الشيطانة الصغيرة (الجزء الاول)

الشيطانة_الصغيرة
الجزء_الاول
في أحد البيوت الريفية القديمة في وقت متأخر من النهار وقرص الشمس علي وشك أن يغرق خلف اللون الاخضر الشاسع حول البيت الذي يبدو من للوهلة الأولي بيت ريفي طبيعي كمعظم المنازل في القري الصغيرة من الطين يعلوه بعض الألوان وله باب كبير قديم تشعر بإنقباضة قلب عند النظر إليه تسمع أصوات قرآن أحياناً يصاحبها أصوات صراخ مرتفعة مع بعض الأصوات الغير مفهومة إنه بيت الشيخ لقمان
الشيخ : إتفضلوا أقعدوا
الحاضرين كانوا عبارة عن رجل وست وشايلة بنتها علي إيديها ، لا تتعدي ٣ سنين من عمرها
الشيخ : خير أيه مشكلتكم
الست : أنا هنا يا شيخ إتجوزت عبد الرحمن جوزي من ١٠ سنين وخلفنا سما بنتنا بعد تعب وبعد ما لفينا علي كل الدكاترة جت بعد شوق وشقي بالله يا شيخ أنقذني الناس قالتلي محدش هيلاقي حل غيرك …
بدأت هنا في البكاء بشكل هستيري ومتواصل وهي تحتضن طفلتها أكثر وأكثر والزوج يربت علي كتفيها
الشيخ : إهدأو بس وفهموني أيه الحكاية وبأمر الله أعالجها بإرادة المولي عزوجل
عبد الرحمن : مراتي من أول ما بنتنا إتولدت وهي بتشتكي من حاجات غريبة هلاوس وأصوات ، هو أنا بصراحة مشفتش حاجه بس خلينا وراها يمكن كلامك يقنعها يا شيخ إنها مجرد هلاوس
الشيخ : طيب إهدي يا بنتي وإحكيلي بتشوفي إيه ؟!
هنا : من بعد ما ولدت بنتي بشهر لاحظت حاجه غريبة البنت غالبا طول الوقت ساكته وهادية مبتبكيش زي العيال الصغيرة طول النهار هادية ومسالمة ،لكن بالليل الساعة 3 الفجر تحديداً لتبدأ وصلة من الصراخ والعياط اللي مبيوقفش مهما عملنا يتفضل كده لحد اذان الفجر وترجع تهدأ تماماً ومتبكيش ولا تصرخ مهما كانت جعانة أو مبهدلة هدومها أو اي حاجه لحد تاني يوم في نفس الميعاد تبدأ وصلة الصراخ ، سألت دكتور أطفال وقال إن الطبيعي إن الأطفال بعد الولادة ولحد سن معين بيفضلوا صاحيين بالليل ويناموا بالنهار
إستحملت الموضوع وعديته ، بس دايما كنت بحس إن في حد معانا في الاوضة ساعات كنت بصحي وألمح ظل حد واقف جنب سريرها ولما أركز وافوق ملاقيش حد كنت بوهم نفسي إني غلط ولما حكيت لجوزي عرض عليا أتكلم مع دكتور نفسي والدكتور قال إني بعاني من إكتئاب ما بعد الولادة ، وبدأت أقتنع إن العيب فيا
الشيخ : وإنت يا بني ملاحظتش نفس الحاجات دي يعني بكاء في اخر الليل أو لمحت ظل أو حد أو حسيت بحضور شئ ؟!
عبد الرحمن : أنا طول الوقت بره البيت بحكم إني بشتغل حارس في مبني دايما شغلي بيبقي بالليل بس طول فترة وجودي في البيت مبحسش بأي حاجه مش طبيعية ..
الشيخ : حصل حاجه اكتر من كده ؟!
هنا : حصل كتير الموضوع لو كان وقف علي كده بس مكنتش هفكر أسأل حد ، بعد بنتي ما كملت سنة جوزي إقترح ننقل سريرها في أوضة تانية عشان تتعود تنام لوحدها من صغرها وفي نفس الوقت الاوضة جنبنا لو عيطت ولا حاجه هنسمعها ، فعلا نقلت سريرها ولما تنام كنت بنقلها علي سريرها وفي مرة بعد ما نيمتها دخلت أخد دش بس وأنا في الحمام سمعت صوت همسات حد بيتكلم في أوضة بنتي ويلاعبها إفتكرت جوزي رجع من الشغل خرجت روحت لاوضتها الصوت لسه سمعاه هو ضعيف بس مسموع قربت من الباب واول ما فتحت الصوت وقف تماماً ، والاوضة كانت مظلمة ومفيش أي حد غير بنتي اللي كانت نايمة في سريرها وبتبص علي الباب بأكتر نظرة مخيفة شوفتها في حياتي رجعت خطوات لورا خايفة من نظرة بنتي اللي عندها سنة بدأت أنادي علي جوزي بس مبيردش جريت علي أوضتي ورنيت عليه قولتله إنت فين قالي أنا في الشغل مش هعرف أرجع النهاردة في الوقت ده باب أوضة بنتي اترزع بقوة وبدأت أسمع صوت الهمس كان عبارة عن كلام بنغمة ممكن تكون أغنية أنا مش عارفة بس الصوت سمعته كالتالي " تيلي تيلي بوم بوم تيلي تيلي بوم بوم إنه داخل البيت يزور من يجافيهم النوم "
كان في حد بيغنيها بنغمة  بدأت أعيط في التليفون واطلب من جوزي يرجع حالا وفعلا الصوت فضل موجود لحد ما جوزي وصل بس الغريب إن الصوت إختفي أول ما دخل الشقة عبد الرحمن : جريت عليها أسالها في أيه كانت بتعيط بهستريا وبتشاور ناحية أوضة بنتي جريت ناحية الاوضة إفتكرت البنت جري لها حاجه ، كانت كويسة جدا ونايمة ومفيش اي حاجه لما رجعتلها كانت بتترعش من الخوف وبدأت تحكيلي اللي هي شافته حسيت إن في حاجه غلط بصراحة مصدقتش طيب ليه الصوت سكت لما أنا دخلت وليه أنا مش ملاحظ أي حاجه غريبة غير كلامها أو كنت فاكر كده ساعتها إن العيب في هنا مراتي لحد ما شوفت بنفسي ....…………
Hadeer_saeed