لعنة المرايا (الجزء الرابع)

لعنة_المرايا
الجزء_الرابع
المرايا عالم منفصل،  هل فكرت في مرة وإنت باصص في مرايتك هل الشخص اللي قدامك ده إنت او حد تاني،  من زمان  والمرايا ليها حكايات  واساطير،  إستخدموها في السحر وفي تحضير الأرواح وفي معرفة المستقبل  وفي العصر الفكتوري كان لما حد يموت لازم كل مرايات البيت تتغطي،لان المرايا في كل الحضارات هي بوابة للعالم الاخر
ده كان كلام دكتور سالم خبير في علم الأساطير والماورائيات اول ما حكيتله علي اللي حصل مع ندى
ندي:  طيب أنا عايزة أعرف انا أيه علاقتي بكل ده؟!
سالم:  بصراحة مش عارف بس ده هعرفه اول ما اشوف المراية 
الشيخ لقمان:  البيت فيه حضور قوي،  حاسس  بقوة شر كبيرة جدا، ده مش مجرد  شبح
أدهم:  طيب ممكن يا ندي ندخل  نشوف المراية
ندي:  أيوه طبعا،  إتفضلوا
دخلنا كلنا  كانت في أوضة مقفولة بالمفتاح، خرجت ندي المفتاح  من جيبها وفتحت الأوضه،  حسينا بحاجه  قوية  صدمتنا اول ما دخلنا  الاوضة،  الدكتور سالم إتجه مباشرة ناحية المراية وبدأ يفحصها  ،  مراية مستطيلة الإطار بتاعها  خشب قديم مدهون بلون دهبي  فيها أحجار كريمة نادرة مرصوصة علي الاطار بعناية  ، مراية قديمة وأثرية بس محتفظة بحالتها.
الدكتور سالم من أول ما بدأ  الفحص  وهو متوتر وخايف، بدأ يعرق بقوة ويرتجف وبعدين طلع بره وساب الأوضة، ساب البيت كله وقعد علي السلم  في الجنينة، طلعنا وراه بسرعة نشوف في أيه
الشيخ لقمان:  حصل أيه؟!
الدكتور سالم:  أنا عارف المراية دي، دي ملعونة انتوا مش عارفين خطورتها
ندي:  أرجوك فهمني، مراية ايه دي؟! 
الدكتور سالم:  دي مراية سحرية ظهرت أول مرة في حضارة بابل ( العراق قديما) كان السحرات بيستخدموها عشان يعرفوا المستقبل  ،  مارسوا عليها أبشع أنواع السحر
الاساطير بتقول إنهم كان بيستحضروا عليها أرواح الموتي. 
أدهم:  إزاي يعني  ؟! 
دكتور سليمان:  يعني مثلا واحدة جوزها مات او ابنها  بتروح للساحرة وتقولها انها نفسها تشوفه،  فتعمل سحر إسود وتحضر روحه وتظهر روحه  في المراية وتكلم أهله لحد طلوع الفجر ينتهي السحر،  في كتب بتقول إن اللي كان بيحضر ده القرين وإن السحر ده بيجعله محبوس جوه المراية يعني علي مر العصور كل الارواح  دي محبوسة في المراية
المراية دي إختفت بعد إنتهاء الحضارة في بابل بيقولوا إنها ظهرت بعدها في الهند بس محدش يعرف مكانها 
ندي  :  طيب ليه أنا؟! 
دكتور سالم:  المراية دي لازم يكون ليها مالك او بمعني أصح مالكة ساحرة يعني
ندي:  بس أنا مش ساحرة  ومعرفش حاجه  عن السحر
دكتور سالم:  ما ده الغريب اللي مش فاهمه بس أكيد ليكي علاقة بالمراية دي
ندي:  كل علاقتي بيها إنها مراية جدتي 
دكتور سالم:  ثواني،  أدهم إنت قولتلي إن جدتها من الهند 
ادهم:  ايوه فعلا يبقي جدتها حلقة الوصل
دكتور سالم:  آسف علي اللي هقوله بس المراية دي ورثك من جدتك،  يبدو إنك آخر نسل الساحرات او بمعني أصح  اخر نسل مالكين المراية
أدهم:  طيب أيه اللي هيحصل،  وأيه المطلوب  منها
الدكتور سالم: أنا قريت عن الموضوع ده بس كنت  فاكر إنها مجرد إسطورة،  انتي لسه  مبقتيش مسئولة عن خدمة المراية
ندي:  يعني ايه خدمة المراية؟! 
دكتور سالم:  يعني تحافظي علي المراية وتنفذي كل اللي الارواح المحبوسة في المراية تطلبه،  تقدمي القرابين والتضحيات
أدهم:  وهي هتعمل كل ده مقابل أيه؟!
الدكتور سالم: هتاخد المعرفة، هيبقي في يديها كل أنواع  السحر، ارواح المراية مسخرة ليها تطلبهم منهم ما تشاء 
الشيخ  لقمان  :  كده الوضع  صعب
الدكتور سالم:  المشكلة إني مش عارف  إزاي نخلص من المراية دي
ندي بإنهيار: طيب المفروض الطقوس دي تتعمل إمتي؟! 
الدكتور سالم:  في ليلة إكتمال القمر
الشيخ لقمان: يعني كمان يومين
أدهم: طيب لو كسرنا المراية نخلص من اللعنة
الدكتور سالم:  لو كسرناها ندي هتموت ولعنتها مش هتخلص
ندي:  والحل؟! 
الدكتور سالم:  ممكن لو منعنا الطقوس تحصل  ، اللعنة  تنتهي
ندي:  ممكن، يعني مش أكيد؟! 
الدكتور سالم:  معظم المراجع التاريخية إتكلمت عن المراية، بس محدش قال نخلص منها إزاي
الشيخ  لقمان:  المهم مينفعش تبقي لوحدك  ، اليومين الجايين هيبقوا أصعب لازم يكون  خد معاكي  لحد ما نشوف هنعمل ايه
أدهم:  هو ممكن الشيخ لقمان يحصن البيت  لحد ما انا والدكتور سالم ندور في للمراجع علي حل
ندي:  خلاص هكلم أهلي  يخليهم جنبي
الدكتور سالم إحنا لازم نبحث  فوراً   مفيش وقت نضيعه........
يتبع
رأيكم يهمني 💜🌺
Hadeer_saeed