السعادة 😍

((((( السعادة ))))

السعادة ملهاش مفهوم ثابت ، ناس بتبقي في قمة ساعدتها وهي بتمارس رياضة معينه ، او انها تغني او بتعزف موسيقي او حتي بتقرا كتب او روايات ..!!
حاولت امارس كل انواع السعادة زي البشر لكن النتيجة كانت ثابته وديما بفشل ..!! مكنتش بحس بحمااس زي اي حد منكم ..،
انا آدام .. اكيد ده مش اسمي الحقيقي ..
كتير اووي منكم هيكرهوني بعد اللي هحكيه دا هو سعادتي او هوايتي ، يمكن انكو هتكرهوني او دي هتبقا حاجه قليله انتو هتتمنو انكو تقتلوني ، بس انا بحاول امارس سعادتي ف الحياه زي اي حد منكم وف الحقيقة اللي بعملو ده هو قمه السعاده بالنسبالي ..!!

طفولتي..،
كنت الطفل الوحيد للأسره بعد حرمان دام ل 9 سنين زواج وبعد فقدان امل والدي ووالدتي انهم يجيبو اطفال ، والدي كان بيحاول ديما يسعدني ويجبلي كل اللي بتمناه بس انا كنت كثير البكاء ، مفتكرش اني فرحت بلعبة والدي جبها اكتر من نصف ساعة وكسرتها .. بس وقت فرحي الحقيقي كان اما اشوف بكاء طفل او اشوف حد بيتعذب ..
علا كانت طفله معايا ف الحضانه كانت ديما تبكي بدون اي سبب ، فكرت وقولت ليه م انا ممكن اخليها تعيط بسبب اشتريت من مصروفي علبه كبريت واستغليت ان الداده خرجت واشعلت عود الكبريت وحطيتو ف ايدها ..!! حسيت وقتها بأحساس جميل جدا وفرحه وهيا بتتعذب وبتبكي بسببي..، وده كان اول موقف ليا احس فيه بأحساس السعاده والمتعه وفرحه داخليه جميله ..

البدايه....

اول يوم دراسي في الجامعه
اتنقلت للجامعه وبقيت قاعد لوحدي عشان افكر ف متعتي الوحيده ف الدنيا ، كنت تايه وسط الطلاب ..براقب هصاحب مين ! لقيت اتنين واقفين جمب بعض واحد اسمه حازم والتاني اسمه حسن ، كانو قريبين من بعض جدا .. حسيت ان حازم ديما هو اللي بيتكلم اما حسن فمجرد شخص بيجاري الكلام وشكلو حزين ، حددت ان هما دول اصدقائي خلاص ، هما دول مصدر السعادة القادمه ..! 
قربت منهم وقولتلهم ممكن اتعرف عليكوا انا ادم زميلكم هنا، حسن مهتمش اما حازم رحب بيا جدا .. سألتو عن سبب حزن حسن الدائم ..!! قالي دا حزين عشان والدته هتنفصل عن والده !! عشان حسن يبص لحازم بغضب ، ويقوله انت ليه تقولو سر انا مأمنك عليه ؟؟
حازم اعتذر وهو بيقول انا اسف خرجت تلقائي والله عشان انا ادخل واقول ل حسن ، محصلش حاجه انا هبقي صديقك انا مليش اصدقاء ، حسن بص في الارض وسابنا ومشي ، حازم بصلي وقالي متزعلش هو ديما حساس ..!! وتوالت الايام وبقينا اصدقاء مقربين جدا ، حازم ف يوم عزمنا عندو ف البيت ..!! كنت سعيد ..! بس سعادة حسن اكبر وهو بيقول اخيرا هشووف ماكس ! سألت مين ماكس ؟ قال ده كلب حازم كنت اتمنا يكون عندي كلب زيو ، طبعا انا عمري م شوفتو بس من قصص حسن عنو انا حبيته ..! شكرت حازم جدا ! وسرحت في تحفتي الجديدة ! .. روحنا منزل حازم بيت كبير مش ساكن فيه حد غيرهم رحب بينا واستضافنا ف الطابق الثالث دخلنا ، اول حاجه سأل عنها حسن.. فين ماكس ..!!  حازم جابو ونزل يجيب حاجات من الطابق التاني اللي هما كانو قاعدين فيه ، وهنا دار حوار بيني وبين حسن
- حسن ايه رأيك لو نعمل مقلب في حازم و نسيبو يدور علي ماكس ونخبيه ..!!
- لا لا هنستفيد ايه ..
حسن شخصية ضعيفة ومهزوزه ، وعشان كده قدرت اسيطر وقولته يلا بينا ، مفكرش كتير وقال يلا نجرب ! ..
خرجنا من الشقة بنتسحب ، وطلعنا فوق السطوح .. طلعت سكنتي وحسن بيبص عليا بتعجب !! وانا بدبح ماكس ، كانت نظراته غريبة !! قلق وخووف وحزن ! كنت في قمة السعاده وانا شايف شكله وهو بيصفني بالمجنون والمعتوه والغبي ! وبيبكي .. البكاء منه كان بيسعدني وهو حاضن ماكس ..! جريت !! جريت وانا ببكي ، ببكي بكااء هستيري ونزلت لحازم..!! وبقوله حسن قتل ماكس ياحازم .. حازم بصلي بتعجب وابتسم وهو بيقولي ايه الهزار ده !! بكيت اكتر وانا بقوله انا مبهزرش ياحازم  ودي السكينه خد شوفها وتعالي معايا .. حازم جري معايا لما شاف السكينه مليانة بالدماء .. واحنا طالعين فضلت اقولو حسن بيغير منك !! انت عندك اهل بتهتم بيك .. عندك ماكس اللي ديما بيحسدك عليه من كلامه .. حازم اول م وصل المكان شاف الكلب مرمي وحسن بيبكي جمبه عشان حازم ينقض عليه بلا رحمة وحسن مش عارف يتكلم .. حازم ضرب السكينه في قلب حسن من غير م يقصد !! حسن كان بيبصله ووقع علي الارض ، كنت بضحك جوا قلبي .. وحازم بيقول انا مكنش قصدي ياادم !! انا مكنش قصدي !!
قولتله لازم نخبيه لازم محدش يعرف انت كده هتروح ف داهيه ، ايه رأيك نرميه في بلاعه الصرف الصحي اللي تحت بيتكم عشان محدش يكتشف وانا مش هقول لحد ..، اهل حسن كانو بيدورا عليه اليوم كله وجم الجامعه وسألو عليه ، حازم كان قاعد متوتر بيبلع ريقه بصعوبة وظابط المباحث بيسألو ..!!
حازم انكر ولما جه الدور عليا .. بكيت !! بكيت وقولت انا مش قادر ياحازم .. حسن صديقي !! وانت قتلته ..!! بصلي وهو بيحط ايدو علي فمي ..!! الظابط شد حازم وقالي كمل.. وهو بيقطعني وبيقول عشان قتل الكلب بتاعي ياادم  !! قولو.. قولو انو عشان ماكس يا أدم ..!!
كان شعور مش قادر اوصفه .. قشعريرة في الجسم مع احساس نشوي رهيب بالانتصار ..!! .. لو هدفع عمري كله عشان اعيد الاحداث دي مش هتردد وهعمل كده ..!!
.

حفلة تخرجناا ..!!
كنت لازم احتفل ، بس احتفالي مش عادي .. صدقني لو رجع بيا الزمن تاني هعمل الاحتفال ده بنفس الطريقة ..!! وبنفس الابداع .. ايوه ده ابداع ، محمود صديقي قرر انه يعمل حفلة تخرجه في منزله ويعزم اصدقاءه فقط ، اتصل بيا وبيقولي ادم حبيبي انا عازم 25 واحد في الحفلة دي ولازم مساعدتك معايا قولتله هو انت عزمت طارق .. قالي انا مينفعش اعزم الانسان ده ، قولتله محمود انت شخص قلبك ابيض ونقي .. دي اخر سنة هنتجمع فيها وده صديق عمرك ..! وبعد اقناع وافق .. 
طبعا عايزين تعرفوا السبب اكيد ..!!!
طارق كان بيحب ايمي اخت محمود من ورا علمه ، كنت انا الشخص الوحيد اللي عارف الموضوع ده طبعا عارفين انا عملت ايه ..، محمود قرر بعدها انه يقطع علاقته ب طارق وايمي سابت طارق واتخطبت لواحد مبتحبوش .. الامر اللي خلي طارق ينعزل عن كل الناس ويبقي وحيد وحزين ، طلبت من طارق انه يجي عشاني بس .. وهنا اخدت معايا العلبة ، العلبة اللي نفسي فيها .. اهم احتفال في حياتي ..! روحت لمحمود بدري وسابني احضر العصير .. عشان انا احط السم.!! واحطه علي الطاولة .. ورجعت المطبخ تاني اجيب باقي المحتويات ، 
وفي تمام الساعه التاسعة مساءا كان ال 25 شخص مجتمعين ..! كنت بلف بسجارتي حوليهم وهما فرحانين وبيرقصوا وماسكين العصير بعد الأكل .. طارق كنت متوقع انه هيمشي لانه بقي انطوائي جدا وملوش غيري اتعمدت اني اتجاهله عشان يمشي ..!! كنت مبسوط مع كل شفطة بياخدوها .. كنت مستني المشهد الختامي اللي ابتدا يبان بسقوط واحد صديقنا ، ابتدي الحشد كله يقع قدامي .. المنظر كان مخيف جدا للبعض وقمة السعادة ليا .. 18 واحد وقع و 6 لا !! انا طبعا منهم دول اللي ماكنوش بيشربوا العصير معاهم ..!! كان مشهد جميل جدا وانا بحضن محمود.. كان نظراته ليا غريبة ، مش قادر اوصفها وهو بينطق ببطيء ادم..  ادم انا مش عايز اموت .. وانا بهمسله بابتسامة ف اذنو بس موتك هيخليني سعيد ..!! .. الشرطة جت واستجوبتنا..!! وعائلة محمود اتهمت طارق !! اللي من بعدها مقعدش كتير في السجن واتوفي بسبب حزنه الشديد علي مستقبلو اللي ضاع ..!!!

انا بكتب ده وانا فرحان بنفسي جدا واشخاص قليله بس هيا اللي ممكن تعرفني .. بس انا مسافر لبلد تانية انفذ سعادتي مع ناس تانيه خالص ، كمان عشان لو عرفتوني هيبقا شعور جميل !! او انا مش عارف ..  اكيد دلوقتي هتقولو عني مريض او مجنون !؟ بس انا عاقل ..!!
عاقل لدرجة انك هتلاقيني صاحبك المخلص .. واللي ديما بينصحك ويقولك عل الصح عشان تعمله ، عاقل لدرجة اني هبقا اخوك الشقيق اللي متقدرش تستغنا عنو..
علي فكره انا مجرد شخص عادي بيمارس هوايته زي مكلكوا عندكوا هوايات ، وفي الحقيقة بحب هوايتي وهفضل امارسها طول م انا عايش وقريب اووي هحكيلكم موقف اكتر سعاده ...