رباط الدم (الجزء الرابع)

رباط_الدم4

ومتفتحليش ليه يا آصف ده انا حتي مش غريب !!
_ مكانك مش هنا يا داسم مشكلتك معايا انا مش هي
اومال مكاني فين يا اصف في بني عامر مثلا ! دول اللي سبتنا عشانهم وفاكر انهم هيحموك من دهار ؟ كنت فاكرك ازكي من كده بكتير
-طريق دهار اخرته جهنم يا داسم والساحر مش ضمان بالعكس ده حجه هتكون ضده قبل م تكون معاه
-هما كمان غسلوا دماغك برقان ده فعلا حكيم قدر يقلب اقوي جندي في قبيلتتنا ضدنا بس اللي ميعرفوش ان ل دهار ولا الساحر هيسبوك  ف حالك برقان حكم عليك بالموت من اول يوم دخلت فيه قبيلته وهي قبلك
- انت جاي ليه يا داسم ؟
-الاوامر يا آصف م انت سيد العارفين ...
اثناء حديث داسم فتحت بوابه من اللهب الاسود لتستطيل يد داسم فجأه وتتكور مخالبه ممتده لتنال فرحه ..
اغمضت فرحه عينيها بقوه لتفتحهما علي صوت هدير مياه بقربها ما ان رأت المنظر حتي شهقت ..
-انا فييين ؟
- وادي عزيف ,متقلقيش انتي هنا في امان محدش يعرف المكان ده غيري واتنين كمان
-ثانيه واحده ثااااانيه واحددددده هو مش كان في نار من شويه وعفريت هياكلني واا
_ انا بقول نرجع عشان ياكلك ويريحنا من جو الروايات الحمضااانه  بتاعك ده
_ هما العفاريت بقيوا قفوشيين كده ليه اليومين دول ...الا يعني ايه عزيف ده ؟؟
- يعني صوت الجن يا فرحه
- يا مامي
- لا يااا شيخه كل اللي حصلان ده مخوفتيش منه وجايه تخافيلي من اسم وادي !! صداااع من كتر الرقه !!!!
- اه رقيقه غصب عنك ووسع كده وريني الوادي بدل م انت واقف كده شغال رغي رغييي رغي
اتجهت فرحه ناحيه جدول المياه لتستكشف المكان وخلفها آصف لتباغته بسؤالها ..
- هو مين الكائن اللي كان في اوضتي ده وكان عايز ايه منك ؟
- ده داسم الدراع اليمين لدهار زعيم قبيلتي او اللي كانت قبيلتي واما كان عايز ايه مني فكان عايزك ... انتي !
- ايه هو ده هما ليه رابطين الانتقام منك بيا وانا مالي انا الله
- منا منا منااا قولتلك وفهمك عشان ... انتي بتبصي في ؟؟
- ايه الكهف اللي هناك ده شكله اثري وحلو  قوي ادخله والنبي
- لا
- باليز
- لااا قولت
- باليز
- لا
- باليز
- برضو لا
- ع فكره انت بوظت الافيه خالص المفروض تقول ك بعد باليز التالته
- افيه ! انتو بتقولوا كلام غريب ليه كده ليه التعقيد ده
- لا اسمالله عليك يا كوم شكاير السهوله
- انا هوريكي الكهف احسن امشي قدامي
تقدمت فرحه يليها اصف ناحيه الكهف لتجد جدارالكهف من الخارج مزخرف برموز غير مفهومه ولكنها تبدو جميله تضيف له نوع من الانبهار الخاص , دلفت فرحه الكهف وعيناها تدور بجنون في مقلتيها من فرط ما تراه من جمال وكأنه قصر من الزمرد الخالص وستائر من الحرير تتدلي من السقف الذ يبدو وكأنه جدول من المياه الجاري
لفت نظرها ما يشبه بالمائده من رخام يعلوها صندوق عتيق اتجهت اليه بهدوء تفتحه لتجد مكتوب عليه بنقش يشبه الخط العثماني " هي عصاي اتوكأ عليها "
همت فرحه بفتحه لتتفقد ما فيه فما وجدت ألا اعواد من الزعفران تتخللها وريقات من أزهار الياسمين تتوسطهم خصلة شعر وبجوارها قلاده وكأنها قطعة من حجر كريم لا مثيل له علي الأرض محفور عليها رموز غير مفهومه وكأنها لغه أخرى تجهلها ما ان وضعت يدها عليها حتي توهجت نقوش القلاده فشهقت فرحه عائده للوراء..
- انتي عملتي اييه ؟
- السلسله..  انا اناا بس كنت بشوفها
- مين قالك افتحي الصندوق ده أساسا انتي مش قولتي هتفرج ع الكهف وبس
- مش مشكلتي انك بتصدق كل حاجه بقولها طيب أعملك ايه
- يعني ايه لازم تكوني محدده وصادقه في كلامك
- لا انا مش صادقه انا فرحه اهاهاهخهخ
- ..............!!!!!!
- احم سووري ده اسمه الش رخيص
- يعني ايه الش! ؟ أنتو مصطلحاتكم مريبه
- يا سيدي ما مريب الا الشيطان م تخليك فليكسبل كده ف نفسك دانت جني قفوش قوي
- جني ولا علاء الدين اهاهاه
- ايبيه دااااه دانت بتتعلم بسرعه اهو وبقيت معانا ع الخط
- خط ولا كارت
- لااا ده القعده صغرت قوي
- عشان تحسي بيا لما تلقى نكاتك السخيفه يا فرحه
- سخيفه!  مش هرد عليك عشان انا ف بيتك بس ، الااا هو ايه الصندوق الغريب ده وخصلة شعر مين دي ؟
- أسئلتك بقت كثيره
- عندك حق هسكت خلاص
- ..........
- طيب والنقوش اللي ع السلسله دي معناها ايه
- مفيش فايده ، دي اللغه السريانيه والرموز زي ايه من القرءان بس باللغه بتاعتنا مش العربيه
- تقصد أنها نفس الايه المنقوشه على الصندوق
- "هي عصاي اتوكأ عليها "
- اهااا طب والخصله د...
- وبعدين معاكي
- خلاص خلاص
- ....
- طب...
- شششششش
- ايه في ايه ؟ بتسكتني ليه ف نص الملثم مبحبش القمع ده انا عشان...
قطع الحديث صوت مبهم يشبه صوت طائر ضخم له صدى مهيب فزعت فرحه لتجد ريح قويه فجأه هبت في المكان باقتراب الصوت لتلتف خلفها وتجد طائرا ضخما يشبه الصقر له قرنان صغيرات بارزان لونهما ابيض كان الطائر وكأنه بحجم مبني ضخم أما عيناه فلا احداق وإنما لون يشبه المجره يبعث احساس الجمال لا الخوف
فزعت فرحه وركضت نحو آصف لتختبئ خلفه
ضحك آصف ليحط الطائر أمامه ثانيا رأسه امام آصف محاولا مداعبته امتدت يد آصف لتمسح عليه محدثا إياه..
- وانا كمان اشتقتلك ، اوعي تكون لسه بتسرق بيض النورس لسه حرام ها
- غرد الطائر هاززا رأسا يمينا ويسارا أن لا فاتحا فاه لآصف وكأنه يخبرها بأن يتفقده ليتأكد
ضحك آصف مداعبا إياه.. - مصدقك مصدقك اقفل بوقك عشان معانا ضيوف
-الناس الطبيعيه بتربي عصفور سلحفه إنما أنتو هنا بتربوا... مش عارف ايه كده
-ههههه ده كورال زي عندكم م في الأساطير العنقاء يشبهلها بس الفرق انه موجود عندنا ونادر مبيخضعش لسلطة حد وملهوش مالك غير اللي يختاره هو بنفسه ومن وقت م دخلت القبيله وبرقان لاحظ أن طائر غريب بدأ يتردد على القبيله يطلق أصوات عاليه ويمشى وبيكرر نفس المشهد كل يوم لحد م تطوعت انا وخرجت أشوفه ليكون خطر ولا حاجه بمجرد خروجي الساحه لقيته فجأه هب وبقي عند ايدي تماما وعينه في عيني مقدرتش ارفع سلتحي او حتي افكر اعمل أي حركه كنت بس باصث في عنيه كأني مغيب تلقائيا مديت ايدي له لقيته استجاب وطأطأ رأسه مسحت عليها بهدوء فجأه لقيت برقان بيقولي - يبقي اختارك انت
من وقتها وهو معايا
-مبيحصلش ليه عندنا احنا كده يا ربي ، احنا اخرنا طيارات هليكوبتر تجيبلنا الطرش لما تعدي فوقينا ف الجو
... اااادي آصف هو الطائر بتاعك بيبصلي كده ليه.. لالاااا ده بيقرب حووشه حووشه والنبي اوعي يكون بيعض
-متخافيش هو بس مستغرب الهاله بتاعتك
-هو مشافش أنس قبل كده ولا اييه
-اكيد بس هالتك مختلفه في حاجه غريبه
-طبعا يابني اومال ايه رب الكون ميسنا بميسه
- ايه ؟!
- لا ولا حاجه ،يا نهاااار اسووود انا ناسيه نفسي هنا وامي تلاقيها قلبت الدنيا عليا ده هتنفخنني لما أرجع، واقولها ايه اصلا لما ارجع ،واصلا هنرجع ازاي، رجعني يا عم امي..
- بااااااس يخربيييتك يخرررربييييتك اهدي ، متقلقيش عاملين حسابنا واحده من العمار دلوقت في هيئتك ونايمه في سريرك لما مامتك هتدخل اوضتك هتلاقيكي انتي فمفيش داعي للخوف
- اه طمنتي انا كنت بس.....  اييييييييه في جن مع امي ف البيت علي هيئتي يا نهار اسوووود انت بتقول ايه !؟
- متخافيش مش هتأذيهم ولا حاجه هي معانا ومسلمه من العمار بتساعدنا مش اكتر عشام مينفعش ترجعي لاوضتك اليومين دول اديكي شوفتي دهار مش هيسيبك ف حالك ومش هيبطل يبعت شياطينه لعندك
- ثااانيه وااحدده ثاااانيييه واحده استوعب كده ، قصدك تقول اني هفضل هنا محبوسه عندكم انت عبيط صح
توهجت عينا اصف للحظه ثم اقترب من فرحه بتروي..
-متتكلميش مع الحارس بتاعك كده!
توترت فرحه عائده بضعة خطوات للخلف..
- م ممش بقولك قفوشين قوي
حال كورال بين آصف وفرحه مانعا وصول اصف اليها مغردا في وجه آصف وكأنه ينهره..
- انت بتكلمني انا كده!  ع فكره انا اللي صاحبك مش هي!!!
- طب تصدق وتؤمن بالله يا كورال انا حبيتك من اول م شوفتك ربنا يكرمك بطيره تكون بنت حلال زيك كده
- لاااااا والله
- شااايف صاحبك يا كورال شااايف عاملي فيها حارس مرمي بسلامته يكونش بكلم الحضري مثلا
- انا بقول ترجعي لاوضتك تستني دهار بنفسه بقي يجي ياخدك
- بس حاارس اييه تسلم ايده والله جابلنا كاس الامم الافريقيه رفع راس مصصصر يا كورال تعرفها ام الدنيا دي
- ضحك آصف علي أثر كلمات فرحه مما ترتب عليه ارتفاع كورال طبرا لاعلي مغردا وكأنه يشدو ليدور حول آصف وفرحه مداعبا اياهما باجنحته..
- -------
- وبعدين يا دهار هتفضل سايبه كده كتير احترامك وسط زعماء القبائل هيختفي تماما ومش هيعملولك حساب زي الاول حتته عفريت زي ده يتمرد عليك وي...
- اخررررررس ياا دااااااااسم ، متنساش ان آصف كان في يوم م الايام دراعي اليمين
- كاااان يا دهااار كاااان دلوقت خرج عن طوعك وانا دراعك اليمين اؤمرني رقبته تكون تحت رجلك ف التو واللحظه هو والانسيه اللي معاه
- غشييم يا داسم عمرك م هتكون مكانه ابدا ، آصف دلوقت تايه محتاج يرجع يفتكر مكانته ونفوذه وقوته وسطنا يفتكر هو كان اييه وهيرجع هو بنفسه يركعلي من تاني
- آصف عنييد يا دهار واستحاله برقان يسيبه بسهوله كده يرجعلنا تاني
- صحيح ، عشان كده محتاجين حد في دهاء برقان وان كان بيتملك الحكمه فاحنا ملكنا الخبث ومفيش غيرها هي اللي تنفع في المهمه دي
- اوعي تكون!!
- هي بعينها ، ابعت دنهش وطلمش يستدعوها ومتنساش القربان المحبب ليها عشان تنجز مهمتها في اسرع وقت
ابتسم داسم ابتسامه خبيثه لعلمه بما يخطط له دهار ويبدو انه قد نال اعجابه ما سيحدث
-اعتبره حصل يا دهار..  اعتبره حصل!
----------------
بينما كان يحلق كورال حول اصف وفرحه حتي اختفت ملامح البهجه من وجه اصف لترتسم علي وجهه ماتمح الوجوم عاقدا حاجبيه
-في ايه مالك اتحولت كده
-برقان بيستدعيني انا لازم اروحله فورا في القبيله الظاهر أن في حاجه حصلت!
-انت عايز تمشي وتسيبني هنا لااا طبعا مقعدش وحدي انا هنا
-انتي هنا في أمان محدش يقدر يوصلك هنا كورال معاكي كمان
-قولت لاا مش هتسيبني وحدي هنا وإلا ترجعني اوضتي
-انتي مجنونه بقولك مينفعش ترجعي اوصتك خادص الفتاه دي
-خلااص يبقى تأخذني معاك
-بس انتي هناك هتكوني معرضه للخطر أكثر
-ع الاقل هكون معاك مليش دعوه مش هقعد وحدي هنا
- هو انتي وحدك كده ولا بنات الانس كلهم كده
- الظاهر ان انا وحدي كده
هبط كورال بجوار فرحه مغردا مشيرا برأيه ناحيه الصندوق ، نظر آصف بتردد ناحية الصندوق ثم باتجاه فرحه مستوعبا ما يرمي إليه كورال لكنه عقد العزم أخيرا مستحسنا الفكره..
-طول م انتي معايا هناك مش عايزك تكلمي حد او تركزي في أي حاجه مهما كانت و..  البسي السلسله دي ومهما حصل اياكي تقلعيها
- نظرت له فرحه باندهاش لكنها ما لبست ان هزت رأسها بالموافقة هامسه في أذن كورال..
- مش بقولك حبيتك من اول م شوفتك حبيبي يا كورال
ارتدت فرحه القلاده لتتوهج لبضعة ثوان ثم تعود لتخفت مجددا..
اقترب آصف من فرحه ممسكا بيديها ليختفيا في اقل من ثوان ويظهران فجأه في منتصف ساحة كبيره مملوءه بجنود وحراس وقليل من العامه فيما يشبه بالتجمع
تقدم آصف ليشق الصفوف مخترقا التجمع ليجد الحكيم برقان جالسا علي ما يشبه بجذع شجره متكئا علي عصاه وامامه جثه علي ما يبدو انها تعود لاحد حراس القبيله
ما ان رأت فرحه المشهد حتي اشاحت بناظرها لتختبيء خلف آصف
-الحكيم برقان!
-آصف ، واضح ان دهار حب يبعتلنا رساله
-انا هحرقهم كلهم الحرب دي تخصني انا حراس بني عامر ملهمش ذنب
-متتهورش يا آصف الامر مبقاش شخصي خلاص دهار خلي الحرب ما بين قبيلتين كلنا في الحرب دي سوا دلوقت
- امتي حصل ده ؟
- سأل آصف مقتربا من جثه الحارس مضيقا عيناه ليلاحظ وشما غريبا اعلي كتفه حتي نظر للحكيم برقان ليجده مجيبا اياه..
- ايوه ده مش من عمل شيطان عادي من شياطينه واضح انه استدعاها..
تطاير الشرر من عيني اصف ليصيح بغضب مدفون..
-لااااقيييس!!!!

يتبع