💀العكاز💀الجزء السادس💀

💀 العكاز 💀

(الجزء السادس)

لحد ما ف يوم لقيت باب البيت بيخبط و لما امي فتحت قالتلي انه واحد عاوزني و لما خرجت لقيته فريد حفيد ابراهيم المملوكي ، دخل البيت و قعد من غير ولا كلمة .

- عاوز ايه يا سيدي ؟
- عاوز اكمل العهد ، جدي باعتني عشان اخد العكاز .
- يا سلااااام ، عكاز ايه بقى ان شاء الله و عهد ايه اللي جاي تكمله ف بيتنا .
- بقولك ايه من الاخر كده ، انتي معاكي كنز مش عارفة تستخدميه صح و انا و جدي ابراهيم المملوكي نعرف قيمته كويس اووي و خصوصا انه بقى مرتبط بالعهد اللي معانا بسبب جدك ، ف شوفي عاوزه فيه كام و احنا تحت امرك ، و اهو كمان تاخديلك قرشين تقدري تساعدي بيهم نفسك و اخواتك بدل ما انتي كل يومين ف بيت من البيوت بتفتحي مندل او تقري كف او تقري فنجان و ف الاخر بتاخدي ملاليم .
- انت عرفت الكلام ده كله منين ؟
- مش مهم عرفته منين ، و بعدين ما انتي سيرتك سبقاكي ياااا .... شيخة حكمت ، المهم هتاخدي كام ؟
- لا طبعا مش هاخد فلوس ، و مش هفرط فالعكاز .
- طيب تمام انتي معاكي مهلة لحد بعد بكرة تفكري و لو مسمعتيش الكلام انا هاخد اللي انا عاوزه و بطريقتي ، سلام يا بنت المنسي ، اه خليكي فاكرة ، ولاد المملوكي بياخدوا اللي هم عايزينه .

خلص كلامه و مشي و انا كنت محتارة ما بين ان انا اطلب مبلغ كبير و اديله العكاز و بين ان انا اكمل ف دور العند و افضل زي ما انا ، لحد ما يومها بليل كنت قاعدة على سريري و جنبي العكاز زي ما اتعودت ، بس فجأة الكهربا اتقطعت و اول ما الكهربا اتقطعت سمعت صوت فحيح تعبان طالع من تحت السرير ، ساعتها مكنتش عارفة اعمل ايه و حسيت ان جسمي اتشل و مخي وقف ، ما هو انا لا مني عارفة انزل من عالسرير علشان اجيب العكاز و اتحامى بيه و لا مني عارفة افضل قاعدة لأن التعبان اللي انا سامعة صوته ده ممكن يخرج من تحت السرير و يموتني ، بلعت ريقي بالعافية و لسه هقول العزيمة اللي بحضر بيها خادم عهد العكاز ، قطع تفكيري صوت جاي من حاجة واقفة قدامي انا مقدرتش احددها بسبب ان الدنيا كانت ضلمة ، بس سمعت الصوت كويس اللي كان بيقول ( العكاز هيكمل عهد الفقيه و المملوكي لازم ياخده والا هتموتي محروقة انتي و كل اهلك و مش هيحميكي مننا مليون انسي او جني ) بعدها الكهربا رجعت و الاضاءة كمان رجعت و اختفى الصوت و الكيان اللي كان قدامي و كنت حاسة بيه .
تاني يوم خدت بعضي و روحت ل عم احمد البسطاويسي و حكيت له اللي حصل و كان رده ان الاختيار ف ايدي انا ، انا قولتله اني اخاف اديله العكاز و خدام العهد اللي ورثه جدي من امه و ابويا من جدي و انا من ابويا يموتوني و اخاف برضه اقوله لا يقوم هو منفذ تهديده و يموتني انا و اهلي محروقين ، المهم ف الاخر استقريت على قرار و هو ان انا اسيب العكاز ل عم احمد البسطاويسي و اخد امي و اخواتي و نقفل البيت اللي في الجمالية ده خالص و نعزل و نختفي عن كل الانظار و بكده المملوكي مش هيقدر يوصلي و خصوصا اني حصنت البيت الجديد من خدامه من الجن لكن الحقيقة هو قدر يوصلي ، اه فريد المملوكي قدر يوصلي و جالي لحد البيت الجديد و سألني على العكاز و قلت له انه ضاع بس هو مصدقنيش و سابني و مشي و يومها بالليل ماتت امي بطريقة بشششعة ، دخلت عليها الاوضة لقيت جسمها ازرق و فاتحة بقها و مبرقة للسقف .
بقيت بعدها مش عارفة اعمل ايه ولا اروح فين ، سيبت البيت الجديد و رجعت بيت الجمالية تاني و نفس اللي حصل قبل كده حصلي تاني لما رجعت ، بقيت اشوف نفس الكيان و الخيال و الضل ده و حياتي اتقلبت بعدها لجحيم ، و لما مبقتش عارفة اعمل ايه خدت بعضي وروحت لعم احمد البسطاويسي تاني و قالي انه هيديني حاجة تحميني من اذى ابن المملوكي و فعلا لقيته بيديني مجوهرات و قالي ان دي جزء من العهد و من غيرها العهد مش هيكمل حتى لو فريد اخد العكاز ، و قالي كمان اني لازم اخبيها ف مكان و اني مطلعهاش الا لحد من ولاد البسطاويسي بعد ما هو يموت لان دي ميراثهم و ف المقابل هو هيحافظ على العكاز و قالي كمان انه هيبدل المجوهرات الاصلية بمجوهرات فالصو عشان لو حد من ولاد المملوكي جه يطلب المجوهرات دي منه ، و فعلا اخدت المجوهرات و دفنتها ف سطوح البيت عندي ، و بالتحديد تحت اول بلاطة يمين من مدخل السطوح ، و مرت ايام و ايام و ارتحت فترة من فريد المملوكي و من أذاه ، لأنه مكنش بيجي و انا مبقتش اشوف حاجة لحد ما جه عيل من عيال المملوكي ينكش ورا القديم و اللي استنتجت يومها ان فريد هو اللي باعته ، و طبعا انا حكتله حكاية نصها صح و نصها غلط و اخدته للبسطاويسي علشان يتوهه و يديله معلومات غلط و كمان يديله المجوهرات اللي هى اساسا مزيفة و بكده هنكون ارتحنا من قرف ولاد المملوكي ، لكن اول ما مشي ابن المملوكي ظهرلي خادم العهد بتاع العكاز و قالي انه مظلوم و انه هو مضحوك عليه من فريد و من جده ابراهيم و انه هو و ولاد عمه اتعملوا طعم ليا انا و البسطاويسي علشان يقدروا يجمعوا بقيت متطلبات العهد اللي هى العكاز و المجوهرات ، لكن انا و البسطاويسي كنا اذكى منهم ، بس برضه الواد حفيد المملوكي صعب عليا بس رجعت و قولت انا مالي اللهي يولعوا فبعض ، فجأة خبط الباب و كان حد من طرف البسطاويسي جه و قالي انه عاوزني و لما روحت قالي خدي العكاز و روحي الحقي الواد اللي هيموت ظلم و ادي العكاز لفريد و هو الواد اخد كل مشتمالات العهد و المجوهرات المزورة ، ف روحي ادي العكاز لفريد و جده و لما يحاولوا يحضروا حراس العهد السحر هيتقلب عليهم بسبب ان المجوهرات مزورة و بكده نبقى خلصنا من ابراهيم المملوكي و فريد حفيده للأبد و كمان هكون انقذت الحفيد المظلوم و اللي اتورط ف كل الهم ده من غير سبب ، انا دلوقتي اخدت العكاز و رايحة على قصر المملوكي و حبيت اكتب المذكرات دي و اشيلها هنا فالبيت و كمان قريت عليها عزيمة خفاء و كان شرطي لو موتت او حصلي حاجة المذكرات دي متظهرش الا لحد من نسل البسطاويسي ، ولو انت او انتي بتقروا المذكرات دي يبقى انا ميتة و انت حد من احفاد البسطاويسي و خليك او خليكي عارفين ان المجوهرات دي من حقك انت اوعى تفرط فيها لحد من نسل المملوكي والا بكده هيكونوا امتلكوا كل متطلبات العهد و ساعتها هيبقى فيهم قوة و شر يقدروا يتحكموا بيها ف معظم انواع الجن و الرواصد و هياخدوا حاجات كتير مش من حقهم لأن هم معاهم كل حاجة الا المجوهرات و ده طبعا اذا انا موتت و هم اخدوا العكاز ..... تمت
(مذكرات حكمت المنسي )

انهيت تلك المذكرات و انا لا افهم شئ سوى ان هناك مجوهرات مدفونه بأعلى ذلك المنزل ، انتفضت من مكاني ذاهبة الى ذلك الدرج المؤدي الى الاعلى ، و قمت بالذهاب الى المكان المحدد و تأكدت من وجود المجوهرات ، ثم وضعت تلك (البلاطه) بمكانها و عند نزولي الى الاسفل وجدت فريد المملوكي واقفاً بالمنزل و بيده ذلك العكاز و هو ينظر لي قائلاً ........ يتبع

بقلم
محمد_شعبان
العارف