قصة لعنة الفراعنة كامله💀 الخمس اجزاء💀
( لعنة الفراعنة ) كاملة
أنا عمرو الصهبي طالب في كلية الأثار
وعاشق لتاريخ الفراعنة ..كل وقتي بقضيه في البحث عن أسرارهم
كانت أحلى فسحة ليا وأنا صغير إني أروح الأهرام أو المتحف المصري واتفرج على العظمة والفن.. بحب أقرأ عن إبداع الفراعنة وإعجازهم الهندسي والعلمي والطبي والفني بس أكتر مجال حبيته مش في دول
بصراحة في حاجات الفراعنة كانت بتعملها زمان مهما العلم قعد يبررها مالهاش إجابة أقنعتني
المجال اللي شدني للفراعنة هوا السحر .. بس هما إزاي قدروا يسخروا الجن تحت إيدهم وكانوا بيتواصلوا معاهم إزاي .. طبعا دي كانت وظيفة الكهنة المرتلين أو "غريو حب" باللغة الهيروغليفية"
دول الكهنة المختصين بالسحر في الوقت ده والمختصين في "الميتافيزيقا" علوم ما بعد الطبيعة أو القوى الغير ملموسة والحاجات الخارقة للعادة والغير متعارف عليها
السحرة في الوقت ده كانوا بينتقوا بينهم اللي يستاهل يعلموه السحر ليكون مع عظماء الكهنة
بس كان لازم ملك مصر من الفراعنة يتعلم السحر .. زي الاتكيت كده دلوقتي ما ينفعش رئيس ما يكونش بيفهم في الاتيكيت
بس منهم الملوك اللي برعوا في السحر ومنهم اللي كان عادي
أكيد الناس دي ماكنتش بتنقش كتابتها في كل مكان كده وخلاص .. اكيد في سبب !؟ أنا متأكد ان كل دي طلاسم عشان كده كانوا لازم ينقشوا كتاباتهم الهيروغليفيه على القبور وعلى الحيطان
زي ماتكون تعويذة حماية ليهم من عالم الانس وكذالك عالم الجن
عشان كده في مقابر فرعونية ملكية صعب حد يدخلها أو يوصلها حتى .. وطبعا تجار الاثار بيتعبوا مع مدعين السحر في عصرنا ده انهم يقدروا يفتحوا مقابر فرعونية او يوصلولها بسهولة أغلبهم بيكونوا كدابين
انا قريت في علم السحر كتير إنما السحر الفرعوني غريب تحسة أعمق وأقوى بكتير أنه لسه صامد كل الفترة دي ..ناس كتير فكروا انهم فكوا رموز حجر رشيد وبكده يبقوا توصولوا لكل خبايا هذه اللغة
اللي من الطبيعي يكون فيها كلمات حروفها تتقري بالعكس لتعطي معنى أخر وتنفذ تعويذه أو تفك سحر
المهم في يوم من الايام في قريتنا اللي كان دايما بيتقال أن تحت كل بيت فيها في مقبرة فرعونية
لقينا أحد أكبر تجار الاثار المعروفين ما بين أهل القرية .. كالعادة مأجر بيت لمدة شهر وبعدها بيرجع البيت لصاحبة عشان الشيخ اللي معاه قاله ان البيت ده تحتيه كنز فرعوني .. فبيأجر البيت شهر بمبلغ خرافي يتعدى المليون .. وطبعا صاحب البيت ما بيصدق يجيله عرض زي ده
وكذالك ما ينفعش يرفض عشان غيره لما رفض بنصحى تاني يوم نلاقيه مقتول هوا وأسرته في البيت
طبعا في الشهر ده بنسمع صوت دق وتكسير وحفر بس عادي ماحدش فينا بيتكلم طول ما الشر بعيد عنك أبعد وغنيله
بس كان في بيت مهجور بعد ما تم تصفية كل اللي عايشين فيه .. ماقدروش يحفروا فيه .. كان دايما نسمع صراخ الناس اللي بتحفر بليل ويلعوا يجروا برة البيت ده كان البيت رقم 17 في القرية من ناحية الترعة
المهم انا كنت بتعلم اللغة الهيروغليفية دي بكل الطرق وكل تحليلات العلماء في تفسير رموزها
لحد ما في يوم قررت أفتح صندوق مقفول بتاع جدي الله يرحمة كان دايما يخاف عليه وبعد وفاته محدش رضي يقرب جنبه أو يفتحه بس أنا متأكد ان الصندوق ده في حاجه لان مع صراخ الناس بليل الصندوق ده كنت بسمع منه صوت طبله بسيطه وبيترج على خفيف كنت بخاف بصراحه لانه كان بيصحيني من النوم لحد ما اروح افتح غرفه جدي واتاكد ان الصوت ده طالع من الصندوق بتاعه بس مارضتش أقول لوالدي حاجه عشان ما يخبيش الصندوق
وفي ليلة متكرره من محاولة تجار المخدرات للحفر داخل البيت رقم 17 سمعت صوت الطبله والدق من الصندوق وانا في غرفتي قومت وانا مقرر اني هفتحه واللي يحصل يحصل
طلعت بره غرفتي في هدوء واتجهت لغرفة جدي وقربت من الصندوق في حذر شديد وانا بحاول ما اتوترش ولا اخاف .. لان شغفي اللي كان مقويي قلبي حبي لاكتشاف الجديد ممكن يموتني الجملة دي أبويا دايما يقولهالي
بس المهم قربت من الصندوق براحة وأول ما حطيت إيدي عليه بطل يتهز والصوت اختفي اطمنت ساعتها
وحاولت افتح الصندق بس واضح ان القفل القديم اللي محطوط عليه مش ضعيف زي ماكنت متخيل روحت جبت شاكوش وقفلت باب الغرفة وروحت ضارب القفل اتكسر من اول ضربة
فتحت الصندوق لقيت حاجه غريبة جدا ما بقتش مصدق دا اللي في دماغي ولا حاجه شبهه ....
نهاية الجزء الاول من قصة ( لعنة الفراعنة )
===================================================
فتحت الصندوق لقيت حاجه غريبة جدا ما بقتش مصدق دا اللي في دماغي ولا حاجه شبهه لقيت زجاجة صغيرة جدا جواها زئبق أحمر شديد الاحمرار .. معقولة السنين دي كلها عندنا كنز في البيت ماحدش يعرف عنه حاجه لقيت جنب الزجاجة دي ورقة ملفوفه بحته قماش عليها كتابات وارقام وطلاسم ..
بعدها سمعت صوت صريخ كالعاده من البيت اللي بيحاولوا يحفروا فيه بس ساعتها رجعت الصندوق مكانه ورجعت على غرفتي وانا حاسس أن أيدي نملت من الزيبق فحطيته في الدرج مع ورقة البردي الملفوفه بالقماش
رغم صغر حجم الزجاجه الا ان وزنها يتعدى الثلاثة كيلو تقريبا ..
كنت قرأت زمان ان الزيبق لونه الطبيعي فضي وبيظهر في الجبال بس مع البرق والرعد ساعات بيحرق الجن فبيهربوا ويستخبوا داخل الزئبق وكل ما لونه كان غامق كل ما كان فيه جن أكتر جواه جزيئات الزئبق عجيبه بتتحمل ممالك كامله من ملايين الجن تستخبي جواه بس عيبه بالنسبلهم
أن الخروج منه مستحيل بسبب قوة الجذب الهائلة لنواة ذرات الزئبق فخروجهم بيكون من خلال كبار السحرة باستخدام تعاويذ وأقسام صعبة المنال حتى يخرجوا من حبسهم
المهم كالعادة رجال عصابة تجار الاثار جت العربيات الجيب وركبوا فيها وهربوا بعدها حسيت أن في حد صحي في البيت بسبب الدوشة اللي عملوها .. قولت انام وبكرة الصبح أشوف الموضوع ده لاني كنت مرهق جدا
صحيت بعدها بشوية لقيت قدامي منظر مرعب .. أشخاص واقفين عيونهم واسعة جدا تكاد تكون أكبر من المتعارف عليه والمألوف بمراحل ورأسهم خالي تماما من الشعر ولهم ذقون طويله سوداء قاتمه وطوال القامة وعينهم كحيله وماسكين رماح طويلة جدا وضخام البنية وانا نايم بصيتلهم برعب وبدأو بتخبيط رماحهم على الأرض بإيقاع منتظم
نفس الإيقاع اللي كان بيخرج من الصندوق .. نظراتهم كانت تحذير وتخويف بعدها لقيت أقرب شخص ليا رفع الرمح وقام غرزة في صدري بكل قوته لدرجه اني سمعت صوت تكسير قفصي الصدري وصرخت جامد
لقتني قاعد على سريري وكنت بحلم وصحيت على صرختي من الخضة
الغريبة اني كنت حاسس بنغزة في قلبي مكان ما ضربني بالرمح بتاعه فضلت قاعد على سريري شويه لحد ما هديت وقومت فتحت الدرج لقيت زجاجه الزئبق زي ماهي شيلتها وبصيت عليها بعد ما النهار شقشق خيوطه بداخل غرفتي
بس لسه لونه أحمر قاتم لا تمر منه أشعة الشمس .. بصيت على البردية الملفوفه بقماش ملصم وفكيتها وفتحت البردية .. لقيتها ورقة بردي عليها كتابات هيروغليفية .. وبما أني خبير في الهيروغليفية عرفت أقرأ اغلب الكلمات
كانت رسالة من إيمحوتب كبير السحرة في الوقت ده زي ماهو كاتب للملك زوسر بيطمنة أن حراس الكنز جميعهم في خدمتة عدا قبيلة شمرا- شينوخ التي عصت الانصياع تحت أوامره فقام بحبسهم في سائل الروح
إلى أن يتم محاكمتهم في القريب العاجل ..ليعترفوا لهم أين قاموا بإخفاء الكنز الاعظم لكبير الألهه آنذاك
بعدها لقيت مكتوب تحت كلمات جيت أقراها مع أول كلمة لقيت صوت الخبط وإيقاع الطبلة بدأ يخرج من الدرج فسكت فالصوت سكت
قلقت بصراحه خوفت أكمل المهم قولت أعدي السطر ده شكله تعويذة كبيره لانه مكتوب بلون ذهبي وغالبا بمية الذهب
بعدها لقيت سطر بيقول أن القبيلة المذكورة سوف تخدم من يخلصها من عذابها المقيت في الحبس .. لفيت البرقية وخبيتها ونزلت أقعد في القهوة اللي بيتجمع فيها رجالة خلف عطية كبير تجار الاثار في البلد
نزلت فعلا ولقيتهم زي ما توقعت فقعدت على طربيزة جنبهم وطلبت شاي ورميت ودني معاهم
واضح على وشوشهم الخوف .. وقعدت أسمع طراطيش كلام كده اللي يقول لقيت أفاعي طالعة من تحت الارض واللي يقول لقيت السقف بينزل دم كانها بتمطر واللي يقولك لقيت كلب بيجري في البيت من غير راس
بعدها قالوا الريس عية لو عرف اننا فشلنا مش هيدينا فلوسنا واحتمال يقتلنا وكانوا بيفكروا يهربوا من البلد
بعدها جالهم شيخ بدقن رمى السلام عالكل وقعد طلب شيشة ...
واضح انه صاحب الرؤية ان البيت ده تحتيه كنز وعمال يعاتب فيهم ويشتمهم عشان طلعوا يجروا
فواحد منهم ساله ليه مش بتدخل معانا طالما انت قلبك ميت بيقوله انا دوري بينتهي اني اقولكم على مكان الكنز غير كده مش شغلي
ساعتها جاتلي فكرة .. هي مجنونة بس هوا قرار وخدته في لحظتها مش قادر شغفي هيقتلني روحت قايم من مكاني و ........
نهاية الجزء الثاني من قصة ( لعنة الفراعنة )
======================================================
ساعتها جاتلي فكرة .. هي مجنونة بس هوا قرار وخدته في لحظتها مش قادر شغفي هيقتلني روحت قايم من مكاني وروحتلهم وقلتله يا شيخنا انا اقدر ادخل البيت ده ..
فقاموا كلهم باصينلي وقالي انت بتتكلم عن ايه ياد انت ؟؟!
قولتله انا عارف وانت عارف انا بتكلم عن ايه.. البيت رقم 17 انا اقدر ادخل احفر فيه بليل
قالي انت مجنون؟!.. انا مش عارف انت بتتكلم عن ايه ؟ . يلا ياد غور من وشي
حسيت بقلق بصراحه فسيبته ومشيت ورجعت عالبيت وقضيت يومي كله بفكر فالغباء اللي انا عملته الصبح .. ماكنش لازم اتسرع واتدخل في شغل تجار زي دول ما يعرفوش الرحمة ..وما يفهموش غير لغة الفلوس والمصالح
وبعدها أمي قطعت حبل أفكاري.. كانت عايزة طلبات من السوق فنزلت أجيبها وانا ببص اشوفهم لسه قاعدين عالقهوة ولا لا.. ولما بصيت مالقتهمش .. فرجعت عالبيت بس قبل ما اطلع البيت لقيت عربية جيب سودا وقفت ونزل منها رجالة خلف عطية أول ما شوفتهم سيبت كيس الطلبات على باب البيت وروحت معاهم من غير اي مقاومة وركبت العربية
حطوا قماشه سوده على عيني لحد ما روحنا بيت فالبلد معرفش مكانه ..واول ما وصلت قعدوني على كرسي وفكوا القماشة من على عيني
ولقيت خلف عطيه قدامي راجل بدقن خفيفه وشنب كبير مبروم لفوق وعنده عين متصابه غالبا مابيشوفش بيها لان كلها بيضا ووشه مجعد بتكشيرة ربانيه كانه مخلوق بيها طول بعرض ولابس خواتم بفص كبير وساند على عصاية مسكة الايد بتاعتها ذهب ..ياما سمعت عنه وشوفته من بعيد في الضلمة بس دي اول مرة أشوفه فيها ..شكله يخوف اي حد
ولقيت معاه الشيخ كفته اللي قابلته في القهوة ..أنا مسميه كده عشان هوا لا شيخ ولا نيله دا راجل نصاب بيدعي انه شيخ وكان حوالينا رجالة خلف .. بعدها خلف بصلي و قالي هتعرف تحفر ؟؟
سالني على طول من غير انت مين ولا عرفت منين ولا اي حاجه !! .. قولتله أيوة بكل ثقة بعدها الشيخ بص للرجاله وقام ضاحك باعلى صوته هوا والرجاله معاه.. الا خلف عطية بيبصلي وما أبتسمش حتى ولا رمش بعينه بيبص على عيني بتركيز بس.. وانا فضلت باصصله بكل ثقة ..
بعدها بص للرجاله قاموا مبطلين ضحك كلهم مرة واحدة .. قالي محتاج كام راجل معاك؟؟ ...
معرفش انا قولتله كده ليه بس لقيتني برد بكل ثقه برده بقوله.. ولا راجل
ساعتها بدأت الاحظ نظرات خوف وحذر من الشيخ ليا بعد ما كان بيبصلي باستهتار في الاول
بعدها سألني قدامك قد ايه وتخلص حفر ..؟؟
قولتله هرد عليك بكره زي دلوقتي .. سكت شويه وبص للارض بعدها بصلي بنظرة كلها شر بعينه السليمة قلقت بصراحه وقام ابتسم فجأة وقالي.. ماشي اتفقنا يا أبو عمو ..سمعت بعدها صوت نفسي كاني كنت غرقان وفجأة طلعت على وش المية
طلعوني من غير ما يحطوا القماشه على عيني ووصلوني البيت .. أول ما دخلت أمي سالتني كنت فين ؟ وسيبت الطلبات على باب البيت ليه ما دخلتهاش أبوك دخلها بعد ما جه من صلاة العشا .. قولتلها كنت مستعجل وعايز أسلم على واحد صحبي عشان مسافر ..وطلعت جري على غرفتي قبل ما نخش في تفاصيل
طلعت ورقة البردي وقعدت اقرأ الكلام اللي مكتوب بمية الذهب لقيت الدرج بيتهز لحد ما خلصت قراية سكت
فضلت قاعد مترقب حاجه تحصل بعدها مافيش حاجه حصلت فضلت مستني لحد الساعه 12 بليل وبرده مافيش حاجه ..لقيت عربيات جيب جت قدام البيت رقم 17 وعايزين يبدأوا حفر فيه وانا مش عارف اعمل ايه ؟!!
المهم جاتلي فكرة غبية قولت اجربها فتحت الزجاجه بتاعة الزئبق الاحمر وحطيت نقطة على الكلام الذهبي بكل حذر شديد لقيت النقطة اتصلت بالحروف ومشيت على كل التعويذه لحد ما الكلام كله بقى باللون الأحمر
قرأتها تاني بس المرة دي قلبي كان بيدق جامد وحاسس أطرافي منملة ..وأول ما خلصت قرأة فيها لقيت البرديه بتولع من الاطراف الاربعه رميتها من ايدي على الارض وحاولت أطفيها مالحقتش وكانت اتحولت كلها لرماد
بعدها لقيت الارض بتتهز تحتي مسكت في السرير والمروحه في السقف بتتهز روحت ماسك زجاجه الزئبق عشان ما تقعش تتكسر وانا شايف من شباك غرفتي البيت رقم 17 بيتهز والناس واقفين بره خايفين يدخلوة
بعدها الارض هديت .. خدت نفسي واطمنت ان كل حاجه سليمه وفكرت اسيب الزئبق هنا عشان ما يضعش مني .. بس قبل ما اسيبة لاحظت حاجه غريبة اوي.. لقيت لون الزئبق متغير وبقى فضي ؟!!
بصتلها شوية وروحت شايلها في الدرج وتقلت هدومي عشان الجو تحت برد جدا .. وقومت نازل رايح لرجالة خلف عطية بس هوا ماكنش معاهم كان الشيخ كفته والرجالة بس اللي موجودين شافوني جاي من بعيد لاحظت ابتسامتهم وهمساتهم ولمزاتهم لبعض عليا
بعدها الشيخ قالي جاهز قولتله جاهز ..قالي هدخل معاك ثلاثة رجاله ودي تعليمات الريس خلف .. عشان ما تسرقش حاجه قولتله براحتك
معرفش انا كنت بعمل ايه ..بس كان جوايا إحساس إني هعرف اعمل حاجه .. بعدها لقيت الشيخ بيقولي انت هتصور البيت هتخش ولا غيرت رأيك ؟؟
ما بصتلوش وقومت داخل انا والثلاث رجالة اللي معايه ..وهما ماشيين وراية خايفين وبيتسحبو ( لو كنت قولت بم بصوت عالي هيلعوا يجروا على برة )
دخلت البيت وقومت مشغل كشاف الموبايل والرجاله نفس الكلام شغلوا الكشافات .. بدأت أحس بهواء اول ما دخلت جوه البيت مع ان كل حاجه مقفله مافيش غير باب الشقة اللي مفتوح أول ما دخلنا كلنا الباب اتقفل لوحده جامد لقيت الرجاله أرتبكت وأترعشت وبيتشاهدوا كلهم واللي بيلعن اليوم اللي جه فيه البلد دي .. انا بصراحه مرعوب أكتر منهم بس خلاص وصلت لمرحلة فعلا اني قتلت نفسي بسبب شغفي ..
مشينا لحد المكان اللي بيحفروا فيه ومش عارفين يكملوه .. قولتلهم أحفروا قالولي انت مجنون هتلاقي حاجات غريبة بتحصل
قولتلهم ما تخافوش ويلا بلاش مياعه..بتكلم معاهم بمنطلق ان دي اخر حاجه هعملها في حياتي فكنت مستبيع ومّوت قلبي .. أول ما بدأو يحفروا سمعنا صوت الخبط والطبلة اللي كنت بسمعها من الصندوق .. الصوت طالع من كل مكان من الارض والسقف والحيطان
لقيتهم بطلوا حفر وبيبصولي ..وواحد منهم قالي ما تيجي نخرج يا عم الحج.. مهو يا أما انت قلبك ميت وواصل مع اسيادنا يا أما انت مجنون مش عارف أحنا فين وهيحصل فينا ايه !!؟
لقيتني بكل قوتي بزعق .. وبقولوا كمل حفر .. صدى صوتي رج البيت كله لدرجه الرجاله بدأت حفر بسرعه وتركيز زي ما يكونوا خافوا مني اكتر .. بصراحه احساس ممتع جدا لما تلاقي حد بيسمع كلامك وبيخاف منك
الموضوع ده اداني ثقه كبيرة اوي في نفسي وحسيت اني مش خايف اطلاقا ...وبالعكس كل ما صوت الطبله بيزيد والايقاع بتاع الخبط بيسرع بزداد حماسة وإصرار وعمال اقولهم يلا كملوا بأعلى صوتي ..وفعلا لقيتهم بدأو يفرحوا ويقولوا الارض بتتحفر أهي ومافيش حاجه .. لقيتهم بيهللو وفرحانين وأتحمسوا
يا بركاتك يا ؟؟ وقام باصصلي مستنيني اكمل
روحت قايله الشيخ عمرو.. الشيخ عمرو الصُهبي .. لقيته ابتسملي وقالي بركاتك يا شيخنا .. حفروا تقريبا متر وبعدها لقوا صخرة ضخمة
قولتلهم احفروا في حته تانيه في الغرفه ..وفعلا حفروها لقوا نفس الصخرة .. فضلنا نكمل لحد ماحفرنا تقريبا الغرفة كلها تحتها هذه الصخره السوداء الصلده تحسها قطعة من الحديد صدى صوتها مكتوم ومش بتتخدش حتى كلهم بيتنفسوا بصعوبه وبدأو يبصولي عشان الاقي حل
ساعتها ..افتكرت الكلام اللي قريته على ورقة البردي فرووحت قايله في سري .. وروحت ماسك الجاروف اللي بيحفروا بيه ..عشان احاول اكسر الصخرة دي ..بس أول ما مسكته ساعتها حسيت بأيدي منملة ولقيت حاجه غريبة بتحصل فضلت أبصلها باستغراب ..والرجاله كلها برقت عينيها ومستغربين من اللي حصل لقيت .......
نهاية الجزء الثالث من قصة ( لعنة الفراعنة )
====================================================
بس أول ما مسكته ساعتها حسيت بأيدي منملة ولقيت حاجه غريبة بتحصل فضلت أبصلها باستغراب ..والرجاله كلها برقت عينيها ومستغربين من اللي حصل لقيت ..لقيت الجاروف أتحول لرمح زي اللي كانه ماسكينه في الحلم .. بصيتله وبصيت للرجاله لقيت وشهم مخطوف منه الدم من الخضه ..قوم عادل الرمح ومخلي السن بتاعه لتحت ووقفت في نص الغرفة وماسك الرمح بايدي الاثنين وقومت بكل قوتي وأنا بزعق ضربت بيه الصخرة .. لقيت الرمح فعلا غرز جواها حسيت بعدها ان أن الارضية بتتهز بينا ..
قومنا طلعنا كلنا بره الغرفة الصخرة بدات تتشقق والشروخ تمشي فيها بسرعه كانها زجاج ..لحد ما أتفتت كلها كانها رمل والارضيه هبطت شوية ..المهم نزلنا والرجاله كملو حفر لحد ما الجاروف ضرب في حاجه تانيه صلده .. بس لما زيحنا عنها التراب لقيناها باب ذهب .. الرجاله قعدت تهلل ويتنططوا ويحضنوا بعض لان ليهم نسبه من الحاجات دي ولو بسيطه .. كملو لحد ما فتحوا الباب وكان تقيل جدا .. ولقينا سلم بعدها
خدنا الكشافات ونزلنا .. لقينا مقبرة مش ملكية ولكنها مليانه ذهب أكتر من الملكية ..أستغربت جدا ..دا كنز مش مقبرة ..قولتلهم محدش يلمس حاجه والا هيتسخط ..قاموا كلهم متثبتين مكانهم من الخوف .. انا طبعا بسرح بيهم بس عشان اعرف اكتشف ايه ده في هدوء .. فضلت ماشي في طرقه كبيرة مليانه ذهب لحد ما وصلت لتابوت ذهبي ضخم محطوط على قاعدة ذهبية منقوش عليها كتير باللهيروغليفيه
ولقيت كتابه متبروزه بالهيروغليفيه فوق القبر .. قريتها أكتشفت ان دا قبر "إيمحوتب كبير السحرة" للحظة خوفت جدا .. الورقه اللي مكتوبه كانت بتاعتة بخط إيده ..ودلوقتي انا جيت لحد مقبرته .. حسيت ان ده إستدراج .. من السحر .. عشان يحرر نفسه .. مش عارف أقول ايه للرجاله دي بس مش عايزهم ياخدوا حاجه من هنا أكيد كلها حاجات مسحورة .وعشان كده كان بيساعدني لما اتحول الجاروف لرمح .. وحاسس قوتي زادت ..
لقيت حد من الرجاله بيقول ما تيجي نفتح التابوت ده نشوف جواه ايه .. قولتله ماحدش يلمس حاجه ..لقيته بيقولي بقولك ايه يا أخينا انت .. احنا ساكتين عليك من الصبح .. وواخدين تعليمات أول ما نلقى المقبرة والكنز نقتلك .. وقام واحد منهم مطلع مسدسه وانا مش ملاحق اتصرف من الخضة وقام ضربني في صدري ...
مكان مظلم وسامع صوت ذئاب بتعوي وجسمي متكتف وسامع ناس حواليا بتتكلم .. عن الذهب اللي بيبقى مع الجثث والاسنان الذهب والخواتم .. وكلام عن الجن والعفاريت ..وبعدها سمعت صوت راجل وست بيضحكوا وبيتغازل فيها بالكلمات ..وبعدها ناس بتقول اسماء ناس .. وتعيط وتقرأ عليهم قرأن ..انا مابقتش فاهم حاجه ومصدع وعطشان وجعان .
لحد ما قررت احاول اتحرك فضلت أحاول .. لحد ما لقيت فعلا الحركه ممكنه بس محتاجه مجهود فضلت احاول لحد ما لقيت ايدي بتتحرك في رمل وطلعت بره في الهوا فضلت ازيح الرمل عن نفسي لحد ما قومت لقيت الدنيا ظلمه وراجل قاعد بيشرب شاي قدامي اول ما شافني وقع اغمى عليه .. قومت نفضت نفسي وأكتشفت أني في المقابر ..ببص مكان طلقة الرصاصه على صدري لسه موجوده .. طب انا ماموتش ازاي ؟؟
كنت حاسس ببرد وكنت واقف كيوم ولدتني أمي بدون اي ملابس ...لقيت بيوت منشرة هدوم روحتلها وخدت هدوم من على الحبل ولبستها كلسون وجلابيه .. وفضلت ماشي مش عارف انا فين لحد ما لقيت ..سوبر ماركت جريت عليه وفضلت افتح في الحاجه واكل واشرب والراجل يزعقلي يقولي امشي من هنا والا هبلغ البوليس ..وجه عشان يضربني ..مسكت أيده لقيته اتشل عن الحركه وايده عماله تزرق لحد ما وقع على الارض بيصرخ ومش عارف يحرك ايده .. خدت الاكل وجريت لقيت محطة قطر .. سالت الناس احنا فين ؟
قالولي بلد بعيده عن بلدنا بساعه .. المهم فضلت اكل وكملت مشي سمعت صوت حاجات ماشيه ورايه .. مشيت بعدها اسمع الصوت تاني ..ابص مالقيش حاجه .. فضلت مكمل لحد ما سمعت صوت صريخ من شقه وناس عماله تعيط .. قومت داخل .. طبعا شكلي مترب ومبهدل .. الناس شافتني بتقولي اطلع بره مافيش فلوس .. المهم فضلت ازقهم لحد ما دخلت لقيت بنت مكتفنها ورابطنها على السرير وفي خيال أسود واقف عليها .. مش عارف الخيال الاسود ده ايه بس شكله شر
ببص في اركان الغرفة في اثنين تانين واقفين في الركن وعمالين يلفوا الغرفة .. قومت رايحلها واهلها يحوشوني ..قومت مزعق فيهم وقولتلهم البنت عليها ثلاث عفاريت .. قامت الناس كلها بصالي وسابوني .. قومت قاعد جنبها على السرير .. قولت التعويذة بتاعة السحر اللي كانت مكتوبه في ورقة البردي .. لقيت الثلاث خيالات السودا بيتجمعوا وبيطلعوا من الشباك .. بعدها قولتلهم هاتوا مياه .. شربت الاول عشان كنت عطشان بعدها بخيت في وش البنت صحيت بصيتلي .. وقالتلي انت مين ..؟؟
قامت الناس كلها قعدت تكبر وتهلل .. ويبوسوني ويحضنوني .. والستات تزرغد .. وفضلوا يقوليلي انت راجل مبروك وبركاتك يا شيخنا .. المهم ابو البنت فضل يبوس راسي وقالي ربنا يباركلك قولي عايز كام وانا تحت أمرك ..قولتله عايز أكل وعايز هدوم ويلزمني ابات.. قالي تحت أمرك وجهزلي كل حاجه وفضلت بايت عنده للصبح
تاني يوم قولتله وصلني للبلد عندي ومشيت معاه بالعافيه من كتر الزحمة.. لان الناس كلها جايه بمصايب عايزيني احلها ..اللي عايز يشتغل واللي عايزة تخلف ولد .. واللي عايز ابنه يخش طب .. المهم اعتذرتلهم ووعدتهم هجيلهم بعدين .. ووصلني لحد بيتي وشكرته .. أول ما قربت من البيت لمحت حاجه غريبه قوي قلبي انتفض وحسيت اني نفسي بقى تقيل بس اكيد ....
نهاية الجزء الرابع .. البقية في الجزء الخامس
==========================================================
أول ما قربت من البيت لمحت حاجه غريبه قوي قلبي انتفضت وحسيت اني نفسي بقى تقيل بس اكيد ..مش اللي في دماغي نزلت من العربية وفي زحمة على باب بيتي ..بزق الناس ودخلت لقيت عزاء ..وعمامي موجودين والناس بتعزيهم ..أول ما شافوني قالولي انت لسه عايش بنحسبك مت ..وعمالين يسالوني كنت فين ؟؟
قولتلهم أبويا وامي فين ؟
عمي قالي اهدى بس وفهمنا انت كنت فين بقى لك يومين ؟؟.. زعقت فيه قالي ابوك وامك لقناهم مقتولين فالبيت من يومين.. وفلوسهم مسروقه وناس شهدت انك انت اللي سرقتهم وقتلتهم.. قومت مزعق وقايلوهم انتوا مجانين .. هقتل أهلي واهرب ..عشان فلوس ..انتوا اتجننتوا .. لقيت واحد بيقولي الكلام ده تقوله في القسم
مابقتش فاهم حاجه .. وخلاص مش قادر افكر ..بس لقيت الناس بدات تقوم تحاوطني ..وفعلا مسكوني وراحوا مكتفني وكلموا البوليس .. وانا مش مصدق اللي بيحصل منهار نفسيا وقعدت اعيط على أهلي وعلى اللي حصلهم بسببي .
وصل البوليس ومسكوني وحطوني في البوكس وانا ساكت ما بتحركش من الصدمه وصلنا القسم .. وقفت قدام مدير المباحث قالي ركز معاية وماتكذبش عليا عشان التهمة هتلبسك .. كنت فين بقى لك يومين ؟؟
قولتله في ناس خطفتني وكانوا هيقتلوني ..وهربت وجيت على هنا
قالي مين الناس دي ؟؟ قولتله رجالة خلف عطيه .. لقيته بيبصلي وبعدها انفجر ضحك قالي رجاله خلف عطيه هيخطفوك وتهرب منهم وترجع حي انت عبيط يلا .. بقولك ايه عشان نقصر على بعض المسافات .. طلع الفلوس اللي سرقتها من اهلك واعترف وانا هخففلك الحكم .. يلا يا عمرو مافيش وقت ..
قولتله انا مش هقتل أهلي .. انا اتخط.....
ما كملتش الجمله لقيت قلم نازل على قفايا وقعني على الارض من امين الشرطه اللي واقف .. وبعدها قاله ارميه فالحجز .. شالني ووداني الحجز غرفة خمسه متر في خمسه متر فيها 20 واحد ..ريحة نتنه ومكان ضلمه ومكتوم .. رماني جوه وقفل الباب وطلع ..سمعت واحد بيقول يا هلا ياهلا بالضيف الغالي قلبوه يا رجاله وسمعت ناس بتتحرك ..
افتكرت اسم قبيله الجن اللي كانت محبوسه في الزئبق قبيله "شمرا- شينوخ" فضلت اقول اسمهم مع التعويذة بعدها سمعت صوت دبدبه الرماح بتهز الارض والحيطان المساجين كلهم وقفوا ومرعوبين والدنيا ضلمه سمعت صوت صريخ يخوف قلبي اتخطف كل اللي في الزنزانه بيصرخوا .. لحد ما الصوت سكت طبعا الصوت كان عالي جدا لدرجه ان العساكر جم جري.. .فتحوا الزنزانه لقوني في وشهم قالولي في ايه ؟؟
ماردتش عليهم طلعوني عالباب وشغلوا النور شافوا منظر يرعب .. لقوا حبال نازله من السقف وكل المساجين مشنوقين وكف ايديهم ورجلهم من الكعب مقطوعه ومرميه على الارض ومغرقين الدنيا دم .. كنت سامع ركب الكل بتخبط .. لقيت العساكر بصالي وخايفين يلمسوني ... فمشيت وعينيا بتطق شرار
العساكر خافوا يمسكوني .. لحد ماطلعت برة القسم .. حاولت افتكر خلف عطيه ورجالته ساكنين فين ؟ مش عارف قومت رايح البيت رقم 17 ..وانا بتسحب في الضلمه .. لحد ما لقيت هناك خمس رجاله من رجاله خلف منهم الثلاثه اللي غدروا بيا شافوني بقوا مذهولين ..من كتر عصبيتي لقيتني باصص عليا من ركن الغرفة من فوق .. مابقتش فاهم ايه ده بقى عندي اكتر من عين.. عيني كشخص وعين متحركه بتطير في المكان كله
فكرت في خيالي ان حد من القبيله يظهر .. لقيت واحد من الجن اللي شوفتهم في الحلم طلع من الحيطة .. الرجاله كلهم نزلوا على ركبهم من الخوف وهما بيستسمحوني .. أكتشفت ان اي حاجه هفكر فيها هتتحقق ..روحت متخيل حد كمان من حراس الجن قام واحد تاني طالع من الحيطه .. قولتلهم قطعوهم .. بدأ الحراس ينزلوا عليهم بالرمح لحد ما قطعوهم فعلا وقولت لحد من خدام الجن شوفلي بيت خلف عطيه مكانه فين ؟ اختفي من قدامي في ثانيه ورجع قالي عرفت المكان
خدت مفاتيح العربية بتاعة الرجاله اللي ماتت وركبتها وطلعت عالمكان والجن طاير قدامي يوصفلي الطريق لحد ما وقف على باب قصر كبير بعيد عن قريتنا بشويه .. نزلت وروحت لبوابة السور لقيت الرجاله اللي بره رافعين سلاحهم وبيقوليلي انت مين؟؟ وقف عندك .. شاورت عليهم الخادم بتاعي قتله .. هوا وكل حرس البوابه وفتحلي البوابه
فضلت ماشي وخدام الجن حواليا وأي حد بقابله أبصله وافكر اقتله يقتلوه .. احساس رهيب جدا بالقوة والعظمة .. اي حاجه نفسي فيها مش محتاج غير اني افكر فيها .. دخلت القصر لقيت كل الرجاله مقتولين لحد ما طلعت غرفة خلف عطية
لقيته واقف وماسك المسدس في ايده .. قالي انت لسه عايش ازاي ؟؟ رجالتي قتلوك وقالولي انك مت!! .. قولتله عشان رجالتك فستك يا ريس خلف .. لقيته بيضغط على ايده اللي فيها مسدس عشان يستعد لقتلي .. قولتله اهدى ياخلف بيه ما تتوترش ..فكرك رجالتك اللي بره دي مش أولى منك بقتلي بعددهم واسلحتهم ..هتيجي انت اللي تقتلني بعد دا كله ياراجل دا حتى عيب
فضل باصصلي .. وقالي انت عايز ايه ؟؟ .. فلوس هديك كل اللي نفسك فيه .. وهخليك تعيش في البلد ملك .. فكر كويس يابني ..قربت منه لقيته بيبصلي وبيرجع لورى.. والسلاح وقع من ايده من الخوف
فضلت ماشي لحد عنده وقومت شايل سلاحه اللي وقع منه وقومت ضربت نار عليه في نصف صدره.. فضلت باصص عليه شويه وهوا بينزف وبعدها طلعت بره الغرفه
أول ما طلعت سمعت صوت خطوات ..أستغربت رجعت بصيت في الغرفه تاني لقيت خلف واقف وغرقان دم وبيبصلي وبيضحك .. قالي فكرك انا بتاجر في الاثار من زمان .. ودا كله ماحدش فكر من اعدائي او رجالتي او البوليس يغدر بيا ويضرب عليا نار .. قام ماسك جلبيته وشقها من عند صدره مليانه علامات ضرب نار
انا اتوترت جدا ساعتها .. قالي انا فضلت اجمع الزئبق الاحمر وتراتيل السحر الفرعوني ومقابر السحرة كلهم ..الا مقبرة كبير السحرة .. ايمحوتب .. الوحيد اللي معرفتش ادخل مقبرته لاني مش لاقي القبيلة اللي انت لقيتها في بيتك .. قلبت عليها الدنيا بس للاسف وقعت في ايدك قبل ما ألاقيها ..
قالي انا عمري 87 سنة ..ماتتخضش مش هيبان عليا .. لفيت بلاد كتير بطلع في اثار عشان اللاقي الزئبق اللي اتحبست فيه القبيلة دي.. وانت لقيته وفكيت سحرهم .. فكرك هيسبوك .. هيفضلوا وراك لحد ما تفتحلهم المقبرة بتاعة ايمحوتب .. الجن مش بيخدم غير كبار السحرة وبمقابل .. ومقابل صعب جدا حد يتحمله .. عايز تقتلني اقتلني لو عرفت .. بس هتعيش حياتك في عذاب ..
بكل ثقة لقتني بقوله .. مافيش حد ما بيموتش والا كان ايمحوتب فضل عايش لحد دلوقتي ..قالي ومين قالك انه مات ياغبي ..أفهم ..ايمحوتب لسه عايش في مقبرته .. ولو مش مصدقني تعالى نروح نشوفها ..ماتخفش مش من مصلحتي أعمل اي حاجه لاني لا هعرف أذيك ولا هتعرف تئذيني
الكلام في المجمل غريب بس انا عندي فضول دايما للاكتشاف قولت خليني ورى الكذاب لحد باب الدار .. وفعلا نزلنا وركبنا عربيته واتحرك بينا لحد البيت رقم 17 ..دخلنا البيت ونزلنا تحت المقبرة ووصلنا لحد التابوت الذهبي وكانت كل حاجه زي ما هي مافيش حاجه أتشالت وأول ما وصلنا للتابوت قالي افتحه
بصيتله بعدم ارتياح وقولتله افتحه انت..ابتسم وقالي لسه مخوني برده ..براحتك انا هثبتلك اني صح .. وفعلا بدا يرفع غطاء التابوت لقيته باب لحفره مش شايف اخرها جبت كشاف الموبايل ونورت جوه عشان اشوف العمق لحد فين لقيته ماسكني من رجلي وبيحاول يشلني يرميني في الحفره حاولت اقول التعويذه مالحقتش ورماني فعلا جوه التابوت ووشوفت الباب بيتقفل وانا بقع وانا بقع وبصرخ لحد ما لقتني خبطت في الارض
وبعدها صحيت لقيتني واقف قدام البيت رقم 17 ومابقتش فاهم ايه ده وببصله من فوق كأن طولي زاد.. بعدها لقيت خلف عطيه طالع من البيت بيضحك وعلى صدره ضرب النار اللي كان من شويه بقيت مش فاهم حاجه بعد شويه جاله الشيخ صحبه روحتلهم عشان اقتلهم واشفي غلي لقيتني بعدي منهم كاني هوا .. بعدها لقيت خلف بيبصلي وبيقولي .. اهلا بيك انت بقيت من الخدم بتوعي ..
ببص على نفسي لقيتني شبه الجن اللي ظهرولي طويل واقرع وجسمي شكله غريب..وخلف عطيه بيضحك ..وركب عربيته هوا والشيخ ومشي بعدها لقيت واحد من الخدام جايلي .. وبيبتسم قالي ماكنتش تأمنله ..سالته انت مين ؟ قالي انا جدك .. احتفظت بالسر بتاعي في الزئبق عشان يجي اللي يحررنا من إيمحوتب بس الظاهر ان محدش هيعرف يغلبه
قولتله وانت أيه وصلك بيه .. قالي خلف عطية هوا ايمحوتب اللي كان في القبر وانا حررته لما كنت شغال مع خلف عطيه الحقيقي زمان .. سحر إيمحوتب طلع من المومياء ودخل في خلف عطية وحبسني في مقبرته ..اللي معمولها سحر بوابات العالم الموازي .. يقدر هوا يتحكم فيك واحنا مانقدرش
قولتله وأيه الحل قالي تصحى من نومك تقتله وتحررني ..قولتله وهقتله ازاي ونوم أ]ه ؟؟ .. قالي هيموت بالحرق..قولتله وقصدك ايه أصحى من نومي..قالي انت في عالم سابق زمنه دلوقتي وقام جدي غرز ايده جوة صدري صرخت
صحيت من النوم حاسس بنغزة ناحيه ماحط ايده .. ببص حوليا مش مصدق قومت من السرير فتحت الدرج .. لقيت ورقة البردي ملفوفه بقماشه عليها طلاسم وزجاجه الزئبق الاحمر ..انا رجعت لليوم اللي حلمت فيه لاول مره بقبيله الجن وصاحي بنفس الوجع في صدري .. قبل ما أقرأ التعويذة او أنزل لرجاله خلف عطية القهوة
ساعتها فكرت تفكيرين .. يا أما أقتل خلف فعلا بالحرق .. يا أما اعيش واكمل حياتي عادي .. فضلت شويه لحد ما قررت احرر جدي .. روحت بعدها فاتح زجاجه الزئبق حطيتها عالكلام اول ما احمرت قريت التعويذه الورقه اتحرقت والزئبق بقى لونه فضي نزلت جري جبت بنزين ..و استدعيت واحد من حراس الجن.. وداني لبيت خلف عطيه قتلت كل رجالته بمساعده خدم الجن ووصلت لحد باب غرفته .. فتحتها وقومت ضارب عليه نار أول ما لمحته ماسبتلوش فرصه يضحك عليا تاني.. وقومت حاطت عليه البنزين ..ومولع فيه فضل يصرخ بقوة .. ويجري في كل مكان وهوا بيولع.. بعدها وقع على الارض محروق ..روحت ابص عليه من قريب عشان اتاكد انه مات وفعلا ما بيتحركش ..
رجعت على بيتي ..وانا مبسوط رجعت أهلي للحياة وقتلت خلف عطيه .. بس حاسس بحاجه غريبه مش مريحاني .. رجعت البيت كل شئ زي ما هوا ..روحت البيت رقم 17 لقيت البيت فاضي مافهوش حتى اثار حفر ولا طوبه سودا ولا حاجه خالص ..
انا مابقتش فاهم حاجه .. فضلت قاعد على القهوة افكر فكل اللي حصل وبيحصل ..لحد ما لقيت الشيخ اللي كان شغال مع خلف عطيه قعد جنبي وبيكلمني من غير ما يبصلي ..وقالي شكرا يا غبي.. بصيتله عشان استدعي الجن ماحدش جه وحاسس ان قوتي راحت .. قالي انت أغبى واحد في القريه دي كلها .. انا خليت الجن يلعب في عقلك الباطن بأحلام وهميه فيها طريقة فك السحر الحقيقية.. عشان تعرف الطريقه و تحرره من الزئبق في الواقع .. وانت صدقته وحررت أخطر قبيله جن هتخدمني وتعرفني مكان المقابر الملكيه كلها.. وكمان قتلت خلف عطية وريحتني منه ..زائد أنك حررتني
حررتك ..روحت باصصله بسرعه وسالته ..انت مين؟؟ مالقتوش جنبي ...
النهاية
بقلم_عمر_ليمونه
التعليقات على الموضوع