قصة البلياتشو 👺

(((((البلياتشو)))))

مساءالخير ..!!؟
سمعت ان حضرتك بتكتب رعب ممكن تسمع قصتي ..!؟
ايوه طبعا اتفضل..
انا كنت واحد طايش جدا بس حياتي اتغيرت كلها من يوم م شوفتها ..، مكنتش اتخيل اني ممكن اتغير عشان حد..، انا مكنتش عارف غير طريق الحرام كنت حرامي وقاتل مأجور كتير اووي ناس عانت بسببي ..، كتير كنت بيتم أطفال.. كان قلبي ميت مفيش حد بيصعب عليا..، كنت صعب اتخيل ان هيجي يوم ويبقالي أسره وبيت وولد اخاف عليه استقريت وحياتي اتغيرت تماما واشتغلت ف شركه ومرجعتش تاني للي كنت بعملو..
صدعتك شويه معلش بس حاضر هخش في الموضوع ....!!

- كان يوم واقفه العيد ، وكنت راجع من الشغل في وقت متاخر ، كان واقف الناحيه التانيه من الطريق ، كان لابس لبس بلياتشو وماسك عصاية كان بيحركها بسرعه رهيبه وكان حاطط علي راسو قبعه اللي بيلبسها عاده اي مهرج بلونها الأحمر المعتاد ، كان جمبه شخص قاعد علي كرسي متحرك بس لاحظت انو مكشر اووي ، الاضواء بتاعت الشارع كلها منورة طبعا أجواء رمضان المعتاده ف مصر بس المكان اللي واقف تحته مكنش منور اووي ،كان بيلف العصاية بسرعة رهيبة ، كان معاه شنطة هدايا ، خمنت أنها بمناسبة العيد بصراحه كنت عايز اتجاهله خصوصا اني راجع تعبان ، بس معرفش ليه قررت اني اعدي من الجانب اللي هو واقف عليه، وبمجرد معديت بصلي واتعدل ..! ووقف قدامي ..!

مد ايده عشان يسلم عليا .. مديت ايدي وانا بضحك وبقول "" اهلا..، عرفت انه بيتخذ مجال التمثيل الصامت طبعا فن البهلونين المعتاد .. "" بدأ يطلعلي مجموعة من اوراق الكوتشينة ، عشان كده بصتله قولتله اختار ورقة ؟ بصالي وهز دماغه وحط ايده اللي فيها جونت ابيض علي عينه قال يعني مش شايف انا هختار ايه ، قولت الطف الجو شوية  واخترت الورقة كانت ورقة برقم اتنين باللون الأحمر ، بصلي  ومسك الورقة من ضهرها ! وحطها جوا الكوتشينة وفنط الورقة ، وبعدها طلع الورقة اللي اخترتها ! صقف لنفسه وانا قولتله شيء ميتصدقش ، في الحقيقة مكنتش عايز احبطه في اجواء العيد دي حركة طفولية اعتقد سر قديم معتمدة علي التركيز والعاب الذكاء ولكننا في اجواء عيد وشكله بيعمل كده عشان يصرف علي الشخص اللي في الكرسي المتحرك اللي معاه .. فحطيت ايدي في جيبي وطلعت 50 جنيه ! مال بدماغه وحط ايده علي عينه كأنه بيعيط بطريقة البلياتشوو .. اللي لاحظته نظرات الرعب اللي كان بيبصهالي ال ف الكرسي المتحرك !! .. بس قاطع تركيزي والساحر ده بيشاور بالعصاية بمعني لا انا مش عايز فلوس ، وحط ايده في الشنطة وادني هدية ..
.
شاورلي اني افتحها ، كان خاتم فضه شكلو قديم جدا بصلي وسقف ولبسني الخاتم ..! بعد م لبستو فضل يسقف زي المجانين وبعدها ودعني ، كنت راجع مرهق فعشان كده نمت بهدومي  ، صحيت قولت اغير هدومي ، وانا بقلع البنطلون وقعت منو ورقة !

""السنادي العيد هيكون مختلف غير كل سنه لانك السنادي هتحتفل بطريقتي الخاصه
متقلقش انا راجل عظيم مبديش حد اكتر من حقه ولا بظلم حد ، اما اللي هطلبه منك مش حاجة جديدة عليك دا انت محترف فيها .. اقتل اتنين من افراد عائلتك ..! ومترميش الورقة وكمل قراية .. من 10 سنوات انت كنت بتسرق منزل وشافك طفل صغير زعق في البيت صاحب المنزل وزوجته صحيوا خلصت عليهم وسرقت المنزل ..! 
انت اتجوزت بعدها وخلفت ولد جميل وبما انك اخترت رقم اتنين ف انت هتقتلو هو وزوجتك ..!! 
علي فكره انت اللي اخترت مش انا ..! دلوقت هتقولي ايه اللي يجبرك علي كده ؟ الإجابة الخاتم اللي ف ايدك ، الخاتم اللي انت لابسه مش هتقدر تقلعه او تفكه ، هيطلع من ايدك تلقائي لو انت نفذت المطلوب ! لو منفذتش هيجيلك شلل تام في يومين بس .. زي اللي انت شوفته قاعد علي الكرسي ..!! وهتيجي تقعد مكانو ..!!
في النهاية انت قاتل .. مفيش قاتل بيتوب واظن ان هدية عائلتك السنادي لازم تكون مختلفة ..!!
.
مجرد مخلصت الورقة !! اترعبت !! .. انا من زمان بحاول اكفر عن ذنبي واتوب من يوم م اتجوزت وانا بقيت كويس ومرجعتش للحرام كل الماضي بتاعي انتهي من يوم م شوفت زوجتي ..، كنت قاعد بكلم نفسي بس حسيت ان كام صوباع في ايدي اليسري مش قادر احركهم خالص ..!!
ده مش حلم ده حقيقه مش عارف اتصرف ازاي ..طلعت علي قسم الشرطة .. حكتلهم القصة ، حكتلهم ان في شخص قابلني ولبسني دبله بس محكتش هو بيعمل كده ليه وعايز ايه ، الظابط استغرب من كلامي وضحك ، و فكرني مجنون، يعني ايه مش عارف تقلع خاتم ؟ بس بمجرد محاول بدأت الدهشة تسيطر علي وشه ! جاب ناس تحاول بس مفيش في فايدة ، نقلني في غرفة خاصة ..! حاولوا بكل الطرق حتي بادوات حداده ، او مكنه خرط للحديد !!، كنت تايه..، خلاص بدأت افقد القدرة علي الشعور بايدي .. بس كنت اتمني انها تقف لحد هنا ! رجلي .. رجلي اليسري كانت ابتدت تتقل ..!!
انا مش عايز اروح معاه .. مش عايز اتشل .. مش عايز اقعد علي كرسي متحرك ... كل اللي كان في ذهني نظرات الرعب اللي كانت في عين الراجل المشلول اللي كان علي الكرسي ..

.
رجعت البيت وانا بعرج !! كان اول يوم العيد ! مراتي كانت بتقدملي طبق الكحك وابني الصغير مستني عديته .. كانوا بيبصولي باستغراب ازاي مدتهمش فلوس ك عادتي كل عيد .. ابتسمت وقولتلهم حاضر هخش اجبلكم العيديه .. دخلت جبت السلاح بتاعي وفجرت فيهم طلق مسدسي الصامت المسدس اللي استعملته من 10 سنوات .. كانت اخر عديه ليهم في حياتهم ..!
القاتل ملوش توبة زي مكنت متخيل ، القاتل اكتر شخص جبان .. اكتر شخص بيخاف علي حياته .. خبيت جثثهم والدبله اتخلعت لوحدها .. رجعت ل حياتي ودنيتي تاني سارق وقاتل مأجور ..!
عايز اقولكم النهاردة كان اول يوم اضحك فيه من قلبي ، انا شوفته شوفته تاني .!! واقف جمبه شخص بيسحب ورقة ، عديت مخصوص وانا عمال اضحك !!  ساب الراجل وبصلي وضحك وهو بيسقف ..! ولعت سجارتي ومشيت .. كنت قاعد علي مقاعد الركاب استنيت الشخص اللي كان معاه .. بصلي وهو بيضحك ! قالي اكيد بتضحك من المنظر بس هو صعب عليا جدا واداني دبله.. قولتو هو انتا اخترت ورقة من عنده!؟
قالي اه طبعا
قولتلو الورقة دي كانت ايه !!؟
قالي الچوكر ...!!
ضحكت .. من ساعة مقتلت عائلتي وانا مشوفتش يوم فرحة ولا ضحكت حتي ..، بس انا النهاردة ضحكت دا تقريبا هيقتل عيلتو كلها ..!!