بنسيون فلاوريس

((((بنسيون فلاوريس))))

انا زياد طارق .. مدير شركة كبيرة في يوم خلصت شغل في وقت متاخر جدا ،ركبت عربيتي واتجهت للمنزل سلكت الطريق السريع عشان انجز ولكن لسوء الحظ العربية عطلت ، والطريق تقريبا مفيهوش غيري ،نزلت ابص علي العربية اكتشفت ان البطرية نامت وعشان تتشحن علي بعد ٤٠ كيلو .. وده صعب جدا ، لمحت بعيني اوتيل قديم شوية ، فكرت كتير قبل مدخل وابات ولكن الجو كان ثلج وعاصفة شديدة ، عشان كده قررت ان ادخل ابات ليلة .. دخلت الاوتيل لقيت شخص عجوز جدا قاعد علي كرسي متحرك

- مساء الخير يافندم ، بعد اذنك انا محتاج غرفة لليلة واحدة بس ..

الغريب انه مردش عليا بس ابتسم واداني مفتاح متعلق عليه ورقة مكتوب فيها غرفة 7 ومطلبش مني اي اوراق شخصية ولا سألني عن اي حاجه ..!!  كان وضع غريب جدا لان عادة علي الاقل بيسألو عن البطاقة الشخصية او اي اثبات عشان الحجز ...!!
ممكن مسألش عشان هبات ليلة واحده ..، مهتمتش ،اخدت المفتاح وطلعت الغرفة ، المكان قديم اوي اعتقد المكان متجددش من ايام الحرب العالمية الاولي .. ديكورات قديمة اوي بس ممتعة ..
دخلت ووانا بغير هدومي لحظت كتاب موجود علي التربيزه ،كتاب غريب ومكتوب بخط الأيد ..
فتحتو عشان اقرا الموجود فيه """  البرد اللي انت حاسس بيه ده مش برد ده هو بيقنعك بكده.. هو موجود .. موجود وقاعد جمبك ،  .. وكمان بيتفرج عليك وانت بتقرا كلامي .. بس لو بصيت عليه ؟ مش هتشوفه .. بس هو شايفك ومركز معاك ..! الرعشة اللي جتلك دي منو اكيد حسيت بيها في ضهرك دلوقتي ..!! انت بتقنع نفسك انك بردان ! زي مانا كنت بحاول اقنع نفسي بكده .. سامع صوتك دلوقتي جوا نفسك وبتقول ده كداب ..! ده مش انت ... ده مش صوتك دا صوت محمود صاحب البنسيون ...!!
هو بيقدر  يطابق صوتك جوا نفسك ! بيقدر يسيطر علي مخك ويتحكم في كل تصرفاتك ..اوعا تكون فاكر انك لو مت هو هيموت او هيسيبك ..؟ هو هيشقلب حياتك ..!!"""

.. انا خوفت ..خوفت اقلب الصفحة .. ونزلت جري بالكتاب للراجل القعيد اللي في الريسبشن  عشان الاقي شكل عمري مكنت اتوقعو ..!! هيكل عظمي هو اللي قاعد علي الكرسي ..!! خيوط العنكبوت !! خيوط العنكبوت ف..في الكرسي .. ومغطيه الهيكل والكرسي.. انا فين !! قربت من الهيكل كان قدامه دفتر مغطيه التراب كأنو متفتحش من سنين كتير ! وقلم جمبو.. ومكتوب علي الدفتر ... بنسيون فلاوريس ..ملك الزوجين ميرنا إيهاب و محمود الشرقاوي .. الدفتر بتاريخ 13/5/1890 . ومكتوب تحت رقم 8 .. في اللحظة دي انا هزتني رعشة غريبة اول مرة احس بيها خصوصا لما حولت افتح باب الأوتيل ومكنش بيفتح ..!  طلعت تليفوني ابص فيه لقيتو مفيهوش شبكه !! سناني بتكتك واطرافي منمله ..لا مش من البرد .. انا كل اللي في دماغي اول سطر اللي قريتو من الكتاب وبدأت اسمع أصوات غريبه لناس كتير بيتكلمو ف نفس الوقت ..!!
مسكت الكتاب وفتحت الصفحة التانية ..
"" انا عارف انت بتفكر في ايه دلوقت .. بتفكر تنزل تحت ! انت عارف لو نزلت هتشوف ايه ؟ هتشوف هيكل عظمي للراجل اللي استقبلك  .. وهتسمع اصوات غريبة تحت ..!! مطولش تحت ارجوك مطولش تحت .. هتلاقيها .. هتلاقي ميرنا ظهرتلك وهتبقي دي نهايتك ! .. مش مصدقني..؟

طلعت جري علي الغرفه وقفلت الباب كويس وكملت قرائه..

دلوقت بتفكر انا مين.. انا..  انا كاتب ! كاتب احمق طول عمره بيدور علي كل ماهو غريب .. بيحب يكتب قصص حقيقية ! عرفت ان في بنسيون في روح شريرة لزوجين موجودين ف المكان من قبل سنه 1900  ، الزوجه جت الاوتيل لقت جوزها بيخونها مع واحده ف غرفه رقم 7 ، دخلت عليهم وقتلتهم.. بس هيا من حبها ليه قتلت نفسها في نفس المكان بعد مقتلتهم ..  لو انت قريت كلامي لحد هنا هتلاقيه بيخبط عليك دلوقت .. قوم افتحله متخفش ! اما لو لسه مخبط..

كنت لسه مخلصتش السطر عشان الاقي الباب بيخبط فعلا ..تخبيطة غريبة !! كنت خايف .. خايف ومرعوب جدا ..!! بتحرك ببطيء ناحية الباب ، وفتحت الباب .. دخلي شاب لابس بدلة قديمه ..! بيتكلم بتهته وهو بيقول جيتلك اهه زوجتي مسافره ومش هنا عشان كده قولتلك تعاليلي البنسيون .. كنت ببصله و جسمي بدا يترعش انا في حلم .. في حلم صح !! .. صرخت في وقولتله انتو عايزين ايه مني .. بتلعبوا معايا ليه ؟؟ انا مأذتش حد ..، بدأ بعديها يمشي ف إتجاه الحيطه ..واخترق الحيطه كأنو هوا .. ودخل الغرفه 8 اللي جمبي ...قفلت الباب عليا وانا بنهج ..!! كنت بنهج وببكي ! كنت خايف .. ومسكت الكتاب.. عشان اكمل قراية !!

.
اما لو لسه مخبطش فكمل قراية .. بس اعتقد انه هيخبط عليك دلوقتي ..!
""قلبت الصفحة "'
انت عرفت انه محمود اكيد .. عرفت كمان اني مش بضحك عليك ..! لو الباب خبط مرة تانيه اوعي تفتح !! اوعي تفتح .. دي نصحتي ليك ! لأنها مراته ميرنا ولو دخلت هتقتلك ..!!  عايز تخرج من هنا اكيد .. قدامك دلوقتي 20 دقيقه .. 20 دقيقه تنزل تدور فيهم علي مفتاح  الغرفه 8 .. حاول تلاقيه ، دور في كل مكان .. لو لقيته خرج الهياكل من الغرفة .. وحاول تدفنها في المقابر مجرد متنزل بالهياكل دي علي السلم باب البنسيون هيفتح لوحدو .. اتمنالك التوفيق واتمنا تلاقي المفتاح انزل خلاص متكملش قراية ..

نزلت جري تحت !! دورت في كل مكان مش لاقي المفتاح.. كل ده وانا سامع الاصوات المرعبة ال كان بيقول عليها ..كنت متوتر..  وكنت خايف .. وكنت مرعوب ! ملقتش حاجة كدا عدا 17 دقيقة .. جريت علي الغرفة تاني ..! وقفلت عليا الباب ومسكت الكتاب تاني عشان اكمل قرايه

"" طبعا فشلت !! فشلت زي م انا فشلت !! .. ولكن مهما كان مش هتبقي اغبي مني .. انت اكيد !! اكيد دخلت هنا غصب عنك ..!!  لكن انا دخلت بكامل ارادتي عشان اتاكد من اسطورة طلعت حقيقية  .. حاول تستخبي .. حاول تستخبي ياصديقي زمان ميرنا جايه ..!! الباب هيخبط دلوقتي .. استخبي في اي مكان ..! بس قبلها اكتب كل اللي حصلك يمكن تقدر تساعد اللي هيخش بعدك ..

  .. الباب خبط فعلا .. الخبط شديد جدا مكنتش عارف استخبي فين ! نزلت تحت السرير .. عشان الاقي هيكل عظمي ببدلة قديمة منكمش في نفسه ومستخبي !! نمت جمبه وانا بترعش .. حطيت ايدي في جيبة عشان الاقي بطاقة شخصيه قديمة مكتوب فيها كريم محمد ..!! انا كنت عارف مين ده كويس .. ده كان كاتبي المفضل .. اللي كل الناس كانت بتتكلم عن اختفاءه فجأه وأنهم مش قادرين يتوصلو ل مكانو ..!! كنت بحب اووي قصصة المخيفه واللي كانت ديما حقيقيه.. !!
.. الباب ...الباب اتكسر...!!