💀العكاز 💀الجزء الخامس💀

💀 العكاز 💀
(الجزء الخامس)

لقينا واقف جنبها ف الاوضة كلب اسود كبير و بيزمجر بصوت مررررعب جداااا ، فجأة جدك دخل من ورانا و طردنا كلنا بره الأوضة و قفل من جوه و بعدها سمعنا صوت صراخ و خبط جوه الأوضه لمدة ، و بعد كده سكت الصوت خالص و سكت كمان صوت الذكر ، استغربت جدا للي حصل بس تاني يوم الصبح عرفنا ان الشيخ اللي بيعمل الحضرة تعب جداا و بعدها بكام يوم مات .

عدت ايام يا حكمت يا بنتي و جدك احمد المنسي كان دايما ملازم لأمه و خصوصا بعد الليلة دي ، بقى هو كمان بيعالج الناس و بقى له هيبة و قوة اكبر من أمنة نفسها ، لحد ما ف ليلة و قبل ما أمنة تموت بحوالي يوم ، كنتي انتي نايمة فاليوم ده ، سمعنا صوت خناق جدك المنسي مع امنة ف اوضتها ، روحت اتسحب علشان اسمع اللي حصل لكني مسمعتش غير جملة واحدة قالها جدك ( العكاز خلاص مبقاش ليكي يا أمنة ، العهد لازم يتنقل ليا انا ) و بعدها سكتوا تماماً ، انا خوفت لاحسن حد يشوفني و اخدت بعضي و رجعت اوضتي تاني ، و بعدها بيوم بالظبط ماتت جدتك أمنة و العكاز اللي كانوا بيتخانقوا عليه بقى ف أيد جدك المنسي ، و كمان كل الحاجات اللي بتمتلكها أمنة زي البيت و الزباين و حتى التحف و الاناتيك اللي كانت متعلقة ف الاوضة اياها.

خلصت امي كلامها و انا لسه برضه مفهمتش حاجة ، لحد ما ف يوم بالليل كنت قايمة اشرب و لقيت الكلب اللي شوفته فالحلم واقف قصاد باب أوضتي ، خوفت اخرج و رجعت لسريري تاني لكن سمعت صوت ضرب كرباج و كانوا ٣ ضربات ورا بعض ، بعدها الكلب اختفى من قدام باب الاوضة و ظهر جدي احمد المنسي و كان ف أيده كرباج ، انا بصتله برعب و قولتله .

- انا مروحتش عند الاوضة ،،،اا ااا انا محاولتش اسمع حاجة .
- متخافيش ، انا مش هأذيكي انا هعرفك كل اللي انتي عاوزة تعرفيه ،،،،، الكلب ده هو خادم العهد اللي جد جد جدتك أمنه اخدوا من الجن و نص العهد ده جوه العكاز اللي فأيدي و بيتوارثه اجيال العيلة جيل ورا التاني ، و طبعا العهد ده بيخلي اللي بيحمله يقدر يعالج الممسوسين من الجن و بيخلي صاحبه كمان يقدر يطوع قرين أي شخص مات و بيخليه بدل ما هو قرين بدون صاحب ، بيكون خادم لحامل العكاز ، انما العيب اللي فالعهد ده انه بيخلي صاحبه يقدر يعمل اللي قولتلك عليه بس ، انما في حاجات تانية ميقدرش حامل العهد يعملها.
- حاجات زي ايه ؟
- زي مثلا ان حامل العهد او حامل العكاز ميقدرش يعرف مكان الكنوز اللي ف الارض ولا يقدر يفك او حتى يتواصل مع الرصد اللي بيحرس الكنوز دي .
- طب و انت ليه بتقولي كل الكلام ده .
- لأنك كبرتي و لازم تعرفي كل حاجة و خصوصا ان انا لو موتت انتي هتبقي وريثة العهد و هيبقى العكاز من حقك انتي .
- ازاي يبقى من حقي ؟
- لأن ابوكي شخصيته ضعيفة و مش هيستحمل العهد ده ، و خليكي فاكرة الكلام اللي انا قولتهولك ده ميطلعش ما بيننا احنا الاتنين والااااا ...
- لا لا لا والا ايه انا مش هفتح بقي ب ولا كلمة .
- تمام ، دلوقتي تقدري تخرجي ، الكلب مش هيتعرضلك تاني .

عدى على كلامي مع جدي سنين و ف يوم جه جارنا البسطاويسي و قال لجدي على مكان كنز ، و مع مرور الوقت عرفت ان جدي لقى الكنز ده و كان نصيبه منه ورقة يقدر يسيطر بيها على الرصد و يقدر من خلالها يفتح المقابر و الدفاين اللي ف الارض ، مطولش الموضوع كتير و جدي مات و اتنقل العهد الجديد اللي هو الورقة و الكتاب ، و كمان العهد القديم اللي هو العكاز ل ابويا ، اللي مستحملش قوة العهدين و اداهم ل ابراهيم المملوكي اللي هو جد فريد ، بس فضل العكاز معاه ، بعدها بيوم بالظبط ابويا مات و انا اخدت العكاز ، ايووووه اخدت العكاز و بقيت صاحبة العهد و اتبدلت حياتي ، و لأني مكنتش زي جدي ولا زي أمنة مبقتش بساعد الناس الملبوسة او اعالجهم لا انا كنت بستعمل العكاز ف حاجة تااانية خااااالص ، انا كنت بحضر قرناء الاموات و اسألهم على حاجات حصلت و عن طريقها بقدر اعرف تاريخ حياة الناس اللي يعرفوهم و اللي هم لسا عايشين و بقيت كل اما اقابل اي حد بعرف تاريخ حياته و بكده بقى الكل يخاف مني و اصحابي الاغنياء كانوا بيكلموني اروح اقرى الفنجان لقرايبهم و اتعرفت وسطهم بالشيخة حكمت ، و طبعا مكنتش بعمل حاجة لله كله بتمنه ، لحد ما ف يوم لقيت باب البيت بيخبط و لما امي فتحت قالتلي انه واحد عاوزني و لما خرجت لقيته .... يتبع

بقلم
محمد_شعبان
العارف