تمثال القط الأسود (الجزء الاول)

((((الجزء الأول من قصه تمثال القط الأسود))))

حياتي كلها اتقلبت ل جحيم بسبب حبي للتحف و التماثيل ..!

أنا  مصطفي كمال من شبرا شاب مهووس بالحاجات القديمة والرسومات الغريبة واللوحات الفنية والتحف والأشياء القيمه وأي حاجة أثرية ممكن تخطر على بالك ، أي حاجة بتعجبني على طول بشتريها لحد ما بقى عندي أوضة خاصة بالتحف الفنية ،كانو بيقولو عني مجنون يمكن عشان بشتري حاجات بالنسبة ليهم حاجات غريبة وبقعد أتأمل فيها طول الوقت ! ، نسيت أقولكم إني كمان برسم بعض التحف ، ورسومات لأشخاص وأي حاجة ممكن أرسم حاجات مش شرط تدل على حاجة !
بحب العزلة لكن صدقوني ولا مرة حسيت بالوحده طول ما معايا ريشتي وألواني
في إحدى الأيام نزلت شارع المعز ك العاده ،طبعًا نازل عشان اشتري شوية تحف وحاجات من اللي بحب اشتريها ...!!
في اليوم ده شوفت محل كان فيه حاجات حلوه جدا شدتني ليه ..! بدأت اتفرج لحد ما عيني وقعت على تمثال كان عباره عن قطة سودا أنيابها بارزة وعنيها فيها لمعه غريبه كده شدتني ليها .. !
وفي ظل ما أنا كنت واقف بشاور عقلي كان جمبي سايح وشكله كده عجبته القطة وهيشتريها  ، أنا سكتت وقولت خلاص اشوف غيرها لكن أول ما البياع مد ايده عشان يجيب القطة
عين القطة نورت ولقتها بصت نحيتي !
وفجأة التحفة اللي جمب القطة وقعت على الارض ،السايح ملامح وشه اتغيرت وقاله سوري وأصر يدفع تمن التحفة اللي اتكسرت وقال إنه غير رأيه وخلاص مش عايز القطة !
بصراحة حسيت أني متمسك بالقطة دي وعايز اشتريها..،
روحت علي طول من غير مااخد جولة في شارع المعز على غير العادة
دخلت البيت أمي نايمة قدام التليفزيون "ياسلام عليكي يا أمي" طفيت التليفزيون ودخلت أوضتي غيرت هدومي واتجهت على طول لأوضتي الخاصة ومعايا الشنطة اللي فيها القطه....
بفتح الشنطة لقيت القطة وفلوس معاها !! بس أنا محطتش فلوس هنا ! بسرعة خدت الفلوس وبدأت أعدها بس ده نفس تمن القطه! غريبة اووي هو الراجل رجعلي الفلوس !! ابتديت اقلق
بس قولت ممكن الراجل يكون مخدش بالو مثلا او نسي مهو كان مشغول عشان المحل كان مليان ناس.، علي العموم مش مهم أنا هعدي عليه بكره وأشوف ايه الموضوع ده ، خدت التمثال وقعدت أتأمل فيه واركز في عيون القطة وفي اللحظة دي اتقطع النور..، لكن الغريب كان شعاع النور اللي مصدرو عيون القطة خوفت وبسرعة رميت التمثال ع الأرض وف اللحظه دي النور رجع .!! لكن الغريب إن التمثال متكسرش ولا حتى اتخدش ..!!
اكيد ده إرهاق وتعب هقوم اشرب قهوه عشان افوق واخدت التمثال وحطيته في المكتبة اللي برُّص عليها التوحف وخرجت م الأوضة روحت المطبخ ،عملت القهوة وبفتح الباب لاقيت أمي مبرأة ع القطة وفاتحة بوقها وعلى وشها ملامح خوف أول مرة أشوفها في حياتي ، الفنجان وقع من إيدي اتكسر و النور قطع تاني بحاول أنادي يا أمي في ايه مالك ، النور جه لكن أمي مش في الأوضة ومفيش قهوة وقعت ع الأرض ولا في فنجان اصلا! ازاااي !! خرجت م الأوضة زي المجنون بنادي "ياأمي" أمي نايمة في مكانها امال مين اللي كان جوا ..!!
لا لا أنا شكلي تعبان ولازم أنام ، وفعلا دخلت نمت وكل حاجة كانت تمام ، ولما صحيت الصبح "أمي إنتي دخلتي عندي الأوضة امبارح؟ " بس قالتلي رد غريب اووي " انت مش خرجت قولت لي لو سمحتي ياأمي متدخليش عليا عشان مشغول واقفلي التليفزيون عشان اركز ! مالك يامصطفي " بصيت لها كده بدهشة " لا لااا اه ايوه فعلا آسف ياأمي أصلي تعبان من امبارح " دخلت لبست بسرعة رهيبة ونزلت على شارع المعز لحد ما وصلت للمحل كان مقفول سألت البياع اللي جمبه هو هيفتح امتى ؟ قالي " يفتح ايه يابني المحل ده مقفول من سنين ! " صوتي علي وأنا بقوله " ازاي ياعم انت انا لسه شاري منه امبارح حتى بالإمارة لابس جلبيه صعيدي كده وراجل كبير ف السن" ، بص لي بشفقة وقالي " يخربيت الحشيش اللي مبوظ عقولكم ربنا يتوب عليكم يابني من الهباب ده ،ماجادلتش معاه ومشيت بسرعة وأنا عامل زي المجنون ورجعت البيت ، هو ايه اللي بيحصل ده ! ازاي المحل مقفول من سنين دا انا وقفت واشتريت منو معقول الراجل ده بيقول اي كلام..!!
دخلت البيت وعملت فنجان القهوة وقعدت أتأمل القطة اللي من ساعة ما شوفتها وانا بيحصلي حاجات غريبه جدا، قعدت ع الكرسي بتاعي وادامي اللوحة وبحاول ارسمها واحفظ تفاصيلها ياترى وراكي ايه ! وبعد م انتهيت من رسمها سمعت صوت صريخ ل قطط ف الشقه خرجت من الاوضه جري عشان اشوف لكن ملقتش حاجه بره بس لمحت نار بتشتعل ف الاوضه عندي جريت علي المطبخ جبت مايه بسرعه عشان اطفي النار بس ملقتش النار ولا كأن في حاجه..!! بس انا كمان ملقتش اللوحه اللي رسمتها..!!
"لا لا اللي بيحصل ده غريب جدا أنا مش هستنى أكتر من كده أنا لازم ارمي القطة دي برا البيت لازم اخلص منها بأي شكل "
خدتها وخرجت جري ورميتها في صندوق الزبالة اللي ورا بيتنا
ورجعت البيت بسرعة لاقيت أمي واقعة في الارض مغمي عليها بسرعه فوقتها وسألتها عن اللي حصل قالت مش فكره اي حاجه غير اني سمعت صوت قطه بره خرجت اشوف في ايه محستش غير وانت بتفوقني دلوقت..!!
دخلت جري علي الاوضه بتاعتي لقيت التمثال مكانو بصتلو بستغراب هو ازاي رجع هناا هو انا مش لسا راميه...!! وهنا حصل الاغرب صوت طالع من التمثال ..!!
""لو حاولت تتخلص مني تاني هنتقم منك أشد الانتقام""
قلبي اتخلع من مكانه من الخوف وحسيت اني فقدت القدره علي النطق والتفكير ...!!
بعد م استوعبت الموقف قعدت افكر اعمل ايه..!! اتصلت ب طاهر عاشور صحبي اللي قالي انا اعرف واحد ممكن يساعدنا ف الموضوع ده الشيخ محمد باليل ممكن نروحلو.. ،
وصلنا باليل للمكان اللي موجود فيه الشيخ دخلت انا وطاهر وحكيت للشيخ كل التفاصيل الشيخ رد عليا وقالي ""يابني التمثال ده ملعون ولازم تخلص منو بأي طريقه.... """
.......(((انتظرو الجزء التاني)))...