هذا هو العشق💕الحلقه السادسه💕

الفصل ( 6 )

جنى :::: : الو

بسام :: : ايوه يا انسه جنى ازيك

جنى :::: : الحمد لله ( بصوت مبحوح )

بسام انا بس كنت ...... عايز اغير الميعاد بتاع

الدرس و الانسه منال سابت نمرتك معايا انا اسف لو كان فيه ازعاج

جنى :::: لا ازعاج مفيش قصدى مافيش ازعاج و لا حاجه يا دكتور , هوه فيه مشكله فى يوم السبت

بسام :: : ايوه هاقابل الدكتور المشرف على رسالتى عشان كده يعنى لو نخليها الجمعه يكون احسن

جنى ::: : مافيش مانع يا دكتور زى ما تحب

بسام :: : الساعه سته كويس

جنى ::: : كويس خالص حاستنى حضرتك قصدى حانستنى حضرتك

بسام :: : طيب انتى صحتك عامله ايه عشان الانسه منال قالت انك كنتى عند الدكتور

جنى :: : انا الحمد لله بس مامى هى اللى قلقانه على اوى عشان كده الدكتور طلب تحاليل و اشعات و انا حاعملها ان شاء الله

بسام بحنان بالغ : خللى بالك من نفسك يا جنى

جنى :: : هه ............

بسام : قصدى يا دكتوره جنى قدامك مذاكره و شغل ولازم تخلى بالك من صحتك مع السلامه

جنى هائمه : مع السلامه يا دكتور بسام

يخربيت كده ......

قاللى يا جنى و انا تنحت زى الهبله ليه كده
ماهو كمان برضه صوته و طريقته و هو بيطلب منى اخلى بالى من نفسى ...............
ده انا كان حايغمى على تانى .............
لا اكيد ده الحب امال ده ايه يعنى
اشتغاله ؟؟؟

وعلى الجانب الاخر
يعنى اعمل ايه فى نفسى يعنى خليك كده اهبل و مفضوح كمان زمانها حست
حست بايه ، بص بقه خلاص ما عادش نافع انا بحب البنت دى بمجرد ما سمعت صوتها نبضى زاد و عرقت و بقت حالتى حاله
بس البنت دى بتحبنى برضه ؟؟

تلاته بالله العظيم بتحبنى , ده صوتها كان طالع بالعافيه , و بعدين ايه صوتها ده ؟ هوه فيه كده
انت وقعت يا بسام و ماحدش سمى عليك

و قبل الميعاد بساعات كانت جنى لاول مره تشرف على نظافة غرفة المكتب بنفسها و تنسق الزهور

وتسال كل خمس دقائق (لا بجيت) بعت الجاتوه .. طب (ليه دام) بعتو الساليزون

جاءت امها و هى منهمكه و سالتها : ايه يا جنى انتى عامله عيد ميلاد و لا درس يا بنتى

جنى :: : معلش يا مامى اصل ده استاذ جامعه يعنى مش مدرس ابتدائى برضه لازم نحسسه بوضعه

الام : هوه شكله ايه دكتور بسام ده و عنده كام سنه ؟

جنى :: : قمر يامامى ، يعنى طويل و كتافه عريضه كده و عينيه عسلى و واسعه و شيك و .............

تنبهت جنى الى ان امها تنظر اليها و تهز راسها و ابتسامتها اخذه فى الاتساع

الام : طيب خلاص يا ام سيد طلعى طقم الجاتوه من البوفيه

جنى :: : مانا طلعته يا مامتى خلاص بعد اذن حضرتك يعنى هى هى

الام : اما نشوف ايه الدرس الفول اوبشن ده ؟ و منال ما جتش ليه لحد دلوقت ؟

جنى :: : فكرتينى صحيح حاتصل بيها

و بعد دقائق

منال : انتى بنت حلال لسه كنت حاطلبك

جنى :: : ايه يا نونى اتاخرتى اوى

منال : بصى انا مش جايه النهارده معلش اصلى كنت مديه المعاد ده لخالد من قبل ما يغير بسام المعاد و النبى اوعى ماما تتصل و تقولى انى ما جتش الحصه انتى عارفاهم عندنا فى البيت

جنى :: :لا يا منال انا تصرفاتك كلها مش عاجبانى لو ما جيتيش دلوقتى حالا حاكلم مامتك و اقولها هه

منال : هاها انا عارفه انك جدعه و ما تعمليش كده عشان خاطرى المره دى بس اصلنا رايحين سينما و حجزنا خلاص التذاكر و حياتى يا جوجو و حياتى

جنى ::: : بصى يا منال انا مش حاكذب لا عشانك و لا عشان اى حد لو مامتك سالت حاقولها منال مش هنا

منال : هى مش حتسال هى فاضيه زمانها بتذاكر لاخواتى و محتاسه فى الطبيخ انت بس ما تتبرعيش و تسالى على و كله حايبقى تمام سلام يا قمر

يا نهار ابيض ده انا مش واخده بالى من حاجه مهمه اوى كده حابقى انا و بسام لوحدنا ...........

دخل بسام المنزل و فتحت له جنى بنفسها الباب و سلمت عليه بايماءه من راسها
اصطحبته الى غرفة المكتب

فى اثناء دخوله كان بسام يفكر .............

ايه الذوق العالى ده , البيت رائع, ما تحسش انه بيت مليونير زى ما بيقولو قد ما تحس انه بيت فنان رقيق كل حاجه فيه رقيقه و بسيطه و جميله يا رب يا اشرف تطلع بطيخه و مش عارف حاجه و تطلع جنى بنت تسعه زينا كده

جنى : : : : منال بتعتذر يا دكتور عشان تعبانه شويه لكن حاتيجى المره الجايه ان شاء الله

بسام : : : : كده طب الحمد ..... اصدى سلامتها

جنى ::: تحب تشرب ايه

و قبل ان يكمل بسام دخلت الشغاله تحمل صينيه عليها عصير فواكه و شاى و نسكافيه و كل انواع المشروبات الممكنه كتوصية جنى

بسام : حاخد عصير بس شكرا

و دخلت والدة جنى :: : اهلا يا دكتور بحضرتك ارجو ان ما نكونشى تاعبينك معانا

هب بسام واقفا : لا يا افندم و لا تعب و لا حاجه

الام : طيب اتفضلو انا حامشى انا بس كنت عايزه اتعرف على حضرتك

بسام :: : حصلنا الشرف يا فندم

جرى ايه يا واد يا بسام دى صاحبتها مش هنا و جابت لك امها ايه ده ايه ده باين عليه فخ جامد
فخ ايه انت فاكر نفسك لقيه شايف مامتها عامله ازاى و لابسه ايه انت تطول
و النبى تتلهى ............

و عبثا حاول بسام الشرح و عبثا حاولت جنى تفهم حتى قالت له :

انا تعبت يا دكتور انت كنت
بتذاكر الحاجات دى لوحدك ده موضوع صعب اوى

بسام ::: : اصل انا بحب الموضوع و غاوى مذاكره حتى و انا صغير كنت بجيب المجلات العلميه و النشرات حتى ما كنتش بافهمها كلها لكن بعد كده عرفت قيمة الاطلاع

بسام ::: : معلش عندى سؤال

جنى ::: : اتفضل

بسام ::: : ايه اللى دخلك جامعة القاهره رغم انك ما شاء الله يعنى تقدرى تخشى اى جامعه خاصه و يكون العدد اقل و كل حاجه اسهل بالنسبه لك

جنى ::: : عدة اسباب اولها انى مش عايزه حد يقول انى داخله صيدله بفلوس بابى لأنى فعلا الحمد لله جايبه مجموع عالى و ثانيا عشان اعز اصحابى دخلو صيدلة القاهره و كنت عايزه ابقى معاهم و ثالثا عشان قريبه من البيت و مامى بتخاف على من السواقه فى طرق الجامعات الجديده اللى كلها خارج القاهره ....... و عشان انا لسه مش عندى رخصه اصلا هاها

بسام : امال سايقه ازاى

جنى :: : انا حاكمل 18 سنه بعد ثلاث شهور ساعتها بقه اطلع رخصه و اجيب عربيه انشاء الله لكن دلوقتى انا باستعبط و اخد عربية مامى عشان هى نادرا ما بتخرج الصبح

و سرح بسام الحمد لله طلعت
البى ام بتاعة مامتها ان شاء الله يجيبولها ميه تمانيه و عشرين زييى يارب ايه الحقد ده يا بسام ... قاسم السماوى قاعد ينق ؟؟

و فجاه و انا و جنى بنتكلم دخل والدها
راجل شكله طيب جدا لكن كان زعلان

جنى : اهلا يا بابى

الوالد : اهلا يا جنى اهلا دكتور بسام نورتنا

بسام :: : سعيد بمعرفة سعادتك يا فندم

و خرج الوالد فورا و بعدها بثوانى خرج بسام و نادى الاب على جنى .........

الاب : ايه يا جنى ده ازاى تقعدى انتى و شاب لوحدك فى اوضه كده مقفوله ثلاث ساعات ما قعدتوش فى الريسبشن ليه انتى فاكره نفسك لسه فى ابتدائى

ايه اللى بابى قاله ده ؟
اول مره يكلمنى فى حاجه زى دى ؟؟
هوه انا باين على اوى كده ان بطنى واجعانى , اصدى انى بحب بسام ؟؟

و بعدين بابى قال كلمته و مشى ..

حتى ما استناش اقول اى حاجه و لا ادافع عن نفسى !ادافع ؟ هوه انا حاسه بالذنب ليه كده ؟ اول مره بابى يزعقلى على حاجه و ما عيطش ده لما كان يبص لى بصه كده مش اللى هيه كنت باعيط علطول

ايوه انا حاسه بالذنب بسام مش استاذ زى اى استاذ
ده انا حتى مش فاهمه حاجه برضه رغم انى جايبه تسعه وتسعين فى الميه فى الثانويه العامه انا الظاهر هاحول تجاره باين ولا ايه ؟ لا لا و بسام اسيبه و امشى ؟؟

و دخلت جنى غرفتها بين افكارها و فتحت الراديو لانها من عادتها ان تتخذ فالا من اول ما تسمعه من الاغانى
فسمعت :قبلك قلبى كان شجره بلا عصافير
جنه بلا الوان
فراشه ما فيها تطير
غيرت الزمان
بدلت البرد بدفا ........................
.
.
.
.

قولى يا ست اليسا قولى و سمعينى

وفى ذات الوقت كان بسام طريق عودته للمنزل يفكر كيف يخبر جنى بحبه
انه يحبها و يتمنى لو كانت من طبقه اقرب له حتى يرتبط بها
انه يعلم تفكير غيره من الشباب قد يفضل ان يتزوج من تعلوه مقاما و مالا لكى ترفعه للاعلى
لكنه لم يكن يحلم غير بجنى , و يتمنى ان يحقق لها هو كل احلامها لا العكس
و قد ضحكت له اليوم مرتين ...........

و فتح بسام الراديو ليتشاغل عن افكاره فسمع :
ضحكت يعنى قلبها مال و خلاص الفرق ما بيننا اتشال ياللا يا قلبى روحلها ياللا قولها كل اللى بيتقال

.
.
.
.
.
قول يا عم عمرو يا هضبة قول كمان .....................😍