هذا هو العشق💕الحلقه العاشره💕

الفصل ( 10 )

و بعد يومين جاء ميعاد الدرس فى منزل جنى ، و كانت لم تر بسام خلال اليومين و لا حتى حاولت ان تفتح الكومبيوتر خشية ان يتهور مره تانيه ، و قررت انها يجب ان تدرس

الموقف صح هى بتحبه لكن هى اللى اخترعت عبارة الحب شعور مش علاقه ، لكن لازم يعرف انه عشان يكون فى علاقه لازم يكون لها اطار رسمى محترم و رغم ان بسام حاول مع نفسه اكثر من مره حتى لا يذهب للدرس

الا انه فى النهايه ذهب فى ميعاده، ولكن كان متجهما على عكس ما تخيلت جنى تماما و جلس معها فى الريسبشن هذه المره حيث ان منال لم تات لان علاقتها بجنى توترت تماما بعد اخر حوار لهما فى الجامعه

قابلته جنى مبتسمه لكن شيئا ما فى عينيه جعلها تبتلع ابتسامتها وتتساءل فيم اخطات حتى يعاقبها هذا العقاب !!؟
انه يتحاشى النظر اليها و ينظر فقط فى الاوراق و يشرح لها كانه مستر حسين بتاع سنه تانيه اعدادى !!

هل اخطات حينما ردت عليه بهذا الوجه الخجول على النت هل كان من الواجب ان ترد عليه بعنف و تقول له انها مش بتاعة الكلام ده عشان يحترمها و يزيد حبه لها ؟هى ما بتحبش التمثيل و ما بتحبش تكون غير نفسها ، دى مسكت نفسها بالعافيه عشان ما تقولوش انها كمان بتحبه ..ايه اللى غيره كده ؟؟

و فى وسط تساؤلاتها رن جرس الباب و التفتت هى و بسام بحركه غريزيه الى الداخل من الباب حيث كانت الشغاله قد فتحته .......

و تمتم بسام سره : الله الله كمان جايلك لحد هنا ....... دى زاطت و الله

دخل شريف المنزل و القى السلام

جنى : : : : اهلا شريف

تمتم بسام لنفسه و كمان بتقولى شريف و لا هامك

جنى : : : : اعرفكم ببعض د. بسام استاذى فى الكليه يا شريف ، شريف اخويا سادسه طب

تقدم شريف و سلم على بسام مبتسما : تشرفنا يا دكتور بسام ارجو تكون جنى بتذاكر و مش تاعباك

بسام متهللا و ضاحكا : انا اللى تشرفت بمعرفة حضرتك ما تتصورش انا سعيد اد ايه انى قابلتك و الله

ثم انسحب شريف للداخل وهو يقول للشغاله: مفاتيحى مع الحارس تحت بيركن العربيه خديها منه لما يجيبها

لاحظت جنى تبدل احوال بسام تماما بعد ان قابل شريف ، وتهلل وجهه و عاد ينظر الى عينيها تلك النظرات الهائمه ،لكن جنى كانت اذكى من ان تفرح بهذا التغيير

بسام :::: ما قولتليش يعنى يا دكتوره ان عندك اخ كبير فى طب

جنى : : : : على فكره انا ما قلتش لحضرتك حاجه خالص اساسا

فهم بسام التلميح و ابتلعه لاحساسه بالذنب اذ كانت تقصد انه مدلوق و انه هو الذى قال كل شىء ماشى يا جنى ماشى

و اردفت جنى : : انا على فكره عندى كمان اختين اكبر منى شاهيناز فى امريكا و شهيره ساكنه معانا هنا فى العمارة

بسام ::: ربنا يخليهم كلهم و انا اسف يعنى اذا كنت بسال على حاجات يعنى ماليش فيها

جنى : : : : مين قال كده يعنى دى معلومات عاديه و كل الناس ممكن تعرفها

ابتلعها بسام للمرة الثانيه و كانت جنى قد بدأت تفهم لماذا تغير بسام لقد فهمت انها راها اليوم عندما ركبت السياره مع شريف فى الجامعه لقد مر عليها لاصطحابها لمقابله احدى زميلاته ، انه يحب زميلته تللك و كان يريد خطبتها ، و قد اصطحب اخته لياخذ رايها فى فتاته

و رغم ان جنى عذرته فمن يحب بشده يغار بشده لكنها قررت الا تدع هذا الموقف يمر

جنى : : : : حضرتك شفت شريف قبل كده

بسام متلعثما : لا ..ايوه ... لا اول مره اكلمه دلوقتى

جنى : : : : اصل و حضرتك بتسلم عليه افتكرتك عارفه يعنى عشان هوه تقريبا دفعة حضرتك بس طب يعنى بيطولو شويه

بسام : : : ايوه عندك حق

و فكر بسام بس يا خفيف هى عرفت انك شفتها النهارده من لخبطتك ، ايوه بس يعنى انا كنت اعرف منين انه اخوها ، برضه يا اخى ما تشكش فى البنت كده يعنى هى واضح جدا انها محترمه

و هنا انهى بسام الشرح و استاذن فى الانصراف و جنى تنظر اليه نظرات ذات مغزى و بدون

كلام فقط بالعينين اتفقا على ان يتقابلا على الشات ، الاشاره وصلت فى لحظه واحده الى عقل كل منهما ، انهما يجب ان يتكلما الليله

دخلت جنى غرفة المعيشه و كانت هناك اختها الكبيره شهيره و والدتها و شريف و ندى ابنة شهيره ، قفزت ندى على ساقى جنى و صاحت:

أنطى جنى حضرتك خلصتى الدرس ؟

ردت جنى : : : : ايوه يا حبيبة أنطى انا مبسوطه
منك عشان ما طلعتيش بره و ما عملتيش شقاوه

ندى : بس حضرتك وشك سخن ليه يا أنطى ؟
هوه حضرتك عيانه ؟

ردت جنى قد زاد وجهها احمرارا :لا لا انا الحمد لله كويسه

شهيره : صحيح يا جنى وشك احمر اوى تعالى ندخل اوضتك اقيس لك الحراره هاهاها

و قامت الاختان و دخلا غرفة جنى

شهيره : اعترفى دلوقتى حالا احسن لك

جنى : يييه هوه انا مفضوحه اوى كده حتى ندى خدت بالها هاهاها

شهيره : لا لا لا ، معقوله العسكرى بتاعنا وشه يحمر كده ، احكى من الاول احسن لك

..
جنى : : : ابدا يا شهيره و الله بس يعنى كل ما اشوف بسام ده قصدى دكتور بسام يحصلى حاجات و بطنى توجعنى و خسيت اتنين كيلو و ......

قاطعتها شهيره و قد تقمصت دور الخبيره :
بطنك توجعك و لا تحسى انك كده راكبه طياره و روحك بتتسحب ؟

جنى : : : ايوااه عليكى نور فعلا كده يعنى بحس الحجاب الحاجز كده مش فى مكانه

شهيره : طيب يا بتاعة علمى علوم هاهاها
التشخيص بتاع الحاله دى ان تقريبا جنابك
بتحبيه و كمان سخونيه وشك دى و احمراره
اكبر دليل على كده

جنى : : : : بس انا خايفه اوى يا شهيره انتى
عارفه انى ماليش خبره فى الحاجات دى خالص و عمرى فى حياتى ما كلمت ولد غير قرايبناو المدرسه بتاعتى كان كلها بنات و الرجاله الوحيدين اللى باكلمهم ابيه شوكت و ابيه طارق جوز شاهنده و شريف و بس ......

شهيره : يا حبيبتى الحب مش عيب ، دى اسمى عاطفه فى الوجود ،المهم الحب ده يكون بناء ما يهدمش ، يعنى يخليكى احسن و يخليه هوه كمان احسن ، و ما تنسيش انى برضه ليه تجربه فى المواضيع دى انا طول عمرى بحب شوكت من و انا فى اولى ثانوى ، بس الحمد لله عمرى ماغلطت و كنت عارفه من اول يوم انه طالما انا مراعيه ضميرى و مراعيه ربنا ، اكيد حاييجى يوم و نتخطب و نتجوز ده انا باسمع عجب عن البنات اليومين دول و مع ذلك انا واثقه فيكى

جنى : : : : جواز ؟ مش عارفه يا شهيره انا لسه ما فكرتش فى كده ،ثم تراجعت جنى عن كلامها : بصى يا شهيره انا باكذب عليكى انا من ساعة ما شفته و انا شايفه نفسى جنبه فى الكوشه بقه من الاخر

شهيره : و مكسوفه ليه ، هما بنات الناس المتربيين كده ، ما فيش حاجه اسمها الحب للحب و الوهم للوهم دى ، النتيجه الطبيعيه

للحب هى الجواز ، يا اما يكون حب من طرف واحد او من غير امل ، لكن لو الاتنين بيحبو بعض لازم يفكرو كده من اول يوم ، بس انا عايزاكى تتقلى يا جنى ، انا عارفه ان اول حب ده بيبقى بهدله مش شايفه شريف اخوكى و اللى بيحصلو .......