الشيطانه الصغيرة (الجزء الثاني)

الشيخ لقمان : أنا لسه مش فاهم حالة البنت إيه ممكن تكملوا أيه اللي حصل عشان أقدر أفهم ؟!
هنا : بعد ما جوزي رجع من الشغل بسببي كنت خائفة جدا ومرعوبة حكيتله اللي حصل وأنا بترعش من الخوف ، سابني وجري ناحية أوضة بنتنا أتأخر شوية وأنا معرفش في أيه خايفة أقوم أشوفه رجع كان عصبي جداً قال إن كلها أوهام وإن البنت كويسة والمشكلة فيا بس حسيته خايف وهو بيتكلم بس مفتحتش معاه الموضوع تاني
عبد الرحمن : أنا دخلت الاوضة البنت كانت نايمة في هدوء ومفيش اي حاجه غير طبيعية قربت من سريرها والنور مطفي عشان خايف تصحي أول ما دخلت الاوضة الباب قفل لوحده وبنتي فتحت عينيها كانت عينيها غريبة مش عينيها الطبيعية كانت واسعة وجاحظة للخارج واللون كله إسود كانت باصة ناحيتي وحسيتها بتبتسم رغم الضلمة عينيها كانت بتلمع بشدة للحظة حسيت بوجود حد معانا صوت أنفاس تقيلة رائحة كريهة حضور تقيل بدأت أحس بحرارة غريبة وقوية كأن حد واقف جنبي اللي رعبني إن بنتي بصت فعلا علي الفراغ جنبي ، محستش بنفسي غير وأنا بجري ناحية أوضتي وبسمع صوت همس ، لما رجعت خوفت أحكيلها حاجه كنت حاسس إنها السبب ، إنها نقلت جنونها ليا إتعصبت عليها عشان أنهي الموضوع ولما صحيت تاني يوم إتعاملت كأن مفيش حاجه حصلت
الشيخ :وحصل أيه بعد كده ؟!
هنا: عدي كام يوم الدنيا هادية مفيش أي أصوات البنت طبيعية جدا ، وفي ليلة كنت مرهقة جدا نمت وهي جنبي وكسلت أنيمها في سريرها ، نمت نوم عميق بس صحيت في نص الليل علي نفس الصوت اللي سمعته في اوضتها قبل كده " تيلي تيلي بوم بوم ،تيلي تيلي بوم بوم "
بدأت أفتح عيني ببطء واللي شوفته عمري ما هنساه في حياتي ست قاعدة جنب السرير ماسكة إيد بنتي بتغنيلها ،الست لابسة فستان إسود وشعرها إسود طويل بس في فراغات في رأسها مكان الشعر فاضي وكأن حد قاصص لها شعرها رقبتها عليها علامات ضرب واصابع وشها نصه محروق ومكان عينيها فاضي والعين التانيه سوداء تماما وبتنزف دم ، جلد إيديها متقطع وضوافرها بتنزف بقوة ،
بصت ناحيتي ووقفت الأغنية وفجأة صرخت صرخة حسيت إن جدران البيت هتقع من قوتها وإختفت فجأة زي ما ظهرت ، بنتي بدأت تصرخ وتعيط بصوت عالي وهستيري وأنا مش عارفة أعملها أيه !!
قربت إيدي أطبطب عليها وأهديها عضتني في إيدي عضة قوية بالرغم من إنها لسه معندهاش أسنان بس حسيت بأسنان قوية إتغرزت في إيدي ، إيدي بدأت تنزف بشكل متواصل كنت بعيط من الألم في الوقت اللي هي هديت فيه وسكتت ربطت إيدي من الألم ومعرفتش أنام للصبح ، لما جوزي رجع من شغله حكيتله كل اللي حصل ووريته إيدي فكيت الشاش بس إيدي كانت سليمة تماماً سخر مني وقال إني إتجننت ومفيش أمل في علاجي وأنا مش عارفة هل أنا فعلا اللي مجنونة ؟! 
عبد الرحمن : أنا رجعت في اليوم ده ولقيتها منهارة زي كل يوم ، وأنا مش فاهم ايه حصل أو ليه هي بتعمل كده حكتلي وكنت بدأت أصدقها ، بس لما فكت إيديها ولقيتها سليمة إتأكدت إنها مجنونة وهتنقل جنانها ليا .
هنا: أنا مش مجنونة بنتي فيها حاجه غلط أنا بخاف منها بتبص ناحيتي بطريقة غريبة بتخوفني  بحس بصوت خطوات وحركة في البيت طول الوقت ، دايما حاسة بوجود حد معايا وحواليا حاجه شريرة ومخيفة ، عدي فترة وأنا مبشوفش حاجه ملموسة غير صوت الخطوات والريحة الكريهة ونظرات بنتي
فاتت شهور ونطقت بنتي أول كلمة ماما بس مكنتش باصة ناحيتي وهي بتقولها كانت باصة بعيد في ركن الاوضة ، حسيت بحرارة قوية وللحظة حسيت حد واقف ورايا ، بس كدبت نفسي بدأت أقنع نفسي إني مجنونة وكل اللي بحس بيه مجرد جنون ، بس للأحداث كانت بتبقي أقوي كل ما بنتي ما تكبر يعني أول خطوة مشيتها لما دخلت أوضتها أتطمن عليها ولقيتها قاعدة في ركن الأوضة ضهرها للباب إترعبت أنا متأكدة إني سايباها في سريرها لفت ناحيتي وقامت مشيت خطوتين وقعت ورجعت زحف لركن الأوضة فات سنة وأنا عايشة مع كل ده مع طفلة بتتحول أخر الليل لشيطانة مبعرفش أقرب منها ولا أكلمها ، ومن إسبوع بالظبط بدأت كل حاجه تبقي أعنف ، من بعد منتصف الليل لتبدأ صوت الخطوات ، مش خطوات حد تاني زي ما كنت فاكرة ، لا دي خطوات بنتي بتجري في الصالة وتلعب مع حد مش عارفاه سامعة صوت ضحكها وكلماتها سمع صوتها بتجري وبتكسر كل حاجه في البيت وانا قاعدة في أوضتي ماسكة المصحف وقافلة باب الاوضة عليا وبعيط من الرعب ، في الأول كانت بتلعب من غير ما تقرب ناحية أوضتي ، بس بدأ الجنون يزيد وبدأت تخبط علي أوضتي ، فالبداية كانت بتبخبط بهدوء : ماما ممكن تفتحيلي ، متخافيش يا ماما إحنا مش هنأذيكي إحنا هنلعب بس .....
ماما هتفتحي ولا أسيبها تقطع إيدك
الصوت بس بيزداد قوة وعنف : ماما إفتحي
ماما هنقتلك ..... هنقتلك .......هنقتلك
الشيطانة_الصغيرة
الجزء_التاني
Hadeer_saeed