هذا هو العشق 💕الحلقه 15💕

منال : قصدك خد و خد انا اديتك كل حاجه خدت ايه منك ؟

خالد : برضه البت فاكرانى عبيط ، فسح يا ختى عمر اهلك ما حلموا بيها ، هدوم و بارفانات كنت باحرم نفسى عشان اجيبهالك بالفلوس اللى بيبعتوهالى اهلى من بره و غير كده دانتى ساعات كنتى بتبقى عايزانى اكتر مانا عايزك و لا ده كان تمثيل و عدة الشغل

منال : عدة الشغل ؟ ايه الكلام ده يا خالد انا عمرى ما تصورت انك تكلمنى كده ؟ انت عارف انى محترمه و ما عملتش كده الا عشان بحبك

خالد : بتحبينى اه ، هاها ضحكتينى و الله ،اوكى حبينى وانا كمان بحبك ، يعنى نقضى وقت لطيف سوا ، نخرج سوا ، لكن تكلبشينى و تقولى لى عريس و بتاع ، مع الف سلامه و القلب داعيلك

منال : ده انت طلبت منى اتجوزك عرفى

خالد : ضحكتينى تانى ، ده انتى حتى العرفى ما كنتيش عايزاه ، عايزه تبقى براحتك ، خدى راحتك على الاخر يا ماما
و بعدين دى برضه عدة الشغل بتاعتى انتى فاكره ايه ؟
و حتى لو اتجوزتك عرفى ، عمرى ما كنت حاعمل معاكى علاقة كامله تهددينى بيها و لا تدعى انى اعتديت على الشرف المصون

منال : و انت كده ما اعتديتش على الشرف ؟

خالد :بصى باقولك ايه ، انا فايق وعارف كويس انى ما .... و اذا كان حد غيرى عمل عملته اوعى تفتكرينى انا اللى حاشيلها ماشى ؟
ردت منال و قد بدات فعلا ترثى لنفسها و تبكى بالرغم من انها كانت تسمع كل ما توقعته بالفعل

منال : بس انت فعلا اول واحد فى حياتى

خالد : انا ايش عرفنى ، انا قلت لك نخرج بالعربيه ، اوكى ، تعاليلى البيت ، قشطه يعنى ما غصبتش عليكى فى حاجه و انا برضه حبيتك و ما نكرش انك حسستينى احساس غير اى واحده تانيه عرفتها

منال : بس كده ، و بعدين انت عرفت كام واحده ، انت مش قلتلى انا اول واحده تحبها

خالد : بصى يا منال انا مش حارغى كتير ، انا برضه باحبك و ما ستغناش عنك بس موضوع الجواز ده ، انسيه ، و لو كان فيه عريس بجد يعنى ، اتفضلى اتخطبى ، و احنا برضه مع بعض زى ما حنا

منال : انت بتقول ايه ؟ ازاى يعنى اتخطب لواحد تانى و نفضل مع بعض

خالد : عشان خاطرى ما تعمليش فيها خضره الشريفه ، غصب عن عينك لما اعوزك حاتيجى ، لحد ما انا ازهق منك و اسيبك بمزاجى ، انا ما ترميش يا ماما

منال و هى تلملم نفسها و تربط ايشاربها كى تمشى :انت مجنون و انا مش حاتكلم معاك ، انسانى خالص يا خالد و لا كانك عرفتنى ، الحمد لله ان نجانى منك و انى ما كتبتش ورقه عرفى و لانيله كان زمانك ودتنى فى داهيه

خالد : احنا مش فى عصر الورق يا ختى ، احنا فى عصر البلوتوث اصبرى بس كده اوريكى حاجه اييه عجب

لم تدرى منال اين تذهب ولا الى اين تاخذها قدماها و هى تبكى فى الشارع بعد ما حدث و ظلت تسترجعه فى عقلها و كلما تذكرت غطت وجهها بيديها اكيد ماحدث كان كابوسا و ستستيقظ منه الان و استمر حوارها مع نفسها .. معقوله خالد يعمل فى كده ؟ انا اديته الامان ، استامنته على نفسى ،

معقوله !!انتي اللى غلطانه ، مين قالك تعرفى واحد لمده اسبوع و يبقى حياتك و تكذبى على اهلك عشان تخرجى معاه و تقابليه .. كل البنات بتعمل كده ، اشمعنى انا اللى حظى كده جايز عشان انتي اساسا بنت كويسه ربنا اراد يعاقبك عشان تفوقى..

اه يا رب استرها معايا يا رب انا عارفه انى ما ستهلش الستر انا اللى فضحت نفسى بس عارفه انك انت حاتستر عليا ............

و لم تشعر الا و هى تشير لاحد سيارات الاجره و تعطيه عنوان جنى صديقتها ، حبيبتها ستعترف لها بكل شىء انها لا تستطيع ان تبلغ امها او اباها ،لا يمكن ، سيخرب البيت كله ، و اخواتها ليس لهم ذنب ، سيتركون القضيه الاصليه و ينهمكون فى معرفة من فيهما اخطا فى تربيتها حتى تصبح هى هذا الكائن البشع

و عندما راتها جنى اندهشت من شكلها و بكاءها فاخذتها مباشرة الى غرفتها و اغلقت

الباب و سالتها: فيه ايه يا منال

منال : بصى يا جنى اول حاجه لازم تعرفى انى مش حاقدر اتجوز شريف اخوكى ابدا ابدا و انى جايالك النهارده بصفتك صاحبتى و اختى و ماليش غيرك
اقفى جنبى يا جنى الله يستر عرضك

جنى : انا كده قلقى زاد ، بلاش شريف يا ستى ، ده انا حتى لمت نفسى كتير بعد ما قلتلك ، حرام يعنى تسيبى واحد بتحبيه عشان واحد اغنى منه او ظروفه احسن ، حتى لو خالد مش عاجبنى كان المفروض انى اقف جنبك و اسا.....

قاطعتها منال :
اسكتى ما توسخيش لسانك بسيرته انا فى مصيبه يا جنى مصيبه بصى انا كذبت عليكى يا جنى انا كنت باقابل خالد كل يوم تقريبابس بره الجامعه فى عربيته و فى كافيهات ، و ......فى بيته بس و الله العظيم ما حصلش حاجة

و عادت منال تستدرك :
لا حصل ..حصل حاجات مكسوفه اقولها بس انا لسه انسه ، المصيبه دلوقتى انى مش عارفه اسيبه عشان ..! صورنى و انا لابسه لبس ؟؟؟؟ و قاعده معاه فى البيت ، و بنرقص مع بعض وكان بيبوسنى يعنى و .. حاجات يا جنى مش قادره احكيهالك مش عشانى انا ما ستهلش تبصيلى ، مش انك تكونى صاحبتى مش عايزه الوث انسانه جميله زيك بحاجه زى دى .. انا ما ستاهلكيش يا جنى ما استاهلش اكون صاحبتك

الى هنا و انهارت منال على ركبتيها على ارض الغرفه

فنزلت جنى الى جوارها و قد المها مااصاب صديقة عمرها و احاطتهابذراعها وهى ذاهله و غير مصدقه

منال ؟
صاحبة عمرى ؟
تكذب على و تعمل كده فى نفسها!!
و عشان مين و عشان ايه ؟

لكنها لم تواجهها باى خاطره من هذه الخواطر و لكنها قالت فى حزم

بصى يا منال اللى حصل حصل ، و انتى غلطتى و عرفتى غلطك المهم دلوقت نتصرف هوه حاطط الحاجات دى على ايه

منال باكيه :قاللى انه حاططها على كل حاجه ، ميمورى كارد بتاع الموبايل و سي دى ، و على الهارد ديسك بتاع الكومبيوتر و هوه لما شغلهولى شغله على شاشة الكومبيوتر و لما حاولت اكسره

قاللى انه عنده منه الف نسخه و انه حايفضحنى و حاينزله على النت و حاينزل معاه اسمى و اعلانات انى عايزه اعمل علاقات مع ناس خاصة انه استاذ فى الجرافيك و الكلام ده

جنى : : : : : تعالى معايا دلوقتى حالا

منال : حانروح فين انا مش عايزه اروح البيت ارجوكى
جنى : : : : تعالى بس حانروح لشهيره انا واثقه ان هى اللى حاتحلها ، دى جريمه اللى عايز يعملها دى ، و بعدين انتى ناسيه ابيه شوكت مين ، و والده مين كمان فى البلد

انصاعت منال لجنى و صعدت معها لشهيره

شهيره : انت ازاى يا منال يا مجنونه تعملى كده فى نفسك يعنى من كلامك انتى عملتى فالحه ومارضتيش توقعى الورقه العرفى اهه ربطك باللى انيل منها

منال : يعنى هوه كان عايز الورقه العرفى عشان...

شهيره : طبعا ياختى امال انتى كنت فاكراه خايف من الحرام زى ما قالك دى حاجه كان عايز يربط سعادتك بيها و وقت ما يرميكى يقطعها و خلاص

انفردت شهيره بمنال بعد ان طلبت من جنى أن تدخل لندى ابنتها حتى تلهيها عن الخروج و سماع الحوار

و التفتت لمنال :
منال هاتى عنوان الواد ده بالتفصيل و سنه اد ايه و كل حته تتوقعى انه ممكن يكون شايل فيها نسخ من التسجيلات دى ، و ممكن لو سمحتى بقه جنى مش هنا ، اعتبرينى امك و قولى لى انتى وصلتى لحد فين مع البنى ادم ده

منال : سنه عشرين سنه عشان ، و الله زى ما قلت لك يا شهيره ، انا يعنى قلت دى حاجات ماتاثرش على كونى لسه عذراء

شهيره : منال انتى لسه قاصر ما كملتيش 18 سنه لكن هوه كمل ، لو عمل فيكى حاجه انا حودى اهله كلهم فى ستين داهيه

منال : و الله ما فيش الا اللى قلته لك يا شهيره
انتى بجد ممكن تساعدينى ؟؟؟

شهيره : ربنا يسهل بس اكتبى العنوان بالتفصيل و تليفونه كمان

اتت جنى و وجدت منال قد هدات قليلا بعد ان وعدتها شهيره انها ستتصرف و قامت لتذهب لبيتها

جنى : : : : اغسلى وشك يا منال عشان ما حدش عندك فى البيت يلاحظ ، انا حالبس و اجى اوصلك بالعربيه عشان مامتك تطمن انك كنتى معايا فعلا

منال : انت عارفه يا جنى ، انت ما فيش منك اتنين فى الدنيا دى ، حساسه و طيبه و حنينه ، ربنا يخليكى لي يا حبيبتى

و كانت جنى لا تعفى نفسها من المسئوليه عما حدث لمنال ، كان يجب ان تحس بها اكثر من ذلك ، كان يجب ان تقف الى جوارها وتساندها حتى لا تكون عرضه لاشكال مثل خالد..لا وقت للندم الان ، يا رب تقدرى تعملى حاجه يا شهيره يارب

و فى نفس الوقت كان بسام يدور على السماسره و يستعلم عن اسعار العمارات القديمه فى منطقة السيده ليعرض المنزل القديم للبيع .. و فكر فى ان يمر بالشارع ليرى المنزلو هناك عرف من بعض الجيران ان المحافظه اتى مندوبوها اكثر من مره لانه يجب ازالة المنزل

لكونه خطرا بعد انهيار المنزل الملاصق له و ان قرار الازاله وقع احد سكان الشقق المؤجره باستلامه ، واخفى عنهم هذا الخبر حتى لا يتم اخلاء المنزل وذلك معناه ان المنزل ثمنه زاد حوالى عشر مرات لانه سيباع ارض فضاء بدلا من عقار مؤجر بالكامل ، واتصل بسام باحد اصدقاءه المحامين الذى اكد له انها مسألة وقت و يتم اخلاء السكان

و جرى من فوره ليخبر والدته : ماما مش حاتصدقى يا ماما اللى حصل

الام : خير يا حبيبى ، ايه اللى حصل ربنا يفرحك يا ابن عمرى يا رب

بسام : : : ماما البيت حايتباع ارض يا ماما و ثمنه حايبقى عشر اضعاف ما كنا فاكرين ده ممكن يوصل مليون جنيه يا امى

الام : اللهم لك الحمد و الشكر يا رب ، صحيح صدق الله العظيم لما قال

( و كان ابوهما صالحا ) انت ابوك كان صالح و عمره ما مد ايده على الحرام رغم انه كان فى امكانه ، عشان كده ربنا بارك فى ابنه من بعده و بقه دكتور و قمر و كمان غنى
يا حبيبى يا بنى الف مبروك

بسام : : : : مبروك علينا يا ماما انتى لازم تحجى السنه دى باذن الله ، انا و انتى حانحج مع بعض يا ماما ، مش دى امنيتك طول عمرك

الام : يا ريت يا حبيبى ، لو فضل حاجه بعد مصاريف جوازك احج بيهم

بسام : : : : انتى قبل جوازى و قبل كل حاجه فى دنيتى يا حبيبتى يا امى

و انهار يقبل يديها و هى تحتضنه و لا تستطيع منع نفسها من البكاء لقد صبرت كثيرا و جاهدت نفسها كثيرا حتى لا تبيع هذا المنزل و اكبر مبلغ عرض عليها كان عشرين الف جنيه من ثلاثة سنوات فقط لا غير .. لكن الله كان يعلم بها و باليتيم الذى تربيه و كان ارحم بهما من نفسيهما 😍