قصة احبني❤الجزء الثالث و الاخير❤

تفتكروا أيه اللي يجبر حد إنه يحبنا يتقبل عيوبنا مهما زادت ؟!
أنا أول مرة أفهم إن محدش هيحبني طول ما أنا مش حابة نفسي ، بس هو أنا لو مش عارفة أحبني أو أتعامل مع عيوبي أعمل أيه ؟!
مكنتش محتاجة أي حاجه غير حد يطمني ويطبطب علي كتفي ويقولي ، كل حاجه هتبقي كويسة ، أو إنتِ تستاهلي كل حاجه حلوة ، الكلام ده كان هيفرق كتير لما يجي في وقته ، دخول يوسف في حياتي في الوقت ده كان الإيد اللي بتتمد عشان تنقذني ، بس أنا كنت الغريق اللي بيتعلق في قشة ، أي قشة والسلام توصله للشط ، ومكنش عارف إنه هيغرق أكتر .
من آخر مرة شوفته وأنا مش قادرة أبطل تفكير فيه ملامحه الهادية ، لون الشمس اللي بيلمع في عنيه ، الدنيا اللي إبتسمت لما هو إبتسم ، جوايا أحاسيس عكس بعضها مليون إحساس بيتخانقوا جوايا نفسي أشوفه وخايفة من التمادي في الحلم ، شكله المطمن ، بس أنا معرفش عنه غير إسمه
وحشني ، مش من حقي أفكر فيه
خرجني من التفكير صوت أم كلثوم بيتردد في الخلفية " مخطرتش علي بالك يوم تسأل عني"
ياتري بيفتكرني ؟!  ياتري شايفني إزاي ؟!
جريت علي المرآية , ياتري خد باله من لون عنيا ؟! أو من رعشة صوتي حتي وأنا بحاول أبقي قوية ؟! طيب خد باله من لون الأحمر اللي ساكن في خدودي أول ما يبتسم أو ما تقابلني عنيه ، أكيد مخدش باله والدليل إني بطلت أشوفه ، أكيد مش بيحاول حتي يشوفني 
معرفتش أعبر عن إحساسي وأرسم أول حاجه تخطر في بالي قررت كل ما أفتكره أرسم بس هو أنا بنساه أصلا في يوم هنتقابل ويأخد كل الرسومات دي بنفسه .
فات شهر وخلاص بدأت أفقد الأمل إني أشوفه عنيا بتدور عليه طول الوقت ، أول ما أشوفه هحاسبه علي كل التأخير ده .
بالليل بفتح موقع صراحة بالصدفة لقيت رسالة من كام يوم بتقول :
آسف لتاني مرة علي تدخلي الغير مبرر في حياتك واللي أنا شخصياً مش عارف سببه ، وآسف علي طريقتي الغريبة في التواصل معاكي بس أنا بتصرف بالطريقة الوحيدة اللي أعرفها ، أنا بحثت عنك كتير تخيلي دورت في كام أكونت لحد ما لاقيتك فضلت أيام مش عارف اوصل ما أنا مش معايا أي معلومات غير إسمك وكليتك بس
إمبارح كنتِ منزلة " مخطرتش علي بالك يوم تسأل عني " فحبيت إنهاردة أقولك إني مخطرش أي حاجه علي بالي غير إن أسأل عنك وبس ، عايز أقولك إن الوردة مبتفتحش في يوم وليلة بتأخد وقت كتير ، إنتي كمان خدي وقتك وإفتحي قلبك علي الدنيا ، أنا موجود هساندك في الوقت اللي هحس فيه إنك محتاجة حد جنبك ، عارف إني لو حاولت أقرب بأي طريقة تانية هبعدك ، عارف كمان إنك خايفة ، قلقانة  وأنا مش هقولك متخافيش مش هتحكم في مشاعري جربي كل المشاعر من غير ما حد ما يتحكم فيها
إمضاء :الغريب المجهول
يوسف
خلصتها وعنيا دمعت ، الطبول بتدق في قلبي يمكن صوت قلبي دلوقتي واصل لآخر الشارع
أنا عمر ما حد حبني ولا حتي إهتم بيا غيره بس غريبة ليه ساب كل البنات الحلوين وجالي أنا بالذات ، أنا مش جميلة أو بمعني آخر مش مثالية وهو يستاهل واحدة مثالية ، الغريب إني لأول مرة أحس إني حلوة ، لأول مرة أحب أبص في مرآية ، طول عمري بيني وبين المرايات عداوة بطلت أبص علي نفسي بقالي كتير مبقتش أشوف نفسي غير في عيون الناس ، وأكون صورة عن نفسي لحد ما بقيت صورة من النسخة اللي إخترعوها مبقتش أنا ، مبقتش ليلي اللي أعرفها بقية ليلي اللي هما شايفينها ، عشان كده كنت دايما برفض أي كلمة حلوة ، اي مدح ، أو أي حاجه تغير الصورة اللي رسمتها لنفسي كنت بشوفها مجاملة لطيفة مش أكتر .
أنا غبية ، غبية جداً عشان دايما بشوف بعين الناس وبطلت أعرف نفسي كويس ، غبية عشان أنا أستاهل أحب نفسي أكتر من كده ، غبية عشان لسه لحد دلوقت شايفة إني متحبش ، وفجأة إتحولت كل سعادتي لحزن عميق مليان بذكريات الماضي السيئة بكل الكلمات اللي سمعتها في يوم ، لكل الأكاذيب والمواقف والخذلان والألم ، مكنش لازم أشوفه مكنش لازم أقابله ...
عدت أيام كتير وأنا بتعمد مفتحش الموقع خلاص مش عايزة أشوف أي رسايل منه كنت بحاول أشغل نفسي عن التفكير فيه ، لازم أرجع أقفل علي نفسي أبوابي من جديد كان خطأ كبير مني أسمح لغريب يقتحم عزلتي وقلبي يدق بسببه لأول مرة ، كان لازم أفهم إن قدري أكون لوحدي وانا راضية بقدري .
عدي أسبوعين من الروتين الممل رجعت لحياتي وبطلت أفكر فيه أو أنا خدعت نفسي بكده مش هسمح لنفسي أحبه ، مش هسمح لنفسي أضعف أنا مش ضعيفة ، بس أنا ضعفت وفتحت الرسايل والغريب إن مكنش فيه غير رسالة واحدة
حاسس إنك مش كويسة ، حزينة  ووحيدة ومستسلمة لليأس ، مش عارف هل أنا السبب في حالة الحزن دي أو لا ؟! 
أنا مقصدش أبداً تزعلي أنا تقريباً أكتر حد في الدنيا نفسي أشوفك مبسوطة ، أو نفسي أشوفك تاني عموماً ، إمبارح شوفتك كاتبة
"أنا لا أصلح للحب ، أنا لا أشبه الأخريات"
وحقيقي ده سبب يخليكي تصلحي للحب أكتر إنك مميزة ومش شبه حد ، عارفة أنا تقريباً الكام مرة اللي شوفتك عمري ما شوفتك بتضحكي بس أنا تخيلتك بتضحكي وفجأة حسيت الدنيا بالألوان تاني كفاية أبيض وإسود وإضحكي ، موسم الربيع قرب  وهتزهري ، هانت ......
إمضاء: يوسف
معرفش ليه قريتها وإبتسمت ، قلبي اللي إبتسم سامعة صوته بيضحك كمان .
ولو مرة هعترف " أحببته لأنه جعل قلبي يبتسم "💜💜
أحبني
الجزء_التالت
Hadeer_saeed