الشيطانه الصغيرة (الجزء الثالث)

مفيش اصعب من أنك تبقي خايف من اكتر شخص ممكن تحبه في الدنيا مش قادرة أقتنع إني خايفة من بنتي بس أنا مرعوبة من الليلة الأخيرة وأنا مبعرفش أنام في البيت لوحدي جوزي غير مواعيد شغله وقاعد جنبي ومش عارفين نعمل أيه
الشيخ لقمان : طيب يا عبد الرحمن من ساعة ما قعدت ملاحظتش اي حاجه غريبة
عبد الرحمن بتوتر : لالا .... بنتي طبيعية معايا ....هو ..هو أنا مبشوفش حاجه لا
الشيخ لقمان : متأكد؟!
عبد الرحمن : أيوه طبعاً متأكد
الشيخ لقمان: يعني مش مخبيين اي حاجه عليا ؟!
هنا: وهنخبي أيه أنا تقريبا حكيت كل اللي حصل بالتفصيل
الشيخ لقمان : مش عارف ، حاسس إن في حلقة مفقودة معرفش أيه هي
عبد الرحمن : حلقة أيه ده كل اللي حصل
الشيخ لقمان : تمام يبقي البنت محتاجة جلسات قرآن وحاجات كتير لازم نبدأ فيها فوراً بس مش هنا
هنا : أمال فين ؟!
الشيخ لقمان : في بيتكم أنا حاسس إن الشئ ده مرتبط بالبيت أكتر ، بصي يا بنتي الجن ضعيف مش قوي زي ما كلنا متخيلين عمره ما بيأذي إنسان إيمانه قوي دايما بيختار النفوس الضعيفة البعيدة عن ربنا ويمكن إختار بنتك طريق لأنها أضعف واحدة فيكم وإنتي بعدها ، وطول ما انتي بتخافي وعملالهم حساب هيسيطروا عليكي أكتر وأكتر ، لازم إيمانك بالمولي عزوجل يكون أقوي من كده ، تكوني واثقة إن مفيش حد يقدر يأذيكي مهما كان لا إنس ولا جن ولا أي مخلوق إلا بمشيئة الله
قوي قلبك يا بنتي ومتخافيش رب الإنس والجن معاكي إستعيني بيه وحافظي علي صلاتك وقرانك ومفيش اي أذي هيصيبك
عبد الرحمن : طيب يا شيخ هنبدأ إمتي ؟!
الشيخ لقمان : إنتظروني بكره بعد صلاة العشاء  بإذن الرحمن
خرجنا من عنده وروحنا بيتنا منكرش إن كلامه طمني وريح قلبي وحسيت إن شفاء بنتي هيبقي علي إيده البنت كانت ساكتة وهادية وماسكة فيا بكل قوتها كنت حاسة إنها خايفة ومرعوبة بتحاول تاخد مني شوية طمأنينة وأمان ، أكيد اللي بتشوفه مش سهل ربنا يخصلنا من كل ده بقي
وصلنا البيت كانت نامت نيمتها في اوضتنا وروحت اعمل أكل وسبت عبد الرحمن بيسمع التليفزيون وأنا واقفة اعمل الاكل وافتكر كلام الشيخ لقمان حسيت بسخونة قوية جاية من ورايا صوت أنفاس بطيئة وتقيلة بصيت ورايا مكنش في أي حد حاولت أنفذ كلام الشيخ وأتجاهلهم سمعت همس كأن الصوت خارج من جوايا مش من بره الصوت جوه دماغي
" مش بنتك مش بنتك مش بنتك"
الصوت بيتكرر بإنتظام بنفس الكلمة بدون تغيير حطيت إيدي علي وداني احاول امنع الصوت ، الغريب إن الصوت فعلا وقف  بصيت حواليا لقيت جوزي واقف علي باب المطبخ وعلي وشه أكتر نظرة مرعبة شوفتها سألته في ايه باصص كده ليه حصل ايه ؟! البنت حصلها حاجه ؟!
كان متوتر وقلقان قال : لالا.. محصلش حاجه انا ... هدخل أنام ....
طب والأكل ؟!
لالا خلاص مش عايز
سابني وجري من قدامي كأنه بيهرب من حاجه ممكن يكون هربان مني انا ؟!
سبت كل حاجه وروحت وراه كان نايم وحاضن بنتنا كان بيترعش  فضلت إني مسألش علي حاجه بدل مش عايز يتكلم نمت
طبعا اكيد متوقعين إنها كانت ليلة مرعبة كالعادة بس الغريب إنها كانت ليلة عادية جدا نمت ومحستش بأي حاجه بس لما صحيت لقيت جوزي قاعد علي كرسي قصاد السرير جسمه كله بيرتجف تحت عينه إسود عيونه مرهقة وحمرا باين عليه منمش كويس ، قربت منه وسألته في أيه بص ناحية بنتي اللي كانت نايمة علي السرير وشاور عليها وقال : مش هتسيبني أبداً مش هترحمني ....
قولتله يعني أيه بس هو سكت تماما ومتكلمش بعدها
اليوم عدي طبيعي ومفيش أي حاجه غريبة حصلت للدرجة اللي إستغربت فيها هي إزاي الأمور ماشية ببساطة كده حاسة إن في حاجه غلط بس قررت أكدب إحساسي ما يمكن دي بركات الشيخ لقمان
بعد صلاة العشاء الشيخ لقمان وصل وطلب إنه ياخد البنت في أوضة لوحدهم الاول عشان يبدأ طقوسه في قراءة القرآن والحاجات اللي هيعملها من الطرق المختلفة للعلاج قفل الباب من جوه وطلب إن مهما سمعنا منقربش ومنحاولش نفتح الباب مهما حصل
بدأت أسمع صوت قرآن آيات مختلفة " آية الكرسي ... آيات متفرقة من القرآن بعض الأدعية "
كان كل ما صوته يعلي بالقرآن البنت بتصرخ أكتر وأنا قلبي بيتقطع عليها وببكي وجوزي بيحاول يهديني وفجأة سمعنا صوت حاجه بتقع وصوت بنتي بتتكلم ماما أرجوكي تعالي خديني يا ماما الصوت كان بيتبدل بين الحدة والغلظة بين صوت طفلة وصوت قوي مخيف صوت صرخات مختلفة ، أصوات همس ، أصوات إستغاثة ، الإضاءة بتترعش بجنون وبدأ صوت بنتي يخرج من كل ده ، ماما ماما ماما
جريت ناحية الباب وبدأت أخبط ارجوك إفتح أرجوك كفاية بس مفيش اي رد غير صوت القران اللي بيعلي وفجأة توقفت كل الأصوات إلا من صوت القران بعدها بدقايق الشيخ لقمان خرج وقال إن بنتي خلاص بقت كويسة محتاجين شوية جلسات بس في العموم خلاص هي بقت بخير ومش هنشوف حاجه تاني شكرته وجوزي عرض عليه فلوس مرضيش أبداً وقال إنه بيعمل كده لوجه الله بس لازم نفضل عل تواصل عشان ميتكررش ده وجريت ناحية بنتي وبالفعل بقت كويسة ومشوفتش حاجه لشهور بعدها الغريب إن جوزي هو اللي مبقاش كويس علي طول خايف وباصص للفراغ بسمعه بيكلم نفسه دايما بيحلم بكوابيس وبيقوم مفزوع لدرجة إنه بطل ينام بيفضل صاحي لحد ما التعب ينيمه ويصحي برده خايف وقلقان  ، ياتري في أيه ، أيه اللي حصل ؟! هو بيحصل معاه أيه وليه ؟! 
الشيطانة_الصغيرة
الجزء_التالت
Hadeer_saeed