قصة المثلث 📐الجزء الاول

المثلث
Triangle

المثلث هو شكل من الاشكال الهندسية و تعريفه كالأتي : هو أحد الاشكال الاساسية في الهندسة ، و هو شكل ثنائي الابعاد مكون من ثلاثة رؤوس تصل بينها ثلاثة اضلاع .

ليه التعريف ده و ليه المثلث بالذات و ليه انا اخترت اسم المثلث لحكايتي ، كل ده هتعرفوه لما تقروا اللي حصلي .

انا مين ؟
انا : امير ...... اسمي امير جاد
سني : ٢٠ سنة
مهنتي : طالب بأحدى الجامعات الخاصة (الفرقة الثانية شعبة نظم و معلومات ادارية)
ده اللي مكتوب فكارنيه الجامعه و الحقيقة هو لا يمت للواقع بصلة لأننا تقريبا فالجامعة لا بنتعلم اصول النظم و لا بنتعلم حاجة عن الادارة و حال جامعتنا كحال معظم جامعات مصر اللي بتعاني من ضعف و سوء المنهج الدراسي ، عموما كل ده مش موضوعنا و لا له علاقة بقصتي بس حبيت اديكوا نبذة صغيرة عن حياتي و اللي اصبحت جحيم بسبب شكل المثلث و بسبب فضولي و عكي و جهلي و بتبدأ حياتي تتغير لما ف يوم خميس كنت سهران و فاتح اللاب توب بتاعي و قاعد علي سريري و بقلب في المواقع ، و اثناء ما انا بقلب كده ف الموقع لقيت اعلان عن حاجة غريبة جدا ، كان الاعلان عبارة عن صورة لسلسلة فنهليتها شكل مثلث عادي جداا بس اللي مش عادي السعر اللي كان مكتوب على الاعلان و هو ١٠٠٠٠٠٠ دولار ، انا استغربت يعني ايه الغريب اللي فالسلسلة دي عشان يكون سعرها مليون دولار ، فتحت الاعلان و طبعا دخلني لموقع تاني و هنا كانت البداية .
الكمبيوتر وقف او بمعنى اصح هنج لا بيخرج ولا الماوس بيتحرك ولا بيحصل اي حاجة لحد ما لقيت مكتوب على الشاشه بالانجليزي ( Read what is written until it lasts) و بحكم دراستي و تعاملي مع الكمبيوتر و النت عرفت اترجم الجملة دي و كان معناها ( اقرأ ما هو مكتوب حتي تستمر) ، بصيت للي مكتوب تحت و كان كلام باللغة العربية بس ماكانتش لغة عربية عادية دي كانت لغة عربية اه بس من غير نقط و كان الكلام كالأتي ( احصروا ىا حدام المثلث احصروا الى الموحود أمركم طمطائىل حادم المثلث الدموى احصر الى الداعى ) ايوه ده كان الكلام اللي مكتوب و اللي كان كله معليهوش نقط معادا كلمة (المثلث ) و اللي اول ما خلصت قرايته حسيت زي ما يكون هوا سخن خرج من شاشة اللاب توب و خبط ف وشي علشان الدنيا تضلم من حواليا و ده بسبب اني غمضت عيني من قوة الهوا السخن و لما فتحت عيني تاني لقيت الدنيا برضه كلها ضلمه من حواليا زي ما يكون النور قطع او انا اللي اتعميت ، قطع صوت تفكيري صوت غليظ جاي من ورايا بيهمس و يقول

( لقد حضرت اليك ايها الداعي انا طمطائيل خادم المثلث المقدس)

استغربت و بدأت الف راسي و اقول

(ميين !! ..... انت مين؟؟ )

رد عليا بكلمة واحدة بس المرة دي بس بصوت عالي

(زااااااميييير)

اول ما قال الكلمة دي المشهد اتبدل حواليا و لقيت نفسي واقف ف مكان كله ضلمه و من بعيييييد في نور بيقرب ، ركزت مع النور ده و كل ما كنت بركز النور كان بيقرب بيقرب لحد ما قرب جدا و كان عبارة عن كرسي او عرش كبييير من خشب ، الضهر بتاع العرش ده علي شكل مثلث لونه احمر زي ما يكون كده متغرق دم و حواليه هالة او اضاءة حمرة ، ركزت علي اللي قاعد عالكرسي لقيته انا ........
ايوه انا .... نفس الملامح و نفس الوش لكن جسمي متغير ، شكل جسمي اكبر و اضخم و الشعر كثيف ف كل مكان فجسمي لدرجة ان الشعر مغطي جسمي كله و شعر الكائن اللي شبهي ده كان طويل لدرجة انه واصل للأرض اللي كانت سودة تماما .
ركزت مع الكائن ده و قلتلو
( انت مين ؟؟؟ )

رد بصوت شبه صوتي و قالي

(انا طمطائيل ..... حارس المثلث المقدس و ملازم جسدك الان بعد طرد قرينك )

بصتله باستغراب و قولتله
( انا فين ؟ ..... و انت جيتلي منين ؟)

رد بصوت عالي و بنبرة مليانة غضب و قالي

( لقد دعوتني .... و لبيت دعوتك ..... فالأن عليك بالطاعة و خدمتي ايها المستضيف )

و لقيته قام من مكانه و قرب مني بسرعة و حط كفه الشمال اللي كان مش قد كف البشر العاديين لا كان اكبر بكتيييير و كان مليان شعر كثيف علي عنيا ، ساعتها حسيت بأن عينيا بتوجعني و حسيت ان عنيا بتتحرق ، ساعتها شوفت شكل مثلث لونه احمر بالدم بيقرب من نظري اكتر و اكتر و الالم بيبقى اكتر و ابشع و غصب عني صرخت و اول ما صرخت حسيت بخبطة قوية جدا زي ما يكون هو ضربني بكف ايده على عنيا و من قوة الضربة حسيت ان عنيا اتعمت و بتحرقني جداااااا اكتر من الاول و سمعت صوت عالي جوه راسي بيقول

( اصبحت مختوماً بالمثلث المقدس ..... انت ملكي الأن )
....... يتبع

بقلم
محمد_شعبان
العارف