لعنة المرايا (الجزء السادس)

لعنة_المرايا
الجزء_السادس
فتحت ندي الصندوق وإحنا مش عارفين أيه اللي بيحصل، ولا ايه اللي جواه، الصندوق  كان شكله قديم جدا خشبي مرسوم عليه  نقوش بلغات مختلفة، زي اللغات القديمة اللي بنشوفها في المتاحف، رسومات لمشهد غريب جدا قمر وتحته مجموعة من الستات علي كتفهم وشم معين شايلين بنت جميلة ومتجهين بيها ناحية مراية ضخمة، أكيد كلكم فاهمين معني  المشهد ده
بصيت ناحية ندي اللي بدأت تطلع محتويات الصندوق واللي كانت عبارة عن كتاب قديم
سألتها:  أيه ده وأيه علاقته بحل اللغز؟!
ندي: زي ما انت شايف  كتاب قديم معرفش علاقته بيا أيه
الشيخ  لقمان:  طب ازاي عرفتي  مكانه وازاي جبتي مفتاح الصندوق؟!
ندي:  هحكيلكم بس ممكن نطلع فوق عند أهلي، انا لازم افهم شوية حاجات
طلعنا عند أهل  ندي اللي كان واضح عليهم الخضة وقالوا لندي انهم كانوا محضرين نفسهم عشان يقعدوا معاها  ويفهموا بتمر بأيه
بدأت ندي تحكيلهم كل حاجه من الاول، الام كان باين عليها  عدم التصديق نهائي، بس الأب كان ظاهر علي وشه تعبيرات غريبة مش فاهمها كأنه كان عارف  أيه  اللي بيحصل
هنا سألها الشيخ لقمان عن سر الصندوق والكتاب.
قالت:  أنا كل مرة بتحصلي الحالة اللي بكون غايبة فيها عن الوعي بحلم حلم مبعرفش  أفسره او مبعرفش بحلمه ليه، عشان كده مبحسش باللي بعمله ولما بفوق مبفهمش انا حلمت بأيه وليه، المرة دي حلمت بجدتي حلمت انها كانت في اوضتها القديمة اللي في بيتنا واني كنت هنا برده صحيت من النوم عشان أشرب شوفتها  نازله تحت نزلت وراها،  كانت ماشية بخطوات ثابته وتقيلة، فتحت باب الشقة ودخلت، كانت مخبية قطة في قفص خرجتها  وربطتها من رجليها وعلقتها في السقف جنب كل الحيوانات اللي شوفتوها تحت، قطعت رقبتها وسابت دمها يتصفي في الكأس اللي في نص نجمة داوود وبدأت تقرأ طلاسم وتراتيل جابت المراية وحطتها في نص الدايرة ورجعت تكمل فتحت الشباك فظهر انعكاس للقمر جوه المراية بدأت ترسم بالدم اللي في الكأس رموز وكلمات  المراية نورت وبدأ يخرج منها ستات كلهم متفقين في حاجه واحدة في الوشم اللي علي أكتافهم بدأو يلفوا حوالين جدتي وهما بيرددوا التعاويذ بدأت المراية  تتكلم كان بيخرج منها أصوات لناس كتير كنت سامعه صراخات وإستغاثات وأطفال بتبكي، بدأت تظهر ظلال سريعة علي الحيطة  كل حاجه ماشية بسرعة بدأت  أحط أيدي علي وداني أحاول  أوقف الصوت اللي بيعلي أكتر الامر إستمر معرفش قد ايه بس فجأة بدأت الأصوات تهدي وبدأت أنوار المراية  تقل الظلال دخلت المراية ووراها الساحرات  كل حاجه توقفت تماماً  ولكن جدتي دخلت في نوبه  شبه نوبات الصرع تشنجات ولون عنيها إختفي جسمها كله بيرتعش وفقدت  الوعي فضلت واقفة مش فاهمة  دوري ايه في كل الحلم ده، جدتي فاقت بس ملامحها  كانت متغيرة، دي جدتي الطيبة اللي انا اعرفها خرجت الصندوق ده من الحيطة  وبصت ناحيتي، اتخضيت انها شافتني  قربت مني وادتني المفتاح في إيدي ومشيت صحيت ولقيت المفتاح في ايدي والصندوق مكان ما شفته في الحلم بس ده اللي حصل
أدهم:  انا لسه مش فاهم  الكتاب ده بتاع أيه؟!
طارق (والد ندي)  :  ده مش كتاب، ده دفتر مذكرات أمي، شوفتها معاها  دايماً كنت بتقفل علي نفسها وتكتب فيه وتعيط، مكنتش فاهم ابدا هي بتكتب أيه ولا بتعيط ليه
ندي:  انت كنت عارف  كل اللي بيحصل معايا  ومقولتش!!!
طارق:  انا مكنتش فاهم ايه اللي بيحصل ولا عارف انه ممكن  يأثر عليكي  انتي كمان
الشيخ لقمان:  طيب ممكن تحكيلنا كل اللي تعرفه بالتفصيل  التفاصيل ممكن تفرق معانا
طارق: من وأنا صغير وأمي  عندها موهبة غير طبيعية كانت بتقدر دايماً تتنبأ بكل اللي الحاجات  اللي هتحصل وكل احلامها بتتحقق، يعني تصحي النهارده  تقول ان في حاجه  سيئة علي وشك الحدوث كانت بتحصل حاجه فعلا سيئة،  كنت بصحي علي صرخاتها في نص الليل بسبب كوابيسها،  كنت بسمع  ابويا بيهديها وبيقولها ان لازم  يشوفوا حل بس هي كانت بتعيط وتقول  مفيش حل،  كبرت وهي لسه زي ما هي واسوأ، كانت كأنها بتتحول بتبقي واحدة تانيه تماما في الحالة دي أبويا كان بيدخلني أوضتي ويقفل علينا ويشغل موسيقي بصوت عالي عشان منسمعش حاجه
في يوم صحيت  في نص الليل علي صوت أمي فضولي خلاني أخرج أشوف مالها كانت  نازلة ناحية البدروم وكأنها  مغيبة نزلت وراها وشوفت نفس المشهد اللي شوفتيه  ،  يومها خوفت جدا وحكيت لوالدي اللي  قالي اني كبرت  وجه الوقت  اللي لازم اسيب البيت فيه واني كبرت ولازم  اشوف حياتي وفعلا كنت بدات اشتغل  وعشت حياتي، كنت بقابلهم كل فترة  كنت بحس انها متغيرة اكتر كنت بحس انها مش أمي، لما والدي مات وعاشت معانا  هنا كانت قافلة الشقة علي نفسها  ، رافضة ان اي حد يدخلها  او يشوفها وبعد ما ماتت محدش فينا نزل الشقة
الشيخ لقمان:  احنا لازم المذاكرات دي فيها أيه اكيد هنلاقي فيها حل
ندي: اكيد لازم نقراها
قطع كلامنا إتصال دكتور سالم 
احنا لازم نمشي فوراً 
ندي:  في ايه
ادهم:  دكتور سالم لقي معلومات جديدة لازم  نعرفها
ياتري لقي أيه وممكن ينقذوا ندي ازاي؟! 
طب تخيل لو عندك مراية ملعونة، ممكن تتخلص منهل ازاي؟!!!!
يتبع.........
Hadeer_saeed