لغز وجوه بيريرا الغامضه

القصة اللي هتقروها دي من اغرب القصص اللي ممكن تقراها عن الماورائيات، تخيل كده انك تبص على بلاط شقتك تلقيه اتحول لوشوش بني ادمين مخيفة جدا؟!

بص يا سيدي القصة دي حصلت في بلدة صغيرة اسمها " بيلميز" موجودة في اسبانيا، هناك كان في البلدة الصغيرة دي يوم 23 أغسطس سنة 1970م، في بيت بسيط في شارع اسمه ( رودريجرز) كانت في ست بيت اسمها ( ماريا بيريرا) واقفه لوحدها في المطبخ بتطبخ وجبة الطعام لأسرتها الصغيرة، واثناء ما هي بتطبخ لاحظت حاجة غريبة جدا على بلاط المطبخ مشفتهاش قبل كده؟! بقعة غريبة عبارة عن وجه امرأة مرعب جدا! 

ماريا محطتش اهتمام كبير للبقعة الغريبة دي، هي جابت مسحوق عشان تنضف البلاطة اللي كان عليها البقعة لكن ده محصلش، جربت كل المساحيق عشان تشيل البقعة دي لكن ولا مسحوق حوق فيه! هنا انتابها الشك ففورا راحت ندهت على الزوج وابنها الاكبر عشان يشوفوا البقعة، جه الابن والاب وحاولوا هما كمان بالمساحيق، لكن كان في حاجة غريبة بتحصل وهي ان كل ما كانوا بيحطوا المسحوق ويحاولوا ينضفوا البلاطه اللي عليها وجه المرأة كان بيزداد وضوح اكتر من الاول وكانوا بيشوفوا كمان ان وجهها بيغضب بطريقة غريبة جدا يعني ملامح الوجه بتتغير وتكشر! الابن نزل لاقرب محل بيبيع مساحيق للتنظيف وقاله انه عايز مسحوق قوي لازالة البقع الصعبة، الراجل اداله مسحوق قوي، وبعدها روح البيت، وجرب ينضف البقعه وبرضه مكانتش بتتشال! نفس الحكاية كانت مستمرة الابن يحط المسحوق ويبدأ يدعك البلاط فهنا الوجه يكشر وبمجرد ما بيوقف دعك كان الوجه يرجع صامت بدون اي تعابير جه! وده خلى الابن يستغرب ويخاف وقال لنفسه ان الموضوع مش طبيعي خالص، بس مبينش ده للام اللي اصلا كانت خايفه، وعشان يطمنها قالها انه هيشيل البلاطة دي ويحط واحدة بدلها، عمل فعلا كده، والام خلاص اطمنت ان خلاص الموضوع انتهى، هما كانوا فاكرين انه انتهى لكن الأمر بدأ يزداد غرابة اكتر من الاول!..

يوم 8 سبتمبر من نفس السنه حصل شيء غريب جدا مكانش في الحسبان خالص؟!

اللي حصل يا سيدي ان البلاطه الجديده اللي حطها الابن ظهرت فيها نفس الوجه وكان المره دي باين عليه انه غضبان جدا من اللي عملوه! هل الأمر توقف عند هذا الحد، لأ خالص، اسمحلي اقولك التقيلة، كل بلاط الشقة اتحول لوجوه بني ادمين غاضبه جدا! وجوه أطفال وسيدات، في المطبخ بلاطه اتحول لوجوه بني ادمين، في الصاله، في الاوضه، كل بلاط الشقة ظهر فيه وجوه لبني ادمين!.. 

القصه هنا بدأت تنتشر في البلدة، والناس بدأت تتوافد عشان يشوفوا الوجوه الغريبة اللي بتظهر ع بلاط الشقة! 

وعايز اقولكم كمان الوجوه كان بيحصلها تغيرات يعني مره تكون وجه لامراه ومره تكون وجه لطفل ومره تكون وجه لراجل بلحية!  وده حول حياة الأسرة لجحيم بالمعنى الحرفي! عايزك تتخيل الموضوع انك تلاقي وش بني آدم مطبوع على بلاط شقتك مش هتكون حاجة لطيفة خالص!.. 

وعايزك تتخيل اكتر انك تروح تجيب كل المساحيق اللي موجوده عند محل المنظفات الصناعية ويبدأ اهل بيتك يحاولوا انهم يشيلوا البقع الغريبة دي، فبدل ما تتشال، تظهر بشكل أوضح، ويتحول الوجه ده لوجه بني ادم بيصرخ بكل غضب في إعلان واضح ان اللي بتعملوه ده خلاه يغضب عليك! هو ده اللي كان بظبط بيحصل من الأسرة المسكينة أبطال حكايتنا!... 

لما الموضوع خلاص انتشر واخد شهرة اكبر السلطات في إسبانيا قالت ان الموضوع مجرد خدعة من الأهل لجذب الانتباه ليهم عشان يعني يكتسبوا شهرة اكبر ويستغلوها في أمور مادية! واللي خلهم يقولوا كده ان ابن الاسرة دي كان فنان بيرسم وممكن جدا بطريقة ما هو اللي كان بيعمل الخدعة دي!.. 

في مجموعة من الباحثين في الماورائيات جم للمكان عشان يعملوا تحقيقات ويكتشفوا حقيقة الأمر، وواحد من الباحثين دول هو البروفيسور ( جيرمان) وكان معاه كمان البروفيسور ( هانز بندر)  دول ناس تقيلة في الماورائيات مش اي حد يعني، وكان في اكتر من باحث جوه البيت بيعملوا مجموعة من الاختبارات عشان يعرفوا الحقيقة فين، المهم هما قفلوا البيت لمدة 3 شهور و خلالهم اكتشفوا ان الوجوه ما زالت موجودة مع اختلاف خلاهم  يندهشوا؟! الوجوه دي انتقلت كلها وغيرت اماكنها! يعني بدل ما كانت في كل الشقة بقيت في مكان واحد بس!.. وده اثار دهشتهم جدا... 

فضلوا الباحثين يعملوا فحوصات كتير على ماهية الوجوه دي، كل الفحوصات والاختبارات دي فشلت انها تعرف الحقيقة! هما جابوا مختصين من اكتر من جامعه في اوروبا عشان يعرفوا يعني هل البقعة دي فيها مواد كيميائية زي ( الطلاء، الكلوريدات، النترات، الفضة، الملح... وغيرها) وملقيوش اي مواد كميائية! استمروا في اختباراتهم وعملوا مجموعة تانيه من الاختبارات ومنها ب ( الاشعة السينية وصور فوق البنفسجية و أشعة فوق حمراء.. وغيرها) كانوا عايزين يكشفوز عن أي مواد عضوية ساهمت بتشكل الرسوم الغريبة دي... لكن ده زادهم تيقن أن الرسومات دي غريبة فعلا ومفهاش اى خدعة!... 

وبعد ما يئس الباحثين من تجاربهم الكتير عشان يفهموا الأمر راحوا  بقى عملوا الاختبار الاخير اللي زاد الأمر غرابة ورعب اكتر للقصة، يعني اللي فات حمادة واللي جاي حمادة تاني خالص😂

اللي حصل يا سيدي انهم قرروا يثبتوا مجموعة من  الميكروفونات فى الشقة عشان تلطقت اي صوت الأذن البشرية متقدرش تسمعوا ، واللي مكانوش متوقعينو حصل! رصدوا مجموعة من الاصوات الغريبة! كانت بعض الأصوات دي لنساء ورجال! واطفال بيصوتوا! أصوات بتصرخ وتعيط واصوات اهات حزينة! وغير كمان اصوات تانية لهمهمات لعبرات مش مفهومة، ووسط العبارات الغير مفهومة قدروا يفهموا كام عبارة؟ وكانت العبارات دي هي:

 الجحيم يبدأ من هنا

 إنها لا تزال مدفونة

 ماريا أريد أن أذهب

 إنهم جميعا هنا

 إنهم جميعا أموات

 أمييييييي

 نحن نعاني

العبارات كانت مخيفة جدا لناس بتتألم وبتقولها وسط ما هي بتبكي كأنهم بيتعذبوا في المكان اللي محبوسين فيه!

هنا طلب المحقق ( بيرو أمورس) من ( ماريا) انها تتكلم بصوت عالي وتسأل الاصوات دي عن سبب مجيئهم إلى بيتها؟! سألتهم فعلا وجاوبوا عليها بعبارة تم التقاطها وكانت هي: " انه بسبب سوء المعاملة!" 

المحقق ( بيرو أمورس) طلب انه يحصل حفر في ارضية البيت لانه كان واثق ان في شيء غريب تحت أرضية البيت ده! تم حفر 2,8 متر تحت أرضية البيت، بالاضافة كمان انه اتحفر كمان في بيت حد من الجيران اللي اتضح انه هو كمان بيحصله نفس الأمر الغريب، بيظهر برضه في بلاط البيت وجوه لوجوه غضبانة، ولما تم الحفر تم اكتشاف المفاجئة المرعبة؟! تم العثور على هياكل بشرية مدفونة تحت البيت! وكمان الادهى ان بعد فحص الهياكل تم الوقوف على سبب الوفاة اللي كان ما بين الهياكل دي لمرهقين ماتوا اثر التعذيب وقطع للرؤوس لأسباب مش معروفة! ومع البحث والتحقيق في القضية الغريبة دي اتضح ان البيت ده سابقا كان عبارة عن مقبرة بنيت في القرن الـ13 وكانت المقبرة دي في الاول مقبرة رومانية وبعدها اتحولت لمقبرة إسلامية واخيرا لمقبرة مسيحية!... 

طب ايه اللي خلى الوجوه دي تظهر في الوقت ده بالذات مع أن يعني المقبرة قديمة جدا والبيت مبني من سنين كتير فوقيها ومحصلش اي حاجه؟ هقولك يا سيدي أن في مكان قريب من المنزلين اللي حصلوا فيها الظاهرة دي كان في كنيسة بيحصل فيها تجديدات، يعني من حفر بقى وهدم لاماكن وبناء احدث وكده، ده خلى الاموات اللي تحت ينزعجوا فبقوا يظهروا بالطريقة دي للفت الانتباه عشان يوقفوا عمليات التجديد اللي بتحصل في الكنيسة ويسبوهم يرقدوا في سلام!... 

الوجوه مبقتش تظهر تاني على البلاط بعد ما تم نقل هياكل الموتى ودفنها في مقابر جماعية، وبعد سنين كتير وبالتحديد سنك 2004 ماتت ماريا بيريرا عن عمر يناهز 85 سنة وتم وضع البيت للبيع.. لكن محدش استجرأ انه يطلب يشتري البيت لان طبيعي بعد ما تعرف ان بيتك كان سابقا مقبرة لدفن الموتى مستحيل تفكر تسكن فيه لليلة واحدة!...

القصة دي من أشهر واغرب القصص الماورائية في أوروبا كلها ، ومحدش لحد الان قدر يجيب تفسير منطقي للوجوه الغريبة اللي كانت بتظهر ع البلاط، واللي كشفت عن مقبرة للموتى بعد كده!...

محمد_مهني

لغز_وجوه_بيريرا_الغامضة