ما تبدأ الطقوس في إكتمال القمر لازم حد فيكم ياخد المراية ويغرقها في مكان  فيه مايه
الشيخ لقمان:  هنجيب  المكان اللي فيه مايه ده منين
طارق:  في بحر  قريب من هنا لازم نروح هناك قبل الغروب
ندي:  لو سمحت يا شيخ لقمان  انا عايزة حضرتك بره شوية ممكن؟! 
طارق:  ليه؟! 
ندي:  مفيش يابابا عايزة أساله علي حاجه  احصن بيها نفسي
خرجت ندي مع الشيخ لقمان وفضلوا يتكلموا شوية  ولما رجعوا كان شكلهم متغير  تماماً  ندي حزينة بشكل غريب ده مش شكل واحدة لقينا حل لمشكلتها حتي الشيخ لقمان  كان باين عليه الضيق والقلق والغريب  اكتر انه استأذن وسابنا ومشي وقال عنده  حاجه  مهمة هيعملها  ويرجع  او هيروحلنا علي المكان المهم نبعتله اللوكيشن
خرجنا في طريقنا للمكان اللي طارق  قال عليه وصلنا  كان المكان غريب لوحده  ارض واسعة جداً  وآخرها بحر او بمعني اصح فرع للنيل بس كان عميق وكبير  وكله دوامات وموجه سريع وأرض زراعية حوالينا في كل مكان
ندي خرجت من العربية وفي إيديها المراية، خرجت دفتر المذاكرات وبدأت ترسم أشكال ورموز علي الارض  بمادة لونها  ابيض اشبه للجير طلعت شموع وحطتها حوالينا  الدايرة اللي رسمت في وسطها نجمة داوود وحطت المراية  في النص وبصت ناحيتنا وابتسمت بحزن
طارق: كل حاجه هتبقي كويسة متقلقيش
ندي جريت علي ابوها وحضنته وبدأت نوبة من البكاء  ولما انتهت بصت ناحيتي أنا ودكتور سالم وقالت:  شكراً  إنكم حاولتوا تساعدوني  مش هنسي أبدا  وقفتكم معايا
أدهم:  شكراً  علي أيه، وبعدين كل حاجه هتتصلح صدقيني هتبقي  كويسه
ضحكت بسخرية وقالت طبعا أكيد
كان وقتها القمر  ظهر في السماء  بدأ انعكاسه يظهر في المراية،  المراية نورت وبدأ يخرج منها  أصوات وتراتيل  ندي بصت ناحيتنا بحزن وكأنها بتودعنا وقعدت قصاد المراية وغمضت عنيها،  بدأت الاصوات تعلي وبدأ يخرج منها خيالات للستات اللي شوفناها قبل كده والوشم المميز اللي علي كتفهم بدأوا يلفوا حوالين ندي في انتظام مخيف ندي بدأت ترتفع عن الأرض لفوق نايمة جسمها مفرود شعرها واصل للأرض، ضوء القمر معكوس علي وشها  زي الرسمة  اللي شوفناها علي الصندوق الغريب ان بدأ يخرج ضوء من المراية  واصل  لكتف ندي كنت قادر اسمع صوت إحتراق جلدها من الضوء
الدكتور  سالم قال ان المراية بترسملها الوشم
قال لو الرسم  اكتمل مش هنعرف نعمل حاجه  قربت بسرعة  ناحية  المراية  عشان  اخدها اغرقها زي ما اتفقنا بس اللي حصل اول ما رجلي لمست الدايره اتحدفت بعيد، كل الساحرات بصوا ناحيتي وبدأوا يصرخوا بهستيريا قربوا ناحيتي غمضت  عيني واستعديت للكارثة اللي هتحصل في اللحظة دي سمعت صوت الشيخ  لقمان بيلقي تعاويذ غريبة،  مفهمتش بيقول ايه بس فهمت ان اغضب الساحرات  جداً  وكل اللي حصل وقتها ان في برق ورعد بدأوا ومطر إسود تقيل أصوات صرخات من المراية ومن الساحرات
لفيت أشوف ندي مكنتش موجودة ولا حتي المراية  بدات  ادور عليها شوفتها  شايلة  المراية ونازله بيها المايه،  جريت وراها  أسالها بتعمل ايه
بصت ناحيتي وقالت:  جدتي قالت عشان  اللعنه تقف انا لازم  اموت، المراية بدأت بتضحية ولازم تخلص بتضحية ولازم الارواح  اللي في المراية  تتحرر،  اشكرك يا حضرة الكاتب العظيم دلوقتي بقي عندك  قصة جديدة تكتبها الوداع
رمت نفسها في المايه قصاد عيني وانا مش عارف  اعمل ايه او انقذها  ازاي اول ما وقعت سمعت صراخات من جوه المايه كنت قادر اشوف الارواح وهي بتخرج من المراية جريت ونطيت في المايه وراها، خرجتها  بس كان قلبها توقف خلاص  بدأت اضغط علي قلبها بقوة عشان تتنفس وحاولت اعملها تنفس صناعي بس هي كانت خلاص، مفيش أمل كل الارواح انسحبت وحصل انفجار  في الماية وسمعت صوت انكسار  المراية، المطر وقف والاصوات،  كلهم جريوا ناحيتي يطمنوا علي ندي، لسه بقولهم انها خلاص ماتت الشيخ لقمان قرب  منها وبدأ يلقي تعاويذه ويضغط علي قلبها الغريب  انها فاقت فعلا
طارق خدها المستشفي  هو ودكتور سالم وانا مشيت  انا والشيخ  لقمان
أدهم:  هو ايه اللي حصل انا مش فاهم حاجه
الشيخ لقمان بإبتسامة:   أنا هحكيلك ندي قرأت في اليوميات ان عشان اللعنة تقف لازم تضحية لازم هي تموت وقالتلي انها عايزاني  ابعد الساحرات  وقت تحضير الطقوس عشان  تقدر تهرب بالمراية كنوع من الإلهاء يعني، لما مشيت كنت بدور علي تعويذة قوية تخليهم يبعدوا عن المراية ولقيتها
ادهم: يعني ايه ندي مماتتش معني  كده ان اللعنة لسه مستمرة
ضحك الشيخ لقمان وقال:  ليه يا بني هي مش ماتت واحنا لسه مفوقنها، هي ضحت بنفسها فعلاً  وتضحيتها اتقبلت والمراية اتكسرت  خلاص الامر انتهي.....
عدت سنة علي الحادثة دي وكتبت روايتي الجديدة وزي ما توقعت كسرت الدنيا وبدأت تجيلي حالات كتير عايزين  مساعدة بس انا قررت اني مش هكتب غير  المختلف، انا وندي اصحاب جدا دلوقتي وساعدتني كتير  في كتابة تفاصيل روايتي، حياتي  كانت لطيفة وطبيعية لحد المكالمة دي مش هقدر اقولكم تفاصيل  بس شكلي هكتب  رواية جديدة قريب دعواتكم  ........
تمت.....
Hadeer_saeed