قصة احبني ❤الجزء الثاني❤

يا مرآيتي .. يا مرآيتي .. هو أنا جميلة فعلاً ؟!
أنا بحب ضحكتي بحبها أوي بحب عيوني وبحب إنعكاس الشمس فيهم بحب اللمعة اللي بتظهر في عنيا وأنا مبسوطة حتي بحب شكل الدموع في عنيا بيفكرني بالمطر
بس كل ده محدش خد باله منه قبل كده محدش حبني كده علي بعضي بكل مشاكلي وعيوبي محدش شاف الحلو اللي جوايا
هما نظرهم ضعيف ولا الوحش عندي أكتر حقيقي مبقتش عارفة بس ثقتي في نفسي ضايعة والشوية اللي فاضلين عندي أقل كلمة تقدر تهزهم بتخيل ثقتي في نفسي عاملة زي شجرة في موسم الخريف ورقها بيقع قصاد الريح بس الريح مكنتش مشكلتي , مشكلتي كانت الكلام اللي الناس بتقوله بمنتهي التلقائية الكلام اللي بيكسر كتير جواك وإنت مبتسم إبتسامة عريضة مخبي وراها بقايا روحك
النهاردة كان أسعد يوم في حياتي شوفته للمرة التانيه دخل الاتوبيس بص عليا وإبتسم لفيت وشي الناحية التانية بضيق مصطنع إبتسم أكتر وقعد علي الكرسي اللي جنبي
بصيت من الشباك في محاولة مني للسيطرة علي مشاعر الفرح الطفولي اللي جوايا دلوقتي
محاولش يتكلم معايا بأي شكل أو حتي يبص ناحيتي
علي العموم مش مستغربة أصلا هو أنا إمتي إتحبيت إمتي آخر مرة حد شافني أصلا بصراحة مش فاكرة عشان عمر ما حد شافني قضيت أغلب عمري شفافة منسية طلعني من أفكاري اللعينة صوته لو سمحتي بصتله قام وقف وطلع ورقة من جيبه وقالي أقري دي ونزل قبل ما أخد أي رد فعل كان عندي فضول إني اقرأها فتحتها
" ليلي مش كده ؟! شوفت إسمك علي الكشكول ، أنا آسف إني بقتحم حياتك بالشكل ده بس كنت عايز أقولك حاجه مهمة ، أنا تقريباً كتبت الورقة دي من أول يوم شوفتك وباخدها معايا كل مكان عشان كنت متأكدة إني هشوفك تاني صدقيني معرفش الإحساس ده جاي منين المهم طبعا أنا مش متوقع رد فعلك إذا كنتِ هتقرأي الورقة أصلا أو هترميها في وشي أو هتتهميني حتي بالتحرش 😂
بس حبيت أقولك ، الحزن لا يليق بيكِ أبداً إنتي شبه رسوماتك حزينة ووحيدة ، بتدافعي عن نفسك بالسور اللي بنتيه حوالين روحك وقلبك وفاكرة إنه هيحميكي ، أقدر أقولك إن السور ده حاجب عنك الشمس ، وزهرة جميلة زيك مينفعش تنمو غير في الشمس 💜
ممكن متصدقيش كلامي أو تعتبريه مجاملة من شخص غريب مجنون بس صدقيني تستاهلي تبتسمي شوية أكتر للحياة ، إنتي مش ناقصة حاجة ، الحياة ناقصها كتير وإنتي غايبة عنها وعايشة في خيالك ، شرفينا شوية في أرض الواقع هنتبسط بوجودك 💜

إمضاء: الغريب المجهول
يوسف
مقدرش أوصفلكم سعادتي كنت حاسة إني فراشة لأول مرة كان عندي جناحات وطايرة فوق الغيوم كنت خايفة فجأة تتقص جناحاتي وأقع لحد قلبي ما يتكسر  ، بكيت لأول مرة في حياتي أبكي لأني فرحانة لأني مش عارفة أتحكم في ضربات قلبي اللي كنت حاسة إن الناس كلها سمعتها ، منمتش يومها من فرحتي حاضنة الورقة زي لبس العيد بتاع زمان ، هو أنا ليه حاسة إن النهاردة عيد ، يارب إحساسي ميخذلنيش المرة دي ، أكيد مستغربين كمية السعادة دي بس لو عمر ما حد شافكم أو حتي إنتبه لوجودكم هتعرفوا يعني أيه حد يشوفك جميلة ، كنت عارفة إنه هشوفه تاني بس يا تري المرة دي أبتسم ولا افضل أتجاهله مش عارفة بس عارفة إني هشوفه .......
أحبني
الجزء_التاني
Hadeer_saeed