اخر الكوبري (كامله)
كل يوم حد بليل انا وصحابي بنروح نصطاد..
الأحد اللي فات روحنا القناطر كنا تلاته..
هناك اغلب الصيد بيكون من فوق الكباري ، المهم بصينا علي الكباري بس كان اغلبها زحمه ، دورنا ولفينا لحد ما لاقينا كوبري مطرف شويه وضلمه بس فاضي ورايق مش زحمه ، مكنش عليه غير صياد واحد بس ومعاه ابنه طفل صغير عشر سنين تقريبا ، كانوا واقفين بيصطادوا في اخر الكوبري .. قعدنا لوحدنا في نص الكوبري تقريبا وابتدينا نفرش عدتنا ونصطاد .. الجو كان برد جدا بليل علي المياه بس احنا عاملين حسابنا ولابسين جواكت " ، شويه وعدت مركب صغيره فيها اتنين صيادين ، لما شافونا وقفوا وبصولنا باستغراب وقالوا انتوا بتعملوا ايه هنا يا شباب ؟؟ بصينا لبعض وضحكنا ورديت قولتلهم انتوا شايفين ايه ؟ بنصطاد زيكم "" مش أنتم صيادين برده ؟؟ رد واحد منهم وقال : اه صيادين بس المنطقة دي مش كويسه ورزقها قليل شوفوا كوبري تاني اصطادوا منه ""
قولتلوا يا عم الرزق علي الله .. قالي ماشي بس مترحوش ناحيه اخر الكوبري عشان مش أمان هناك .. وسابنا ومشي !!
بصينا لبعض وتقريبا كلنا قلقنا من كلامه بس محدش فينا بين للتاني انه قلقان وقعدنا نضحك وكملنا صيد ""
في اخر الكوبري لفت انتباهنا حاجه غريبه !!
ابن الراجل اللي بيصطاد هناك في اخر الكوبري واقف علي سور الكوبري الحديد وقالع هدومه وبيتمشي علي السور والجو هواء شديد وبرد جدا يعني لا يمكن حد ينفع يقف علي السور وكمان قالع هدومه في الجو ده ..!!
يعني مستحيل حد عاقل يطلع علي السور لانه مينفعش ميقعش .. اكيد هيقع !!
صاحبي نادي بأعلي صوته :
يا حااااااج الحق ابنك هيقع من علي الكوبري !! الراجل بصلنا وعينه كان شكلها غريب شوفناها كويس رغم بعد المسافه والضلمه ومتحركش من مكانه وماسك سنارتة وبيكمل صيد عادي وولا اكنه سمعنا !!
وفجأة شاور لابنه اللي لسه واقف علي سور الكوبري راح ناطط من فوق الكوبري في نص المياه !!
غطس ومقبش تاني وأبوه قاعد بيكمل صيد عادي جدا !!!؟؟
هنا كلنا اتصدمنا وقومنا وقفنا وعرفنا ان في حاجه غلط في الموضوع !!
دول مش بني أدمين اكيد .؟؟
. بصوت واطي كلنا قولنا لبعضنا يلا كله يلم حاجته بشويش ويلا من هنا بسرعه .. ..!!
وفعلا كله ابتدي يلم حاجته بلهوجه وخوف ..!!
بشد سنارتي من المياه عشان المها وامشي لقيت راس الولد طالعه من المياه وماسك الخيط بسنانه وبيبوصلنا !!
ايه ده بقا الموضوع كده كبر ..
طبعا اتفزعت من المنظر ، ورمينا كلنا السنارات في المياه وحد فينا ابتدي يقرأ قرأن بصوت مرتعش .. وبنحاول نجري ناحية اول الكوبري .. لكن شوفنا حاجه ف اول الكوبري صدمتنا ورجلينا اتخشبت ف الارض ومقدرناش نتحرك ..؟؟؟؟؟
اخر الكوبري
محمود زغلول
لكن شوفنا حاجه ف اول الكوبري صدمتنا ورجلينا اتخشبت ف الارض ومقدرناش نتحرك ..
الاتنين الصيادين اللي عدوا علينا في المركب لاقيناهم جايين من اول الكوبري وكل واحد ماسك في أيده بلطه (نوع من انواع السلاح الاييض) وجسمهم كله دم .واشكالهم غريبه جداااا..؟؟
وبيقولوا لينا بصوت غريب :
ليه مسمعتوش الكلام ومشيتوا من هنا ؟؟
دلوقتي هنعمل فيكم زي معملنا في الصياد وابنه " وجايين ناحيتنا بخطوة بطيئة ..
اتصدمنا واتفزعنا.. وكلنا جسمنا بيرتعش خايفين لا مرعوبين ..
بسرعه بصينا ناحية اخر الكوبري ..الصياد لسه قاعد مبيتحركش بس لاقينا الولد الصغير واقف جنبه وبيشاورلنا عشان نروحله ...!!؟؟
طب طلع من المياه امتي وازاي ده ..؟؟.
ثواني واقفين متسمرين مش بنتحرك مش عارفين نعمل ايه .. الثانيه كانت بتعدي علينا سنة
اول الكوبري اتنين شكلهم غريب وماسكين بلطتين وجايين علينا واخر الكوبري الراجل الصياد وابنه الل تقريبا احنا متأكدين انهم مش بني أدمين ، طب نهرب فين ..؟؟
فوقنا شويه من الصدمة .. قولتلهم بصوت عالي مرعوش يلا نجري من هنا .. طب هنجري فين هنا ولا هنا ؟؟
"سبنا كل شنطنا" ولاقينا نفسينا بدون وعي بنجري ناحيه الولد الصغير ( اخر الكوبري) ..
اول مقربنا منه بطئنا خطواتنا وشوفنا الولد عن قرب بس كان غير اول مرة ...
المره دي كان لابس هدومه بس كان كلها مياه وكان شكله حلو بس برده كانت نظراته مرعبة..
شاورلنا بايده عشان نمشي وراه بصينا ورانا لاقينا الاتنين الصيادين بيقربوا مننا اكتر ..
لفينا بسرعة ومكنش قدمنا غير اننا نمشي ورا الولد ..
سبنا بينا وبينه مسافه ومشينا وراه واحنا مرعوبين وجسمنا غرقان عرق ف عز البرد " خايفين الصيادين يحصلونا ..
عدينا علي ابو الولد اللي كان لسه قاعد مكانه متحركش بس لما قربنا اكتر منه كان جسمه كله جروح كبيره ودم ، وفجأة بصلنا وكان منظره بشع رقبته كانت تقريبا مدبوحه وشاور بايده ناحية ابنه عشان نمشي وراه..
طبعا اتفزعنا اكتر من المنظر بس مقدمناش غير اننا نمشي وراه .. جسمنا بردان ومع ذلك غرقان عرق بعضنا كان بيقع ويقوم ويبص وراه من الخوف والصيادين بيقربوا مننا ..
الكوبري خلص عديناه كله ودخلنا ورا الولد في جنينة ضلمة جدا ، بصينا ورانا كالعادة لاقينا الصيادين وقفوا عند اخر الكوبري ومكملوش ورانا وكأن حاجه وقفتهم ...
الولد فضل ماشي قدامنا لحد مقربنا لكشك منور وبعدين مره واحده اختفي .. اختفي وملهوش اي اثر !!
جرينا كلنا ناحية الكشك بسرعه جدا ، وصلنا الكشك لاقينا راجل عجوز بيبيع شاي في الجنينة دي ..
ردت فينا الروح من تاني اترمينا علي الارض ، كلنا بناخد نفسنا بصعوبه وبنقول كلام مرتعش مش مفهوم من كتر اللي شوفناه ..
الراجل جري علينا .. في ايه يا ولادي مالكم ..؟
ايه اللي حصل معاكم ..؟
وجابلنا مياه شربنا ..
ابتدينا ناخد نفسنا ونتكلم
حكينا اللي حصل للراجل العجوز بس مكنش باين عليه اي استغراب ..
قالنا هما طلعولكم ؟؟
اه .. هما مين دول يا حاج وأنس ولا جن وايه حكايتهم .. ؟؟
صحابي كان كل همهم يمشوا ونروح بيوتنا ونبعد من المكان ، مش مهم يعرفوا ايه القصه ، بس انا كان عندي فضول رهيب اعرف حكايتهم ، العجوز طمنهم ان احنا كده ف أمان وبدأ يحكلنا الحكاية وقال :
ده كان "سيد" راجل غلبان وابنه صغير كان اسمه "حسن" ، كانوا بيجوا دايما يصطادوا من المكان ده كان رزقه حلو ليهم ، كانوا بيجوا بليل ويمشوا الصبح كل يوم ..
والاتنين الصيادين الل في المركب دول ربيع وكرم ، بس كانوا عيال بتوع مشاكل ومبيحبوش حد يصطاد ف المكان ده وكأنوا بتاعهم..
ف يوم سيد وابنه كان رزقهم واسع اوي واصطادوا سمك كتير جدا ، وربيع وكرم اليوم ده مصطادوش اي حاجه وكانوا شاربين ومتخدرين ،
طلعوا علي سيد وابنه عشان يسرقوا منهم رزقهم بس سيد رفض واتخانقوا مع بعض ، حسن ابن سيد خد شنطة السمك وجري علي الكوبري جريوا وراه وخدوها منه وشالوا الولد الصغير وبكل بشاعه رموه من فوق الكوبري في المياه نزل مطلعش !!..
سيد اتصدم لما شاف ابنه وهوه بيترمي في نص المياه وجري وحاول ينط في المياه عشان ينقذ ابنه بس هما لحقوه ومسكوه ..
طلعوا بلطتين من المركب وقطعوا جسمه كله لحد ما مات ..وخدوا المركب والسمك ومشيوا بسرعه ..
منظر رهيب حصل قدامي كأنه حلم ، كل ده حصل في دقايق معدوده وشوفتوا بعيني ، انا الوحيد الل شوفت الل حصل بس محدش شافني منهم ، بلغت عن الحادثة وقبل ما الشرطة تقبض عليهم كان اهل سيد مسكوا ربيع وكرم وجابوهم علي نفس الكوبري وانتقموا منهم وبنفس البلطتين قطعوهم ...
ومن يومها والكوبري مهجور ومحدش بيجي عليه ومن وقت للتاني كنت بشوف اشباحهم بتطلع في اخر الكوبري ...
المكان الل سيد وابنه كانوا بيقعدوا فيه والل الحادثه حصلت فيه ...!!
هيا دي القصة كلها .
اتصدمنا اكتر من الاول لما سمعنا بشاعة القصة ، الفجر اذن والصبح ابتدي يطلع ...
خدت صحابي ومشينا ، وحتي شنطنا مرجعناش نجبها وسبناها ومحدش فينا بيكلم التاني طول الطريق ، كلنا في حالة صعبه من الل شوفناه وسمعناه ..!!
دخلت بيتنا جريت علي السرير بس مش عارف انام ، مش قادر انسي الل حصل !!
باب اوضتي خبط .،؟؟
اخويا دخل وقالي خد انت نسيت دول علي باب الشقه جبتهملك وسابني وخرج ..؟؟
ايه ده ؟؟
دي شنطتي والسناره اللي سبتهم علي الكوبري
اه هي الشنطة ....
تمت
محمود_زغلول
اخر_الكوبري
التعليقات على الموضوع