الشيطانه الصغيرة (الجزء الرابع و الاخير)

انا مش عارفة هفضل في المتاهة دي لامتي ما صدقت بنتي بقت كويسة وجوزي حاله إتبدل ساب شغله وطول الوقت قاعد في أوضة بنتنا وقافل الباب علي نفسه قاعد في الضلمة تماما وطول الليل بسمع صوته بيتكلم مع حد وبيهمس ولما خبط علي الباب بيزعقلي بعنف إني أمشي أنا مش عارفة اللي بيحصلنا ده ليه ولا عارفة ماله ولا حتي أقدر أساعده إزاي 
فكرت أدور علي حد يساعدني ولا حتي أرجع للشيخ لقمان أسأله بس مش عارفة اتصرف لحد اللي حصل من يومين قررت بعدها إني مش هسكت ولا هسيبه كده
زي كل ليلة نمت وبنتي في حضني وجوزي قافل علي نفسه زي كل يوم غمضت عيني ونمت صحيت في نص الليل علي صوت عياط بنتي البنت بتصرخ بعنف فتحت عيني أدور عليها علي السرير ملقتهاش قومت مفزوعة أدور عليها لقيت جوزي واقف في ركن الاوضة وشايل البنت علي إيده ، عنيه حمرا ومجهدة كأنه مبينامش جسمه كله بيترعش يدوب قومت ولسه بقوله بتعمل أيه لمحت حاجه بتلمع في الضلمة ، ركزت شوية دي سكينة جريت ناحيته في وسط صراخ بنتي رفع السكينة علي رقبتها وقالي ابعدي إنتي مش عارفة حاجه ، دي لعنة وجودها لعنة ، دي لازم تموت حالاً ونرجع نعيش تاني زي زمان دي بس شيطانة مستحيل تكون إنسانة
بصي أنا هقتلها وأتخلص منها ونهرب من هنا ونبدأ من جديد ، متخافيش كل حاجه هترجع كويسة تاني ، أنا تعبت مبقتش قادر أستحملها دي بتدفعني نحو الجنون
بدأت أصرخ واطلب منه : أرجوك متأذيهاش انت ناسي دي بنتنا دي مش شيطانة دي بنتنا اللي تعبنا سنين عشان نجيبها
صرخ فيا دي مش بنتنا دي شيطانة ولازم تموت رفع السكينة علي رقبتها وخلاص هيدبحها سمعت صوت صرخات عالية مش صوت بنتي ولا صوته طبعا الصوت كان عالي لدرجة إن كل حاجه في الاوضة كانت بتتهز الشباك اتفتح بدأ يقفل ويفتح بصوت عالي كل ابواب الشقة في حالة جنونية الضوء بيترعش بيطفي  وينور لدرجة أن بعض اللمبات إنفجرت الغريب إن بنتي بدأت تضحك وتنادي ماما  ماما
جوزي كان بيترعش بيقرب البنت ناحيته أكتر وهنا لمحتها لتاني مرة ست واقفة علي باب أوضتي لابسة فستان إسود طويل بشعرها الاسود وفروة رأسها اللي كلها فراغات ونص وشها المحترق وعنيها الفارغة بتمشي ببطء ناحية جوزي اللي رمي السكينة وبدأ يبكي مش هأذيها مكنتش هأذيها صدقيني مكنتش هأذيها وفجأة النور قطع وهدأت كل الأصوات إلا من أصوات صراخ جوزي وضحكات بنتي الغير مفهومة المشهد كله بالنسبة لي مش مفهوم كنت ببكي من الخوف ومش عارفة اعمل ايه خايفة أتحرك من مكاني خايفة افضل مكاني الدور يجي عليا حسيت بحد ماسك رجلي اتفزعت في الاول بس سمعت صوت بنتي حضنتها وقربتها مني كل الأصوات سكتت حتي صوت جوزي فضلت في مكاني لحد ما النهار طلع واللي شوفته عمري ما هنساه جسمه كله جروح علامات اصابع وخربشات وأيده مكسورة تماما قربت منه حاولت أكلمه كان فاقد الوعي اتصلت علي الشيخ لقمان واستنجدت بيه وصل فوراً ومعاه دكتور ، الدكتور طلب نقله للمستشفى فورا لأنه شاكك أن في كسور داخلية  ولازم تتعالج فوراً خدناه المستشفي والشيخ لقمان قال إن في حاجه غلط دي روح غاضبة جداً ومتعلقة بالبنت وفي سر مش معروف السر ده عند جوزي وبس ، بعد يوم طويل من الفحوصات والأشعة الدكاترة قالوا إن جوزي عنده ضمور في الاعضاء وكسور متفرقة ومش فاهمين إزاي حصل كده قالوا إن علي الأقل يكون جاي في حادثة وان حالته مش طبيعية وإن المسألة مسألة وقت خرجت من عند الدكتور وأنا مش عارفة اعمل ايه ولا هو مخبي ايه معرفش كل اللي احنا فيه ده سببه أيه دخلت اوضته كان نايم ولما جيت أقوم مسك إيدي وشاورلي أقعد  شاورلي أقرب منه ، قربت منه بدأ يهمس  انتي لازم تعرفي كل اللي حصل
أنا أستاهل كل اللي أنا فيه بس أنا عملت كده عشانك انتي ، عشان أشوف نظرة الحب والسعادة في عينك
مسكت إيده وطبطبت عليها بهدوء وقولتله إهدي وإحكيلي حصل أيه
قال فاكرة وانتي بتولدي الدكتورة قالتلك أن البنت حالتها خطيرة اوي وممكن لاقدر الله تموت صح
قولتله ايوه بس بعدها خفت وبقت كويسة للدرجة اللي الدكتورة نفسها إستغربت تحسنها بالسرعة دي
قال : البنت متحسنتش بنتنا ماتت
سبت إيده وقولتله إنت مجنون بنتنا عايشة امال مين اللي معانا في البيت إنت أكيد إتجننت
قال: بنتنا ماتت اللي في البيت دي مش بنتنا دي بنت واحدة ولدت معاكي في نفس اليوم دفعت فلوس كتير للممرضة اللي  في الحضانة عشان تبدلهم مكنتش عايز اكسر قلبك بعد كل السنين دي الممرضة بدلتهم واحنا خدنا البنت ومشينا ونسيت إنها مش بنتي لحد ما فترة الممرضة جاتلي وقالت إن ضميرها بيأنبها وإن ام البنت جوزها طلقها بسبب موت البنت وإن الام إتجننت وماشية تقول أن اللي ماتت مش بنتها وهي خايفة حد يعرف وصعبان عليها الست ، هددتها إنها لو إتكلمت هفضحها وهقول للناس كلها وعرفت بعد كده إن لم البنت ولعت في نفسها وماتت ومن ساعتها وانا بشوفها في كل حتة وبكدب نفسي وبكدبك كنت فاكر إن ده إحساس الذنب اللي انا حاسس بيه كنت بسمع بنتنا بتتكلم مع حد وكنت بشوفها في كل أحلامي ، أنا آسف بس أنا عملت كده عشانك أرجوكي سامحيني
صرخت فيه بعنف ليه تخطف بنت من امها وتحرق قلبها ليه ، مصعبتش عليك وهي بتتألم ويتكسر قلبها وهي بتلف في الشوارع تدور عليها كنت مكمل حياتك عادي إزاي ومتقولش عملت كده عشانك ، إنت عملت كده عشان أناني وظالم
سيبته وخرجت من الاوضة ومشيت حسيت بحاجه تقيلة ورايا لما بصيت كان نور الاوضة والطرقة ضلمة تماما حسيت بيها واقفة هناك في قلب الظلام بس خوفت أقرب مشيت رجعت لبنتي اللي سيبتها في بيت أهلي حضنتها لاول مرة وأنا قلبي مكسور وعارفة إنها مش بنتي مستحيل تكون مش بنتي دي حتة من قلبي كل الأمومة اللي جوايا بتقول إنها بنتي ياريتها كانت بنتي ياريت كل ده ما حصل
فوقت علي  صوت أمي بتجري عليا بخوف وبتقولي البقاء لله المستشفي كلمتنا وقالت إن الاوضة اللي جوزك فيها حصل فيها حريق كبير جدا ومعرفوش يطفوه وإنه مات ..
بكيت ساعتها عليه وعلي بنتي وعلي حالي ومش عارفة هعمل ايه
بس بعدها وبعد مرور عدة شهور البنت بقت كويسة تماماً وشبح الست إختفي كل الاشياء المخيفة وقفت الأمور كلها رجعت كويسة بس بعد ما خسرت كتير اوي الظالم لازم ياخد عقابه وهو إتعاقب حتي لو كان عقابه قاسي بس أفعاله كانت قاسية
بنتي بتكبر قدام عنيا ومبسوطة بيها بس نسيت اقولكم حاجه من فترة للتانيه  بحلم ي
بأمها بس في شكل تاني جميلة جدا بفستان ابيض وشعر ناعم طويل وعيون جميلة زي عيون سما بنتي ......
الشيطانة_الصغيرة
الجزء_الرابع
Hadeer_saeed