لعنة المرايا (الجزء الثالث)

لعنة_المرايا
الجزء_التالت
عارف أنا أكتر حاجه بخاف منها المرايا، مبحبش المراية من زمان، بكره أشوف نفسي جواها،  بحس كأن روحي محبوسة جواها
الخوف ده زاد أكتر من مشكلتي دي،  أنا بقيت  اترعب لو شوفت إنعكاسي في أي حته، بحس إن اللي في المراية ده مش أنا، بحسه شخص منفصل عني
أدهم:  أنا ممكن أشوف المراية دي أمتي؟!
ندى:  بكره
أدهم:  فين؟!  في بيت أهلك؟! 
ندي:  لا في بيتي،  من يوم ما جدتي ماتت صحيت لقيت المرايه  في بيتي متعلقة علي الحيط اللي قصاد سريري، كلمت أهلي أسالهم هي إزاي وصلت عندي،  محدش فيهم يعرف حاجه،  أنا من يومها قافلة الاوضة بالمفتاح وبنام في الصالة بس طول  الليل بسمع أصوات بتناديني،  إسمي اللي بيتردد  بهمس، النور الخارج من تحت الباب،  الظلال اللي بتتحرك في كل مكان في البيت، هقولك سر أنا بقيت بفهم كلامهم، بينادوا عليا وبيقولوا إني بنتمي ليهم،  أنا خايفة،  أرجوك ساعدني، إنت لازم تساعدني....
أدهم:  إهدي هساعدك إن شاءالله  ، بس علي الاقل عايز صورة للمراية
ندي:  أيوه معايا هبعتهالك
أدهم:  تمام علي معادنا بكره، إبعتيلي العنوان
رجعت البيت بصراحة مشغول مش عارف أنا ممكن أساعدها إزاي، ولا حتي عارف أنا بتعامل مع أيه،  يعني ده مش سحر ولا عمل ولا مس زي ما اتعودت مع الشيخ  لقمان، طيب ده أيه؟!
حاولت أرتاح  وشغلت التسجيل  أسمع الحوار وأنا بشرب  فنجان قهوة وبحاول أركز، بس اللي سمعته رعبني، كان في صوت  في الخلفية  صوت ترانيم،حاجه شبه الموسيقي الجنائزية كده، كانت بتعلي اوقات للدرجة اللي أصواتنا بتختفي وبترجع تهدأ تاني شوية وتختفي، أنا مش فاهم ده أيه،  أول مرة يمر عليا حالة زي دي،  أنا كنت خلاص فاكر نفسي بقيت خبرة، بس الظاهر إن لسه في حاجات كتير جدا في العالم ده لسه محدش عنده فكرة عنها، قفلت التسجيل وبدأت اعمل سيرش عن المرايا ولعنتهم،  لقيت أساطير كتير جدا،  فتحت تليفوني علي صورة المرايا  نمت وانا  بحاول أركز في تفاصيلها،  صحيت  علي صوت الترانيم في التسجيل شغالة وصوتها عالي او في صدي صوت معرفش مصدره بدأت أفتح عيني وأدور علي التسجيل بإيدي انا متأكد إني قفلته، بس اتفزعت لما إيدي لمست حاجه شبه صوابع الإيد،  لا دي إيد فعلا فتحت عيني  وانا بسحب إيدي بسرعة كانت ندى  ، ايوه ندي بس ملامحها غريبة عنيها  سوداء وبتبص ناحيتي بشر،  انا قومت مفزوع وجريت بعيد  ، بدأت تتمشي في الشقة بهدوء وتقول التراتيل اللي  سمعتها في التسجيل،  وبدأت  تضحك بهستريا مخيفة البيت كله كان  بيتهز بعنف  ، بدأت  تنادي علي إسمي،  النور بيترعش، الإضاءة بقت خافتة بدأت تمشي ناحيتي  وأنا  برجع لورا لحد ما خبطت في الحيطة، قربت مني بصت في وشي وبدأت تتكلم بصوت أقوي، ملامحها مرعبة وفجأة إنسحبت لأوضتي بمنتهي  الهدوء دخلت وراها وشوفتها بتدخل المراية  ،  أنا عارف إن اللي بقوله ده جنون،  منتهي الجنون بصت لي وإبتسمت وصورتها إختفت، رجعت كل حاجه طبيعية،  أنا خايف جدا أنا كنت فاكر  اني بطلت أخاف،  المشكلة دي مش هعرف أحلها لوحدي أنا لازم أدور علي حد يساعدني
الصبح روحت العنوان اللي ندي بعتتهولي، مش هكدب عليكم أنا كنت خايف أروح خايف جدا،  بس مفيش قدامي  حل تاني  ، وصلت قدام  بيتها  ، البيت  يبان جميل وهادي، الجنينة لطيفة يبدو من بعيد لطيف جدا، خبطت كتير محدش رد ولما فكرت ارجع الباب فتح، كانت مرهقة جدا كأنها مبتنامش، عنيها حمرا وتحت عنيها إسود،  أول ما شافتني بدأت تعيط بهستيريا وترتعش كان جسمها كله بيتنفض، حاولت أهديها بس كانت حالتها بتسوء دخلت بيتها بسرعة أجبلها مايه كان البيت  كله مقلوب كل حاجه مرمية ومبهدلة، جبت الماية وخرجتلها وبعد ما هديت شوية،  قالت:   أنا خايفة 
أدهم: من مين؟! 
ندي: خايفة مني،  إنت متعرفش حصل أيه إمبارح 
أدهم:   عارف أنا شوفتك عندي  في البيت
ندي:  يعني ده مكنش حلم؟! 
أدهم:  لا مستحيل يكون حلم، أنا بس معرفش إزاي ده بيحصل،  بس اللي فاهمه إنك  بتخرجي من المرايه
ندي:  اللي حصلي كان أسوأ، أرجوك إمشي أي حد هيحاول يساعدني  هيموت،  ده قدري
أدهم:  إهدي وهنشوف حل
ندي:  مفيش حلول هما إختاروني أنا،  محدش هيعرف  ينقذني منهم
أدهم:  هما عايزين كده، عايزينك مستسلمة وخاضعة ليهم،  قاومي إنت أقوي منهم،  إيمانك أقوي منهم
ندي:  إنت متعرفش قوتهم ولا تعرف ممكن يعملوا أيه
أدهم:  مهما كانوا أقوياء، إنتي أقوي خليكي مؤمنة بنفسك ده مفتاح النجاة
ندي: طيب نبدأ إزاي
أدهم:  بصراحة  أنا لوحدي مش هقدر أساعدك، بس أعرف ناس ممكن  تساعدنا
ندي:  موافقة كلمهم، أنا حاسة بخطر جاي قريب بس مش عارفة أيه هو
أدهم:  أنا فعلا كلمتهم وهما علي وصول
وفجأة سمعنا  صوت التراتيل من جوه البيت كل الأبواب بتتقفل وتتفتح بشكل مخيف، كل اللمبات بتتكسر،  أصوات صراخ  وأشخاص غير مفهومة
ندي:  كلمهم لازم نشوف حل بسرعة إحنا  في خطر 
إحنا.....  إحنا مين  ...... ليه بتجمعي...  أنا عارف  إني دايما بورط نفسي في المشاكل بس المرة دي شكلي مش هخرج.......
يتبع........
رأيكم يهمني 💜
Hadeer_saeed